မြန်မာနှင့် လာဘ်ပေးလာဘ်ယူ

ဟိန်းမင်း၊ စန္ဒီနွယ်နှင့် ကိုလင်း ကြာသပတေးနေ့၊ မတ်လ ၃၁ ရက် ၂၀၁၁ ခုနှစ် ၁၉ နာရီ ၁၆ မိနစ် .

တီးတိုးငွေကြေးများ အပိုင်း (၁)

၂ဝ၁ဝခုနှစ်အတွက်နိုင်ငံပေါင်း၁၇၆ နိုင်ငံ၏ အဂတိလိုက်စားမှုအဆင့်စီပီအိုင်CPI-Corruption PerceptionsIndex2010 ကိုTransparencyInternationalအဖွဲ့ကထုတ်ပြန်ခဲ့ရာမြန်မာနိုင်ငံသည် ဒုတိယအဆိုးဝါးဆုံး နေရာတွင် ရှိနေသည်။

ယခုနှစ်ပိုင်းအတွင်းကမ္ဘာသိသင်္ဘောပြန်ပေးအဖွဲ့များ သောင်းကျန်းရာ ဆိုမာလီ နိုင်ငံကို အဂတိလိုက်စားမှု အဆိုးရွားဆုံးနိုင်ငံဟုTransparencyInternationalကသတ်မှတ်ပြီးအိုစမာဘင်လာဒင်၏ တာလီဘန်တပ်များ ခိုအောင်းရာဟု အမေရိကန် ယူဆထားသည့် အာဖဂန်နစ္စတန်နှင့် မြန်မာနိုင်ငံကို ဒုတိယအဆိုးရွားဆုံးဟု ပူးတွဲသတ်မှတ်သည်။

မတ်-၂၅ ရက်နေ့က နေပြည်တော်စစ်ရုံးတွင် ပြုလုပ်သည့် နအဖ နှုတ်ဆက်ပွဲတွင် စစ်ခေါင်းဆောင် ဗိုလ်ချုပ်မှူးကြီးသန်းရွှေက မြန်မာနိုင်ငံသည် ဒေသတွင်း နိုင်ငံများဖြစ်သည့် လာအိုနှင့် ကမ္ဘောဒီးယားတို့ထက်ပင် နိမ့်ကျနေကြောင်း အာဏာရှင် သက်တမ်းတလျှောက် ပထမဆုံးအကြိမ် ဝန်ခံသွားခဲ့ပြီး အစိုးရသစ်ကို အဂတိလိုက်စားမှု တိုက်ဖျက်ရန် ညွှန်ကြားပြောဆိုခဲ့သည်။

အသွင်ပြောင်း အစိုးရသစ်ကို အာဏာသိမ်း စစ်အုပ်စု ခေါင်းဆောင်၏ နောက်ဆုံး တရားဝင် ပြောဆိုမှုမှာ လူရယ်စရာ ပျက်လုံးတခုသဖွယ် ဖြစ်နေသော်လည်း အဂတိလိုက်စားမှုနှင့် လည်ပတ်နေခဲ့သည့် အုပ်ချုပ်ရေးစနစ်ဒဏ်ကို လူထု အမှန်တကယ် ခံစားနေရသည်မှာ ရာစုနှစ် တဝက်နီးပါး ကြာမြင့်ပြီဖြစ်သည်။

စနစ်ပျက် ခေတ်ပျက်တွင် အာဏာစက်ဖြင့် ခေါင်းပုံဖြတ်ခြင်း၊ မွေးဖွားခြင်းမှ သေဆုံးသည်အထိ လူမှုကိစ္စများကို လာဘ်ပေး အောက်ကျို့ရခြင်း၊ သာမာန် ပြည်သူ့ရပိုင်ခွင့်များကို ငွေပေးဝယ်နေရခြင်း တို့နှင့် ပတ်သတ်၍ လူထုတွင် ခံစားမှု ဇာတ်လမ်းအဖြစ်အပျက် များစွာ ရှိနေသည်။

ကဏ္ဍအမျိုးမျိုးတွင် လူထုက ပေးနေရသည့် အဂတိလိုက်စားငွေများ၊ တရားမဝင် တီးတိုးပေးရသည့် “တီးတိုးငွေကြေးများ” နှင့်ပတ်သတ်သည့် ဖြစ်ရပ်များကို မဇ္ဈိမက စီစဉ် ဖော်ပြပေးလိုက်ပါသည်။

မှတ်ပုံတင်နဲ့ တီးတိုးငွေ

မဇာဇာတစ်ယောက် အခုချိန်ထိ အသက်(၁၂)နှစ်ပြည့် နိုင်ငံသားစိစစ်ရေးကတ်နဲ့ပဲ။ သူမအသက်က အခု ၂၇-၂၈ ဝန်းကျင် ရှိနေပြီ။ ဘာလို့ (၁၂)ပြည့် နိုင်ငံသားစိစစ်ရေးကတ်ပြားပဲ ကိုင်ထားရလဲလို့ မေးကြည့်မိတော့-

“အခုထိကိုကတ်မလဲရသေးဘူး။ ပိုက်ဆံမတတ်နိုင်လို့။ ဒီ ၁၂နှစ်ပြည့်က ဟိုးမူလတန်းကျောင်းတက်တုန်းက ကျောင်းမှာ လာလုပ်ပေးကြလို့၊ ပိုက်ဆံမပေးရလို့ လုပ်ဖြစ်သွားတာ။ အခုမှတ်ပုံတင်လုပ်ရင် မကုန်ဘူးဆိုတောင် အနည်းဆုံး တစ်သောင်းတစ်သောင်းခွဲလောက် ကုန်တယ်။”

တရားဝင် သတ်မှတ်ထားတာ မဟုတ်ပေမယ့် တီးတိုးငွေကြေးကို မတတ်နိုင်တဲ့အတွက် သူ့မှာ မှတ်ပုံတင်မရ ဖြစ်နေတဲ့ အနေအထားပါ။

“ကိုယ်က အခုအိမ်ထောင်သည်လည်း ဖြစ်နေတယ်။ ကလေးကလည်း မူကြိုအရွယ်၊ ယောက်ျားက ၃၄ ဘတ်စ်ကားလိုင်းက စပယ်ယာဆိုတော့ ဝင်ငွေက ထမင်းစားရရုံပဲ။ ဘယ်လိုမှလက်ထဲ တစ်သောင်း-တစ်သောင်းခွဲ မစုမိဘူးလေ။ အဲဒါကြောင့်မို့ မလုပ်ဖြစ်တာ” လို့ ပြောပါတယ်။

လူမျိုးခြား ဖြစ်ပေမယ့် တီးတိုးငွေကြေး ပေးနိုင်လို့ နိုင်ငံသားစိစစ်ရေးကတ် ရသွားသူက ကိုထွန်းထွန်းပါ။ သူက-

“ကျနော့်အစ်ကိုက အခုမလေးရှားကနေခေါ်နေပြီ။ အခု ကျနော့်အသက် (၁၉)နှစ်ရှိပြီ။ နိုင်ငံခြားသွားဖို့ ပတ်စပို့တ် လျှောက်မှာမို့လို့ မှတ်ပုံတင် အမြန်လုပ်ပေးဖို့ လ.ဝ.က (လူဝင်မှုကြီးကြပ်ရေး) ဝန်ထမ်းတစ်ယောက်ကို သွားမေးတာ။ ခြောက်သောင်းလောက် ကျမယ်လို့ပြောတယ်။ လူမျိုးခြားမို့ နဲနဲပိုခက်တယ်လို့ ပြောတယ်။ ကျနော်လည်း အမြန်လိုနေတာရယ် အိမ်ကလည်း လုပ်လိုက်ပါတော့လို့ ပြောတော့ လုပ်လိုက်တယ်။”

“လက်ဗွေနှိပ်တဲ့ တချိန်ပဲ သွားလိုက်ရတယ်။ ကျန်တာအကုန် သူတို့လုပ်ပေးတယ်။ အကိုတုန်းကတော့ နှစ်သောင်းပဲ ပေးရတယ်။” လို့ပြောတဲ့ ကိုထွန်းထွန်းက ပေါက်ဈေးထက် ပိုပေးခဲ့ရလို့ မခံချိ မခံသာ ဖြစ်ဟန် တွေ့ရပါတယ်။

တီးတိုးငွေ မပေးရပဲ လုပ်ပိုင်ခွင့်ကြောင့် အလွယ်တကူ နိ်ုင်ငံသားစိစစ်ရေးကတ်ရခဲ့တဲ့ သူ အမျိုးသမီးတဦးကလည်း အခုလို ပြောပါသေးတယ်။

“ကျမတုန်းက ၃ရက်နဲ့ ကတ်ပြားရတယ်။ စုစုပေါင်းပိုက်ဆံ သုံးထောင် ဝန်းကျင်လောက်ပဲ ကုန်သွားတယ်နဲ့ တူတယ်။ သိပ်တောင်မမှတ်မိချင်ဘူး။ ဘာလို့လဲဆိုတော့ ကျွန်မဦးလေးက လ.ဝ.က ဝန်ထမ်းလေ။”

တရားဝင်သတ်မှတ်ထားတဲ့ နည်းလမ်းအတိုင်းဆိုရင် ငွေကုန်ကြေးကျ မများတဲ့အကြောင်း မမေမိုးက ရှင်းပြပါတယ်။

“ကတ်ပြားလုပ်မယ်ဆိုတော့ ပထဆုံး သူတို့ဆီက ဖောင်ဝယ်ရတယ်။ အဲဒီဖောင်က ရ.ယ.က ရုံးတွေမှာလဲ ရှိတယ်။ တချို့က ၂ဝဝ နဲ့ ရောင်းတယ်။ တချို့က ၃ဝဝ ။ ခုနောက်ပိုင်းတော့ တထောင်လောက်နဲ့ ပြန်ရောင်းတယ်လို့ကြားတယ်။

ကျမက အဲတာကို ဝယ်ပြီးတော့ဖြည့်၊ ဦးလေးနဲ့ ရုံးလိုက်သွား၊ ချက်ချင်းပဲ လက်ဗွေနှိပ်။ နောက်နေ့ သွေးအမျိုးအစားစစ်ပြီး သွားပေး။ ၃ရက်မြောက်နေ့ ကျတော့ ကတ်ပြားကျလာရော။” ဆိုပြီး မတူကွဲပြားတဲ့ သူမနိုင်ငံသားစီစစ်ရေးကတ်ပြား ရရှိပုံကို ပြောပြပါတယ်။

လူဝင်မှုကြီးကြပ်ရေးနှင့် ပြည့်သူ့အင်အားဝန်ကြီးဌာန မှ တရားဝင် ထုတ်ပြန်ထားသည့် နိုင်ငံသားစိစစ်ရေးကတ် လျှောက်ထားရန် လိုအပ်ချက် ၇ ချက်သာ ရှိသည်။ ယင်းတို့မှာ-

(၁) ကာယကံရှင် ကိုယ်တိုင်လျှောက်ရမည်။

(၂)လျှောက်ထားသူအမည်ပါ အိမ်တောင်စုလူဦးရေစာရင်း(သန်းခေါင်စာရင်း) မူရင်းနှင့် မိတ္တူ တစုံ။

(၃)လျှောက်လွှာနှင့် ရပ်ကွက်အတွင်းနေထိုင်ကြောင်း (ရယက)ထောက်ခံချက်မူရင်း။

(၄)မိဘနှစ်ပါး၏ နိုင်ငံသား/အမျိုးသားမှတ်ပုံတင်လက်မှတ်မူရင်းနှင့် မိတ္တူ တစောင်စီ။

(၅)မွေးစာရင်း (သို့) ကျောင်းထောက်ခံချက် မူရင်းနှင့်မိတ်တူ။

(၆)သွေးစစ်ချက်

(၇) (ဝ.၈)လက်မ x (ဝ.၈)လက်မအရွယ် ဓာတ်ပုံ (၄)ပုံ (မျက်မှန်မပါ)။ စသည်တို့ ဖြစ်သည်။

ထို့အတူ "နိုင်ငံသားစိစစ်ရေးကတ်ပြုလုပ်ရာတွင် စာရွက်စာတမ်းကြေးအဖြစ် တစ်ဦးလျှင် (၆)ကျပ်နှုန်းဖြင့်ကောက်ယူရမည်။ ပျောက်ဆုံးပြီး အသစ်ထပ်မံပြုလုပ်ပါက တစ်ဦးလျှင် ၁ဝ ကျပ်နှုန်းသာကောက်ယူရမည်ဖြစ်သည်။ မှတ်ချက်-အိမ်ထောင်စုစာရင်း ပြုလုပ်ရာတွင် မည်သည့်အခကြေးငွေမှ ပေးဆောင်ရန်မလို" ဟု ဖော်ပြထားသည်။

နိုင်ငံရေးအကျဉ်းသားလွှတ်ပေးမည်ဟုအတိုက်အခံမျှော်လင့်

ဖနိဒါ ကြာသပတေးနေ့၊ မတ်လ ၃၁ ရက် ၂၀၁၁ ခုနှစ် ၁၈ နာရီ ၅၅ မိနစ် .

ချင်းမိုင်(မဇ္စျိမ)။ ။လွတ်ငြိမ်းချမ်းသာခွင့်နှင့်ပတ်သက်၍တစွန်းတစမျှသမ္မတဦးသိန်းစိန်က ထည့်သွင်းပြောကြားခြင်း မရှိသော်လည်း နိုင်ငံရေးအကျဉ်းသားများကို လွှတ်ပေးလိမ့်မည်ဟု အတိုက်အခံများက မျှော်လင့်နေကြသည်။

အစိုးရသစ် ပြောင်းလဲချိန်တိုင်း နိုင်ငံရေး အကျဉ်းသားများကို လွှတ်ပေးလေ့ရှိသည်ကို အခြေတည်ကာ မျှော်လင့်နေကြခြင်း ဖြစ်သည်။

“ကျနော့်အတွေ့အကြုံအရဆိုရင် တော်လှန်ရေးကောင်စီတက်တဲ့ ၁၉၆၂ ခုနှစ်မှာ၊ ၁၉၇၄ မဆလ အစိုးရ ဖွဲ့တယ်။ နောက်ပြီးတော့ ၈၈ မှာ နဝတ အစိုးရတက်တယ်။ ၉၇ မှာ နအဖ ဖြစ်တယ်။ အဲဒီလို အပြောင်းအလဲဖြစ်တိုင်းမှာ သူတို့က အထွေထွေလွတ်ငြိမ်းချမ်းသာခွင့် လုပ်လေ့လုပ်ထ ရှိတယ်”ဟု အမျိုးသားဒီမိုကရေစီအဖွဲ့ချုပ် NLD ရုံးအဖွဲ့ဝင် ဦးဝင်းထိန်က မဇ္ဈိမကို ပြောသည်။

“ဒီအစိုးရသစ်တခု စပြီးတည်ထောင်ပြီဆိုရင် ဒီကိစ္စကို ရှင်းရမယ့် တာဝန်ရှိတယ်။ အဲဒီအကျဉ်းသားနဲ့ ပတ်သက်လို့ ဖြစ်ပေါ်နေတဲ့ ပြဿနာတွေကို ဖြေရှင်းရမယ့် တာဝန်ရှိတယ်။ ဒါကို မဖော်ပြဘူးဆိုတာတော့ သူတို့ရဲ့ ချို့ယွင်းချက်ပေါ့”ဟု နိုင်ငံခြားသတင်းဌာနများသို့ သတင်းမှားများ ပေးပို့သည်ဟု စွပ်စွဲခံရကာ ထောင်ထဲ၌ ၂၂ နှစ်ကြာ နေခဲ့ရသော နိုင်ငံရေး အကျဉ်းသားဟောင်းလည်းဖြစ်သည့် သူက ပြောသည်။

ဧပြီလနှင့်မေလအတွင်းနိုင်ငံရေးအကျဉ်းသားများလွတ်ငြိမ်းချမ်းသာခွင့်ရရှိမည်ဟုလည်း ခန့်မှန်းလိုက်သည်။

ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (မြန်မာနိုင်ငံ)AAPP၏ အတွင်းရေးမှူး ကိုတိတ်နိုင်ကမူ သမ္မတသစ်သည်လည်း အတိုက်အခံများအပေါ် အာဃာတရှိနေသည်ဟု တွက်ဆထားသည်။

“ဒါကနိုင်ငံရေး အကျဉ်းသားတွေကို ရန်သူလိုထားတယ်။ အာဃာတ ကြီးကြီးထားတယ်ဆိုတာက အင်မတန် ပေါ်လွင်ပါတယ်။ ကျနော်တို့အမြင်တာတော့ နဂိုကတည်းကလည်း နိုင်ငံရေးအကျဉ်းသား အားလုံးကို လွှတ်ပေးလိမ့်မယ် မဟုတ်ဘူး။ လွှတ်ပေးရင်တောင် အကန့်အသတ်အနေနဲ့ လွှတ်ပေးလိမ့်မယ်လို့ တွက်ဆထားပါတယ်” ဟု သူက မဇ္စျိမကို ပြောသည်။

အကျဉ်းဦးစီးဌာနနှင့်နီးစပ်သောသတင်းရပ်ကွက်တခုကအစိုးရသစ်အနေဖြင့်မျက်နှာလှရန် လွတ်ငြိမ်းချမ်းသာခွင့် ကြေညာရေး အကျဉ်းသားစာရင်း ပြုစုမှုများ ပြုလုပ်နေသည်ဟု ဆိုသည်။

မြန်မာနိုင်ငံဆိုင်ရာ ကုလသမဂ္ဂ၏ လူ့အခွင့်အရေး အထူးကိုယ်စားလှယ် တောမတ် အိုဟေး ကင်တားနား TomasOjeaQuintana က နိုင်ငံရေး အကျဉ်းသားများကို အမြန်ဆုံး ပြန်လွှတ်ပေးရန် ပြီးခဲ့သည့် မတ်လ ၂၄ ရက်နေ့တွင် တောင်းဆိုခဲ့သည်။

ယခုလ၂၂ရက်နေ့၊ ပြည်သူ့လွှတ်တော် ၁၃ ရက်မြောက် အစည်းအဝေး၌ ကျားဖြူပါတီမှ လင်းခေးမဲဆန္ဒနယ် ပြည်သူ့လွှတ်တော် ကိုယ်စားလှယ် ဦးစိုင်းလှကျော်က လွတ်ငြိမ်းချမ်းသာခွင့်အတွက် ခြွင်းချက်မရှိဘဲ လွှတ်ပေးရေးနှင့် ပတ်သက်သည့် မေးခွန်းအပေါ် ထိုစဉ်က ပြည်ထဲရေးဝန်ကြီး ဦးမောင်ဦးက သမ္မတသစ် တာဝန်ယူချိန်တွင် ဆောင်ရွက်ရမည့်ကိစ္စဟု ဖြေဆိုခဲ့သည်။

အမျိုးသားဒီမိုကရေစီအင်အားစု NDFပါတီက ပထမအကြိမ် လွှတ်တော် အစည်းအဝေး၌ အစိုးရသစ်က လွတ်ငြိမ်းချမ်းသာခွင့် အမိန့်ကို ထုတ်ပြန်ရေး ဦးစားပေးတင်ပြရန် ရည်ရွယ်ခဲ့သော်လည်း တင်သွင်းခွင့်ပင် မရခဲ့ကြောင်း ပြည်သူ့လွှတ်တော်ကိုယ်စားလှယ် ဦးခိုင်မောင်ရည်က ပြောသည်။

တိုင်းရင်းသားလူမျိုးများသူရဲကောင်းဆုဦးခွန်ထွန်းဦးပထမဆုံးရ

မျိုးသန့် ကြာသပတေးနေ့၊ မတ်လ ၃၁ ရက် ၂၀၁၁ ခုနှစ် ၁၇ နာရီ ၄၄ မိနစ် .

ချင်းမိုင်(မဇ္ဈိမ)။ ။လွှတ်တော်ပြင်ပ အတိုက်အခံများ စုပေါင်းအဖွဲ့တခုဖြစ်သည့် ညီညွတ်သော တိုင်းရင်းသား လူမျိုးများ မဟာမိတ်အဖွဲ့-UNAမှပထမဆုံးအကြိမ်ချီးမြှင့်သည့် တိုင်းရင်းသားလူမျိုးများ၏ သူရဲကောင်းဆုကို နိုင်ငံတော်ပုန်ကန်မှုဖြင့်ထောင်ဒဏ်၉၃နှစ်ကျခံနေရသည့် ပူတာအိုထောင်မှ ရှမ်းတိုင်းရင်းသားခေါင်းဆောင် ဦးခွန်ထွန်းဦးမှ ရရှိခဲ့သည်။

ရန်ကုန်မြို့ ကိုးမိုင်ရှိ အသက် ၆၆ နှစ်ရှိ ဦးခွန်ထွန်းဦး၏ နေအိမ်တွင် ဗုဒ္ဓဟူးနေ့ နံနက် ၉ နာရီက ကျင်းပခဲ့ခြင်းဖြစ်ပြီး ဆုပေးပွဲသို့ တိုင်းရင်းသားခေါင်းဆောင်များနှင့် အမျိုးသား ဒီမိုကရေစီ အဖွဲ့ချုပ်မှ ခေါင်းဆောင်များလည်း တက်ရောက်ခဲ့ကြသည်။ UNAမှချီးမြှင့်သည့် ဂုဏ်ပြုမှတ်တမ်းလွှာကို ဦးခွန်ထွန်းဦး၏ ဇနီး ဒေါ်ဝေဝေလွင်က လက်ခံရယူခဲ့သည်။

“သူက အမျိုးသား ပြန်လည် သင့်မြတ်ရေး၊ တိုင်းရင်းသား စည်းလုံးညီညွှတ်ရေး၊ တိုင်းရင်းသားတွေနဲ့လည်း တကယ်ပူးပေါင်း ဆောင်ရွက်ခဲ့တယ်၊ ဒီမိုကရေစီ အင်အားစုတွေနဲ့လည်း ပူးပေါင်း ဆောင်ရွက်ခဲ့တယ်” ဟုUNA အဖွဲ့ဝင်တဦးဖြစ်သူ ဦးအေးသာအောင်က ပြောသည်။

၂ဝ၁ဝ ခုနှစ်တွင် ဖျက်သိမ်းခံရသည့် ရှမ်းအမျိုးသား ဒီမိုကရေစီ အဖွဲ့ချုပ်၏ ဥက္ကဋ္ဌမှာ ရှမ်းလူမျိုး အတိုက်အခံများကို စုစည်းပေးမည့် ရှမ်းပြည်အတိုင်ပင်ခံ ကောင်စီဖွဲ့စည်းခြင်းကြောင့် ၂ဝဝ၅ ခုနှစ် နိုဝင်ဘာလအတွင်းက အခြားခေါင်းဆောင် ၇ ဦးနှင့် အတူ ထောင်ချခံရသည်။ ယင်းတို့အနက် ရှမ်းပြည်တပ်မတော်-မြောက်ပိုင်းမှဗိုလ်ချုပ်ဆေထဲ့င်ဆိုလျှင်ထောင်ဒဏ်၁ဝ၆နှစ်ဖြင့် ခန္ဓီးအကျဉ်းထောင်တွင် ရှိနေသည်။

လွှတ်တော်အတွင်း ကြိုးပမ်းမှုများအဖြစ် နိုင်ငံရေး အကျဉ်းသာများ လွှတ်ပေးရေးရန် ရှိ/မရှိကို ရှမ်းတိုင်းရင်းသားများ ဒီမိုကရက်တစ်ပါတီမှ လွှတ်တော်အမတ် ဦးစိုင်းလှကျော်က လွှတ်တော်တွင် မတ်လ တတိယပတ်အတွင်း မေးမြန်းမှု ပြုလုပ်ခဲ့သေးသည်။

ယင်း၏အမေးကို ပြည်ထဲရေးဝန်ကြီး ဦးမောင်ဦးက ပြန်လည်ဖြေကြားရာတွင် နိုင်ငံတော် သမ္မတနှင့် အမျိုးသား ကာကွယ်ရေးနှင့် လုံခြုံရေးကောင်စီ၏ အပေါ်တွင် မူတည်သည်ဟု ပြန်ဖြေကြားခဲ့သည်။

နေပြည်တော် ပြည်ထောင်စုခန်းမတွင် ဗုဒ္ဓဟူးနေ့ကကျင်းပသည့် ကျမ်းကျိန်ပွဲအပြီး သမ္မတဦးသိန်းစိန်မှ မိန့်ခွန်းပြောကြားရာတွင် တိုင်းရင်းသား စည်းလုံးညီညွှတ်ရေးအတွက် စားပွဲဝိုင်းတွင် ထိုင်ဆွေးနွေးရုံနှင့်မပြီးဘဲ တိုင်းရင်းသားဒေသများသို့ ကူးလူးဆက်ဆံမှုများမှ စည်းလုံးညီညွှတ်မှု ရလာနိုင်သည်ဟု ဆိုသည်။

