ကက်ဆီကွန်ဘဏ် အေတီအမ်မှာ မြန်မာစာအသုံးပြု

ဖနိဒါ

အင်္ဂါနေ့၊ သြဂုတ်လ ၁၀ ရက် ၂၀၁၀ ခုနှစ် ၁၉ နာရီ ၁၄ မိနစ် .

ချင်းမိုင်(မဇ္ဈိမ)။ ။ မြန်မာရွှေ့ပြောင်း လုပ်သားများ အသုံးပြုနိုင်ရန်အတွက် ထိုင်းနိုင်ငံ ပုဂ္ဂလိက ဘဏ်တခုဖြစ်သော ကက်ဆီကွန်ဘဏ် (Kasikorn Bank) သည် ATM ငွေသွင်း ငွေထုတ်စက် အလုံး ၁ဝဝ တွင် မြန်မာ ဘာသာကို ထည့်သွင်းထားလိုက်ပြီဖြစ်သည်။

ကက်ဆီကွန်ဘဏ်မှ ရွေ့ပြောင်းလုပ်သားများအတွက် မြန်မာဘာသာ ထည့်သွင်းထားသော ATMစက်အား ထုတ်လုပ်ပြီး ၎င်း၏ငွေလွှဲလုပ်ငန်းသည် ၂၀ ရာခိုင်နှုန်းမြင့်တက် (photo:: www.bangkokpost.com )

ငါးဖမ်းအလုပ်သမား အများဆုံး နေထိုင်သည့် ဘန်ကောက်မြို့အနီး ဆမွတ်ဆခွန်၊ ပတ်ခ်ျဘူရီ၊ ပရာကျာ့ ခီရီခန် ၊ ရနောင်း နှင့် ထရတ် စသည့်ခရိုင် ၅ ခုတွင် မြန်မာစာအသုံးပြုသော အေတီအမ်စက်များ ထားရှိခြင်းဖြစ်ကာ ဆမွတ်ဆခွန်တွင် ၈ဝ ရာခိုင်နှုန်းဖြစ်သည်ဟု ယမန်နေ့က ကာစီကွန်ဘဏ်မှ အရာရှိတဦးက ပြောသည်။

“ မြန်မာအလုပ်သမားတွေကို ATM သုံးနည်း မိတ်ဆက်ပေးပြီးတဲ့နောက် ငွေလွှဲတဲ့ လုပ်ငန်း ၂ဝ ရာခိုင်နှုန်း တိုးတက်လာတာတွေ့ရတယ် ”ဟု ကက်ဆီကွန်ဘဏ်၏ ဒုတိယ ဥက္ကဋ္ဌ ဝိရာဝတ် ပန်သာဝန်ကွန်း (Wirawat Panthawangkun) ၏ပြောစကားကို ဘန်ကောက်ပို့စ် သတင်းစာက ကိုးကားဖော်ပြထားသည်။

ပြီးခဲ့သည် ဖေဖော်ဝါရီလမှ စ၍ မြန်မာပြည်သား အများဆုံးနေထိုင်သည့် ဆမွတ်ဆခွန်ခရိုင်တွင် စတင် မိတ်ဆက်အသုံးပြုခဲ့ရာ ယခုလတွင် ငွေလွှဲခြင်း၊ ငွေသွင်းခြင်း၊ ငွေထုတ်ခြင်းများ အသုံးပြုလာသည်ဟု သိရသည်။

ယခုဆိုလျှင် KBank ခေါ် ကက်ဆီကွန်ဘဏ်တွင် ထိုင်း၊ အင်္ဂလိပ်၊ တရုတ်၊ ဂျပန်နှင့် မြန်မာဘာသာတို့ဖြင့် အသုံးပြုလာနိုင်ပြီ ဖြစ်သည်။

လက်ရှိ ထိုင်းနိုင်ငံ၌ အလုပ်လုပ်ကိုင်ခွင့် လက်မှတ်(ဘတ်)နှင့် ယာယီနိုင်ငံကူးလက်မှတ် ရရှိထားသော မြန်မာအလုပ်သမားများ ဘဏ်အပ်ငွေ စာရင်းဖွင့်ခွင့် ရထားသည်ဟု သိရသည်။

