တက်လူ/ ၂၂ ဖေဖော်ဝါရီ ၂ဝ၁ဝ
နအဖစစ်အစိုးရအား ဆန့်ကျင်သည့် လှုပ်ရှားမှုတို့ကို အချိန်မီသတင်းပေးနိုင်ရန် ရည်ရွယ်၍ ရန်ကုန်ရှိ စည်ပင်ဧရိယာ မြို့နယ်များရှိ ဈေးအသီးသီးမှ ဈေးသည်အချို့ကို ဝေါ်ကီတော်ကီ ခေါ် စကားပြော ဆက်သွယ်ရေးစက်များ ချထားပေးကြောင်း ရန်ကုန်တိုင်းအေးချမ်းသာယာရေးနှင့်ဖွံ့ဖြိုးရေးကောင်စီ (တယက) မှ သိရသည်။
“လောလောဆယ် ကုန်စိမ်းရောင်းတဲ့သူတွေကို ချပေးထားတယ်။ ဥပမာ ကြက်သားရောင်းတဲ့သူတွေ၊ ဟင်းသီးဟင်းရွက် ရောင်းတဲ့သူတွေပေါ့။ ဘယ်လိုအကြောင်းပဲဖြစ်ဖြစ် သတင်းပေးဖို့ပါပဲ။ သူတို့အနေနဲ့ အစိုးရဆန့်ကျင်တဲ့သူတွေကို ဖမ်းဆီးခွင့်မရှိပါဘူး၊ သတင်းပေးရုံပါပဲ။ သူတို့ကို လခပေးထားတာဖြစ်တယ်။ အနည်းဆုံး တနေ့ကို (၂,၀၀၀) ကျပ်နဲ့ တွက်ပေးတာဖြစ်တယ်” ဟု တယက၏ ခိုင်လုံသောသတင်းရပ်ကွက်မှ ပြောသည်။
ရန်ကုန်မြို့လယ်ရှိ (၃၈) လမ်းဈေးဟု အများသိသော ဈေးတွင် ကြက်သားရောင်းချသူတဦး၏ ဆိုင်တွင် ရောင်းချနေသော ကြက်အကောင်များ၏ အောက်တွင် ပလတ်စတစ်အကြည်ရောင် အပါးစားဖြင့် အုပ်ထားသော စကားပြောစက်ကို တွေ့ခဲ့ရကြောင်း ယင်းဈေးတွင် အမြဲတမ်းဈေးဝယ်နေကျ အိမ်ရှင်မတဦးက ပြောသည်။
၎င်းက “တွေ့နေတာပါပဲ၊ ကျမတို့လည်း အရမ်းကြီး ဂရုမစိုက်ပါဘူး။ သူတို့လည်း ကျမအထင်တော့ စားဝတ်နေရေးကြောင့် လုပ်တာဖြစ်မှာပါ။ ကိုယ့်အလုပ်အပြင် တလကို ကျပ် (၅) သောင်း (၆) သောင်းလောက် ရတာတော့ ဒီခေတ်မှာ လုပ်မယ့်သူ ချည်းပဲလေ” ဟု ပြောသည်။
တယကတာဝန်ရှိသူ၏ ပြောပြချက်အရ စကားပြောစက် အလုံးရေ (၂၀၀) ကျော်ကို မြို့နယ်အလိုက်ရှိသော ဈေးများတွင် ချထားပေးကြောင်း သိရသည်။
ယခုနှစ်တွင် စစ်အစိုးရက ရွေးကောက်ပွဲပြုလုပ်ရန် ကြေညာထားသည့်အတွက် အစိုးရအနေဖြင့် ပြည်သူတို့၏ သဘောထားများကို လွတ်လပ်စွာ ပြောဆိုနိုင်ခွင့် ပေးရန်လိုကြောင်း၊ သို့သော် ရွေးကောက်ပွဲနှင့်ပတ်သက်၍ ပြည်သူတို့က လွတ်လပ်စွာ ပြောဆိုမှု ပြုလုပ်သည်ကို မတွေ့ရကြောင်း ပြည်တွင်းမှ သတင်းစာနယ်ဇင်းသမားတဦးက ပြောသည်။
၎င်းက “ကျနော်တို့က မေးတယ်၊ တွေ့တဲ့သူတချို့ကိုပေါ့ဗျာ။ ရွေးကောက်ပွဲကို စိတ်ဝင်စားမှု ရှိ မရှိပေါ့။ ဒါပေမယ့် တော်တော် များများ မပြောရဲဘူးဗျ။ သူတို့ အဲဒီစကားကို ပြောရင်ပဲ အဖမ်းခံရမှာကို ကြောက်နေတာတွေ့ရတယ်။ ဒါကိုကြည့်ခြင်းအားဖြင့် အတားအဆီးတွေ ရှိနေဆဲဆိုတာ ပေါ်လွင်နေပါတယ်” ဟု ပြောသည်။
မြန်မာနိုင်ငံအနှံ့တွင်လည်း အစိုးရဆန့်ကျင်သောသူများကို စစ်အစိုးရက သတင်းပေးသင်တန်း ဖွင့်လှစ်ရန်အတွက် လူငယ်များအား စိစစ်ရှာဖွေနေကြောင်း၊ ယင်းသင်တန်းကို “စွမ်းရည်မြှင့်တင်ရေးနှင့် စည်းရုံးရေးသင်တန်း” ဟု ညွှန်ကြားချက်ဖြင့် (၁၀) တန်းအောင်ပြီးသော လူငယ်များကို ဦးစားပေးရွေးချယ်နေသည်။
ဆယ်တန်းစာမေးပွဲများ ကျင်းပပြီးစီးပါက ရွေးကောက်ပွဲဥပဒေ ထုတ်ပြန်မည်ဟုလည်း ရန်ကုန်တွင် သတင်းများ ထွက်ပေါ်နေသည်။
Geen opmerkingen:
Een reactie posten