တိုင်းရင်းသား ခေါင်းဆောင်များ အပါအဝင် နိုင်ငံရေး အကျဉ်းသားများနှင့် ပတ်သက်၍ကား ထည့်သွင်း ပြောကြားခဲ့ခြင်းမရှိပေ။

မြန်မာနိုင်ငံ၏ အကျဉ်းထောင်များတွင် တိုင်းရင်းသား ၃၂၄ ယောက်အပါအဝင် နိုင်ငံရေး အကျဉ်းသားစုစုပေါင်း ၂ဝ၇၆ ဦး ရှိသည်ဟု ပြည်ပရှိ နိုင်ငံရေး အကျဉ်းသားများ စောင့်ရှောက်ရေး မြန်မာနိုင်ငံ၏ ယခုလထုတ် စာရင်းများအရ သိရသည်။

အစိုးရသစ်အနေဖြင့် နိုင်ငံရေးအကျဉ်းသားများကို လွှတ်ပေးမည်ဟု မမျှော်လင့်သူကတော့ ပြည်သူ့လွှတ်တော် ကိုယ်စားပြုကော်မတီ CRPP ၏ အတွင်းရေးမှူး ဦးအေးသာအောင်ဖြစ်သည်။

“အမျိုးသား ပြန်လည်သင့်မြတ်ရေးကို တည်ဆောက်မယ်ဆိုရင် နိုင်ငံရေး အကျဉ်းသား အားလုံးကို လွှတ်ပေးရမယ်၊ ပြည်တွင်း ငြိမ်းချမ်းရေးအတွက် လက်နက်ကိုင် အဖွဲ့အစည်းတွေနဲ့ တွေ့ဆုံဆွေးနွေးဖို့ လိုမယ်၊ ဒီအလုပ်တွေကိုတော့ သူတို့ လုပ်နိုင်လိမ့်မယ်လို့ လုပ်လိမ့်မယ်လို့ အန်ကယ်တို့ မျှော်လင့်မထားဘူး” ဟု ဦးအေးသာအောင်က ပြောသည်။

သို့သော်လည်း ရှမ်းတိုင်းရင်းသားများ ဒီမိုကရက်တစ်ပါတီမှ ပြည်သူ့လွှတ်တော်အမတ် ဦးစိုင်းဆောင်ဆီကတော့ နိုင်ငံရေးအကျဉ်းသားများလွတ်မြောက်လာမည်ဟု မျှော်လင့်နေသည်။

အကျဉ်းဦးစီးဌာနနှင့် နီးစပ်သော သတင်းရပ်ကွက်တခုကတော့ အစိုးရသစ်အနေဖြင့် မျက်နှာလှရန် လွတ်ငြိမ်းချမ်းသာခွင့် ကြေညာရေး အကျဉ်းသားစာရင်း ပြုစုမှုများ ပြုလုပ်နေသည်ဟုဆိုသည်။ သို့သော် နိုင်ငံရေးအကျဉ်းသားများကို ထည့်သွင်းစဉ်းစားခြင်း ပြုမည် မပြုမည်ကို ယတိပြတ် မပြောနိုင်ဘဲရှိနေသည်။

UNAမှချီးမြှင့်သည့်သူရဲကောင်းဆုကိုနှစ်စဉ်ချီးမြှင့်မည်မဟုတ်ဘဲထင်ရှားသည့် မြန်မာ့နိုင်ငံရေးခေါင်းဆောင်၊ကိုယ်ကျိုးစွန့်အနစ်နာခံခြင်း၊လွှတ်တော်ကိုယ်စားလှယ် နိုင်ငံရေးအကျဉ်းသားဖြစ်ခြင်း စသည့် အရည်အချင်းများနှင့် ပြည်စုံသည့် နိုင်ငံရေး အကျဉ်းသားများကို ချီးမြှင့်မည် ဖြစ်သည်။

အမတ် ဦးမောင်စောဖြူ ဆေးရုံတင်ရ

ကျော်ခ ကြာသပတေးနေ့၊ မတ်လ ၃၁ ရက် ၂၀၁၁ ခုနှစ် ၁၇ နာရီ ၃၀ မိနစ် .

ချင်းမိုင်(မဇ္ဈိမ)။ ။ လွှတ်တော် အစည်းအဝေးများ ပြီးဆုံးသဖြင့် ကြာသပတေးနေ့တွင် ဌာနေသို့အပြန်လမ်း ကားပေါ်၌ ရခိုင်အမတ်တဦး သတိလစ်သွား၍ ဆေးရုံတင်ရကြောင်း အတူစီးနင်းလိုက်ပါကြသူ အမတ်များက ပြောသည်။

ရခိုင်တိုင်းရင်းသားတိုးတက်ရေးပါတီRNDPမှ၇၁နှစ်အရွယ်အမျိုးသားလွှတ်တော်အမတ် ဦးမောင်စောဖြူသည် နေပြည်တော်၌ ၅၉ ရက်ကြာ ပြုလုပ်ခဲ့သော လွှတ်တော်အစည်းအဝေးများ ပြီးဆုံးသဖြင့် ယနေ့မနက် ၅ နာရီတွင် ရန်ကုန်သို့ အခြားအမတ်များနှင့်အတူ ကားတစီးထဲလိုက်ပါလာခဲ့ရာ လှည်းကူးမြို့အနီး၌ ရုတ်တရက် အော့အန်ကာ သတိလစ်သွားသောကြောင့် ရန်ကုန် မြောက်ဥက္ကလာ ဝေဘာဂီဆေးရုံသို့ တင်ပို့ရခြင်း ဖြစ်သည်။

“ကားက၅နာရီထွက်မယ်ဆိုတော့၃နာရီလောက်ကတည်းကအိပ်ယာကထ ကိုယ့်ပစ္စည်း ကိုယ်သယ်ဆိုတော့ သူက အသက်ကလည်း ကြီးနေပြီလေ။ အမောဖောက်တာလည်း ပါမှာပေါ့။ ကားပေါ်ရောက်သွားပြီး လမ်းမှာပဲ သတိလစ်သွားတယ်။ အသက်ရှူလာအောင် မနည်းကြိုးစားခဲ့ရတယ်” ဟု ခရီးဖော် အမတ်တဦးက မဇ္ဈိမကို ပြောသည်။

ဦးမောင်စောဖြူသည် ရခိုင်ပြည်နယ် မင်းပြားမြို့နယ် မဲဆန္ဒနယ် အမှတ် ၄ တွင် အနိုင်ရရှိခဲ့သည့် RNDP အမတ် ဖြစ်သည်။

အသက်ပြန်ရှူစေရန်ရင်ဘတ်ကိုဖိနှိပ်မှုများပြုလုပ်ပေးခဲ့သဖြင့်၁ဝမိနစ်ခန့်အကြာတွင် ပြန်သတိရလာခဲ့သည်။

“အခုတော့ဝေဘာဂီဆေးရုံမှာပါပဲ။ရောဂါအခြေအနေနဲ့ပတ်သက်ပြီးစိုးရိမ်ရတယ်၊မစိုးရိမ်ရဘူးဆိုတာကတော့ ဒီနေ့ညနေပိုင်းလောက်မှသိရမယ်လို့ပြောတယ်။အခုတော့စစ်ချက်တွေလုပ်နေတုန်းပါ။သူက အသက်ကြီးပြီး အကယ်၍ နေကောင်းလို့ ပြန်ရင်လည်း မင်းပြားကို တယောက်ထဲ ပြန်ရမှာ။ ဒီအတိုင်းဆို စိတ်ပူစရာပါ” ဟု အခြား လွှတ်တော်အမတ် တဦးက မဇ္ဈိမကို ပြောသည်။

နေပြည်တော် လွှတ်တော်တက် အမတ်များထဲတွင် ဆေးရုံတင်ရသည်အထိ ကျန်းမာရေး ချို့ယွင်းသူများမှာ ဦးမောင်စောဖြူ အပါအဝင် ၂ ဦး ရှိပြီဖြစ်သည်။

ပြီးခဲ့သည့်ရက်သတ္တပတ်ကပင်ပဲခူးတိုင်းဒေသကြီး မဲဆန္ဒနယ် အမှတ် ၃ မှ ကြံ့ဖွံ့ပါတီ အမျိုးသားလွှတ်တော် အမတ် ဦးတင်မြင့်သည်လည်း လွှတ်တော်တက်နေရင်း ကျန်းမာရေး မကောင်းသဖြင့် နေပြည်တော် ကုတင် ၁ဝဝဝ ပြည်သူ့ဆေးရုံကြီး၌ ယခုထိ ဆေးကုသနေရသည်။

ထိုစဉ်ကပြည်ထောင်စုလွှတ်တော်နာယကဦးခင်အောင်မြင့်၊ဒုသမ္မတ စိုင်းမောက်ခမ်း၊ အမျိုးသားလွှတ်တော် ဒုဥက္ကဋ္ဌ ဦးမြညိမ်းနှင့် ကျန်းမာရေးဝန်ကြီး ဒေါက်တာ ကျော်မြင့် သွားရောက်ကြည့်ရှုခဲ့သည်။

ပင်လယ်ထဲမှာ ၈ ရက်ကြာ မျောပါ

ကျော်ခ ကြာသပတေးနေ့၊ မတ်လ ၃၁ ရက် ၂၀၁၁ ခုနှစ် ၁၃ နာရီ ၁၄ မိနစ် .

ချင်းမိုင် (မဇ္ဈိမ)။ ။လေပြင်းမုန်တိုင်းကြောင့်ပင်လယ်ပြင်ထဲငါဖမ်းမော်တော်မျောပါရင်း ၈ ရက်ကြာ လှိုင်းလေဒဏ်ကြား အစာရေစာပြတ်တောက်နေခဲ့ရာမှ ထိုင်းငါးဖမ်းလှေတစီးက ကယ်ခဲ့သဖြင့် ဧရာဝတီတိုင်း ဖျာပုံခရိုင် ဂေါ်တူရွာ ရေလုပ်သား ၇ ဦးမှာ အိမ်ပြန်နိုင်ကြပြီဖြစ်သည်။

၎င်းတို့ ၇ ဦးထဲမှ ဦးဇော်ဝင်းကို မဇ္ဈိမသတင်းထောက် ကျော်ခက ဆက်သွယ်မေးမြန်းထားပါသည်။

စိုက်ဆင်းလေပြင်းများမတ်လ၁၅ရက်နေ့တွင် တိုက်ခတ်ခဲ့သဖြင့် ဧရာဝတီတိုင်းနှင့် ရန်ကုန်တိုင်းရှိ လှေများ၊ ဝါးဖောင်များဖြင့်ငါး၊ပုဇွန်ဖမ်းလုပ်ငန်းလုပ်ကိုင်သည့် ရေလုပ်သား ၄ ထောင်ခန့် ပျောက်ဆုံးနေဆဲ ဖြစ်သည်။

နာမည်နဲ့ ဇာတိကို ပြောပြပေးပါလားခင်ဗျ။

“ဟုတ်ကဲ့ကျနော့်နာမည်ဦးဝင်းဇော်ပါ။ကျနော့်အသက် ၄၂ နှစ်ခင်ဗျာ့။ ဖျာပုံခရိုင် ဂေါ်တူကျေးရွာကပါ။ ဗမာ လူမျိုးပါပဲဗျ’’

အန်ကယ်တို့ကိုမြိတ်အာဏာပိုင်တွေကကယ်တင်လာခဲ့တယ်လို့သိရတယ်ခင်ဗျ။ဒါနဲ့ပတ်သက်ပြီးဖြစ်ပျက်ပုံ အဆင့်ဆင့်ကို သိချင်ပါတယ်။

“ဖြစ်ခဲ့တာကတော့မြန်မာလိုတပေါင်းလဆန်း၁၁ ရက်နေ့က လေထတိုက်တယ်ဗျ။ လေတိုက်ပြီးတော့ မနက် ၄ နာရီလောက်ကနေစပြီးတော့ ကျနော်တို့မျောတယ်။ ကျနော်တို့မော်တော်ပေါ်မှာ လူ ၄ ယောက်ပါတယ်’’

“မျောတော့မနက်မိုးလင်းလို့၈နာရီနဲ့၈နာရီခွဲလောက်မှာကျနော်တို့တပြလောက်မှာဖောင်တဖောင် တွေ့တယ်။အဲဒီဖောင်ဆီကိုကျနော်တို့မောင်းသွားတယ်။ကျနော်တို့ မောင်းသွားတော့တွေ့တဲ့လူတွေက ကျနော်တို့အုပ်စုထဲကလူတွေပဲ ဖြစ်နေတယ်။အဲဒီဖောင်ပေါ်ကလူ၃ယောက်ဆက်တင်တယ်။ ဆက်တင်ပြီးတော့ ကျနော်တို့ ဆက်မောင်းတယ်’’

“၂နာရီလောက်မောင်းပြီးတဲ့နောက်မှာလေကတအားတိုက်ပြီး၊လှိုင်းကတအားကြီးတော့စက် ရေမြုပ်သွားတယ်။ မနိုင်တော့ဘူး။ ဆက်မောင်းလို့လည်း မရတော့ဘူး။ အဲဒီအချိန်မှာ ကျနော်တို့ မျောတာပေါ့။ ၅ ရက်လောက် မျောတယ်ခင်ဗျာ့’’

“ပထမဆုံးကျနော်တို့ကိုကယ်တဲ့လှေကယိုးဒယားလှေလို့ပြောတယ်။ဗမာလိုပြောတာတလုံးမှ နားမလည်ဘူး။ ငါးဖမ်းလှေပဲ။ သူတို့ကိုတွေ့လို့ ကျနော်တို့က လှမ်းခေါ်တာ။ သူတို့က လာတယ်။ လာတော့ ကျနော်တို့က လက်ဟန်၊ ခြေဟန်နဲ့ သူတို့နားလည်အောင် ပြောတာပေါ့။ ကျနော်တို့ လေတိုက်လို့ မျောလာတယ်၊ အစာရေစာ မစားရဘူး၊ ဒုက္ခရောက်နေတယ်ဆိုတာကို သူတို့ကို ပြောပြတယ်’’

“အဲဒီလို လက်ဟန်ခြေဟန်နဲ့ ရှင်းပြတော့မှ သူတို့လှေကို ကျနော်တို့မော်တော်ဘုတ်နားကို ကပ်တယ်။ ပြီးတော့မှ လှေပေါ်ခေါ်တင်တယ်။ အဲဒီလှေနဲ့ လိုက်လာပြီး မြန်မာဘက်က လာကယ်တဲ့ လှေနဲ့ နောက်ရက်တွေမှာ တွေ့တော့ ပြောင်းပေးလိုက်ပြီး အခုလို ဒီကိုရောက်လာတာ’’

မျောသွားတာ ၅ ရက်ဆက်တိုက်ဆိုတော့ အန်ကယ်တို့အဖွဲ့တွေ ဒုက္ခရောက်မှာပေါ့။ ဘယ်လိုတွေဖြစ်ကြလဲ။ အတွေ့အကြုံလေးတွေ ရှင်းပြပေးပါဦးခင်ဗျ။

“ကျနော်တို့လှေ မမြုပ်သွားရေး၊ လှေပေါ်မှာရှိတဲ့လူတွေ တယောက်တလဲ ပက်ကြတယ်လေ။ ရေပက်ပြီး မျှောခံတာပေါ့။ မျှောခံပြီး ၄ ရက်ကျော် ၅ ရက် မြောက်တဲ့နေ့မှာ ကျနော်တို့ကို ဆယ်တဲ့ မော်တော်တစီး သွားတွေ့တယ်။ မနက် ၄ နာရီလောက်မှာ’’

“ ထမင်းကတော့ ၃ ရက်လောက် စားလိုက်ရတယ်။ နောက်ရက်တွေကျတော့ ကျနော်တို့ မစားရတော့ဘူး၊ ရေပဲ သောက်ရတယ်။ ရေကလည်း မရှိတော့ဘူး၊ ရေကုန်သွားတော့ ရေငန်တွေကို ကျနော်တို့ ပေါင်းခံပြီးတော့ သောက်တယ်’’

ပင်လယ်ထဲမှာ မျောသွားတဲ့အခါ စက်လည်း ရပ်သွားတယ်ဆိုတော့။ စိတ်ဓာတ်ကျတာတို့၊ မျှော်လင့်ချက် မဲ့သွားတာတို့ကော ဘယ်လိုကြုံခဲ့ရလဲဗျ။

“ပထမကတော့ကျနော်တို့ပင်လယ်သားထုံးစံကတော့မိုးနဲ့ပင်လယ်သားဆိုတာအမြဲတမ်းထိတွေ့နေကျပဲလေ။ လေတော့လာပြီ ဒို့တော့ မျှောကြမယ်၊ ဒီလောက်ထိတော့ ဒုက္ခရောက်လိမ့်မယ်လို့ မထင်ဘူးပေါ့’’

“ကိုယ်တိုင်ကြုံတွေ့လာရတော့မှ ငါတို့တော့ အခြေအနေကောင်းပါ့မလား၊ တချို့ဆို အားလျော့တဲ့သူက လျော့နေပြီ။ ဦးစီး ကျနော်တို့တော့ သေတော့မယ်၊ ရေမပက်နိုင်တော့ဘူး မြုပ်တော့မယ် အဲဒီလို ပြောကြတာပေါ့’’

“အဲဒီအချိန်မှာ ကျနော်တို့က တယောက်နဲ့တယောက် အားတင်းပြီးတော့။ ဒီမော်တော် မြုပ်သွားရင် ဒို့ သေမှာ၊ ပက်ကြပေါ့။ ဒီမော်တော် မမြုပ်အောင် ပက်ကြမယ်ဆိုပြီးတော့ ပက်လာတာပေါ့။ အဲဒါ ဆယ်တဲ့လူလည်း တွေ့ရော ကျနော်တို့လည်း ခြေကုန်လက်ပန်းကျ။ ထမင်းက ဝအောင်မစားရ ရေက ဝအောင်မသောက်ရတော့ လူတွေလည်း တော်တော်လေး ဒုက္ခရောက်တာပေါ့’’

“တချို့ဆိုရင်ချိနဲ့ကုန်ပြီးခြေတွေ၊လက်တွေ မသယ်နိုင်ဖြစ်ပြီး မှောက်တဲ့လူက မှောက်ကုန်ပြီ။ အဲဒီလိုမျိုးတွေ ဖြစ်ကုန်ကြတာပေါ့။ဒါပေမယ့်နုံးချိနေတာကိုပဓာန မထားဘဲ အားလုံး စုစုစည်းစည်းနဲ့ အသက်ရှင်ဖို့အတွက် ရေပေါ်မှာ မော်တော်ပေါ်ရေးကို ကျနော်တို့ တယောက်တလဲစီ ရေပက်ကြတာ’’

မုန်တိုင်းဒဏ်၊ လှိုင်းလုံးတွေဒဏ်တွေကြားမှာ အသက်မသေအောင် ကြိုးစားနေချိန် အိမ်မှာ ကျန်ခဲ့တဲ့ မိသားစုတွေကို သတိရတာမျိုး၊ တွေးမိတာမျိုးကကော။

“မိသားစုကိုသတိရတာပေါ့ဗျာ။သြော်… ငါ့သားသမီး ငါ့မယား၊ ငါ့ညီကိုမောင်နှမတွေနဲ့ တွေ့ရပါတော့မလား။ ငါတို့တော့ ဒီဘဝနဲ့တင် ချုပ်ငြိမ်းသွားပြီလားပေါ့။ အဲဒီလောက်ထိ တွေးမိပါတယ်။ ကမ်းမမြင်လမ်းမမြင် ဒုက္ခရောက်နေတဲ့ အချိန်မှာ တော်တော်ကို ဝမ်းနည်းသွားပါတယ်’’

“ကျနော့တသက်နဲ့တကိုယ်ဒါမျိုးတခါမှ မကြုံဖူးဘူး။ ကြုံတော့ ကြုံဖူးတယ်။ ဒီလောက် ဆိုးဆိုးဝါးဝါးကြီးတော့ တခါမှမဖြစ်ဖူးဘူး။ဒါပေမယ့်ဗျာ…ကျနော်တို့သူဋ္ဌေးလည်းပစ္စည်းတွေပျက်စီးဆုံးရှုံးမှုတွေ တော်တော်ဖြစ်တယ်။ ကျနော်တို့ကကျတော့ အသက်နဲ့ ရင်းရတယ်။ အခုလို ကြုံတွေတဲ့အပေါ်မှာတော့ တော်တော်လေး ဝမ်းနည်းပက်လက် ဖြစ်ရတယ်ဗျ’’

“အခုလို ကျနော်တို့ သေကံမရောက်၊ သက်မပျောက်ဘဲ ပြန်ရောက်လာတာဟာ ကုသိုလ်ကံကောင်းလို့ ကူညီမယ့်သူ၊ မ’စမယ့်သူ တွေ့တယ်လုိ့ ပြောရမှာပေါ့’’

အိမ်က မိသားစုတွေ ဘယ်လောက်ထိ စိတ်ပူနေမယ်လို့ တွေးမိခဲ့လဲ။

“ကျနော်တို့ဆီမှာကျနော်တို့အရင်ဖြစ်ခဲ့ကြဖူးတဲ့ ရေလုပ်သားတွေတုန်းက မျက်မြင်ကိုယ်တွေ့ တွေတာတော့ အဲလိုဖြစ်ပြီဆိုရင်အိမ်ကသားမယားတွေကတငိုငို၊ တရီရီ ဖြစ်ကုန်ကြတာပေါ့ဗျာ။ ဝမ်းနည်းပက်လက်ပေါ့ဗျာ။ ပင်လယ်ပြင်မှာ ပျောက်သွားတဲ့ သူတို့အိမ်သားတွေ ပြန်မလာမချင်း ငိုယိုနေကြတာပေါ့ဗျာ’’

“အိမ်မှာကကျနော်ကမိသားစုရဲ့အားအထားရဆုံးအိမ်ထောင်ဦးစီးလေ။အဲဒါကြောင့် ကျနော့်မှာ တာဝန်တွေ အများကြီး ရှိတယ်လေ။ သူတို့အတွက် ကျနော်ဟာ အတော်လိုအပ်တဲ့ လူတဦးပါ။ အခုလို ကျနော် မသေဘဲ ပြန်ရောက်လာတာဟာ ကျနော့်အတွက်ရော၊ ကျနော့်မိသားစုအတွက်ပါ အလွန်ဝမ်းသာပီတိ ဖြစ်ရပါတယ်ဗျာ’’

မသေမပျောက် ကမ်းပေါ် ပြန်ရောက်လာတယ်ဆိုတော့ ဘယ်လိုခံစားရလဲဗျ။

“ကျနော့်စိတ်ထဲမှာတော့ ပြောမပြတတ်အောင် တော်တော်လေးကို ဝမ်းသာပီတိ ဖြစ်မိတာပေါ့။ ငါ့မိသားစု၊ ငါ့ဆွေမျိုးတွေနဲ့ ပြန်ပြီး တွေ့ခွင့်ရတော့မှာပါလားဆိုတဲ့ အသိစိတ်က ပြောမပြတတ်အောင် အတိုင်းထက် အလွန်ပါပဲဗျာ’’

“အော်…ငါတို့ဟာဗုဒ္ဓဘာသာမြန်မာလူမျိုးဖြစ်တဲ့အတွက်ကြောင့်ဘုရားကိုလည်း ယုံကြည်တယ်၊ တရားကိုလည်း ယုံကြည်တယ်၊ သံဃာကိုလည်း ယုံကြည်တယ်။ အဲဒါကြောင့် ဒီအကျိုးတရားတွေကြောင့် သြော် … ငါတို့မှာ ရှင်သန်ခွင့် ပြန်ရခဲ့တယ်လို့ ကျနော် ယုံကြည်မိတာပေါ့လေ’’

“ပင်လယ်ထဲမှာ အတိဒုက္ခရောက်ပြီး ကမ်းမမြင်လမ်းမမြင် ဖြစ်နေတဲ့အချိန်မှာ ဂုဏ်တော်တွေကိုလည်း ကျနော်တို့ တတ်သလောက် မှတ်သလောက် ရွတ်ဖတ်ကြတာပေါ့ဗျာ။ အဲဒါကြောင့် ကျနော်တို့ကို ကယ်ဆယ်မယ့်သူတွေနဲ့ တွေ့တယ်လို့ပဲ ကျနော်ယူဆတယ်’’

“အခုလည်းမြိတ်မြို့ကဘုန်းကြီးကျောင်းက ကျနော်တို့ကို ကူညီတယ်၊ ကျွေးတယ်။ အဲဒါတွေဟာ ရှေးဘဝက ရေစက်တွေပေါ့။ မနက်ဖြန် ကျနော်တို့ ရွာကိုပြန်ဖို့အတွက်လည်း ကားလက်မှတ်တွေ ဝယ်ပေးတယ်။ အကုန် စီစဉ်ပေးပါတယ်’’

ဒီမနက်မှမြိတ်ကမ်းခြေကိုရောက်လာတယ်ဆိုတော့အိမ်နဲ့ရောအဆက်အသွယ်ရပြီလား။ အာဏာပိုင်တွေကရော ဘာအကူအညီတွေပေးလဲဗျ။