သို့သော် စက်ရုံအလုပ်ရုံ လုပ်ငန်းရှင်များမှ ဘဏ်စာရင်းဖွင့်ပေးခြင်း ဖြစ်ပြီး အလုပ်သမား အများစုမှာ ငွေ မလွှဲတတ်သည့်အတွက် အခြားသူကို တဆင့်ပြန်ခိုင်းသဖြင့် ငွေလိမ်လည်ခံရသည့် အလုပ်သမားများရှိနေ၍ ATM ကတ် အသုံးပြုပုံကို အမြန်ဆုံးသိရန် လိုသည်ဟု မဟာချိုင်တွင် အလုပ်လုပ်နေသော ကိုစည်သူက ပြောသည်။

မြန်မာရွှေ့ပြောင်းအလုပ်သမားများသည် မြန်မာပြည်သို့ ဟွန်ဒီမှတဆင့် ငွေလွှဲပို့ပေးလျှင် ထိုင်း-မြန်မာနယ်စပ်ရှိ ငွေပို့ဆောင်ပေးသူထံသို့ ဘဏ်စနစ်ဖြင့် လွှဲပို့ပေးပြီး သူတို့မှတဆင့် အိမ်သို့အရောက် လွှဲပို့ပေးတတ်ကြသည်။

မြန်မာအလုပ်သမားများအတွက် ဘဏ်ဝန်ဆောင်မှု ပေးလာသည့်အပေါ် ကြိုဆိုပြီး အလုပ်သမားများ အတွက် ဘဏ်တွင် ငွေစုထားရသည့်အတွက် ထိုင်းအာဏာပိုင်များ၏ ငွေညစ်တောင်းခံမှုစသော ဘဝလုံခြုံရေးအန္တရာယ်များ လျော့နည်းလာနိုင်သဖြင့် ဘဏ်စာအုပ်များ အသုံးပြုရန် တိုက်တွန်းလိုကြောင်း ပြည်ထောင်စု မြန်မာနိုင်ငံ အမျိုးသားညွန့်ပေါင်းအစိုးရအဖွဲ့မှ ရွှေ့ပြောင်းအလုပ်သမားရေးရာ တာဝန်ခံ ကိုသက်ခိုင်က ပြောသည်။

“မြန်မာစာထည့်ပေးတာက ရွှေ့ပြောင်း အလုပ်သမားတွေအထဲမှာ မြန်မာပြည်သားက ၈ဝ ရာခိုင်နှုန်း ရှိနေလို့ ပထမဆုံး လုပ်ဖြစ်တာပါ”ဟု သူက မဇ္ဈိမကို ပြောသည်။

ကက်ဆီကွန်ဘဏ် အနေဖြင့် တခြား အိမ်နီးချင်း နိုင်ငံများဖြစ်သည့် ကမ္ဘောဒီးယား၊ လာအို ရွှေ့ပြောင်း အလုပ်သမားများအတွက်လည်း ဝန်ဆောင်မှု ပေးနိုင်ရန် အစီအစဉ်ရှိကြောင်း သိရသည်။

မြန်မာနိုင်ငံသား ရွှေ့ပြောင်းအလုပ်သမားများကို ၂ဝဝ၉ ခုနှစ်မှ စ၍ ယာယီနိုင်ငံကူးလက်မှတ် ထုတ်ပေးနေရာ ပြီးခဲ့သည့် ဇူလိုင်လ ၁၁ ရက်နေ့ထိ အလုပ်သမား (၁၂၃,၂ဝ၄)ဦးယာယီ နိုင်ငံကူးလက်မှတ် ပြုလုပ်ထားပြီး ဖြစ်ကြောင်း မြန်မာစစ်အစိုးရ၏ ထုတ်ပြန်ချက်အရ သိရသည်။

ထိုင်းနိုင်ငံအတွင်း မြန်မာ၊ လာအိုနှင့် ကမ္ဘောဒီးယား နိုင်ငံများမှ ရွှေ့ပြောင်း အလုပ်သမား များလာရောက် အလုပ်လုပ်ကိုင်ကြရာ မြန်မာအလုပ်သမား ၂ သန်းခွဲကျော်ရှိသည်။