“ဆိပ်ကမ်းကို ရောက်ရောက်ချင်း ဒီက အာဏာပိုင်အဖွဲ့အစည်းတွေနဲ့ ဆက်သွယ်တယ်။ ဆက်သွယ်ပြီး သူတို့မေးတာ စမ်းတာကို ကျနော်တို့ ဖြေပြီးတော့ သူတို့က အိမ်နဲ့ ဆက်သွယ်ဖို့ ဖုန်းပေးပြောတယ်။ အဆက်အသွယ်တွေ လုပ်ပေးတယ်။ ကျနော်တို့ လုပ်ငန်းရှင်နဲ့ ကျနော်တို့ မိသားစုနဲ့ အဆက်အသွယ်တော့ ရသွားပြီ’’

ဦးဇော်ဝင်းကဂေါ်တူးရွာမှာဘာစီးပွားရေးကို အဓိကလုပ်လဲဗျ။ အဲဒီမှာရှိတဲ့လူတွေကရော ဘာလုပ်ငန်းတွေ လုပ်ကြလဲဗျ။

“ကျနော်တို့လုပ်ငန်းက ရေလုပ်သားတွေပါ။ ငါး၊ ပုဇွန် ဖမ်းတာပေါ့။ ကျနော်တို့က အခုလုပ်နေတဲ့ အလုပ်ကလည်း ကိုယ်ပိုင်လုပ်ငန်း မဟုတ်ဘူးခင်ဗျ။ စားရင်းငှားပေါ့ဗျာ။ ကျနော်တို့အလုပ်တွေကတော့ အစားစားပါပဲ။ ၁၅ဝဝ ကနေ ၃ဝဝဝ ထိ ရတဲ့လူတွေလည်း ရှိတာပဲ’’

“ငါးဖမ်းတာကတော့ ညရောနေ့ရော ဖမ်းတာပေါ့။ ကျနော်တို့လုပ်ငန်းက ဖောင်နဲ့အလုပ်လုပ်တာ။ ဖောင်နဲ့ ကျားပိုက်နဲ့ အလုပ်လုပ်တယ်။ ရတဲ့ပစ္စည်းကို ကျနော်တို့မော်တော်ကတဆင့် ကမ်းကို ပြန်ပို့ရတယ်။ စာရင်းဒိုင်ဆီကို’’

“ကျနော်တို့ သူဋ္ဌေးမှာဆို ဖောင် ၁ဝ ဖောင် ရှိတယ်။ တဖောင်ကို ၄ ယောက် သတ်မှတ်ထားတယ်။ နောက် ကျနော်တို့ ဆိပ်ကမ်းမှာ ဆိုလို့ရှိရင် ၉ဝ ရာခိုင်နှုန်းက အဲဒီအလုပ်လုပ်တဲ့ လူတွေချည်းပဲ။ ဒီဖျာပုံခရိုင်အတွင်းမှာလည်း ဖောင်လုပ်ငန်းလုပ်တဲ့ လူတွေချည်းပါပဲ’’

“ဒီကရတဲ့ ငါးသားပုဇွန်တွေကို သူဋ္ဌေးတွေက အခြောက်လုပ်ပြီးတော့ ရန်ကုန်ဘုရင့်နောင်ပွဲရုံကို ပို့တာပေါ့’’

ဖျာပုံခရိုင်ထဲကအများစုကဝါးဖောင်တွေနဲ့ပင်လယ်ထဲမှာသားငါးပုဇွန်လိုက်ဖမ်းပြီး အသက်မွေးဝမ်းကျောင်းတယ်ဆိုတော့ လေပြင်းတိုက်တုန်းက မျောသွားတဲ့အထဲမှာ တော်တော်များလားဗျ။

“အဲဒီအချိန်က ညဘက်ဖြစ်နေတော့ သိပ်ပြီးတော့ သူ့မမြင်၊ ငါ့မမြင် အဲလိုဖြစ်နေကြတာပေါ့။ မျောတာတော့ တော်တော်လေးကို မျောကုန်ကြတယ်။ မနက်မိုးလင်းတော့ တောင်၊ မြောက် လိုက်ကြည့်လိုက်တဲ့အခါ သူလည်းမျော၊ ကိုယ်လည်းမျော တော်တော်များများ မျောနေတာတော့ တွေ့ရတယ်’’

“ဘယ်သူတွေ သေကြလဲတော့ မသိဘူး။ ကျနော်တို့ကို ပင်လယ်ထဲမှာ လာကယ်တဲ့ လှေကတော့ ပြောတယ်။ ကျနော်တို့လို လူတွေကို အရင်နေ့က ၁ဝဝ ကျော်လောက် ကယ်ပြီး နေရပ်ဌာနေတွေကို ပြန်ပို့ပေးတယ်လို့ ပြောတယ်’’

မိသားစုတွေနဲ့ အဆက်အသွယ်ရတော့ သူတို့ ဘယ်လိုဖြစ်သွားတယ်ပြောလဲ။

“ကျနော့်မှာတော့မိန်းမနဲ့သားသမီး၅ယောက်ရှိတယ်။ကျနော်ဖုန်းဆက်လိုက်တော့သူတို့ အံ့အားသင့်သွားကြတယ်။ တော်တော်လည်း ပျော်နေကြတယ်။ ကျနော်တို့ လေနဲ့ ပါသွားပြီဆိုပြီး အားလုံးက ဝမ်းနည်းပက်လက် ဖြစ်နေကြတာလေ။ ကျနော်ဖုန်းဆက်တော့ ဝမ်းနည်း၊ ဝမ်းသာဖြစ်ပြီး ငိုကြတာပေါ့ဗျာ’’

ပင်လယ်ထဲမှာလေဒဏ်မိုးဒဏ်တွေ တွေ့ကြုံခဲ့ရ၊ အစားအသောက်မရ ဒုက္ခရောက်ခဲ့ရတယ်ဆိုတော့ ကျန်းမာရေးထိခိုက်မှုတွေ ရှိလားဗျ။

“အခုတော့ဆိုးဆိုးဝါးဝါးရောဂါတော့ ဘာမှမဖြစ်ဘူးဘဲ ပြောရမှာပေါ့ဗျာ။ တချို့တွေကတော့ အအေးပတ်လို့ ကိုက်ခဲတာတို့၊ ဖျားတာတို့လောက်ကတော့ ဖြစ်ကြတာပေါ့လေ။ အဲဒါလည်း ဒီဘက်က လာကယ်တဲ့ လှေပေါ်က လူတွေက ဆေးတွေ ပေးပါတယ်’’

မနက်ဖြန် ရွာကို ပြန်ရောက်ကြတော့မယ်၊ မိသားစုတွေနဲ့ ပြန်တွေ့ရတော့မယ်။ ရွာနဲ့ ကမ်းခြေကြီးကိုလည်း ပြန်တွေ့ရတော့မယ်ပေါ့နော်။ အိမ်ပြန်ရောက်တဲ့အခါ ဒီငါးဖမ်းတဲ့ အလုပ်ကို ဆက်လုပ်ဖြစ်ဦးမလားဗျ။

“ကျနော်တို့က ဒီအလုပ်နဲ့ အသက်မွေးဝမ်းကျောင်းလာတဲ့ လူတွေပါ။ ကျနော်တို့ဆီမှာလည်း ဒီအလုပ်ပဲ ရှိပါတယ်။ ကျနော်ကိုယ်တိုင်လည်း ဒီအလုပ်နဲ့ပဲ ကျနော့်မိသားစုကို လုပ်ကိုင်ကျွေးမွေးလာခဲ့တာပါ။ ဒါကြောင့် ကျနော့်အနေနဲ့ ဒီအလုပ်ကိုပဲ ကျနော့်သူဋ္ဌေးနဲ့အတူ ဆက်ပြီး လုပ်ဆောင်သွားဦးမှာပါ’’

စစ်တပ်ကိုအင်အားတောင့်အောင်လုပ်မည်ဟုဦးသိန်းစိန်ပြော

ဖနိဒါ ဗုဒ္ဓဟူးနေ့၊ မတ်လ ၃၀ ရက် ၂၀၁၁ ခုနှစ် ၂၀ နာရီ ၅၂ မိနစ် .

ချင်းမိုင်(မဇ္ဈိမ)။ ။သမ္မတဦးသိန်းစိန်၏ ပြည်ထောင်စုလွှတ်တော်တွင် ဗုဒ္ဓဟူးနေ့က ပထမဆုံးပြောကြားသော မိန့်ခွန်းတွင် စစ်တပ်အင်အား တောင့်တင်းအောင် တည်ဆောက်သွားရမှာဖြစ်ကြောင်း အလေးထား ပြောကြားသွားခဲ့သည်။

“နိုင်ငံတော်ကာကွယ်ရေးကိုပေါ့ပေါ့တန်တန်နဲ့သဘောထားကြရင်ခေတ်သစ်ဖျက်ဆီးခံရခြင်းမျိုနဲ့ တွေ့ကြုံကြရဦးမှာ ဖြစ်ပါတယ်။ ပထဝီဝင် အနေအထားရော၊ စီးပွားရေးအရပါ အချက်အချာကျတဲ့ မိမိတို့ နိုင်ငံသည် နယ်ချဲ့လက်သစ်တွေ ဝင်ရောက်စွက်ဖက် ခြယ်လှယ်နေတဲ့ အန္တရာယ်ရှိနေတာကို အားလုံး သဘောပေါက်ကြမှာ ဖြစ်ပါတယ်။ ဒါကြောင့် နိုင်ငံတော်ကို ကာကွယ်ဖို့အတွက် အဆင့်မီ တပ်မတော်တရပ် ရှိဖို့လိုပါတယ်" ဟု အငြိမ်းစား ဗိုလ်ချုပ်ကြီးဟောင်း ဦးသိန်းစိန်က ထည့်သွင်း ပြောကြားသွားသည်။

၁၉နှစ်ကြာအတိုက်အခံများကိုဖိနှိပ်ကာအုပ်ချုပ်သွားခဲ့ကာဗုဒ္ဓဟူးနေ့တွင်အနားယူသွားသည့်အငြိမ်းစား ဗိုလ်ချုပ်မှူးကြီးဦးသန်းရွှေ၏လူယုံတဦးဟုလူသိများသောအသက်၆၆နှစ်အရွယ်ဦးသိန်းစိန်က နေပြည်တော်ရှိလွှတ်တော်အဆောက်အဦးတွင်ကြိုတင်ရေးသားလာခဲ့သောမိန့်ခွန်းကိုဖတ်ကြားသွားခဲ့ခြင်း ဖြစ်သည်။

“နိုင်ငံတော်ကာကွယ်ရေးမတောင့်တင်းရင်သူတပါးရဲ့အနိုင်ထက်ပြုကျင့်မှုကိုခံကြရမှာဖြစ်ပါတယ်။ ကိုယ့်မင်းကိုယ်ချင်း၊ကိုယ့်ထီးကိုယ့်နန်းနဲ့နှစ်ပေါင်းရာထောင်ချီပြီးနေလာခဲ့ကြတဲ့လူမျိုးဘဝမှ ကုန်းဘောင်ခေတ် ဇတ်သိမ်းခန်းမှာ နယ်ချဲ့လက်အောက်ကို လွယ်လွယ်ကလေးနဲ့ ကျရောက်ရခြင်ဟာ ခေတ်မီတဲ့ တပ်မတော်တရပ် မရှိခဲ့လို့ ဖြစ်ပါတယ်” ဟု ဦးသိန်းစိန်က ပြောသည်။

“လက်ရှိတပ်မတော်ကိုအင်အားတောင့်တင်းတဲ့တပ်မတော်၊အစွမ်းအစရှိတဲ့တပ်မတော်၊ခေတ်မီတဲ့ တပ်မတော်၊မျိုးချစ်စိတ်ထက်တန်တဲ့တပ်မတော်ဖြစ်အောင်အားလုံးဝိုင်းပြီးတည်ဆောက်ကြရမှာ ဖြစ်ပါတယ်။နိုင်ငံတော်ကာကွယ်ရေးဟာနိုင်ငံသားတိုင်းမှာတာဝန်ရှိပါတယ်။ဒါကြောင့်နိုင်ငံတော် ကာကွယ်ရေးကို နိုင်ငံသားအားလုံး ဝိုင်းဝန်းပြီး တာဝန်ယူကြရမှာ ဖြစ်ပါတယ်”ဟု ဦးသိန်းစိန်၏ မိန့်ခွန်းတွင် ပါရှိသည်။

အရှေ့တောင်အာရှ အသင်းဝင်နိုင်ငံများတွင် အမျိုးသားဝင်ငွေ အနည်းဆုံးဖြစ်သော မြန်မာနိုင်ငံ၏ ၂ဝ၁ဝ-၂ဝ၁၁ ဘဏ္ဍာရေးနှစ်အတွက် လျာထားသော စစ်အသုံးစရိတ်မှာ နိုင်ငံစုစုပေါင်း အသုံးစရိတ်၏၂၅ ရာခိုင်နှုန်းနီးပါးရှိပြီး မြန်မာကျပ်ငွေ ၁.၈ ထရီလီယံ ဖြစ်သည်။

လက်ရှိ မြန်မာ့တပ်မတော်တွင် စစ်သည်အင်အား ၄ သိန်းခန့်ရှိမည်ဟု ခန့်မှန်းထားကြပြီး အခြေခံ ဥပဒေသစ်အရ စစ်တပ်၏ အသုံးစားရိတ်များကို လွှတ်တော်က စစ်ဆေးခွင့် မပြုဘဲ ကန့်သတ်ထားသည်။

အာဏာရှင်ဟောင်းဦးသန်းရွှေ၏ စစ်အစိုးရအဖွဲ့တွင် ဝန်ကြီးချုပ်ရာထူးယူခဲ့သော ဦးသိန်းစိန်မှ စစ်အစိုးရကို ချီးမွမ်းစကားဆိုရာတွင် အဘက်ဘက်က ယိုယွင်းပျက်ဆီးနေသည့် နိုင်ငံကို အေးချမ်းသော ခေတ်မီဖွံ့ဖြိုးသော နိုင်ငံအဖြစ် ဆက်လက်တည်ဆောက်ရန် အမွေခံကောင်းများ ပေးသွားခဲ့သည်ဟုလည်း ဆိုသည်။

နိုင်ငံရေးနှင့်ပတ်သက်သည့် ပြောကြားချက်တွင် တိုင်းရင်းသား စည်းလုံးညီညွှတ်ရေးအတွက် ဆွေးနွေးရုံနှင့် မပြီးဘဲ လမ်းပန်းဆက်သွယ်ရေး၊ ပညာရေး၊ ကျန်းမာရေးနှင့် စီးပွားရေး အခြေခံကောင်းများ ပြုလုပ်ပေးရန်လိုသည်ဟု ပါရှိသည်။

ထို့အပြင်အတိုက်အခံများကိုလည်း“ကမ္ဘာ့အလယ်မှာကိုယ့်တိုင်းပြည်ဂုဏ်သရေကျဆင်းအောင် ပြုမူပြောဆိုခြင်း မပြုလုပ်ကြဖို့၊ ကိုယ့်နိုင်ငံသားတွေကို ထိခိုက်နစ်နာအောင် မပြုလုပ်ကြဖို့ လိုပါတယ်”ဟု သူက ဆိုသည်။

“ဒီမိုကရေစီကျင့်စဉ်နဲ့အညီရွေးကောက်ပွဲမှာပါဝင်ယှဉ်ပြိုင်ကြပြီးလုပ်ပိုင်ခွင့်အာဏာကိုတရားနည်းလမ်းကျစွာနဲ့ ရယူကြမယ်ဆိုရင် သာဓု ခေါ်ကြမှာဖြစ်တဲ့အတွက် ကျနော်တို့ အစိုးရအနေနဲ့ ငြိမ်းချမ်းရေးတံခါးကို ဖွင့်ထားပြီး လက်ကမ်းကြိုဆိုနေမှာဖြစ်ကြောင်း” ပြောဆိုသွားသည်။

သမ္မတကအစိုးရကဝင်ရောက်စွက်ဖက်မှုရှိသောဈေးကွက်စီးပွားရေးကိုကျင့်သုံးမည်ဟုလည်း နာရီဝက်ခန့်ကြာသော မိန့်ခွန်းတွင် ပြောကြားသွားသည်။

အလုပ်သမားများအတွက်အနိမ့်ဆုံးလစာသတ်မှတ်မှုကိုမြှင့်တင်သွားမည်ဟုသဲလွန်စပေးပြောကြားသွားပြီး အလုပ်အကိုင် အခွင့်အလမ်းများ ပေါများပြီး ကုန်ဈေးနှုန်း တည်ငြိမ်အောင် လုပ်မည်ဟုလည်း ဆိုသည်။

ထို့အပြင်လာဘ်ပေးလာဘ်ယူမှုကိုတားဆီးသွားမည်ဖြစ်ကြောင်းပြောကြားရာတွင်“လာဘ်ပေး လာဘ်ယူမှုဟာလူတဦးချင်းထိခိုက်စေရုံသာမကနိုင်ငံနဲ့လူမျိုးရဲ့ဂုဏ်သိက္ခာကိုပါထိခိုက်စေတဲ့အတွက် ပြည်သူတွေရဲ့ အကူညီကို ရယူပြီး ထိရောက်စွာ တားဆီးသွားပါ့မယ်” ဟု ဆိုသည်။

ကမ္ဘာ့နိုင်ငံများတွင် အကျင့်ပျက် ခြစားမှုများကို တိုင်းတာ၍ အစီရင်ခံစာ ထုတ်ပြန်နေသော ယုံကြည်ရသည့် TransparencyInternational၏၂ဝဝ၉ခုနှစ်အစီရင်ခံစာတွင်မြန်မာနိုင်ငံသည် အာဖဂန်နစ္စတန်နှင့် တန်းတူ ကမ္ဘာပေါ်တွင်ဒုတိယအဆိုးရွားဆုံးလာဘ်ပေးလာဘ်ယူမှုထူပြောသည့်နိုင်ငံဖြစ်သည်ဟုဆိုသည်။ အဆိုးဆုံးနိုင်ငံမှာ ဆိုမာလီ ဖြစ်သည်။

သမ္မတကသဘာဝပတ်ဝန်းကျင်ထိန်းသိမ်းရေးကိုအကျယ်တဝံ့ပြောကြားသွားပြီးစီးပွားရေး ဖွံ့ဖြိုးတိုးတက်မှုနှင့်သဘာဝပတ်ဝန်းကျင်ထိန်းသိမ်းရေးလိုအပ်ချက်များကိုဟန်ချက်ညီညီ ထိန်းညှိဆောင်ရွက်မည်ဟု ပြောသွားသည်။

မြောက်ကိုရီးယားလည်း သဝဏ်လွှာပို့ ၊ အနောက်အုပ်စု မပို့သေး

မျိုးသန့် အင်္ဂါနေ့၊ မတ်လ ၂၉ ရက် ၂၀၁၁ ခုနှစ် ၁၈ နာရီ ၅၂ မိနစ် .

ချင်းမိုင်(မဇ္စျိမ)။ ။မြောက်ကိုရီးယား အပါအဝင် မြန်မာ့အိမ်နီးချင်းနိုင်ငံများက သမ္မတ ဦးသိန်းစိန်နှင့် ဒုသမ္မတများထံ ပေးပို့သည့် ဝမ်းမြောက်ကြောင်း သဝဏ်လွှာများကို ပြည်ထောင်စုလွှတ်တော် နာယက ဦးခင်အောင်မြင့်က အင်္ဂါနေ့လွှတ်တော်အစည်းအဝေးတွင် ဖတ်ကြားမှတ်တမ်းတင်ခဲ့ကြောင်း လွှတ်တော်အမတ်များထံမှ စုံစမ်းသိရသည်။

မြောက်ကိုရီးယား၊ တရုတ်၊ အရှေ့တောင်အာရှနိုင်ငံများမှ ဝမ်းမြောက်ကြောင်း သဝဏ်လွှာများ ပေးပို့ခဲ့သော်လည်း မြန်မာ့ ဒီမိုကရေစီရေး ထောက်ခံအားပေးနေသည့် အမေရိကန်၊ အင်္ဂလန်နှင့် ဥရောပနိုင်ငံများမှ သဝဏ်လွှာ ပေးပို့ခြင်းများကို မတွေ့ရကြောင်း အမျိုးသားဒီမိုကရေစီအင်အားစုပါတီမှ ပြည်သူ့လွှတ်တော်အမတ် ဦးခိုင်မောင်ရည်ကဆိုသည်။

“ဥရောပနိုင်ငံတွေက ပို့တာတော့ လုံးဝမပါဘူး၊ အဖွဲ့အစည်းထဲကဆိုလို့ အရှေ့တောင်အာရှနိုင်ငံတွေနဲ့ ကုလသမဂ္ဂကပဲပါတယ်” ဟုသူကပြောသည်။

ပြည်ထောင်စုလွှတ်တော်ဥက္ကဋ္ဌက အင်္ဂါနေ့ လွှတ်တော်အစည်းအဝေးတွင် မှတ်တမ်းတင်ခဲ့သည့် သဝဏ်လွှာများမှာ တရုတ်၊ မြောက်ကိုရီးယား၊ ဂျပန်၊ တောင်ကိုရီးယား၊ ကုလသမဂ္ဂ၊ နီပေါ၊ ကျူးဘား၊ ပါလက်စတိုင်း၊ဘင်္ဂလားဒေ့ရှ်၊ ဆော်ဒီအာရေဗျ၊ အီရန်နှင့် အရှေ့တောင်အာရှ နိုင်ငံများမှ ဝမ်းမြောက်ကြောင်း သဝဏ်လွှာများ ဖြစ်သည်။

အင်္ဂါနေ့ ပြည်ထောင်စုလွှတ်တော် အစည်းအဝေးတွင် အမျိုးသားဒီမိုကရေစီ အင်အားစုပါတီမှ ဒေါက်တာ မြတ်ဉာဏစိုးက လွှတ်တော်နှင့် ပတ်သက်သက်သည့် ဝမ်းမြောက်ကြောင်း အဆို ၃ ရပ်ကို တင်သွင်းခဲ့ပြီး ပြည်ထောင်စု လွှတ်တော်ကမှတ်တမ်းတင်ခဲ့သည်။

ထို့အပြင် နယ်စပ်ကုန်သွယ်ရေးစခန်းများ ဖွင့်လှစ်ရေးနှင့်ပတ်သက်သည့် လွှတ်တော်အမတ်များ၏ အမေးကို စီးပွားရေးနှင့် ကူးသန်းရောင်းဝယ်ရေးဝန်ကြီး ဦးတင်နိုင်သိန်းက ပြန်လည် ဖြေကြားရာတွင် နယ်စပ်လုံခြုံရေး၊ ကုန်သွယ်မှု ချောမောစွာ စီးဆင်းနိုင်ရေး၊ နှစ်နိုင်ငံသဘောတူညီချက်၊ ကုန်သွယ်မှုပမာဏ စသည်တို့ ကိုက်ညီမှု မရှိခြင်းကြောင့် ဖေါ်ဆောင်နိုင်ခြင်းမရှိသေးကြောင်း ပြန်ဖြေခဲ့သည်။

တောင်သူများ ပိုးသတ်ဆေးသုံးစွဲခြင်းနှင့်စပ်လျင်းသည့်မေးခွန်းကို လယ်ယာစိုက်ပျိုးရေးနှင့် ဆည်မြောင်းဝန်ကြီး ဦးဌေးဦးက ပြန်လည်ဖြေကြားခဲ့သည်။ ပိုးသတ်ဆေး ၁၉ မျိုး ရောင်းဝယ်ခွင့် ပိတ်ခဲ့ပြီး အာနိသင်မရှိသည့် ဆေးများဈေးကွက်အတွင်းရောင်းချခြင်းတွေ့ပါက အကြောင်းကြားနိုင်ပြီး အရေးယူသွားမည်ဖြစ်ကြောင်း ဖြေခဲ့သည်ဟု လွှတ်တော်အမတ်များကပြောသည်။

ထို့အပြင် ရှမ်းပြည်နယ် လမ်းပန်းဆက်သွယ်ရေးနှင့် လျှပ်စစ်မီးရရှိရေး ကိစ္စများကို လွှတ်တော်အမတ်များက မေးမြန်းကြရာ ဆောက်လုပ်ရေးဝန်ကြီး ဦးခင်မောင်မြင့်က ဆောက်လုပ်ဆဲနှင့် ဖောက်လုပ်ဆဲဖြစ်ကြောင်း ပြန်ဖြေခဲ့သည်။

အင်္ဂါနေ့ ပြည်ထောင်စုလွှတ်တော်အစည်းအဝေးတွင် ကြံ့ခိုင်ရေးအမတ်များဖြစ်သည့် ဦးဝင်းမြင့်၊ ဦးမြင့်အောင်၊ ဦးကျော်ကျော်ဌေး၊ ဦးခင်မောင်အေး တို့ လေးဦး လွှတ်တော်ကိုယ်စားလှယ်အဖြစ်မှ နုတ်ထွက်သွားကြသည်။

ထိုနုတ်ထွက်သွားသူများမှာ မဖွဲ့ရသေးသည့် ပြည်ထောင်စုရာထူးဝန်အဖွဲ့တွင် ထမ်းဆောင်ရန် ဖြစ်နိုင်ကြောင်း လွှတ်တော်အမတ်များက သုံးသပ်သည်။

ယနေ့ပြုလုပ်သည့် လွှတ်တော်အစည်းအဝေးကို မနက်ပိုင်း ၁ဝ နာရီတွင် စတင်ပြီး နေ့လယ် ၁၂ နာရီခွဲတွင် ပြီးဆုံးသည်။ ဗုဒ္ဓဟူးနေ့တွင် နိုင်ငံတော်သမ္မတ ကျမ်းကျိန်ရန်ရှိပြီး ပြည်ထောင်စုလွှတ်တော်တွင် အစမ်းလေ့ကျင့်နေပြီဟုလည်း လွှတ်တော်အမတ်များကပြောသည်။

ဗုဒ္ဓဟူးနေ့တွင် ပြည်ထောင်စုလွှတ်တော်ကို နံနက် ၁၁ နာရီတွင် ကျင်းပရန်ရှိသော်လည်း အမတ်များ၏ မေးခွန်းမေးမြန်းမှုနှင့် အဆိုတင်သွင်းမှုများ မရှိတော့ဟု သိရသည်။

အနိမ့်ဆုံး အခကြေးငွေ နှင့် သီးစားခ

ဦးမျိုး (ဥပဒေ) အင်္ဂါနေ့၊ မတ်လ ၂၉ ရက် ၂၀၁၁ ခုနှစ် ၁၇ နာရီ ၃၂ မိနစ် .

လွတ်လပ်သော မြန်မာနိုင်ငံ၏ ပထမဆုံး “ပြည်ထောင်စုမြန်မာနိုင်ငံ၏ဖွဲ့စည်းအုပ်ချုပ်ပုံ အခြေခံဥပဒေ”ကို ၁၉၄၇ ခုနှစ်၊စက်တင်ဘာလ၂၄ ရက်တွင်အတည်ပြုပြဋ္ဌာန်းခဲ့သည်။ဤအခြေခံဥပဒေအခန်း၃ ။တောင်သူလယ်သမားများနှင့် အလုပ်သမားများအတွက် နိုင်ငံတော်၏ တာဝန် ဝတ်တရားများ၊ ပုဒ်မ-၃ဝ။ ။

(၁) နိုင်ငံတော်သည် မြေယာအားလုံး၏ ပင်ရင်းပိုင်ရှင် ဖြစ်သည်။

(၂)ဤအခြေခံဥပဒေ၏ပြဋ္ဌာန်းချက်များနှင့်မဆန့်ကျင်စေဘဲ၊ မြေယာပိုင်ဆိုင်ခွင့်စနစ်များကို စည်းမျဉ်းတကျ ဖြစ်စေရန်သော်၎င်း၊ လွှဲပြောင်းရန်သော်၎င်း၊ ဖျက်သိမ်းရန်သော်၎င်း၊ နိုင်ငံတော်၌ အခွင့်အရေးရှိရမည်။ သို့တည်းမဟုတ်မည်သည့်မြေယာကိုမဆိုလည်းသိမ်းယူပြီးလျှင်၊ထိုမြေယာကို စုပေါင်းစိုက်ပျိုးရေးအတွက်ဖြစ်စေ၊သမဝါယမစိုက်ပျိုးရေးအတွက်ဖြစ်စေ၊လယ်သီးစားသမားများသို့ဖြစ်စေ၊ ဝေငှပေး ရန် အခွင့်အရေး ရှိရမည်။

(၃)မည်သည့်အခြေခံစနစ်နှင့်မျှမြေယာအမြောက်အမြားပိုင်ဆိုင်နိုင်သောအခွင့်အရေးမရှိစေရ။ တဦးတည်းပိုင် ဖြစ်သော မြေယာ၏အများဆုံး မြေဧက အရေအတွက်ကို အကြောင်းညီညွတ်လျှင် ညီညွတ် ခြင်း တရားဥပဒေဖြင့် သတ်မှတ်ရမည်။ ဟုပြဋ္ဌာန်းထားသည်။

“လွတ်လပ်ပြီး မြန်မာနိုင်ငံတွင် သီးစားချထားရေး ဥပဒေတွေ အထပ်ထပ် အခါခါ ပြဋ္ဌာန်းပြီး လယ်သမား အမြောက်အများ သွေးစုတ်ခံနေရသည်ကို မခံနိုင်လွန်း၍ ”ဥပဒေ နောက်ထပ် မတိုးလိုက်ပါနဲ့ သူအမေ ကြောက်တတ်တဲ့ အမျိုးဟာမို့ ”

မြန်မာနိုင်ငံ လွတ်လပ်ရေးမရမီက လယ်ယာမြေအများစုကို တောင်သူလယ်သမား မဟုတ်သော ငွေရှင်ကြေးရှင်များ လက်ထဲသို့ လယ်ယာများရောက်နေခြင်းကြောင့် တောင်သူလယ်သမားများ အများထုကြီးသည် သီးစားခ ကြီးမားလွန်း၍ လယ်ယာကို စွဲစွဲမြဲမြဲ မလုပ်ကိုင်နိုင်ခြင်း၊ လက်ငုတ်လယ်ယာ လက်မဲ့ဖြစ်ရခြင်း၊ ကြွေးမြီတင်ခြင်း စသည့် ပြဿနာမြောက်များစွာနှင့် တွေ့ကြုံ ရင်ဆိုင်ခဲ့ကြရသည်။ ထို့ကြောင့် “လယ်လုပ်သူသာ လယ်ပိုင်ရမည်”ဟူသော သဘောတရား ပေါ်ထွက်လာခဲ့သည်။လယ်ယာ မလုပ်သူတို့ ပိုင်ဆိုင်ထားသည့် လယ်ယာမြေများကို သိမ်းယူ၍ လယ်လုပ်ခွင့် မရသူတို့အား ဝေပေးရန်အတွက် ”၁၉၄၈ ခုနှစ်တွင် သီးစားချထားရေး ဥပဒေနှင့် လယ်ယာမြေနိုင်ငံပိုင် ပြုလုပ်ရေး ဥပဒေများကို ပြဋ္ဌာန်းခဲ့သည်။

၁၉၄၈ခုနှစ်လယ်ယာမြေနိုင်ငံပိုင်ပြုလုပ်ရေးအက်ဥပဒေကို ၁၉၅ဝ တွင် သန်လျင်မြို့၌စတင်ကျင့်သုံးရာတွင် အခက်အခဲများ ကြုံတွေ့ကာ ချွတ်ယွင်းချက်များ တွေ့ရှိခဲ့ရသည်။ ထိုကြောင့် ၎င်းချွတ်ယွင်းချက်များကို ပြုပြင်ပြီး ၁၉၅၃ ခုနှစ် လယ်ယာမြေနိုင်ငံပိုင် ပြုလုပ် ရေး အက်ဥပဒေကို အသစ်တဖန် ပြဋ္ဌာန်းခဲ့ပါသည်။ ၁၉၅၃ ခုနှစ် သီးစားချထားရေး ဥပဒေ ကိုလည်းပြဋ္ဌာန်းခဲ့သည်။ မြန်မာနိုင်ငံတွင်(၁)၁၉၃၉ ခုနှစ် သီးစားအက်ဥပဒေ (၂) ၁၉၄၆ ခုနှစ် သီးစား အက်ဥပဒေ (၃) ၁၉၄၈ ခုနှစ် သီးစားချထားရေး အက်ဥပဒေ (၄)၁၉၅၃ခုနှစ်သီးစားချထားရေးအက်ဥပဒေဟူ၍သီးစားဥပဒေများပေါ်ပေါက်လာခဲ့ပြီးနောက်ဆုံး တော်လှန်ရေးကောင်စီ လက်ထက် ၁၉၆၃ ခုနှစ် သီးစားချထားရေး ဥပဒေကို ပြဋ္ဌာန်းခဲ့သည်။ဤဥပဒေကို ပြီးပြည့်စုံပြီဟု မယူဆသည့်အတွက် ၁၉၆၅ ခုနှစ် သီးစားချထားရေး ဥပဒေကို ပြင်ဆင်သည့် ဥပဒေ ကိုထပ်မံပြဋ္ဌာန်းခဲ့ပြန်သည်။ လွတ်လပ်ပြီး မြန်မာနိုင်ငံတွင် သီးစားချထားရေး ဥပဒေတွေ အထပ်ထပ် အခါခါ ပြဋ္ဌာန်းပြီး လယ်သမား အမြောက်အများ သွေးစုတ်ခံနေရသည်ကို မခံနိုင်လွန်း၍ ”ဥပဒေ နောက်ထပ် မတိုးလိုက်ပါနဲ့ သူအမေ ကြောက်တတ်တဲ့ အမျိုးဟာမို့ ”ဟုစာချိုးခဲ့သည့် အဖိုးသခင် ကိုယ်တော်မှိုင်းကို တိုင်တည်ရပါတော့မည်။

မြန်မာနိုင်ငံတွင် အနိမ့်ဆုံး အခကြေးငွေနှင့် ပတ်သက်၍ ”လယ်ယာ အလုပ်သမား အနည်းဆုံး အခကြေးငွေ အက်ဥပဒေ(၁၉၄၈ ခုနှစ်၊ ဥပဒေအမှတ် ၄၄)ကို ၁၉၄၈ ခုနှစ်၊ ဒီဇင်ဘာလ ၃ဝ ရက်နေ့တွင် ပြဋ္ဌာန်းခဲ့သည်။ ဤ၁၉၄၈ခုနှစ်အက်ဥပဒေပုဒ်မ-၃တွင်”မည်သည့်အလုပ်ရှင်မဆိုသူရင်းငှား တယောက်ကို ငှားသည်ရှိသော် ထိုသူရင်းငှားအား -

အလုပ်သမားတဦး၏အနိမ့်ဆုံး လစာမှာ (တလ ၁၂,ဝဝဝ/ကျပ်) ဖြစ်ကာ အစိုးရ ဝန်ထမ်း တဦး၏ အနိမ့်ဆုံး လစာမှာ (တလ ၃ဝ,ဝဝဝ/ကျပ်) ဖြစ်နေသည်ကို ကွက်ကွက်ကွင်းကွင်း တွေ့နေရပေသည်။

(က) တတုံးထွန်ထက် ပိုမိုသည့် လုပ်ခွင်ကို ချထားလုပ်ကိုင်စေခြင်းမပြုရ။

(ခ) လယ်ယာထွန်ယက်ခြင်း မပြုသည့် အချိန်တွင် ခိုင်းနွားတရှဉ်း ထိန်းကျောင်းကျွေးမွေးရန် တာဝန်ထက် ပိုသော တာဝန်ကို ချထားခြင်း မပြုရ၊

ဤဥပဒေ ပုဒ်မ -၄ တွင်”(၁)(က) ကျီဝင် သူရင်းငှား တဦး၏ အခကြေးငွေမှာ ထိုသူ၏ လုပ်ခွင်မှ ထွက်သည့် သီးနှံ၏ ၃၅ ရာခိုင်နှုန်း အနည်းဆုံး ဖြစ်စေရမည်။ ထို့ပြင် အလုပ်ရှင်က ထိုသူရင်းငှားအား ငှားရမ်းသည့် အချိန်ကာလပတ်လုံး ကျွေးမွေးထားရမည်။ (ခ) ကျီဝင် သူရင်းငှားမှ အပ အခြားသူရင်းငှားများ ပုတ်ပြတ် လယ်ယာအလုပ်သမားများ နေ့စားလယ်ယာ အလုပ်သမားများအတွက် အခကြေးငွေကို နိုင်ငံတော်သမ္မတက ကျီဝင်သူရင်းငှားများ၏ နှုန်းနှင့် နှိုင်းယှဉ်ပြီး သင့်တော်သည့်နှုန်းကို ကန့်သတ်ပေးရမည်။ သို့သော် တနှစ်ပတ်လုံး လုပ်ကိုင်ရသည့် သူရင်းငှားများကို ပိုမို၍ ငှားရမ်းစေခြင်းငှာ နှုန်းများကို နိုင်ငံတော် သမ္မတ က ပြုပြင်ပေးနိုင်သည်။” ဟုဖော်ပြထားသည် ကိုတွေ့ရသည်။

အနည်းဆုံးအခကြေးငွေ အက် ဥပဒေ (၁၉၄၉ ခုနှစ်၊ ဥပဒေအမှတ် ၆၆)ကိုလည်း စီးပွားရေးလုပ်ငန်းများနှင့် စက်မှုလက်မှုလုပ်ငန်း အရပ်ရပ်တို့၌ လုပ်ကိုင်လျက်ရှိကြသော အလုပ်သမားများအား သင့်တင့်လျောက်ပတ်စွာ နေထိုင်စားသောက်နိုင်လောက်သော အခကြေးငွေကို ရရှိစေရန် ရည်ရွယ်၍ ၁၉၄၉ ခုနှစ် နိုဝင်ဘာလ ၈ ရက်နေ့တွင် ပြဋ္ဌာန်းခဲ့သည်။ဤဥပဒေ ပုဒ်မ (၂)(၁)တွင် ”အလုပ်သမား” ဆိုသောစကားရပ်တွင်အလုပ်ရှင်နှင့်ပဋိဉာဉ်ပြုလုပ်ခဲ့သူ၊သို့တည်းမဟုတ်ပဋိဉာဉ်အရ အလုပ်လုပ်ကိုင်နေဆဲ ဖြစ်သူကို ဆိုလိုသည်။

(က) အလုပ်ရှင်၏ စီးပွားရေး လုပ်ငန်းအတွက် မဟုတ်ဘဲ အခြားကိစ္စအတွက် ခေတ္တခဏ ခိုင်းစေခြင်း ခံရသူ၊

(ခ) အစိုးရ ဌာနကဖြစ်စေ၊ အစိုးရ ကိုယ်စားလှယ်ကဖြစ်စေ၊ လုပ်ကိုင်ဆောင်ရွက်သော စီးပွားရေးလုပ်ငန်း၊ သို့တည်းမဟုတ် စက်မှုလက်မှုလုပ်ငန်း၊ သို့တည်းမဟုတ် ကူးသန်းရောင်းဝယ်ရေးလုပ်ငန်း မှတပါး အခြား ကိစ္စအတွက် နိုင်ငံတော် အစိုးရက ခိုင်းစေခြင်းခံရသူ၊ ထို့ပြင်

(ဂ)၁၉၄၈ခုနှစ်လယ်ယာအလုပ်သမားအနည်းဆုံးအခကြေးငွေအက်ဥပဒေနှင့်သက်ဆိုင်သော အလုပ်သမား။ ဟူ၍ ဖော်ပြပါရှိပါသည်။

အနည်းဆုံး အခကြေးငွေ ကောင်စီများ ဖွဲ့စည်းခြင်း၊ ထိုကောင်စီများ၏ အရာရှိများနှင့် ကောင်စီများ ၏ ဆောင်ရွက်မှုများကို ပဌမ ဇယား (ပုဒ်မ ၈) တွင်လည်းကောင်း၊ စုံစမ်းရေးကော်မရှင် အဖွဲ့များ ဖွဲ့စည်းခြင်း၊ ကော်မရှင်အဖွဲ့၏ အရာရှိများနှင့် ကော်မရှင်အဖွဲ့များ၏ ဆောင်ရွက်မှုများကို ဒုတိယဇယား (ပုဒ်မ ၉) တွင် လည်းကောင်း ဖော်ပြထားသည်။ ဒုတိယဇယား အပိုဒ် (၁)တွင် ” စုံစမ်းရေး အဖွဲ့တွင် နိုင်ငံတော် သမ္မတက ခန့်ထားသူများ ပါဝင်ရမည်။ထိုသူများသည်-

(က)အလုပ်ရှင်အလုပ်သမားတို့နှင့်မသက်ဆိုင်သောပုဂ္ဂိုလ်များအနက် နိုင်ငံတော် သမ္မတက ရွေးချယ်သည့် သုံးဦးထက် မပိုသော သူများ။

(ခ) အလုပ်ရှင် ကိုယ်စားအဖြစ် နိုင်ငံတော် သမ္မတက ရွေးချယ်သည့် နှစ်ဦးထက် မပိုသော သူများ။

(ဂ) အလုပ်သမား ကိုယ်စားအဖြစ် နိုင်ငံတော် သမ္မတက ရွေးချယ်သည့် နှစ်ဦးထက် မပိုသော သူများ။”

ဟူ၍ ဖော်ပြထားသည်။

ပြဋ္ဌာန်း ဥပဒေများ၏ အခွင့်အရေးများကို မုချမသွေ အလုပ်သမား လယ်သမားများ ခံစားကြရပေမည်။ သို့သော်ခေတ်အဆက်ဆက် အစိုးရများက ဥပဒေသည် ဥပဒေပြဋ္ဌာန်းသူများ အတွက်သာ ပြဋ္ဌာန်းခြင်း ဖြစ်သည့်အလား ကြွေးကြော်လာခဲ့ကြသည်မှာ ယခုလောလောလတ်လတ် နအဖ စစ်အစိုးရလက်ထက်ထိပင် ဖြစ်သည်။ လက်တွေ့ ဖြစ်ပျက်နေသည်များကို တစေ့တစောင်းဖော်ပြရလျှင် မြန်မာနိုင်ငံရှိ အလုပ်သမား တဦး၏အနိမ့်ဆုံး လစာမှာ (တလ ၁၂,ဝဝဝ/ကျပ်) ဖြစ်ကာ အစိုးရ ဝန်ထမ်း တဦး၏ အနိမ့်ဆုံး လစာမှာ (တလ ၃ဝ,ဝဝဝ/ကျပ်) ဖြစ်နေသည်ကို ကွက်ကွက်ကွင်းကွင်း တွေ့နေရပေသည်။ လုံးဝ ငြင်းမရပါ။

ဦးဌေးဦး (လယ်ဆည် ဝန်ကြီး)ကတခွန်းတည်း ဖြေကြားသည်မှာ ဥပဒေ လုပ်ထုံး လုပ်နည်းများနှင့်အညီ ဆောင်ရွက်ခဲ့ပါသည် ဟူ၍သာ

အထက်ပါ ဥပဒေများအပြင် နောက်ဆုံး လက်ရှိတည်ဆဲ ဥပဒေဖြစ်သည့် ၁၉၆၃ ခုနှစ် သီးစား ချထားရေး ဥပဒေ နှင့် ၁၉၆၃ ခုနှစ် တောင်သူလယ်သမား အခွင့်အရေး ကာကွယ်သည့် ဥပဒေ များ၌ သီးစားခကို ငွေဖြင့်သာ ပေးရမည်။(၆၃ သီးစားချထားရေးဥပဒေပုဒ်မ၄(၃)ဟုဖော်ပြထားသည်။၁၉၆၃ ခုနှစ် တောင်သူလယ်သမား အခွင့်အရေး ကာကွယ်သည့် ဥပဒေ ပုဒ်မ ၃(၁)(က)တွင် ”လယ်ယာမြေကိုသော်၎င်း၊ လယ်ယာမြေ လုပ်ကိုင်ရာ၌ အသုံးပြုသည့် ကျွဲ၊ နွားနှင့်ကိရိယာ တန်ဆာပလာ၊ ထွန်စက်နှင့် ကိရိယာတန်ဆာပလာ၊ အခြားသက်ရှိ သက်မဲ့ ကိရိယာတန်ဆာပလာများကိုသော်၎င်း၊ လယ်ယာမြေမှ ထွက်သောပစ္စည်းများကိုသော်၎င်း၊ ဝရမ်းကပ်ခြင်း၊သိမ်းဆည်းခြင်း မပြုရ။” (ခ) တွင် “လယ်ယာမြေကို မလုပ်ကိုင်ရဟုသော်၎င်း ၊ လယ်ယာမြေထဲသို့ မဝင်ရ ဟုသော်၎င်း တားဆီးခြင်းမပြုရ။” ဟူ၍ အတိအလင်း ပြဋ္ဌာန်းထားပါသည်။

တရားဥပဒေ ကိုလေးစားလိုက်နာပြီး တရားဥပဒေပါ အခွင့်အရေး များကို လယ်သမား ၊ အလုပ်သမားများ ရရှိခံစားခွင့် ရှိပါသလား။ ယခုကျင်းပခဲ့သော ပြည်သူ့လွှတ်တော် (၉ -၃ -၂ဝ၁၁) နေ့တွင် ဦးအောင်ခင် (ပုဇွန်တောင်၊မဲဆန္ဒနယ်) နှင့် ဦးရဲထွန်း (သီပေါ မဲဆန္ဒနယ်) တို့ “လယ်သမားများ ၏ လယ်မြေများကို လျော်ကြေးငွေဖြင့်သိမ်းယူခြင်း၊ စက်ရုံတည်ဆောက်ရန် သိမ်းယူခြင်း ကိစ္စများကို ဖြေရှင်းပေးရန်ရှိမရှိ” မေးခွန်းနှင့်“ကုမ္ပဏီများ၏လျော်ကြေးအနည်းငယ်ပေးသိမ်းယူမှု၊လယ်လုပ်သူတိုင်း လယ်လုပ်ပိုင်ခွင့်သာရှိ၊လယ်လုပ်သူတိုင်း လယ်ပိုင်ခွင့် မရှိခြင်း၊ လယ်သမားများ လယ်ယာမြေပိုင်ဆိုင်ခွင့်ကို အာမခံချက်ပေးရန် ဥပဒေပြဋ္ဌာန်းပေးနိုင်ခြင်း ရှိမရှိ” မေးခွန်းများကို မေးမြန်းခဲ့ ကြသည်ကို တွေ့ရှိရပါသည်။ ဦးဌေးဦး (လယ်ဆည် ဝန်ကြီး)က တခွန်းတည်း ဖြေကြားသည်မှာ ဥပဒေ လုပ်ထုံး လုပ်နည်းများနှင့်အညီ ဆောင်ရွက်ခဲ့ပါသည် ဟူ၍သာဖြစ်သည်။ ဤစကား ကို ကြားရရုံ ဖြင့် စည်းမဲ့ကမ်းမဲ့ နိုင်ငံနှင့်အဝှမ်း လယ်သမားများထံမှ လယ်မြေများကို မတရားသိမ်းဆည်း ထားခြင်းကြောင့် အိုင်အယ်အိုက ပါဝင်ဆောင်ရွက်နေရသည်ကို နိုင်ငံတကာ မှာ သက်သေခံ အထောက်အထားများ ရောက်ရှိနေပါလျက်သားနှင့် အလိမ်အညာ လည်ဆယ် ဖြေကြားခဲ့သော ကြောင့် အုတ်အော်သောင်းနင်း ဖြစ်ကုန်ပါသည်။ လည်ဆယ် ဝန်ကြီး ဦးဌေးဦးကြောင့် ပြည်သူ့လွှတ်တော် တခုလုံး ပြည်သူလူထုကို လိမ်ညာနေကြောင်း မတော်မတရား ဥပဒေတွေ ထွက်ပေါ်လာတော့မည် ဖြစ်ကြောင်း သိနေကြပေပြီ။

အလုပ်သမား၊ လယ်သမား တည်းဟူသော မြင်းမိုရ်တောင်ကြီးကို မဖြစ်စလောက် လွှတ်တော်များက ဇီးစေ့နှင့် ပေါက်၍ ရွေ့နိုင်ပါမည်လော။

ဦးမျိုး (ဥပဒေ)

ဒေါက်တာတူးဂျာ ကြံ့ဖွံ့ပါတီဝင်ရန် ကြိုးပမ်း

ဖနိဒါ အင်္ဂါနေ့၊ မတ်လ ၂၉ ရက် ၂၀၁၁ ခုနှစ် ၁၅ နာရီ ၄၆ မိနစ် .

ချင်းမိုင်(မဇ္စျိမ)။ ။ ကချင်လွတ်မြောက်ရေးအဖွဲ့KIOမှနုတ်ထွက်ကာ၂ဝ၁ဝရွေးကောက်ပွဲဝင်ရန် ကချင်တိုးတက်ရေးပါတီ KSPP ကို ဦးဆောင်ဖွဲ့စည်းခဲ့သူ ဒေါက်တာတူးဂျာက ကြံ့ခိုင်ရေးနှင့် ဖွံ့ဖြိုးရေးပါတီ USDP သို့ ဝင်ရောက်ရန်အတွက် လျှောက်လွှာတင်ထားသည်။

ရွေးကောက်ပွဲဝင်ရန် အားခဲခဲ့သော သူ၏ KSPPပါတီသည် ကချင်ပြည်နယ်ရှိ မြို့နယ် ၁၈ ခုတွင် ပါတီရုံးများ ဖွင့်လှစ်ခဲ့သလို၊ အဖွဲ့ဝင်၎ဝဝဝကျော်လည်း စုစည်းနိုင်ခဲ့သည်။ သို့သော် ရွေးကောက်ပွဲကော်မရှင်က KSPP ခေါင်းဆောင်များသည် KIO နှင့် ဆက်စပ်မှုရှိသည်ဟု စွပ်စွဲကာ ပါတီထောင်ခွင့် ပိတ်ပင်ခဲ့သည်။

ထို့နောက် ဒေါက်တာတူးဂျာ အပါအဝင် အဖွဲ့ဝင် ၁၄ ဦးက တသီးပုဂ္ဂလအဖြစ် ရွေးကောက်ပွဲဝင်ရန် ထပ်မံကြိုးစားခဲ့သော်လည်း ယှဉ်ပြိုင်ခွင့် ပယ်ချခံခဲ့ရပြန်သည်။

ကြံ့ခိုင်ဖွံ့ဖြိုးရေးပါတီထဲဝင်ရောက်ရန်စာတင်ထားခြင်းနှင့်ပတ်သက်၍ဒေါက်တာတူးဂျာကို မဇ္ဈိမသတင်းထောက် ဖနိဒါက ဆက်သွယ်မေးမြန်းထားပါသည်။

ကြံ့ခိုင်ဖွံ့ဖြိုးရေးပါတီထဲ ဝင်ဖို့ ဘယ်တုန်းက စာတင်ခဲ့တာလဲရှင့်။

“လွန်ခဲ့တဲ့ဖေဖော်ဝါရီလထဲမှာပါ။ရက်အတိအကျ မမှတ်မိတော့ဘူး။ အန်ကယ်ကိုယ်တိုင် စာသွားတင်တာပါ’’

အန်ကယ်နဲ့အတူ တခြားလုပ်ဖော်ကိုင်ဘက်တွေရော ပါသေးလား။

“ကျနော်နဲ့အတူအဖွဲ့အစည်း(KIO-ကချင်လွတ်မြောက်ရေးအဖွဲ့)ကထွက်လာတဲ့တခြားပုဂ္ဂိုလ်တွေကတော့ မပါပါဘူး။ ကျနော်တယောက်ထဲပါ။ ပါတယ်ဆိုတာလည်း မကြားဘူးနော်။ကျနော်တို့အချင်းချင်းလည်း ဆက်သွယ်ရေးမရကြဘူးလေ။ဒါကြောင့်မလို့ဒီသတင်းနဲ့ပတ်သက်ပြီးတော့မှ ရှင်းလင်းတင်ပြချင်တာကတော့ကျနော်တယောက်ထဲပါ၊တခြားလူတွေမပါပါဘူး။ကျနော်ကလည်း စေတနာသန့်သန့်နဲ့ သဘောထား ဖြူဖြူစင်စင်နဲ့ လုပ်ဆောင်တယ်ဆိုတာ မီဒီယာကို ရှင်းပြချင်ပါတယ်’’

ဘာကြောင့်မို့ ကြံ့ဖွံ့ပါတီထဲဝင်ဖို့ ဆုံးဖြတ်ရတာလဲရှင့်။

“အစောပိုင်းကတည်းကနေ၊ပြီးခဲ့တဲ့ညီလာခံတက်ပြီးတဲ့နောက်ပေါ်ပေါက်လာမယ့်အခြေခံ ဥပဒေသစ်အသွင် ဆောင်ရွက်သွားမယ့် နိုင်ငံရေးအခင်းအကျဉ်းမှာ ပါဝင်လုပ်ဆောင်ချင်တဲ့ ဆန္ဒရှိခဲ့တယ်။ အဲဒါကြောင့်မလို့ ဒီအဖွဲ့အစည်း(KIO)ကနေလည်းအပြီးအပိုင်နုတ်ထွက်ပြီးတော့မှဒီဥပဒေဘောင်ထဲကနေ မြို့ပေါ်ရောက်လာတယ်။လုပ်ဖော်ကိုင်ဘက်တွေနဲ့ပါတီတရပ်ထောင်ကြည့်တယ်။ ဒါပေမဲ့ အဆင်မပြေခဲ့ဘူး။ ပါတီကလည်း မရပ်တည်နိုင်ခဲ့ဘူး။ အဲဒါကြောင့် ကျနော့်အနေနဲ့ နိုင်ငံရေး ဆက်လုပ်နိုင်တဲ့ နည်းလမ်းကို ရှာပါတယ်။ တိုင်းပြည်ရဲ့ လက်ရှိ အခြေအနေမှာ နိုင်ငံရေးအရ အခြေခံကျကျ ပြောင်းလဲမှု ပေးရမယ်။ လွှတ်တော်တွေ ပေါ်လာတယ်။ ပါတီစုံစနစ်၊ ဈေးကွက် စီးပွားရေးစနစ်၊ အာဏာလွှဲပြောင်းပေးဖို့ စနစ်တွေ ပြည်ထောင်စုပုံစံ ဖြစ်လာတယ်။ ဒါကို ကျနော်က သဘောကျတယ်။ ကြိုက်နစ်သက်တယ်’’

“ဒါကြောင့်မလို့ ဒီအတိုင်း တလှမ်းချင်းလှမ်းသွားတဲ့ ခရီးစဉ် နိုင်ငံရေးအခင်းအကျဉ်းမှာ အတတ်နိုင်ဆုံး ပါဝင်လှုပ်ရှားချင်တာပေါ့ဗျာ။ ဒါကြောင့် ပါတီဖွဲ့စည်းဖို့ မရတဲ့နောက်ပိုင်းမှာ နိုင်ငံရေးကို ဆက်လုပ်ချင်တယ်ဆိုရင် နည်းလမ်းက ဖွဲ့စည်းထားတဲ့ ပါတီတရပ်ရပ်မှာ ပါဝင်လှုပ်ရှားဖို့ပဲ ကျန်တော့တာပေါ့ဗျာ။ အဲဒီလိုဖြစ်တဲ့အခါကျတော့ လက်တွေ့ကျကျ လုပ်ဆောင်နိုင်မယ့် ပါတီက ကြံ့ခိုင်ရေးပါတီပဲ ဖြစ်တယ်။ ဒါကြောင့် ကျနော်က ဒီတိုင်းကျိုးပြည်ကျိုးကို တတ်နိုင်သလောက် သယ်ပိုးနိုင်ဖို့ဆိုရင်၊ လက်တွေ့လုပ်ဖို့ဆိုရင် ဒီလိုလုပ်မှ ဖြစ်တော့မယ် ဆိုတဲ့ သဘောထား ခံယူချက်နဲ့ ကြံ့ခိုင်ဖွံ့ဖြိုးရေးပါတီမှာ လျှောက်ထားပါတယ်။ လျှောက်တာကတော့ မြို့မိမြို့ဖအနေနဲ့ ပါဝင်လှုပ်ဆောင်သွားဖို့ပါ’’

ဝင်ခွင့်ရလိမ့်မယ်လို့ ယူဆသလားရှင့်။

“ဒါကတော့ မပြောတတ်ဘူး။ လူကြီးတွေရဲ့ ဆုံးဖြတ်ချက်အပေါ် မူတည်မှာပါ။ ဒါက မြို့မိမြို့ဖလို သူတို့နဲ့ ပူးပေါင်းလိုက်တယ်ဆိုတဲ့ သဘောပေါ့။ ဘာဖိအားမှ မရှိပါဘူး။ ဘာမက်လုံး ဘာမှ မရှိပါဘူး’’

ကြံ့ဖွံ့ပါတီဝင်ပြီးတော့စစ်အစိုးရနဲ့KIOအကြားဖြစ်နေတဲ့နိုင်ငံရေးပြသာနာတွေကိုဖြေရှင်းပေးဖို့ စိတ်ကူးလား။

“ဒီကိစ္စကတာဝန်ယူလုပ်ဆောင်နိုင်မလားဆိုတာမပြောနိုင်သေးဘူး။ ဒါပေမဲ့ အန်ကယ် သဘောထားတခုက - အခုခေတ်ကာလမှာ အသွင်ကူးပြောင်းရေးကို အလေးအနက်ထား စဉ်းစားစေချင်တယ်။ လက်နက်ကိုင် အဖွဲ့တွေကိုပေါ့။ တနည်းနည်းနဲ့တော့ အသွင်ကူးပြောင်းရေးကို အဆင်ပြေစေချင်တယ်။ ဒီသဘောထားတခုပဲ ရှိပါတယ်။ စစ်အစိုးရနဲ့ အဆင်ပြေမယ့် နည်းလမ်းကို ရှာစေချင်တယ်လေ။ အသွင်ကူးပြောင်းရေးကို လက်ခံသွားနိုင်အောင် ကြိုးစားစေချင်တယ်။ တခြားနည်းလမ်းတော့ မရွေးစေချင်ဘူး’’

ဒီပါတီထဲကနေပြီးကချင်ပြည်သူ့အရေးမှာဘယ်လိုကဏ္ဍတွေလုပ်ပိုင်ခွင့်ရလာမယ်လို့ ထင်ထားလဲ။

“အဲဒါနဲ့ ပတ်သက်ပြီးတော့ အတိအကျပြောလို့ မရဘူး။ ဒီလိုပဲ နေမယ်ဆိုရင် အန်ကယ့်စိတ်ထဲမှာရှိတာ ဘာတခုမှ တိုင်းကျိုးပြည်ကျိုးကို မယ်မယ်ရရ အကောင်အထည် ဖော်နိုင်မယ့် အလားအလာ မရှိဘူးလေ။ ဒါကြောင့် ပါတီတရပ်ရပ်မှာ ပါပြီးတော့မှ ဒီပါတီနဲ့အတူ တထောင့်တနေရာမှာ လုပ်ဆောင်ခွင့် ရလာမယ်ဆိုရင်တော့ အန်ကယ့်စိတ်ထဲမှာ ရှိတဲ့၊ လုပ်ဆောင်သင့်တဲ့ လုပ်ငန်းစဉ်တွေကို အတတ်နိုင်ဆုံး ကြိုးစားပြီး အကောင်အထည် ဖော်မှာပေါ့။ ပြည်သူလူထုအတွက် ဒီအတိုင်း နေနေမယ့်အစား နည်းလမ်းတွေ ရှာပြီးတော့မှ လုပ်သွားရင် ကောင်းမွန်မယ်လို့ ယူဆလို့ လုပ်ဆောင်နေတာ ဖြစ်ပါတယ်’’

KIO ရဲ့ သဘောထားက ဘယ်လိုရှိမယ်လို့ ထင်လဲ။

“မသိဘူး။ ဒါက သူတို့အပိုင်းပဲ။ အန်ကယ်က သူတို့နဲ့ ကင်းကွာသွားတယ်။ အရင်ကတော့ ဟုတ်ပါတယ်။ နုတ်ထွက်လိုက်တဲ့ နောက်ပိုင်းတော့ အန်ကယ်နဲ့ တိုက်ရိုက်အဆက်အသွယ်လည်း လုံးဝ မရှိတော့ဘူး’’

ကချင်ပြည်သူတွေကကော အန်ကယ်အပေါ် ဘယ်လိုသဘောထားရှိကြလဲ။

“နားလည်မှုအမျိုးမျိုး ရှိလာနိုင်တယ်။ အဆိုးကြီးတော့ မတွက်ထားပါဘူး။ အားလုံးလည်း နိုင်ငံရေးကို နားလည် သဘောပေါက်ဖို့လိုတယ်။ ဒါကြောင့် လက်တွေ့ကျကျ လုပ်ဆောင်နေတယ်ဆိုတာကို အများစုက အကောင်းမြင်မယ်လို့ ထင်ပါတယ်။ ပြည်သူလူထုအတွက် လုပ်မှာပါ။ ပြည်သူလူထုက အန်ကယ့်အပေါ် ဘယ်လောက်ထိ ခွင့်ပြုမလဲ၊ လမ်းဖွင့်မလဲဆိုတဲ့ အပေါ်မှာလည်း မူတည်ပါတယ်’’

တခြား ဘာများ ပြောချင်ပါသေးလဲ။

“ထူးထူးခြားခြားပြောဖို့တော့မရှိဘူး။အန်ကယ်လည်းသေချာစဉ်းစားကြည့်ပြီးတော့မှ နိုင်ငံရေးကို ဆက်လက် ရှင်သန်စေချင်တယ်။ နောက်ပြီးတော့လက်ရှိဖြစ်ပေါ်နေတဲ့နိုင်ငံရေးကိုထောက်ခံသွားစေချင်တယ်။ ဒါကြောင့်မလို့ ဒီခေတ်သစ် နိုင်ငံရေးအခင်းအကျင်းတခုကိုတွန်းအားတခုအနေနဲ့ ပူးပေါင်းဆောင်ရွက်ချင်တဲ့ ဆန္ဒရှိတယ်။ ဒါကြောင့်မလို့ အခုလက်ရှိ အခြေအနေမှာတော့ လက်တွေ့ကျကျ လုပ်မယ်ဆိုရင် ဒီနည်းလမ်းနဲ့ ဖြစ်နိုင်တယ်ဆိုပြီး ထင်မြင်ယူဆပြီးတော့ လုပ်ဆောင်ခဲ့တာဖြစ်တယ်။ အားလုံးလည်း နားလည်သဘောပေါက်ပေးကြဖို့လည်း လိုလားပါတယ်လို့ ပြောချင်ပါတယ်’’

ရှမ်းပြည် ငလျင်သင့်ဒေသသို့ ကူညီမည်ဟု NLD ပြော

ကျော်ခ တနင်္လာနေ့၊ မတ်လ ၂၈ ရက် ၂၀၁၁ ခုနှစ် ၂၀ နာရီ ၃၁ မိနစ် .

ချင်းမိုင်(မဇ္ဈိမ)။ ။ ရှမ်းပြည်နယ်အတွင်း ငလျင်ဒဏ်ခံရသည့် ဒေသများသို့ အမျိုးသားဒီမိုကရေစီအဖွဲ့ချုပ် NLD က သွားရောက်ကူညီမည်ဟု ပါတီပြောခွင့်ရ ဦးအုန်းကြိုင်က ပြောသည်။

ပြင်းအားအဆင့် ရစ်ချက်စကေး ၆.၈ ရှိ ငလျင်ကြောင့် တာလေ၊ ကျကူနီ၊ မိုင်းလင်း၊ တာချီလိတ်နှင့် နားယောင်းတွင် လူဦးရေ ၁၅ဝ ကျော် သေဆုံးခဲ့ပြီး၊ လူဦးရေ ထောင်ချီကာ အိုးအိမ်ပျက်စီး ဆုံးရှုံးခဲ့ရသည့် ဒေသခံများ၏ စားဝတ်နေရေးနှင့် ဆေးဝါးများ ကူညီသွားနိုင်ရန် မတ်လ ၂၉ ရက် အင်္ဂါနေ့တွင် ပြုလုပ်မည့် ဗဟိုအလုပ်မှု ဆောင်အစည်းအဝေး၌ စီမံခန့်ခွဲသွားမည်ဟု သိရခြင်း ဖြစ်သည်။

တာလေမြို့နယ် မိုင်းလင်းရွာမှ ငလျင်ကြောင့် ပြိုပျက်သွားသည့် ဘာသာရေးအဆောက်အအုံများကို တွေ့မြင်ရစဉ်။ (ဓာတ်ပုံ-မဇ္ဈိမ)

“ငလျင်ဒဏ်ခံလိုက်ရတဲ့ ဒေသတွေကို စားဝတ်နေရေး၊ ဆေးဝါးနဲ့၊ လိုအပ်တဲ့ အကူအညီတွေ ပေးနိုင်အောင် ကျနော်တို့ စီစဉ်နေပါတယ်။ ဒါနဲ့ပတ်သက်ပြီး တိုင်းနဲ့ ပြည်နယ်မှာ ရှိတဲ့ NLD ရုံးတွေကို အကူအညီတွေ ပေးနိုင်ကြဖို့အတွက် ဒီနေ့ စာထုတ်ပြီး ပို့ပါတယ်” ဟု ဦးအုန်းကြိုင်က မဇ္ဈိမကို ပြောသည်။

ငလျင်သင့် ဒုက္ခသည်များကို အနီးပတ်ဝန်းကျင်ရှိ မြို့နယ်များမှ လူမှုရေး ဘာသာရေး အသင်းအဖွဲ့များ၊ စီးပွားရေး လုပ်ငန်းရှင်များ၊ အစိုးရဝန်ထမ်းများက ကူညီနေသော်လည်း လိုအပ်ချက် များစွာရှိနေကြောင်း ငလျင်ထိဒေသများသို့ သွားရောက်ကူညီသည့် လူမှုကူညီရေးအဖွဲ့များက ဆိုသည်။

ထို့ပြင် ယခုအခါ ရာသီဥတု အအေးဒဏ်ကို ငလျင်ဘေးဒုက္ခသည်များ ခံစားနေကြရသလို ငလျင်အသေးစားများ နေ့စဉ် လှုပ်ခတ်နေသဖြင့် ဒေသခံများမှာ ကြောက်လန့်နေကြသည်ဟု ဒေသတွင်း ကွင်းဆင်း၍ ကူညီနေသည့် ရှမ်းတိုင်းရင်းသားများ ဒီမိုကရက်တစ်ပါတီ SNDP ခေါ် ကျားဖြူပါတီ၏ အရှေ့ပိုင်း ဥက္ကဋ္ဌ ဒေါ်နန်းငွေမြက ပြောသည်။

“ရှင်းရှင်းပြောရရင်ဖြစ်တဲ့ နေရာတိုင်းမှာ အကုန်လုံး လိုနေတယ်လို့ပဲ ပြောရမှာပဲရှင့်။ ဘာဖြစ်လိုလဲဆိုတော့ ဖြစ်တုန်းက တချို့ရွာတွေက အိမ်တော်တော်များများ ပြိုကျကုန်တာဆိုတော့ နေစရာမရှိဘူး။ အပြင်မှာ တဲထိုးနေတာ။ အခုလောလောဆယ်တော့ အစားအသောက်၊ အနွေးထည်၊ စောင်နဲ့ နေရာထိုင်ခင်း အရေးပေါ်လိုမယ်” ဟု သူက မဇ္ဈိမကို ပြောသည်။

ပုဂ္ဂလိကအလှူရှင်များမှလာရောက်လှူဒါန်းသည့်ထောက်ပံ့ရေးပစ္စည်းများနှင့်အတူ မိုင်းလင်းရွာ ဒေသခံများအား တွေ့မြင်ရစဉ်။ (ဓာတ်ပုံ-မဇ္ဈိမ)

ထို့ပြင် ငလျင်ဒဏ် နောက်ထပ်ကြုံတွေ့မည်ကို စိုးရိမ်ကြသည့် မိသားစုများမှာ နီးစပ်ရာ အဖွဲ့များ စုဖွဲ့၍ တာလေမြို့နှင့် ၁ဝ မိုင်ကွာ အပြင်ဘက်သို့ ထွက်ခွါသွားကာ နေထိုင်ကြသဖြင့် ၎င်းတို့အတွက် ထမင်းထုပ်နှင့် အကူအညီများ ပေးဝေရန် ခက်ခဲသည်ဟု ဆိုသည်။

ယနေ့မနက်တွင် ကျားဖြူပါတီ၏ ဥက္ကဋ္ဌ ဦးအိုက်ပေါင်းက ငလျင်ဘေးကူညီရန်အတွက် ပါတီတာဝန်ရှိသူများခေါ်ယူ၍ အလှူခံပြီး ကျပ် ၁ဝ သိန်းနှင့် အဝတ်အထည်များ ပို့ပေးလိုက်ပြီဟု SNDP တာဝန်ရှိသူများက ပြောသည်။

NDL ကလည်း တနင်္လာနေ့တွင် ပြည်နယ်နှင့် တိုင်းများရှိ ပါတီရုံးခွဲများသို့ စာပို့ထားသဖြင့် တပတ်အတွင်း အကူအညီလိုသည့် ကျေးရွာနှင့် မြို့များသို့ သွားရောက်ကူညီမည်ဟု တောင်ကြီးမြို့နယ် NLD အထွေထွေ အတွင်းရေးမှူး ဒေါ်ခင်မိုးမိုးက ပြောပြသည်။

“ကျမတို့ကတော့ အစားအသောက်၊ ဆေးဝါးနဲ့ အမိုးအကာတွေကို အဓိကထားပြီး ကူညီသွားဖို့ ရှိပါတယ်။ နောက်ပိုင်းမှာလည်း အခြေအနေအရ နိုင်ရင် နိုင်သလို ကူညီသွားမှာပါ” ဟု သူက မဇ္ဈိမကို ပြောသည်။

ငလျင်ဖြစ်ပွားရာဒေသရှိ ကျိုင်းတုံနှင့် တာချီလိတ် မြို့များတွင် NLDရုံးခွဲများရှိပြီး ထိုရုံးခွဲ တာဝန်ရှိသူများကလည်း ကွင်းဆင်း၍ ထမင်းထုပ်များနှင့် ဆေးဝါးများ ကူညီနေသည်ဟု ယင်းမြို့နယ် ၂ မြို့နယ်ရှိ NLD တာဝန်ရှိသူများက မဇ္ဈိမကို ပြောပြကြသည်။

အဂတိလိုက်စားမှု တိုက်ဖျက်ရန် အစိုးရသစ်အဖွဲ့ကိုပြော

မဇ္ဈိမသတင်းဌာန တနင်္လာနေ့၊ မတ်လ ၂၈ ရက် ၂၀၁၁ ခုနှစ် ၂၁ နာရီ ၃၂ မိနစ် .

ချင်းမိုင်(မဇ္စ္ဈိမ)။ ။အဂတိလိုက်စားမှု ပြဿနာ တိုက်ဖျက်ရန် မြန်မာ စစ်ခေါင်းဆောင် ဗိုလ်ချုပ်မှူးကြီး သန်းရွှေက ရွေးကောက်ခံ အစိုးရသစ် ဝန်ကြီးများကို အကြံပေးခဲ့သည်ဟု နေပြည်တော်မှလာသော သတင်းတရပ်က ဆိုသည်။

အသက် ၇၈ နှစ်ရှိ နအဖအကြီးအကဲ၏ နေပြည်တော်ရှိ စစ်ဌာနချုပ်တွင် စနေနေ့က နှုတ်ဆက် မိန့်ခွန်းတွင် မြန်မာနိုင်ငံ၏ ဂျီဒီပီ (GrossDomesticProduct-နိုင်ငံ၏ နှစ်စဉ် ထုတ်ကုန်နှင့် ဝန်ဆောင်မှု တန်ဖိုး စုစုပေါင်း)သည် လာအိုနှင့် ကမ္ဘေ္ဘာဒီးယားနိုင်ငံ တို့ အောက်သို့ပင် နိမ့်ကျနေကြောင်း ပထမဆုံးအကြိမ် ၀န်ခံမှုပြုသွားပြီး လာဘ်ပေးလာဘ်ယူမှုပပျောက်အောင် လုပ်ရမည်ဟု ထဲ့သွင်းပြောဆိုသွားသည်။

နိုင်ငံတော်သမ္မ္မတအဖြစ် ရွေးကောက်ခံထားရသည့် ဦးသိန်းစိန်အား အာဏာလွှဲပေးမည့် ရက်ကိုမူ ယခုအချိန်အထိ အတိအကျ မထုတ်ပြန်သေးပေ။ ၀န်ကြီးများလိုအပ်လျှင် လာရောက်တွေ့ဆုံနိုင်ကြောင်းလည်း တပ်မတော်နေ့က ညစာစားပွဲအခမ်းအနားတက်ရောက်ခဲ့သော ကာကွယ်ရေးဦးစီးချုပ်လည်းဖြစ်သူ ဗိုလ်ချုပ်မှူးကြီးသန်းရွှေက ဖိတ်ကြားသွားခဲ့သည်။

အစိုးရနှင့် နီးစပ်သော သတင်းတခုက အစိုးရသစ် ဝန်ကြီးအဖွဲ့သည် မတ်လ ၂၉ ရက် အင်္ဂင်္ါနေ့တွင် ကျမ်းသစ္စ္စာ ကျိန်ဆိုကြမည်ဟု ဆိုသည်။ သို့သော် အရင်ရက်များက လွှတ်တော်အမတ်များက ခန့်မှန်းရာတွင် အစိုးရအဖွဲ့သစ်သည် ဧပြီလ ပထမ အပတ်ထဲတွင် အာဏာရယူလိမ့်မည်ဟု ဆိုသည်။

TransparencyInternationalအဖွဲ့၏၂၀၀၉ခုနှစ်အဂတိလိုက်စားမှုအညွှန်းကိန်း(CPI)တွင် အဂတိလိုက်စားမှုအမြင့်ဆုံး စာရင်း၌ ဆိုမာလီယာ နိုင်ငံပြီးလျှင် မြန်မာနိုင်ငံသည် အာဖဂန် နစ္စ္စတန်နှင့်အတူ ပူးတွဲ ဒုတိယ နေရာ၌ ရှိနေသည်။

စာပေစိစစ်ရေးမူသစ်ကျင့်သုံးမည်

ဖနိဒါ တနင်္လာနေ့၊ မတ်လ ၂၈ ရက် ၂၀၁၁ ခုနှစ် ၁၉ နာရီ ၃၅ မိနစ် .

ချင်းမိုင်(မဇ္စျိမ)။ ။ မြန်မာနိုင်ငံတွင် လက်ရှိ ကျင့်သုံးနေသော ပုံနှိပ်ထုတ်ဝေရေးမူဝါဒကို လာမည့် အစိုးရသစ် လက်ထက်တွင် ဖွဲ့စည်းပုံအခြေခံ ဥပဒေနှင့်အညီ အဆင့်လိုက် လျှော့ပေးသွားရန် ရှိသည်ဟု စာပေစိစစ်ရေးဌာန တာဝန်ခံ ဦးတင့်ဆွေက ပြောကြောင်း ဖလားဝါးနယူးစ် ဂျာနယ်တွင် ဖော်ပြထားသည်။

“ဖွဲ့စည်းပုံ အခြေခံဥပဒေသစ်နဲ့အညီ လက်ရှိတင်းကျပ်ထားတဲ့ ပုံနှိပ်ထုတ်ဝေမူ ဝါဒတွေကို အဆင့်လိုက် ဖြေလျှော့ လိုက်လျောသွားမှာပါ၊ အခု လိုက်လျောမှု ပြုလိုက်တဲ့အဆင့်ကိုလဲ အစိုးရသစ်က စပြီးလုပ်ပါတော့ ဆိုတဲ့နေ့မှာ အကောင်အထည် ဖော်သွားမှာ ဖြစ်ပါတယ်။ လွတ်လပ်မှုနဲ့အတူ တာဝန်ယူမှုတွေပါ ပါလာမယ်ဆိုတာ အထူးဂရုပြုရမှာဖြစ်ပါတယ်”ဟု ပြန်ကြားရေးဝန်ကြီးဌာန ဒုညွန်ကြားရေးမှူးချုပ်၊ စာပေစိစစ်ရေးဌာန တာဝန်ခံ ဦးတင့်ဆွေ၏ ပြောစကားကိုလည်း ဖော်ပြထားသည်။

စာပေစိစစ်ရေးတင်ရန် မလိုတော့ဘဲ တည်းဖြတ်ထုတ်ဝေသူများ လိုက်နာ ကျင့်သုံးရမည့် စံသဘောမျိုး သက်ဝင်သွားမည်ဟုလည်း ပြောဆိုထားသည်။

၂ဝဝ၈ဖွဲ့စည်းပုံအခြေခံဥပဒေပုဒ်မ၃၅၄(က)တွင် နိုင်ငံသားတိုင်းသည် နိုင်ငံတော်၏ လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်းသာယာရေး သို့မဟုတ် ပြည်သူတို့၏ ကိုယ့်ကျင့်တရားအကျိုးငှာ ပြဋ္ဌာန်းထားသည့် ဥပဒေများနှင့် မဆန့်ကျင်လျှင် မိမိ၏ ယုံကြည်ချက် ထင်မြင်ယူဆချက်များကို လွတ်လပ်စွာ ထုတ်ဖော်ပြောဆိုခွင့်၊ ရေးသားဖြန့်ဝေခွင့် ရှိကြောင်း ဖော်ပြထားသည်။

ထိုပြင် တိုင်းရင်းသားလူမျိုးတမျိုးနှင့် တမျိုး သို့မဟုတ် တိုင်းရင်းသားလူမျိုး အချင်းချင်းကို လည်းကောင်း၊ အခြား ဘာသာသနာကို လည်းကောင်း ထိခိုက်နစ်နာမှု မရှိစေဘဲ မိမိချစ်ခင် မြတ်နိုးသည့် စာပေကို လွတ်လပ်စွာ ဆောင်ရွက်ပိုင်ခွင့်ရှိကြောင်း ပါရှိသည်။

ဂျာနယ်နှင့် မဂ္ဂ္ဂဇင်းများမှ အားကစား၊ အနုပညာ၊ သုတရသ၊ ကျန်းမာရေး၊ ကလေး၊ ဂမ္ဘီရ၊ နည်းပညာ စသည့် အမျိုးအစားများနှင့် ဂျာနယ်ပေါင်း ၁၇၂ စောင်ထဲမှ ၈၄ စောင်၊ မဂ္ဂ္ဂဇင်း ၁၈၄ စောင်မှ ၁၁၃ စောင်ကို စာပေစိစစ်ရေးနှင့် မှတ်ပုံတင်ဌာနသို့ စာမူကြမ်းများ ကြိုတင် မစိစစ်ဘဲ ထုတ်ဝေခွင့်ရတော့မည် ဖြစ်သည်။

ထို့ပြင် အထွေထွေ ထုတ်ဝေခွင့်ဖြစ်သော စာမူများ၊ လုံးချင်းဝတ္ထုများ၊ ပုံပြင်နှင့် ရုပ်ပြစာအုပ်များကိုလည်း ကြိုတင်စိစစ်ရေး တင်စရာမလိုတော့ကြောင်း စာပေစိစစ်ရေးနှင့် မှတ်ပုံတင်ဌာနက ပြီးခဲ့သည့် အပတ်က ပြောသည်ဟု ဆိုသည်။

သို့သော် ပုံနှိပ်ပြီးစာစောင်နှင့် စာအုပ်များကိုမူ စာပေစိစစ်ရေးသို့ တင်ပြရမည် ဖြစ်ပြီး ထုတ်ဝေသူ၊ ပုံနှိပ်သူများသည် တရားဝင်မှတ်ပုံတင်ရရှိထားကြသူများဖြစ်ရန် လိုပြီး ထုတ်ဝေသူနှင့် ပုံနှိပ်သူများအကြား လုပ်ငန်းအပ်နှံမှု စာချုပ်များ ချုပ်ဆိုထားရန် လိုအပ်သည်ဟု သိရသည်။

စာပေစိစစ်ရေးက နိုင်ငံရေး သတင်းဂျာနယ်များကိုလည်း တဆင့်ပြီးတဆင့် ထုတ်ဝေခွင့် ပြုလာနိုင်သည်ဟု မြန်မာနိုင်ငံ စာပေနှင့် စာနယ်ဇင်းအတွင်းရေးမှူး ကိုကို(စက်မှုတက္ကသိုလ်)က သုံးသပ်ပြောဆိုသည်။

“လူတွေက စာပေစိစစ်ရေး မတင်ချင်ဘူး။ မဖြတ်ချင်ဘူးလို့ ပြောနေကြတာကိုး။ ဒါတွေ စဖြစ်တယ်ဆိုတော့ ဝမ်းသာစရာ ကြိုရမှာဖြစ်တယ်။ အစိုးရသစ်လက်ထက်မှာ အပြောင်းအလဲကြီးတခုပေါ့။ ဒါပေမဲ့ သတင်းဂျာနယ်နဲ့စီးပွားရေးဂျာနယ်တွေမပါသေးဘူး။ဂျာနယ်တွေလဲတချိန်ချိန်တော့ ဒီအခွင့်အရေးရလိမ့်မယ်လို့ ထင်ပါတယ်”

စာပေစိစစ်ရေးထံ ပထမဆုံး တင်ပြပြီး စိစစ်တည်းဖြတ်ပြီးမှ ထုတ်ဝေကြပြီး မူဝါဒသစ် ဖြစ်ပေါ်ပြောင်းလဲလာပါက လုပ်ငန်းစဉ် ပိုမို လျင်မြန်လာမည် ဖြစ်ပြီး အစိုးရ သတ်မှတ်ထားသော စည်းကမ်းများ လိုက်နာရမည်ဟု ပေါ်ပြူလာဂျာနယ် အယ်ဒီတာ ဟိန်းလတ်က ပြောသည်။

ပြည်တွင်းသတင်းဂျာနယ်များနှင့် နိုင်ငံရေး စာစောင်များအနေဖြင့် အစိုးရသစ်က ဥပဒေ မပြဋ္ဌာန်းမချင်း စာမူ မူကြမ်းများကို စာပေစိစစ်ရေးတင်ပြရမည် ဖြစ်သည်။

၁၉၆၂ ခုနှစ် ဗိုလ်ချုပ်ကြီးနေဝင်း၏ တော်လှန်ရေးကောင်စီက စစ်အာဏာသိမ်းအပြီး သြဂုတ်လတွင် ပုံနှိပ်ထုတ်ဝေခွင့် ဥပဒေ (PrintersandPublishersRegistrationLaw)ကိုပြဋ္ဌာန်းလိုက်ခဲ့ရာ ထိုဥပဒေအပါအဝင် ကိုလိုနီခေတ်၊ အိမ်စောင့်အစိုးရခေတ် စာပေတည်းဖြတ်မှုဥပဒေများ ယနေ့ထိ အသက်ဝင်ဆဲ ဖြစ်သည်။

မြန်မာနိုင်ငံတွင် စာပေစိစစ်ရေး ခွင့်ပြုချက်မရဘဲ သတင်းများ ထုတ်ပြန်ပါက ဂျာနယ်များကို ၂ ပတ်မှ ၁ လထိ ထုတ်ဝေခွင့် ရပ်ဆိုင်းမှုများ ရှိခဲ့သည်။

ရှမ်းပြည်နယ် အရှေ့ပိုင်း လွယ်မွေကို ဗဟိုပြုလှုပ်ခဲ့သော ငလျင်ကြောင့် ကြီးကြီးမားမား ပျက်စီးနေသော ဓာတ်ပုံများကို ဖော်ပြခွင့် မပြုသည့်အပြင် သေဆုံးသူ စာရင်းများကိုလည်း အစိုးရပိုင်သတင်းစာပါ စာရင်းအတိုင်းသာ ထည့်ခွင့် ပြုသည်ဟု အယ်ဒီတာတဦးက ပြောသည်။

“လူအသေအပျောက်တွေက သတင်းစာအတိုင်းဘဲ သုံးရတာပေါ့။ အပျက်အစီး ကြီးကြီးမားမားတွေ ပြလို့ မရဘူး။ အဲဒီသတင်းစာထက် ပိုဆိုးတဲ့ ပုံတွေ မရဘူး၊ တင်တာ ၁၅ ပုံလောက်တင်ရင် ၃ ပုံ၊ ၄ ပုံလောက်ဘဲ ရတယ်။ လူအသေအပျောက် အတိအကျ စာရင်းတွေ၊ ဒေသခံတွေ ပြောတာတွေ မရဘူး”ဟု သူက မဇ္စျိမကို ပြောသည်။

စစ်အစိုးရပိုင်သတင်းစာတွင်သေဆုံးသူ၇၄ ဦးရှိသည်ဟု ဖော်ပြထားသော်လည်း ကယ်ဆယ်ရေးအဖွဲ့များနှင့် ဒေသခံများမှ သိရသော စာရင်းအရ သေဆုံးသူ ၁၅ဝ ခန့်ရှိမည်ဟု သိရသည်။

ယခုလ ၆၆ နှစ်ပြည့် တပ်မတော်နေ့ မတ်လ ၂၇ နေ့တွင် စစ်တပ်က မြဝတီ သတင်းစာသစ်ကို ဆေးရောင်စုံထုတ်ရန် စီစဉ်ထားသော်လည်း လာမည့် ဧပြီလတွင်မှ စတင်ထုတ်ဝေမည် ဖြစ်ကြောင်း မြဝတီသတင်းစာတိုက် ရုံးခွဲ တာဝန်ခံ ဦးဇော်လှိုင်မြင့်က ပြောသည်။

“အဲဒါက ထွက်တယ်။ စမ်းသပ်ရိုက်တုန်းဆိုတော့ မဖြန့်သေးတာ။ အဆင်သင့်မဖြစ်သေးလို့။ ထုတ်တာကို လူကြီးတွေကို တင်ပြတုန်းဘဲ။ မေလထိတော့ မဖြစ်လောက်ဘူး။ လာမည့် ၄ လပိုင်းတော့ ဖြစ်နိုင်ပါတယ်၊ နောက်ဆုတ်တယ်ဆိုတာ မပြောဘူးဗျ”ဟု သူက မဇ္စျိမကို ပြောသည်။

မည်သည့်အတွက်ကြောင့် ရွှေ့ဆိုင်းသည်ကို ပြောဆိုရန် ငြင်းဆိုသည်။ သို့သော် စာမူများ အဆင်သင့် မဖြစ်ခြင်းကြောင့်ဟု သူက ဆိုသည်။ ရန်ကုန်သတင်းစာဆရာကြီးများသို့ ယခုလ ၂၇ ရက်နေ့ ထုတ်ရန်အတွက် စာမူများပေးပို့ရန် တောင်းခံခဲ့သည်။

တလအတွင်းKIOဝန်ထမ်း၎ဦးအဖမ်းခံရ

ဖနိဒါ တနင်္လာနေ့၊ မတ်လ ၂၈ ရက် ၂၀၁၁ ခုနှစ် ၁၉ နာရီ ၃၂ မိနစ် .

ချင်းမိုင်(မဇ္စျိမ)။ ။ နယ်ခြားစောင့်တပ် အသွင်ပြောင်းရေး ငြင်းဆန်နေသည့် ကချင်လွတ်မြောက်ရေးအဖွဲ့ KIO ၏ ဖားကန့်ခရိုင် တပ်ရင်း ၆ နယ်မြေမှ ဝန်ထမ်း ၂ ဦး ယခုလ ၂၄ ရက်နေ့တွင် ဒေသခံစစ်တပ်က ဖမ်းဆီးသဖြင့် တလအတွင်း အဖမ်းခံရသူ KIO ဝန်ထမ်း ၄ ဦး ရှိသွားပြီဖြစ်သည်။

ဆိုင်းတောင်မြို့ ဆိုင်းဇွပ်တိုက်နယ်ရုံးမှ ဒုတိုက်နယ်မှူး ဦးဘရန်မိုင်နှင့် ရုံးစာရေး ကိုလဆိုင်းကို ဖားကန့်အခြေစိုက် ခလရ ၇၄ တပ်ရင်းမှ တပ်ခွဲမှူး ဗိုလ်ကြီး ကရင်ကြီးပါ လက်နက်ကိုင် စစ်သား ၁ဝ ဦးက ဖမ်းဆီးခဲ့ခြင်း ဖြစ်သည်။

ယခုလဆန်းတွင်KIOတပ်ရင်း၁၁မှဝန်ထမ်းဦးယော်ဘောမ်ကိုကျပ်၁ဝ သိန်းနှင့်အတူ မြစ်ကြီးနား အခြေစိုက် ခလရ ၃၇ ကလည်းကောင်း၊ တရုတ်နယ်စပ် ဆန်ပိုင်အခြေစိုက် KIOတပ်ရင်း ၃ မှ ဝန်ထမ်း ဦးဇော်နန်ကို မြောက်ပိုင်းတိုင်း စစ်ဌာနချုပ် (မပခ) စစ်ဘက်ရေးရာ လုံခြုံရေးတပ်ကလည်းကောင်း ဖမ်းဆီးခဲ့သေးသည်။

ယခုနောက်ဆုံး ဖမ်းဆီးမှုတွင် ဒုတိုက်နယ်မှူး ဦးဘရန်မိုင်၏ တိုက်နယ်မှူးရုံးကို ခလရ ၇၄ တပ်သားများက ဝိုင်းရံကာ ဖမ်းဆီးခဲ့ပြီး၊ စာရေး ကိုလဆိုင်းကိုမူ ဓာတ်ဆီဆိုင်၌ ဆီဖြည့်နေစဉ် လက်နက်ကိုင် စစ်သားများက ဖားကန့်မြို့ စစ်ဗျူဟာမှူး ဒုဗိုလ်မှူးကြီး ဝင်းလွင်ဦး၏ အမိန့်ဖြင့် ဖမ်းဆီးခဲ့သည်ဟု KIO တပ်ရင်း ၆ အရာရှိ တဦးက ပြောသည်။

သူတို့နှစ်ဦးကို ဖားကန့် ဆိုင်းဇွပ်ရပ်ကွက်မှ ဓာတ်ဆီဆိုင်အချို့၌ ဆက်ကြေးကောက်ခံသည်ဟု စွပ်စွဲကာ ပြစ်မှုဆိုင်ရာ ဥပဒေ ခြိမ်းခြောက်မှုဖြင့် ပုဒ်မ ၃၆၅ ၊ ၅၁၁ တို့ဖြင့် တရားစွဲဆိုထားသည်ဟု ဆိုသည်။

“ကြံဖန်ပြီးတရားစွဲထားတာပဲ။သူတို့နှစ်ယောက်ကဘာမှလိုက်မတောင်းဘူး။ကိုယ့်ရုံးမှာ အေးအေးဆေးဆေးပဲ နေတာကို လာဖမ်းတယ်။ ကျနော်တို့ မရရအောင် ပြန်ယူရမှာပါ။ ဘာအပြစ်မရှိတဲ့ ဝန်ထမ်း ၂ ဦးကို ဖမ်းထားတာ သူတို့အမှားပဲ။ တခုခုဖြစ်လာရင် ဖားကန့် ဗျူဟာမှူးရဲ့ တာဝန်ပဲ” ဟု သူက မဇ္ဈိမကို ပြောသည်။ ကျပ် ၁ဝသိန်းကျော်၊ CDMAလက်ကိုင်ဖုန်းတလုံး၊ ဆိုင်ကယ်တစီးနှင့် Digital Camera တလုံးပါ သိမ်းသွားသည်ဟု ဆိုသည်။

ယခုအခါ ၂ ဦးစလုံးကို ဖားကန့် ရဲစခန်းတွင် ချုပ်နှောင်ထားသည်ဟု KIO သတင်းရပ်ကွက်က ပြောသည်။

နယ်ခြားစောင့်တပ် အသွင်ပြောင်းရေး လက်မခံသဖြင့် စစ်အစိုးရနှင့်KIOအကြား ဆက်ဆံရေး တင်းမာနေပြီး၊ KIO နယ်မြေအတွင်း စစ်အစိုးရတပ်များ စစ်အင်အား တိုးချဲ့မှုနှင့် လှုပ်ရှားမှုများ ရှိနေသည်။

ဦးဌေးဦး၏ ဆန်ရှင် ကန့်ကွက်ရေးအဆို အတည်ပြု

မျိုးသန့် သောကြာနေ့၊ မတ်လ ၂၅ ရက် ၂၀၁၁ ခုနှစ် ၁၉ နာရီ ၄၇ မိနစ် .

ချင်းမိုင်(မဇ္စျိမ)။ ။ ကြံ့ခိုင်ဖွံ့ဖြိုးရေးပါတီမှအမတ်ဖြစ်သော လယ်ယာစိုက်ပျိုးရေးနှင့် ဆည်မြောင်းဝန်ကြီး ဦးဌေးဦးကတင်ပြသည့် စီးပွားရေးပိတ်ဆို့မှုများကို ကန့်ကွက်ရေး အဆိုကို နောက်လာမည့် ပြည်ထောင်စု လွှတ်တော် အစည်းအဝေးများအတွင်း ဆက်လက်ဆွေးနွေးရန် သောကြာနေ့ ပြည်ထောင်စု လွှတ်တော်က အတည်ပြုပေးလိုက်သည်။

အမေရိကန်နှင့် ဥရောပသမဂ္ဂအဖွဲ့ဝင်နိုင်ငံများက မြန်မာစစ်အစိုးရ၏ လူ့အခွင့်အရေး ချိုးဖောက်မှုကြောင့် ပြဌာန်းထားသော စီးပွားရေးပိတ်ဆို့မှုကို ကန့်ကွက်ရေးအဆိုကို ဦးဌေးဦးက တင်သွင်းထားခဲ့ရာ ကြံ့ခိုင်ရေး လွှမ်းမိုးသော ပြည်ထောင်စုလွှတ်တော်တွင် ဆက်လက်ဆွေးနွေးမှာ ဖြစ်သည်။

ဥပဒေမူကြမ်း ဖြစ်လာရေး မသေချာသော်လည်း လွှတ်တော်မှ သဘောတူသည့် ပြန်တမ်းအဖြစ် ထုတ်ပြန်နိုင်ပြီး နိုင်ငံတကာသံရုံးများသို့ ပေးပို့နိုင်ကြောင်း အမျိုးသား ဒီမိုကရေစီ အင်အားစုပါတီအမတ် ဦးခိုင်မောင်ရည်က ဆိုသည်။

“အောင်တဲ့အဆိုတွေသည် ဒုတိယ အကြိမ်မှာကျင်းပမယ့် အစည်းအဝေးမှာ မူကြမ်းတွေ ဖြစ်ဖို့ ဆွေးနွေးကြမှာ ဥပဒေမူကြမ်းဖြစ်မယ်လို့တော့ ကွက်တိ ပြောလို့မရဘူး။ အဆိုတွေသည် သတင်းစာတွေမှာ ပြန်တမ်းအဖြစ် ကြေညာနိုင်တယ်ပေါ့နော်၊ နောက်ပြီး ပြန်တမ်းဖြစ်ပြီးတော့ လွှတ်တော်က အတည်ပြုတာဖြစ်တဲ့အတွက် နိုင်ငံတကာ သံရုံးတွေကို ပို့နိုင်တယ် ပြန်တမ်းမှာ ထုတ်ပြန်နိုင်တယ်” ဟု ဦးခိုင်မောင်ရည်က ပြောသည်။

စီးပွားရေးပိတ်ဆို့မှုများရုတ်သိမ်းစေချင်သောအဆိုကို ထောက်ခံသူ ၇ ဦးရှိပြီး လွှတ်တော်တွင်း အတိုက်အခံပါတီများလည်း ပါဝင်နေသည်။

အမျိုးသား ဒီမိုကရေစီ အင်အားစုပါတီ ပြည်သူ့လွှတ်တော်နှင့် အမျိုးသားလွှတ်တော် အမတ်များ ဖြစ်သည့် ဦးသိန်းညွှန့်နှင့် ဒေါက်တာမြတ်ဥာဏစိုး တို့လည်း ထောက်ခံဆွေးနွေးခဲ့ကြသည်ဟု လွှတ်တော်တက် အမတ်တဦးက ပြောသည်။

မွန်ဒေသလုံးဆိုင်ရာ ဒီမိုကရက်တစ်ပါတီမှ လွှတ်တော်အမတ် ဦးလှမြင့်က ထိုအဆိုကို ဖြည့်စွက် ဆွေးနွေးရာတွင် ပိတ်ဆို့မှုကို ကန့်ကွက်ပါသည် ဆိုသည့်အဆိုသည် သံတမန်ရေးအရ မသင့်လျော်သည့် အဆိုဖြစ်ပြီး စီးပွားရေး ပိတ်ဆို့မှုများ ပြန်လည် ရုပ်သိမ်းပေးရန် မေတ္တာ ရပ်ခံပါသည် ဆိုသည့် အဆိုပြုချက်များ ဖြစ်သင့်ကြောင်း ထည့်သွင်းဆွေးနွေးသွားသည်။

သောကြာနေ့ ပြည်ထောင်စုလွှတ်တော် အစည်းအဝေးများတွင် ဒေါက်တာအေးမောင်၏ ကြက်ငှက်တုတ်ကွေးဖြစ်သည့် ဒေသများတွင် တိကျသည့် ဧရိယာ သတ်မှတ်ပေးရေး၊ ကြက်များကို သုတ်သင်ရာတွင် ခြံပိုင်ရှင်များကို လျော်ကြေးပေးရေး အဆိုကို လွှတ်တော်က ကန့်ကွက်သူမရှိ ထောက်ခံခဲ့ပြီး ထိုအဆိုကို တနင်္လာနေ့ ပြည်ထောင်စုလွှတ်တော်တွင် ဆက်လက် ဆွေးနွေးမည် ဖြစ်သည်။

အခြားအဆိုတခုဖြစ်သည့် ပြည်ပရောက် ရွှေ့ပြောင်းအလုပ်သမားများအရေး ကူညီပေးရေး အမျိုးသားဒီမိုကရေစီ အင်အာစုပါတီမှ ဒေါက်တာမြတ်ဥာဏစိုး၏ အဆိုကို ထောက်ခံသူ ၃ဝဝ ကျော်နှင့် ကန့်ကွက်သူ ၂ဝဝ ကျော်ရှိခဲ့ခြင်းကြောင့် ထိုအဆိုကိုလည်း တနင်္လာနေ့ ပြည်ထောင်စုလွှတ်တော်တွင် ဆွေးနွေးမည်ဖြစ်သည်။

ဒေါက်တာ မြတ်ဥာဏစိုး၏ အဆိုသည် ရွှေ့ပြောင်းအလုပ်သမားများကို ကူညီပေးရေးထက် ရှုပ်ထွေးမှုများသာ ဖြစ်လာနိုင်ကြောင်း ပါတီတူ အမတ်တဦးဖြစ်သည့် ပြည်သူ့လွှတ်တော်အမတ် ဦးခင်မောင်ရည်က ဝေဖန်လိုက်သည်။

“အဲဒါက ကူညီဖို့ထက် အစိုးရလက်ထဲ ရောက်သွားတဲ့အတွက် အခွန်ကောက်ခံမှုတွေ ဖြစ်လာနိုင်တယ်၊ အရေးယူခံရမယ့် ကိစ္စမျိုးတွေ ပေါ်လာနိုင်တယ်၊ အဲဒါတွေကို ပိုဆိုသွားနိုင်တယ်” ဟု သူက ဆိုသည်။

ပြည်ထောင်စုလွှတ်တော်၏ သောကြာနေ့ မေးခွန်းများတွင် ဝန်ထမ်းများ လစာတိုးပေးရေး ကိစ္စနှင့် ပတ်သက်သည့် မေးခွန်းကို စက်မှု ၁ ဝန်ကြီး ဦးအောင်သောင်းက ပြည်ပမီဒီယာများ၏ မမှန်မကန် သတင်းလွှင့်မှုကြောင့် ဝန်ထမ်းများ လစာတိုးပေးမည်ဆိုသော သတင်းများ ထွက်ပေါ်လာ၍ ကုန်ဈေးနှုန်းများ ကြီးမြင့်ရခြင်းဖြစ်ကြောင်း ဖြေကြားပြီး ထိန်းချုပ်နိုင်ရန် ကြိုးစားနေကြောင်း ဖြေခဲ့သည်။

အခမဲ့ ပညာရေးနှင့် ပတ်သက်သည့် အမတ်များ၏ မေးခွန်းကို ပညာရေးဝန်ကြီး ဒေါက်တာ ချမ်းငြိမ်းက မူလတန်းအထိ အခမဲ့ ပညာသင်ကြားရေးစနစ်ကို လုပ်ပေးနေကြောင်း ဖြေခဲ့သည်။

သောကြာနေ့ ပြည်ထောင်စုလွှတ်တော်တွင် ကြာသပတေးနေ့ညက တာချီလိတ်မြို့နှင့် အနီးတဝိုက်တွင် ဖြစ်ပွားခဲ့သည့် ငလျင်ကြောင့် သေဆုံးသူများအတွက် ဝမ်းနည်းမှတ်တမ်းကို လွှတ်တော်နာယကမှ ဖတ်ပြခဲ့သေးသည်။

သို့သော် လွှတ်တော်အမတ်များက ထုံးစံအတိုင်းလုပ်ဆောင်နေကြဖြစ်သော လွှတ်တော်နာယကပြောအပြီး လက်ခုတ်တီးမိကြသဖြင့် ရယ်စရာဖြစ်ခဲ့ကြရကြောင်း အမတ်တဦးက ပြောသည်။

“ဒီနေ့ဝမ်းနည်းကြောင်းလွှတ်တော်အခမ်းအနားခင်မှာ လွှတ်တော်နာယကက ကြေညာချက်ကို ဖတ်ပြရာမှာ ကြေညာအပ်ပါတယ် ဆိုတာကို နာယကက ဒါဟာ ဝမ်းနည်းတာဖြစ်တဲ့အတွက် လက်ခုပ်တီးဖို့ မလိုပါဘူး ဆိုတာကို ပြောမထားဘူး။ ဝမ်းနည်းကြောင်း အတည်ပြုပါတယ်ဆိုတော့ လက်ခုပ်တီးကြသေးတယ်၊ တဝက်လောက်ကတော့ မတီးဘူးပေါ့။ ဝမ်းနည်းတာကို လက်ခုပ်တီးတဲ့အတွက် သောင်းသောင်းဖျဖျ ဖြစ်သွားတာပေါ့နော်” ဟု သူက ပြောသည်။

ပြည်ထောင်စု လွှတ်တော်အစည်းအဝေးများကို ယခုလ ၂၉ ရက်နေ့အထိ ကျင်းပဖွယ်ရှိပြီး သမ္မတ ဦးသိန်းစိန်က အတည်ပြုပေးထားသော ဝန်ကြီး အယောက် ၃ဝ ကိုလည်း တာဝန်ထမ်းဆောင်ရန် ဌာနများသတ်မှတ်ပေးဖွယ်ရှိကြောင်း အမတ်များက ခန့်မှန်းနေကြသည်။

ငလျင်ကြောင့် သေဆုံးသူ ၁ဝ၄ ဦးဟု ဒေသခံများ ပြော

ဖနိဒါ သောကြာနေ့၊ မတ်လ ၂၅ ရက် ၂၀၁၁ ခုနှစ် ၁၉ နာရီ ၃၀ မိနစ် .

ချင်းမိုင်(မဇ္စျိမ)။ ။ရှမ်းပြည်နယ်အရှေ့ပိုင်း လွယ်မွေကို ဗဟိုပြုခဲ့သော ငလျင်ကြောင့် သေဆုံးသူ ၇၄ ဦး ရှိကြောင်း မြန်မာအစိုးရ ရုပ်မြင်သံကြားက ထုတ်ပြန်ချိန်တွင် မျက်မြင်သက်သေများနှင့် ဒေသခံများကမူ သေဆုံးသူ ၁ဝ၄ ဦး ရှိပြီဟု သောကြာနေ့ နှောင်းပိုင်းတွင် ပြောဆိုကြသည်။

ဒေသတွင်း ကြည့်ရှု့စာရင်းကောက်ခဲ့သူနှင့် ဒေသခံများသို့ မဇ္ဈိမ မေးမြန်းချက်အရ တာချီလိတ်မြို့ အရှေ့တောင်ဘက် တာလေမြို့၌ပင် သေဆုံးသူ ၄၇ ဦး ရှိပြီး၊ မိုင်းယောင်းအုပ်စု ကျကူနီရွာ၌ ၂၂ ဦး၊ မိုင်းလင်း ၂၉ ဦး၊ တာချီလိတ် ၃ ဦးနှင့် နားယောင်း ၃ ဦး ဖြစ်သည်။ ထို့အပြင် တာလီရွာ၌ ပျောက်ဆုံးနေသူများ ရှိသည်ဟု ဒေသခံများက ဆိုသည်။

တာလေသို့ သွားရောက်ခဲ့သူ တာချီလိတ်မြို့ခံ တဦးက “တာလေက အခြေအနေ တော်တော်ဆိုးတယ်။ လမ်းဘေးမှာပဲ အခေါင်းတွေနဲ့ ထားထားတယ်” ဟု မဇ္စျိမကို ပြောသည်။

ကျကူနီရွာ၌ သေဆုံးသူများမှာ နှစ်ခြင်းခရစ်ယာန်အသင်းတော် ဘုရားကျောင်းထဲတွင် ကျမ်းစာသင်နေစဉ် ငလျင်လှုတ်ခတ်သဖြင့် သေဆုံးရခြင်း ဖြစ်သည်။

သောကြာနေ့ မွန်းလွဲပိုင်းတွင် အရှေ့ပိုင်းတိုင်း စစ်ဌာနချုပ်တိုင်းမှူး ဗိုလ်မှူးချုပ် သန်းထွန်းဦးနှင့်အဖွဲ့ တာလေနှင့် မိုင်းလင်းသို့ သွားရောက်ခဲ့သလို၊ တာလေမြို့ ကယ်ဆယ်ရေးတွင် စစ်သား ၃ဝဝ ခန့် ပါဝင်လုပ်ကိုင်နေခဲ့သည်။

MRTV-4 က မွန်းလွဲပိုင်း ထုတ်ပြန်ချက်တွင် တာချီလိတ်၊ တာလေ၊ နားယောင်း၊ မိုင်းလင်း၊ မိုင်းကိုး၊ ကျကူနီရွာ စသည့် ကျေးရွာများ၌ ၇၄ ဦး သေဆုံးကာ၊ ၁၁၁ ဦး ဒဏ်ရာရခဲ့ပြီး အိမ် ၂၂၄ လုံး၊ တိုက်ခန်းတွဲ ၆ ခု၊ သာသာနာ အဆောက်အအုံ ၁၁ ခု၊ အစိုးရ အဆောက်အုံ ၉ ခု ပျက်စီးဆုံးရှုံးခဲ့ကြောင်း ဖော်ပြထားသည်။

ကြာသပတေးနေ့ကတည်းက လျှပ်စစ်မီးပြတ်တောက်နေပြီး သောက်သုံးရေသန့် လုံလောက်စွာ မရသော တာလေ၌ လူအများမှာ ကွင်းပြင်များ၌ မိုးကာတဲများထိုး၍ နေကြကာ၊ မုန့်ခြောက်နှင့် ခေါက်ဆွဲခြောက်များကို အားကိုးနေရသည်။

ယူနီဆက်၊ Worldvision၊ ကြက်ခြေနီ၊ အမျိုးသားပြန်လည် နေရာချထားရေး အဖွဲ့များလည်း ကယ်ဆယ်ရေး လုပ်ငန်းတွင် ပါဝင်ဆောင်ရွက်နေသည်။

ဦးထွန်းလွင်၏ မိုးလေဝသ ဝဘ်ဆိုဒ် အတိုက်ခံရ

ကျော်ခ သောကြာနေ့၊ မတ်လ ၂၅ ရက် ၂၀၁၁ ခုနှစ် ၁၇ နာရီ ၀၆ မိနစ် .

ချင်းမိုင် (မဇ္ဈိမ)။ ။ မြန်မာနိုင်ငံ၌ ရာသီဥတု ပြောင်းလဲမှုဆိုင်ရာ သတင်းများကို အချိန်မီ တင်ပြပေးနေသည့် မိုးလေဝသနှင့် ဇလဗေဒပညာရှင် ဦးထွန်းလွင်၏ MyanmarClimateChangeWatch(MCCW) အင်တာနက်စာမျက်နှာကို ဟက်ကာများက ဖောက်ထွင်းမှု ပြုသွားသည်။

 MCCWဆိုဒ်အတွင်းသို့ဖောက်ထွင်းဝင်ရောက်၍BlinkHackerGroup(BHG)မှသတိပေးစာကို စာမျက်နှာပေါ်သို့ တင်ထားပုံ (Photo :: http://www.tunlwin.com)

MCCWဆိုဒ်အတွင်းသို့ဖောက်ထွင်းဝင်ရောက်သည့်BlinkHackerGroup(BHG) ကလျှို့ဝှက်စကားလုံးများအား စာသားသီးသန့်ဖြင့် မှတ်သားထားသောကြောင့် အသုံးပြုသူများ၏ လုံခြုံမှုကို ထိခိုက်သည်ဟုဆိုကာMCCWဝဘ်ဆိုဒ်တွင်းသို့ ယခုလ ၁၁ ရက်နေ့တွင် စတင်ဝင်ရောက်ခဲ့ပြီး ကြာသပတေးနေ့တွင် သတိပေးစာကို စာမျက်နှာပေါ်သို့ တင်ပို့ခြင်း ဖြစ်သည်။

“ဤဝဘ်ဆိုဒ်ရှိ Admin Panel တွင် User Password များအား Plain Text ဖြင့် သိမ်းဆည်းထားကြောင်း တွေ့ရှိရသည်။ ထိုကဲ့သို့ ပြုလုပ်ထားခြင်းသည် User Privacy ကို ချိုးဖောက်ရာ ရောက်သည့်အပြင် User Mail များ၏ လုံခြုံမှုကိုပါ ထိပါးစေသဖြင့် အမြန်ဆုံး ပြုပြင်ပြောင်းလဲပါရန် BlinkHackerGroup မှ လေးနက်စွာ သတိပေးလိုက်သည်။ အကယ်၍ ဤစနစ်ကို ပြောင်းလဲမှုမရှိပါက BHGအနေဖြင့် ဤဝဘ်ဆိုဒ်ကို ဖျက်ဆီးပစ်မည်ဖြစ်ကြောင်း အသိပေးလိုက်သည်” ဟု MCCW ဝဘ်ဆိုဒ်အတွင်း လာရောက် ရေးသားသွားသည်။

ဦးထွန်းလွင်ကလည်း သောကြာမနက် ၆ နာရီခွဲတွင် မြန်မာနိုင်ငံ ရှမ်းပြည်နယ်၌ လှုပ်ခတ်မှု ပြင်းအား ၇ အဆင့်ရှိ ငလျင်တခု ကြာသပတေးနေ့ မြန်မာစံတော်ချိန် ည ၈း၂၅ မိနစ်တွင် လှုပ်ခတ်သွားကြောင်း သတင်းတပုဒ်အား တင်ခဲ့သေးသည်။

တိုက်ခိုက်ခံရမှုအတွက် အမြန်ဆုံး ပြုပြင်သွားမည်ဟု ဦးထွန်းလွင်၏ အင်တာနက်ဝဘ်ဆိုဒ် လုံခြုံရေးကို တာဝန်ယူထားသည့် Pioneer Web line ကုမ္ပဏီ၏ မန်းနေးဂျင်း ဒါရိုတ်တာ ဦးမိုးဟိန်းက ပြောဆိုသည်။

“ဒီကောင်တွေ ဖောက်ဝင်လာတာ ဟုတ်တယ်။ အဲဒီအတွက် လူထုကို သတင်းမှားတွေ ရေးပြီး တင်မှာစိုးလို့ အဲဒါကို အခု ကျနော်တို့ ပြန်ကာဖို့ လုပ်နေပါတယ်။ ” ဟု ဦးမိုးဟိန်းက မဇ္ဈိမကို ပြောသည်။

MCCWဆိုဒ်အတွင်းသို့ဖောက်ထွင်းဝင်ရောက်၍BlinkHackerGroup(BHG)မှသတိပေးစာကို စာမျက်နှာပေါ်သို့ တင်ထားပုံ (Photo :: http://www.tunlwin.com)

ဝက်ဆိုက်တွင် နည်းပညာအရ ကာကွယ်မှု အားနည်းခဲ့သည်ဟု သူက ဝန်ခံသည်။ သို့သော် ဝဘ်ဆိုဒ်အတွင်းသို့ Hacker တိုက်ခိုက်ခံရသည့် စနစ်နှင့် ပြန်လည်ကာကွယ်နေသော စနစ်ကို ပြောဆိုခြင်း မပြုပေ။

“အခုဆိုက်ကိုဖောက်တဲ့အဖွဲ့ကမြန်မာနိုင်ငံသားတွေပါ။အန်ကယ်ဦးထွန်းလွင်ကနာမည်ကြီးတဲ့ လူဖြစ်တဲ့အတွက် Hacker တော်တော်များများက စိတ်ဝင်တစားနဲ့ ဖောက်ကြတယ်။ ဒီဆိုဒ်ကို ဖောက်ပြီး တခုခုတင်လိုက်ရရင် သူတို့ကို လူအများက စိတ်ဝင်စားကြတယ်ဆိုတဲ့ ရည်ရွယ်ချက်နဲ့ လုပ်တာပါ။ အခုလည်း အဲလိုပါပဲ” ဟု ဦးမိုးဟိန်းက ပြောသည်။

မြန်မာနိုင်ငံတွင်လည်း စိုက်ဆင်းလေပြင်းများ ကျရောက်ခြင်း၊ မိုးကြိုးပစ်ခြင်း၊ မြေငလျင်များ လှုပ်ခတ်ခြင်း၊ မိုးသီးများ ကြွေခြင်း စသည့် ဖြစ်စဉ်များကို MCCWက ကြိုတင်သတိပေး တင်ပြနေသဖြင့် ဦးထွန်းလွင်၏ ဝဘ်ဆိုဒ်ကို သတင်းဌာနများနှင့် ရာသီဥတု အခြေအနေကို စိတ်ဝင်စားသူများက စောင့်ကြည့် ဖတ်ရှုကြသည်။

ရန်ကုန်အခြေစိုက် သတင်းဌာန အယ်ဒီတာတဦးက “Hacker တွေက လက်ဆော့ကြတယ်။ အခုလို လူအများစုအတွက် အရေးပါတဲ့ ဦးထွန်းလွင်လို ဆိုဒ်မျိုးကို ဝင်တာတော့ မလုပ်သင့်တဲ့ ကိစ္စပါ။ အစိုးရတောင် သူလို့ သေသေချာချာ မေတ္တာထားပြီး အရေးတယူ ထုတ်ပြန်ပေးတာ မရှိဘူး”ဟု မဇ္ဈိမကို ပြောသည်။

ဒေါက်တာထွန်းလွင်သည် မိုးလေဝသနှင့် ဇလဗေဒညွှန်ကြားမှု ဦးစီးဌာန၏ ယခင်ညွှန်ကြားရေးမှူးချုပ် Former Director-General ဖြစ်ခဲ့ပြီး ၂ဝဝ၉ ခုနှစ်တွင် အနားယူခဲ့သည်။

BHG Hacker များ တိုက်ခိုက်မှုကို ခံခဲ့ရသည့် ဝဘ်ဆိုဒ်များထဲတွင် ဦးထွန်းလွင်ဆိုဒ် အပါအဝင် အခြား လူကြိုက်များသည့် ဖျော်ဖြေရေးနှင့် အရောင်းအဝယ် ဝက်ဆိုက်အချို့လည်း ပါဝင်သည်။

တာချီလိတ်တဝိုက်ငလျင်ကြောင့်လူ ၅ဝကျော်သေ

ဂျန်ဝန်မိုင် သောကြာနေ့၊ မတ်လ ၂၅ ရက် ၂၀၁၁ ခုနှစ် ၁၃ နာရီ ၃၃ မိနစ် .

ချင်းမိုင်(မဇ္ဈိမ)။ ။ရှမ်းပြည်နယ် အရှေ့ပိုင်း တာချီလိတ်မြို့ပတ်ဝန်းကျင်တွင် ကြာသပတေးနေ့က ငလျင်ကြောင့် အနည်းဆုံး လူ ၅၁ ဦးသေဆုံးခဲ့ပြီး ဒဏ်ရာရသူများစွာရှိနေသည်ဟု ဒေသခံများနှင့် ချယ်ရီFM က ပြောသည်။

ဘိန်းထုတ်လုပ်မှုကြောင့် လူသိများသည့် ရွှေတြိဂံဒေသတွင် ကြာသပတေးနေ့ ည ၈ နာရီ ၂၅ မိနစ်ခန့်တွင် ပြင်းအားအဆင့် ရစ်ချတ်စကေး ၆.၈ ရှိသည့် ငလျင်လှုပ်ခတ်သွားခြင်းဖြစ်ကာ မြန်မာနိုင်ငံဘက်တွင် ရှမ်းပြည်နယ် အရှေ့ဘက်ခြမ်းကို ဗဟိုပြု လှုတ်ခတ်သည်။

                                                              (Photo :: http://www.huffingtonpost.com)

မြန်မာနယ်စပ်မြို့တာချီလိတ်၏၃၅ ကီလိုမီတာအကွာတွင်ရှိသော မိုင်းဖြတ်၊ တာချီလိတ် အရှေ့မြောက်ဘက်ရှိ တာလေနှင့် မိုင်းလင်းတို့တွင် လူအသေအပျောက်နှင့် ပျက်စီးဆုံးရှုံးမှုများကာ ပျောက်ဆုံးနေသူများလည်း ရှိနေသည်။

အမေရိကန် ငလျင်တိုင်းထွာရေးဌာနက ငလျင်ပမာဏ ရစ်ချတ်တာစကေး ၇ မှ ၆.၈ ဟု ပြန်လည် ပြင်ဆင်ခဲ့သည်။ ကျိုင်းတုံဒေသမြေအောက်ကို ဗဟိုပြုသွားသည်ဟု ပါရှိသည်။

တောင်ကြီးအခြေစိုက်ချယ်ရီFMက ထုတ်လွှင့်ချက်အရ တာချီလိတ်တွင် သေဆုံးသူ ၁၁ ဦး၊ မိုင်းလီကျေးရွာတွင် ၂၉ ဦး၊ ဝက်လုံးကျေးရွာတွင် ၁ ဦးသေဆုံးကာ ဒဏ်ရာရသူ စုစုပေါင်း ၄၅ ဦးရှိသည်ဟု ပါရှိသည်။

တာချီလိတ်မြို့နှင့် တာလေမြို့နယ်ခွဲတို့တွင် ငလျင် လှုပ်ခတ်မှု ၁၅ မိနစ်ခန့်ကြာမြင့်ခဲ့ပြီး တာလေမြို့၌ နေအိမ် ၉၆ လုံး၊ ဘုန်းကြီးကျောင်း ၄ကျောင်း၊ ဌာနဆိုင်ရာ အဆောက်အဦး ၉လုံး၊ နာယောင်းကျေးရွာ နေအိမ် အလုံး ၂ဝ၊ ဘုန်းကြီးကျောင်း တကျောင်း၊ မိုင်းလီကျေးရွာတွင် နေအိမ် ၁၂၈ လုံး၊ ဘုန်းကြီးကျောင်း ၅ကျောင်းနှင့် အခြား ရွာသုံးရွာတွင် ဘုန်းကြီးကျောင်းများ ပြိုကျသွားခဲ့သည်ဟု ပါရှိသည်။

တာချီလိတ်နှင့် ကျိုင်းတုံကို ဆက်သွယ်ပေးထားသည့် တာလေတံတားမှာလည်း ငလျင်ကြောင့် ပျက်စီးသွားခဲ့သည်ဟု သိရသည်။ ဒေသအာဏာပိုင်များက တံတားပေါ်သို့ ဖြတ်သန်းသွားလာခြင်း မပြုရန် တားမြစ်ထားသည်။ ထို့ကြောင့် တာချီလိတ်နှင့် ကျိုင်းတုံအကြား တမြို့နှင့် တမြို့ ကူးသန်းသွားလာလိုလျှင် ကူးတို့ငှား၍ သွားရပြီး တဘက်ကမ်းရောက်မှ ကားထပ်မံငှားကာ သွားနေရသည်ဟု ဆိုသည်။

ဒေသခံတဦး၏ အဆိုအရ ငလျင်လှုပ်ခတ်ရာ ဒေသသို့ အစိုးရမှ ဆရာဝန်များ စေလွှတ်လိုက်သည်။

တာချီလိတ် ဒေသခံတဦးက “ညက ကျနော်တို့ အိမ်တွေထဲမှာ မအိပ်ရဲပါဘူး။ မနက်အစောကြီး သုံးနာရီလောက် အထိ အများစုက ခြံဝင်းတွေထဲမှာပဲ ဆင်းအိပ်ကြတယ်။ ဒါတောင် မနက် ၆နာရီ ၂၅ မိနစ်လောက်မှာ ငလျင် အသေးစား တခု ထပ်လှုပ်လို့ ကျနော်တို့ အိမ်ထဲကနေ ထွက်ပြေးရသေးတယ်” ဟု ပြောပြခဲ့သည်။

တာချီလိတ်မြို့ ရှမ်းရိုးမကွင်းတွင် တရားပွဲကျင်းပနေစဉ် ငလျင်လှုတ်ခတ်မှုကြောင့် ကွင်းအတွင်းသို့ ထပ်မံရောက်ရှိလာခဲ့သည်ဟု ဒေသခံများက ပြောသည်။

ထိုင်းနိုင်ငံ မယ်ဆိုင်မြို့ရှိ မယ်ဆိုင်ဆေးရုံတွင်မူ ဆေးရုံနံရံများတွင် အက်ကွဲမှုများ တွေ့ရှိလာသည့် အတွက် လူနာများအား ဘေးကင်းရာသို့ ပြောင်းရွှေ့ပေးထားရသည်ဟု ဆိုသည်။ ထိုင်းနိုင်ငံ မယ်ဆိုင်ခရိုင်တွင် အမျိုးသားတဦးမှာ သူ၏ အိမ်နံရံ ပြိုကျမှုကြောင့် သေဆုံးသွားခဲ့သည်ဟု သိရသည်။

မြန်မာခြိမ်းခြောက်မှုနျူကလီးယားမဟုတ်စကဒ်ဒုံးကျည်

ဂျင်အင်ဒရူး ကြာသပတေးနေ့၊ မတ်လ ၂၄ ရက် ၂၀၁၁ ခုနှစ် ၁၉ နာရီ ၃၈ မိနစ် .

ချင်းမိုင်(မဇ္ဈိမ)။ ။မြန်မာနိုင်ငံက စကဒ်ပုံစံဒုံးကျည်များ ထုတ်လုပ်ရန် စီစဉ်နေသည်ဟူသော သတင်းများသည် အရှေ့တောင်အာရှ နိုင်ငံများအတွင်း အာဏာချိန်ခွင်လျှာကို ပျက်စီးသွားစေနိုင်ပြီး ဒေသတွင်း စစ်လက်နက်ပြိုင်ပွဲတရပ် ပေါ်ထွက်လာစေနိုင်ကြောင်း မြန်မာ့အရေးကျွမ်းကျင်သူ ဘာတီလင်တနာ Bertil Lintner က သတိပေးထားသည်။

မြန်မာနှင့် မြောက်ကိုရီးယား နိုင်ငံများအကြောင်း ယုံကြည်အားထားလောက်သည့် စာအုပ်များ ရေးသားခဲ့သူ လင်တနာက “ကျနော်ရထားတဲ့ အထူးသီးသန့် သတင်းတွေအရ ဧရာဝတီအနောက်ဘက်ကမ်း မကွေးတိုင်း မင်းဘူးမြို့တောင်ဘက်မှာ ရှိတဲ့ မင်းလှဆိုတဲ့ မြို့လေးက စစ်တပ်လက်နက်စက်ရုံတွေမှာ ခေတ်မီဆန်းပြားတဲ့ စကဒ်ဒုံးကျည်တွေ ထုတ်လုပ်နေတယ်လို့ သိထားရပါတယ်’’ ဟု ပြောသည်။

ဤထိပ်တန်း လျှို့ဝှက်စီမံကိန်းတွင် မြန်မာစစ်တပ်ပညာသည်များကို မြောက်ကိုရီးယား လက်နက်ပါရဂူများက အကူအညီပေးနေသည်ဟု ဟောင်ကောင်အခြေစိုက် သတင်းဌာနAsiaPacific Media Services ၏ ဝဘက်ဆိုက်တွင် တင်ထားသော ဘာတီလင်တနာ၏ စာတမ်းတွင် ပါရှိသည်။

နည်းဗျူဟာသုံးပဲ့ထိန်းအမျိုးအစားဒုံးကျည်များဖြစ်သော စကဒ်ဒုံးကျည်များကို စစ်အေးတိုက်ပွဲကာလအတွင်း ဆိုဗီယက်ယူနီယံက စတင်ထုတ်လုပ်ခဲ့သည်။ ထို့နောက် မြောက်ကိုရီးယားက အဆိုပါ စကဒ်ဒုံးကျည်များကို သူ့လက်နက်တိုက်အတွင်း လွန်ခဲ့သော နှစ် ၂ဝ ကျော်ကပင် ထည့်သွင်းတပ်ဆင်ခဲ့သည်။ အီဂျစ်နိုင်ငံမှ နည်းဗျူဟာသုံး လက်နက်အမြောက်အမြား ဝယ်ယူတပ်ဆင်ခဲ့သည်။ လက်ရှိအသုံးပြုနေသော သူ့ကိုယ်ပိုင် Hwasong-6 အမျိုးအစား ဒုံးကျည်ကို နောက်ပိုင်းတွင် ထုတ်လုပ်ခဲ့ပြီး အီရန်နှင့် ဆီးရီးယား နိုင်ငံများသို့ တင်ပို့ခဲ့သည်။

လက်ရှိ အသုံးပြုနေသော ထိုလက်နက်သည် ထိပ်ဖူး ၈ဝဝ ကီလိုဂရမ်ကို သယ်ဆောင်ကာ ၇ဝဝ ကီလိုမီတာ အကွာအဝေးအထိ ရောက်ရှိအောင် ပစ်ခတ်နိုင်သည်။ ထို့ကြောင့် ဒေသတွင်း စစ်ပွဲများတွင် ထိရောက်သော အလွန်အစွမ်းထက်သည့် တာလတ်ပစ်လက်နက် ဖြစ်လာခဲ့သည်။

“မြန်မာနိုင်ငံသာ စကဒ်ဒုံးလက်နက် ပိုင်ဆိုင်သွားပါက ယင်းသို့ တာဝေးပစ် ဒုံးကျည်မရှိသည့် အရှေ့တောင်အာရှ အိမ်နီးချင်းနိုင်ငံများကြားတွင် နှာတဖျား သာသွားမည် ဖြစ်သည်။ လက်နက်ပြိုင်ပွဲတရပ်လည်း အဆိုပါ နိုင်ငံများကြားတွင် ပေါ်ပေါက်လာစေနိုင်ပြီး၊ အိမ်နီးချင်း ထိုင်းနိုင်ငံကိုလည်း အလားတူ ဒုံးလက်နက်များ ထုတ်လုပ်ရန်သော်၎င်း၊ ဝယ်ယူရန်သော်၎င်း တွန်းအားပေးလိုက်သလို ဖြစ်လိမ့်မည်’’ ဟု လင်တနာက သတိပေးသည်။

မြန်မာနိုင်ငံသည် နျူကလီးယားလက်နက် ပိုင်ဆိုင်ရန် ကြိုးပမ်းနေသည်ဆိုသည့် ယူဆချက်များအစား မြန်မာနိုင်ငံ၏ ဒုံးလက်နက် အစီအစဉ်ကို ပို၍ အလေးအနက်ထား ကိုင်တွယ်သင့်သည်ဟု သူက ဆိုသည်။ မြန်မာနိုင်ငံက နျူကလီးယားလက်နက် ပိုင်ဆိုင်ရေးဆိုသည်မှာ လတ်တလော ကာလအတွင်း ဖြစ်နိုင်ခြေမရှိသည့် စိတ်ကူးယဉ်စီမံကိန်း တခုမျှသာဖြစ်သည်ဟုလည်း သူက ပြောသည်။ ထို့ကြောင့် မြန်မာနိုင်ငံ၏ စကဒ်ဒုံးကျည် ထုတ်လုပ်ရေး အစီအစဉ်ကိုသာ လေးနက်စွာ ကိုင်တွယ်ရန် လိုအပ်သည်ဟုပါ သူက ပြောသည်။

ဤဒုံးကျည် အစီအစဉ်များအကြောင်း ပထမဆုံးပေါ်ထွက်လာသည်မှာ ဝီကီလိ ဝဘ်ဆိုဒ်က ဖော်ထုတ်ခဲ့သည့် ရန်ကုန်ရှိ အမေရိကန်သံရုံးမှ ဝါရှင်တန်သို့ ၂ဝ၁ဝ ခုနှစ်တွင် ပေးပို့ခဲ့သော ကြေးနန်းစာတွင် ဖြစ်သည်။

အမေရိကန်သံရုံး၏ သတင်းရင်းမြစ်တခုက မကွေးတိုင်းအတွင်း စစ်တပ်ပိုင်မြေအတွင်း သံကူကွန်ကရစ် မြေအောက်အဆောက်အအုံတခု တည်ဆောက်လျက်ရှိပြီး ထိုအထဲတွင် မြောက်ကိုရီးယား ပညာသည်များက မြေပြင်မှ ဝေဟင်ပစ် ဒုံးကျည်များ တပ်ဆင်လျက်ရှိသည်ဟု သတင်းပေးပို့လာသည်။ အဆိုပါ သတင်းရစ်မြစ်ကပင် “ပုံမှန်အရွယ်ထက် ပိုမိုကြီးမားသော အရွယ်အစားရှိသည့် အားဖြည့် သံမဏိထည်ကြီးတခုကို ဖောင်ကြီးတခုဖြင့် တင်ဆောင်သွားသည်ကို မြင်တွေ့ခဲ့ရကြောင်း’’ ပြောကြားခဲ့သည်။

လက်နက်စက်ရုံကို မြေအောက်တွင် တဝက်တပျက်မြှုပ်၍ တည်ဆောက်ထားခြင်းကြောင့် ဝေဟင်မှ ထောက်လှမ်း လေ့လာရန် ခဲယဉ်းသည်ဟု လင်တနာက ပြောသည်။ ယခုအခါ လက်နက်စက်ရုံနှစ်ခုက စကဒ်ပုံစံ ဒုံးကျည်များ အပါအဝင် တိုင်းပြည်တွင်း ယခုထိ ထုတ်လုပ်ခဲ့သမျှထက် ပိုမိုအဆင့်မြင့်သော လက်နက်များကို ထုတ်လုပ်လျက်ရှိသည်ဟု သူ့သတင်းရင်းမြစ်များက သူ့ကိုပြောပြသည်ဟု သူက ဆိုသည်။

“သံရုံးကြေးနန်းထဲမှာ ရည်ညွှန်းဖော်ပြထားတဲ့ စက်ရုံဟာ မင်းလှမြို့နယ် ကုန်းကြီးကျေးရွာအတွင်း တည်ရှိတဲ့ ကပစ အမှတ် ၁ဝ စက်ရုံဖြစ်တယ်ဆိုတာ အခုအခါ ရှင်းသွားပြီ။ အဲဒီစက်ရုံကို ၁၉၉၃ ခုနှစ်မှာ စတင်ဆောက်လုပ်ခဲ့ပြီး မကြာသေးခင်ကမှ ပြီးစီးသွားခဲ့တယ်’’ ဟု လင်တနာက ပြောသည်။

“အဆိုပါစက်ရုံသည်မြေဧက၆ဝဝဝ(၂၄၂၈ဟက်တာ)ကျယ်ဝန်းပြီးစက်ရုံတည်ဆောက်ခြင်း ရည်ရွယ်ချက်မှာ မြေပြင်မှ ဝေဟင်ပစ်၊မြေပြင်မှမြေပြင်ပစ်နှင့်ဝေဟင်မှ ဝေဟင်ပစ် ဒုံးလက်နက်များ ထုတ်လုပ်ရန်ဖြစ်သည်’’ ဟု စက်ရုံတွင် အလုပ်လုပ်ကိုင်ခဲ့သူ သတင်းရင်းမြစ်၏ အပြောအရ သိရသည်။

’’စက်ရုံမှာအလုပ်လုပ်တဲ့မြောက်ကိုရီးယားပညာရှင်တွေကပထမတော့တရုတ်ပြည်ကတဆင့် ကုန်းလမ်းကနေတိတ်တဆိတ်ဝင်လာတာလို့သိရတယ်။သူတို့ကိုမြန်မာနိုင်ငံကာကွယ်ရေးဌာန လက်နက်ထုတ်လုပ်ရေး ညွှန်ကြားရေးမှူးရုံး (ကကထုတ်)က အရာရှိတွေက နယ်စပ်မှာ သွားကြိုပြီး ခေါ်လာခဲ့တာလို့ သိရတယ်’’ ဟု အဆိုပါ သတင်းရင်းမြစ်က ပြောသည်။

အဆိုပါ ကပစ ၁ဝ တွင် စစ်ဘက်ပညာသည်နှင့် အခြားစစ်သည် ၆ဝဝ မှ ၉ဝဝ ကြား အခြေစိုက်ကာ တာဝန်ထမ်းဆောင်နေသည်ဟု လင်တနာက ပြောသည်။ “အစပိုင်းမှာ ရုရှနဲ့ တရုတ်ပညာရှင်တွေလည်း စက်ရုံဆောက်လုပ်ရေးမှာ ပါသေးတယ်။ နောက်တော့ သူတို့ ထွက်သွားပြီး မြောက်ကိုရီးယား စစ်လက်နက်ပါရဂူတွေ အစားဝင်လာပုံရတယ်’’ ဟု သူက ပြောသည်။

မင်းလှမြို့နယ်ရှိ ဒုတိယစစ်လက်နက်စက်ရုံဖြစ်သော ကပစ ၂ ကို မလွန်ကျေးရွာအနီး မြေဧက တသိန်းပေါ်တွင် ခွဲဖြန့်တည်ဆောက်ထားသည်ဟု သူက ဆိုသည်။ ထိုစက်ရုံဟောင်းတွင် အင်ဂျင်နီယာနှင့် အခြားစစ်သည် ၉ဝဝ တာဝန်ထမ်းဆောင်နေပြီး ၆ဝ မမ၊ ၈၁ မမ၊ ၁၂ဝ မမ စိန်ပြောင်းများနှင့် ၁ဝ၅ မမ အမြောက်များ ထုတ်လုပ်နေသည်ဟု သူ့သတင်းရင်းမြစ်က သူ့ကို ပြောပြသည်။

အဆိုပါ စက်ရုံဝင်းအတွင်း အလွန်ကြီးမားသည့် စက်ပစ်ကွင်းနှင့် လက်နက်စမ်းသပ်ကွင်းတခုလည်း ထည့်သွင်းတည်ဆောက်ထားပြီး အမြောက်နှင့် ဒုံးများ အပါအဝင် လက်နက်ကြီးများကို စမ်းသပ်ပစ်ခတ်နေသည်ဟု အဆိုပါ သတင်းရင်းမြစ်ကပင် လင်တနာကို ပြောသည်။

“ဒီသတင်းရင်းမြစ်ရဲ့အပြောအရစင်္ကာပူလိုမြေလုံလုံလောက်လောက်မရှိတဲ့နိုင်ငံက ဒီလက်နက်စမ်းသပ်ကွင်း တည်ဆောက်ရေးအတွက် ငွေထုတ်ပေးခဲ့တယ်။ လက်နက်တွေကို စင်္ကာပူက ယူလာပြီး ဒီမှာ စမ်းသပ်ပစ်ခတ်ကြတယ်’’ ဟု လင်တနာက ပြောဆိုသည်။

“အခုအထိ ရရှိထားတဲ့ သတင်းတွေအရတော့ မင်းလှမှာရှိတဲ့ ကပစ စက်ရုံနှစ်ရုံကနေ အခုမှ အစပျိုးစ၊ အလွန်အငြင်းပွားဖွယ် လျှို့ဝှက်သိပ်သည်းလှတဲ့ နျူကလီးယားလက်နက်တွေ ထုတ်လုပ်နေတယ်၊ ပါဝင်ပတ်သက်နေတယ်ဆိုတဲ့ သတင်းတွေတော့ မကြားရသေးပါဘူး။ နျူကလီးယား သုတေသန လုပ်ငန်းတွေကို ပခုက္ကူမြောက်ဘက်က မြိုင်မှာ လုပ်နေတယ်လို့ သိရတယ်။ မကွေးတိုင်းအတွင်း မင်းလှစက်ရုံတွေနဲ့ အတော်ဝေးဝေး နေရာမှာလည်း လုပ်နေတယ်လို့ သိရတယ်’’ဟု လင်တနာက ပြောသည်။

ကပစ ၂ စက်ရုံတွင် မြောက်ကိုရီးယားနိုင်ငံ ပါဝင်ပတ်သက်နေမှုမှာ နိုင်ငံတကာအတွက် စိုးရိမ်ပူပန်စရာ ဖြစ်နေဆဲဖြစ်သည်။ မြန်မာနိုင်ငံ၏ အစဉ်အလာ စစ်ရေးမဟာမိတ် တရုတ်နိုင်ငံအတွက်ပင် စိုးရိမ်စရာ ဖြစ်နေသည်။ ၁၉၉ဝ စုနှစ်များအတွင်း ၂ဝဝဝ စုနှစ်များ အစောပိုင်းအထိ အလုံးအရင်းဖြင့် စစ်လက်နက်ပစ္စည်း အမြောက်အမြားကို တင်ပို့ခဲ့ပြီးနောက် တရုတ်နိုင်ငံမှ လက်နက်များ ပေးပို့ခြင်းမှာ သိသာစွာ လျော့နည်းကျဆင်းသွားပြီဟု လင်တနာက ပြောဆိုသည်။

မီဒီယာသို့ပေါက်ကြားသည့်အမေး/အဆိုများပယ်ချခံရ

မျိုးသန့် ကြာသပတေးနေ့၊ မတ်လ ၂၄ ရက် ၂၀၁၁ ခုနှစ် ၁၉ နာရီ ၄၆ မိနစ် .

ချင်းမိုင်(မဇ္စျိမ)။ ။လွှတ်တော်ထဲ မေးမြန်းမည့်မေးခွန်းများနှင့်အဆိုများသည်မဆွေးနွေးမီ ပြည်ပမီဒီယာများသို့ ကြိုတင်ပေါက်ကြားခဲ့သဖြင့် အမျိုးသားလွှတ်တော် ဥက္ကဋ္ဌ ဦးခင်အောင်မြင့်က ပယ်ဖျက်မှုများ ပြုလုပ်ခဲ့ကြောင်း လွှတ်တော်တက် အမတ်များထံမှ စုံစမ်းသိရှိရသည်။

“ဦးခင်အောင်မြင့် ပြောတာက တချို့ဟာတွေက ကောင်းတယ်တဲ့၊ သင့်တော်တဲ့ အဆိုတွေဖြစ်တယ်တဲ့။ တချို့ဟာတွေက လွှတ်တော်မှာ တင်သွင်းဆွေးနွေးမှုတွေ မလုပ်ရသေးဘဲနဲ့ အပြင်မီဒီယာတွေကို ရောက်နေတဲ့အတွက် အဲဒါတွေကို ဖြုတ်လိုက်တယ်တဲ့။ ဘယ်ဟာ ပယ်ဖျက်တယ်တော့ မပြောဘူး”ဟု လွှတ်တော်အမတ်တဦးက မဇ္ဈိမကို ပြောသည်။

အမျိုးသားလွှတ်တော်ဥက္ကဋ္ဌလည်းဖြစ်၊ ပြည်ထောင်စုလွှတ်တော်၏ နာယကလည်းဖြစ်သူ ဦးခင်အောင်မြင့်သည် တပ်မတော် စိတ်ဓာတ်စစ်ဆင်ရေးဌာန၏ အကြီးအကဲဟောင်းတဦးလည်း ဖြစ်သည်။ သူသည် ဇန်နဝါရီလ ၃၁ ရက်နေ့ အမျိုးသားလွှတ်တော် အစည်းအဝေးတွင်လည်း လွှတ်တော်အတွင်း သူနိုင်ကိုယ်နိုင် စကားနိုင်လုပြောခြင်းမျိုး မဖြစ်စေရန် အမတ်များကို မှာကြားခဲ့သေးသည်။

လွှတ်တော်တက် အမတ်များအနေဖြင့် လွှတ်တော်တွင်း ဆွေးနွေးမည့် အဆိုများနှင့် မေးခွန်းများကို ၁ဝ ရက်ကြိုတင်၍ လွှတ်တော်ရုံး ဒုတိယ ညွှန်ကြားရေးမှူးချုပ်မှတဆင့် သက်ဆိုင်ရာ လွှတ်တော်ဥက္ကဋ္ဌများထံ ပေးပို့ခဲ့ရသည်။

ထို့နောက် လွှတ်တော်ဥက္ကဋ္ဌ စိစစ်ပြီးဖြစ်သည့် မေးခွန်းများနှင့် အဆိုများကို မည်သည့်နေ့တွင် ဆွေးနွေးရန်ရှိကြောင်း တရက်ကြိုတင်ကာ အမတ်များထံ လွှတ်တော်ရုံးက ပေးပို့ထားလေ့ရှိပြီး နောက်နေ့တွင် ဆွေးနွေးကြခြင်း ဖြစ်သည်။

ပြည်သူ့လွှတ်တော်နှင့် အမျိုးသားလွှတ်တော်ဆိုင်ရာ ဥပဒေနှင့် နည်းဥပဒေများ အခန်း ၁၇ (ဃ)တွင် လွှတ်တော် ဥက္ကဋ္ဌများက ဆွေးနွေးရန် ခွင့်ပြုချက် မရသေးမီ မည်သည့်အဆိုကိုမျှ ထုတ်ပြန်ကြေညာခြင်း မပြုရဟု ဖော်ပြထားသည်။

အချို့အဆိုများ ပယ်ဖျက်ခဲ့ကြောင်း ဗုဒ္ဓဟူးနေ့ အစည်းအဝေးတွင် အမျိုးသားလွှတ်တော် ဥက္ကဋ္ဌ ဦးခင်အောင်မြင့်က ပြောဆိုခဲ့သည့်အပြင်၊ ထိုသို့မဖြစ်ရေး ထိန်းသိမ်းရန် လိုအပ်ကြောင်း မှာကြားခဲ့သေးသည်ဟု အမျိုးသား လွှတ်တော်တက် အမတ်တဦးကလည်း ပြောသည်။

အမျိုးသားလွှတ်တော်တွင် အဆိုများ ပယ်ဖျက်ကြောင်း ပြောခဲ့သော်လည်း ပြည်သူ့လွှတ်တော်တွင် ထိုသို့သော ဖြစ်ရပ်မျိုး မရှိဘဲ အဆိုများ ဆွေးနွေးခွင့်ရခဲ့သည်ဟု ပြည်သူ့လွှတ်တော်တက် အမတ်တဦးက ဆိုသည်။

ယနေ့ ပြည်ထောင်စုလွှတ်တော်တွင် ကြံ့ဖွံ့အမတ်၊ လယ်/ဆည်ဝန်ကြီး ဦးဋ္ဌေးဦး၏ စီးပွားရေးပိတ်ဆို့မှု ကန့်ကွက်ရန် အဆိုတင်ခဲ့ပြီး၊ ၎င်းအဆိုကို သောကြာနေ့ အစည်းအဝေးတွင် ဆွေးနွေးကြမည်ဖြစ်သည်။

အနောက်နိုင်ငံများ၏ စီးပွားရေး ပိတ်ဆို့မှုကို ပြန်လည်ရုပ်သိမ်းစေရန် ရွေးကောက်ပွဲဝင် ပါတီများ လိုလားနေကြပြီး ယခု ဦးဋ္ဌေးဦး၏ အဆိုသည် စီးပွားရေးပိတ်ဆို့မှုကို ရုပ်သိမ်းရန် တောင်းဆိုသည့် အဆိုမဟုတ်ဘဲ ကန့်ကွက်သည့် အဆိုဖြစ်နေခြင်းကြောင့် သောကြာနေ့လွှတ်တော်တွင် သူ့အနေဖြင့် ပါဝင်ဆွေးနွေးမည် မဟုတ်ဟု အမျိုးသား ဒီမိုကရေစီ အင်အားစု NDFပါတီမှ အမတ် ဦးခိုင်မောင်ရည်က ဆိုသည်။

“ကျနော်တို့ပါတီက စီးပွားရေးပိတ်ဆို့တာကို ရုပ်သိမ်းပေးဖို့အဆို ဆိုရင်တော့ ကျနော်က ထောက်ခံတယ်။ အခုဟာက သူတို့ဟာ ဘာကြောင့်ပိတ်ဆို့တာလဲ၊ ပိတ်ဆို့တဲ့ အကြောင်းရင်းတွေရှိပါတယ်။ အဲဒီပိတ်ဆို့တဲ့ အကြောင်းရင်းတွေကို တဖက်က လိုက်လျောမှ တဖက်က လိုက်လျောလာမှာ ဖြစ်တဲ့အတွက် နှစ်ဖက်လုံး ကိစ္စဖြစ်တယ်။ အဲဒီတော့ ပိတ်ဆို့တဲ့ ဘက်ကိုကော၊ ပိတ်ဆို့ခံရတဲ့ ဘက်ကိုကော နှစ်ဖက်လုံးကို တောင်းဆိုရမှာ ဖြစ်တယ်။ အဲဒီလို ဆွေးနွေးဖို့ အခုဟာက ရုပ်သိမ်းပေးဖို့ တောင်းဆိုတာလည်း မဟုတ်ဘူး၊ ကန့်ကွက်ပါတယ်ဆိုတော့ ကျနော်တို့က ဆွေးနွေးစရာကို မရှိတော့ဘူး” ဟု သူက ပြောသည်။

ကြာသပတေးနေ့ ပြည်ထောင်စုလွှတ်တော်တွင် ဒေါက်တာမြတ်ဥာဏစိုးက မြန်မာနိုင်ငံတွင် စီးပွားရေးကို အထောက်အကူပြုမည့် အမျိုးသားစီးပွားရေး ကော်မရှင်တခု ဖွဲ့စည်းရန် အဆိုကို တင်သွင်းခဲ့ရာ ထောက်ခံမည်သူ မရှိဟု လွှတ်တော်အမတ်များက ပြောသည်။

ဒေါက်တာမြတ်ဥာဏစိုး၏ ဒုတိယအဆိုဖြစ်သည့် စီးပွားရေး အထူးဇုန်များ ထပ်မံတိုးချဲ့ရန် အဆိုသည်လည်း ထောက်ခံမဲ ၁၃၉ မဲ ကန့်ကွက်မဲ ၄ဝဝ ကျော်ဖြင့် ရှုံးနိမ့်ခဲ့သည်။

ကြံ့ဖွံ့အမတ်ဖြစ်သူ စက်မှု ၁ ဝန်ကြီး ဦးအောင်သောင်း၏ ကျောင်းသားများအတွက် ပညာသင် ထောက်ပံ့ကြေးပေးရန် ရှိ/မရှိ မေးခွန်းကို ပညာရေးဝန်ကြီး ဒေါက်တာချမ်းငြိမ်းက တနှစ်လျှင် ကျောင်းသား ၁၅ဝဝ ကျော်ကို ပညာသင်စရိတ် ပေးနေကြောင်း ပြန်လည်ဖြေကြားခဲ့သည်။

မြန်မာနိုင်ငံတွင် ဓာတ်မြေသြဇာများ ထုတ်လုပ်မှု အရည်အသွေးမြင့်မားရေး မေးခွန်းကို လယ်/ဆည်ဝန်ကြီးက ဓာတ်မြေသြဇာများ အတုထုတ်လုပ်မှုများ ရှိပါက အရေးယူသွားမည်ဟု ဖြေကြားခဲ့သည်။

ပြည်ထောင်စုလွှတ်တော်သည် ယခုလ ၂၈-၂၉ ရက်နေ့များအထိ ကျင်းပဖွယ်ရှိပြီး၊ ၃ဝ ရက်နေ့တွင် ဝန်ကြီးများ နေရာချထားရန် ရှိနိုင်သည်ဟု အမတ်များက ခန့်မှန်းကြသည်။