NEJ / ၁၀ ဇူလိုင် ၂၀၀၉
မွန်ပြည်နယ် မုဒုံမြို့နယ်တွင် သွေးလွန်တုပ်ကွေးရောဂါဖြင့် ကျောင်းသားအချို့ သေဆုံးခဲ့သောကြောင့် ယခုသီတင်းပတ်တွင် မူလတန်းနှင့် အလယ်တန်းအဆင့် ကျောင်းတက်ရောက်သူ ကျောင်းသားဦးရေ လျော့ကျသွားကြောင်း မြို့ခံများက ပြောသည်။
မုဒုံမြို့ အမှတ် (၂) အထက်တန်းကျောင်းမှ ကျောင်းဆရာတဦးက “ဇွန်လနောက်ဆုံးအပတ်မှာ အမှတ် (၁) ကျောင်းက ကျောင်းသားတွေ နှစ်ရက်ထဲမှာ (၄) ယောက်တောင် သေတဲ့အကြောင်း အခု သတင်းပျံ့နေတယ်။ လူတွေက ရိုးရိုးတုပ်ကွေးနဲ့မှ ဟုတ်ရဲ့လားပေါ့။ နှစ်ရက်တည်းနဲ့ (၄) ယောက်တောင် ဆုံးတာဆိုတော့လေ” ဟု ပြောသည်။
၎င်းက “ကျောင်းသားတွေ သေပြီးတဲ့နောက်မှ ဆရာဝန်တွေ ဟိုဝက်တုပ်ကွေးအန္တရာယ် ကာကွယ်ရေးအတွက်ဆိုပြီး ဒီမုဒုံကျောင်းကို ရောက်လာတယ်။ သွေးစစ်တာတို့၊ ဝက်တုပ်ကွေးနဲ့ ပတ်သက်တဲ့ ကြိုတင်ကာကွယ်ရေးတို့အတွက် ပညာပေး ပွဲတွေ လာလုပ်ကြတယ်။ ကျောင်းမှာ ဖြစ်နေတဲ့ သွေးလွန်တုပ်ကွေးနဲ့ ဟိုကျန်းမာရေးပညာပေးအဖွဲ့ ပြောတဲ့ ၀က်တုပ်ကွေးက တိုက်ဆိုင်သွားတော့၊ ဒါ သွေးလွန်တုပ်ကွေးလား၊ အအေးမိတာလား၊ ဝက်တုပ်ကွေးလား၊ လူတုပ်ကွေးလားဆိုတာ မခွဲတတ်ကြ တော့ဘူး။ အဲဒါကြောင့် ကျောင်းသားမိဘတွေက သူတို့ကလေးတွေကို ကျောင်းမလွှတ်ကြတော့ဘူး” ဟု ဆက်ရှင်းပြသည်။
ဇွန်လကုန်ပိုင်းမှစ၍ မော်လမြိုင်ဆေးရုံကြီး၌ တုပ်ကွေးရောဂါဖြစ်ပွားနေသည့်ကလေးငယ် အများအပြားရှိနေပြီး အများစုမှာ ကော့ကရိတ်၊ သံဖြူဇရပ်နှင့် မုဒုံမြို့နယ်တို့မှဖြစ်ကြောင်း မြို့ခံများက ပြောသည်။
ပြီးခဲ့သည့် သီတင်းပတ်အတွင်း မုဒုံမြို့ ဘိုတဲရပ်မှ တုပ်ကွေးရောဂါဖြင့် သေဆုံးသွားသည့် (၆) တန်း ကျောင်းသားတဦး၏ အဒေါ်ဖြစ်သူက “မော်လမြိုင်ဆေးရုံက ပြောတာ ရိုးရိုးတုပ်ကွေးရောဂါနဲ့ပဲ ဆုံးတာတဲ့။ ဆေးရုံဆေးစစ်ချက်ကို လွန်ခဲ့တဲ့ (၂) ရက်ကမှ သွားယူလာတာ။ ဖြစ်တာအရမ်းမြန်တော့ ဘာမှ လုပ်လို့ မမီလိုက်ဘူး။ သူ့အတန်းအဖော်တယောက်လည်း ဆုံးသွားတယ်။ တရက်ပဲ ခြားတယ်။ မော်လမြိုင်ဆေးရုံမှာပဲ။ အများစုက ကလေးတွေပဲ ဖြစ်တယ်။ သူတို့အမှတ် (၁) ကျောင်းက ဆရာမတယောက်လည်း ဆုံးသွားတာကြားတယ်၊ မော်လမြိုင်ဆေးရုံမှာပဲ” ဟု ပြောသည်။
ယခုနှစ်တွင် မုဒုံမြို့နယ်၌ သွေးလွန်တုပ်ကွေးဖြစ်ပွားသူများ ယမန်နှစ်ကထက် များပြားပြီး သွေးလွန်တုပ်ကွေးကြောင့် ကျောင်းသားအချို့ သေဆုံးမှုများဖြစ်ပွားနေချိန်သည် မြန်မာနိုင်ငံ၌ A(H1N1) တုပ်ကွေးရောဂါစွဲကပ်သူတဦး တွေ့ရှိကြောင်း အစိုးရက တရားဝင်ကြေညာခဲ့ပြီးနောက်ပိုင်း ရောဂါကာကွယ်ရေး သတိပေးချက်များ အဆက်မပြတ်ထုတ်ပြန်နေချိန်ဖြစ်သည့် အတွက် မုဒုံမြို့တွင် ကျောင်းသားအချို့ A(H1N1) တုပ်ကွေးရောဂါဖြင့် သေဆုံးသွားသည်ဟူသော ကောလာဟလသတင်း များလည်း ထွက်ပေါ်နေသည်။
ထိုသို့သတင်းများထွက်ပေါ်နေသည့်အတွက် ကျောင်းသားမိဘများက စိုးရိမ်ကာ ကျောင်းသားများအား ကျောင်းသို့ စေလွှတ်ရန် ငြင်းဆန်နေခြင်းကြောင့် ယခုအခါ မုဒုံမြို့ အမှတ် (၁) နှင့် အမှတ် (၂) အ.ထ.က ကျောင်းများတွင် ကျောင်းသားဦးရေ (၅၀) ရာခိုင်နှုန်းခန့် လျော့ကျသွားကာ စာသင်ကြားရန် မဖြစ်နိုင်တော့ကြောင်း မုဒုံမြို့ အမှတ် (၂) အထက်တန်းကျောင်းမှ ကျောင်းဆရာက ပြောသည်။
မော်လမြိုင်မြို့ ဆေးရုံကြီးမှ အထူးကု ဆရာဝန်တဦးကမူ နယ်အရပ်ရပ်မှ တက်ရောက်ကုသနေသည့် ရာသီအလိုက် သာမာန်တုပ်ကွေးရောဂါ ဖြစ်ပွားသူများသာ ဆေးရုံကြီးတွင် ရှိကြောင်းနှင့် ၎င်းတို့ထဲမှ သွေးလွန်တုပ်ကွေးဖြစ်ပွားသူအချို့ သေဆုံးမှုများ ရှိသော်လည်း A(H1N1) ဗိုင်းရပ်စ် အမျိုးအစား တုပ်ကွေးရောဂါကြောင့် မဟုတ်ကြောင်း ခေတ်ပြိုင်သို့ ပြောသည်။ သို့သော် ယင်းသွေးလွန်တုပ်ကွေးရောဂါဖြင့် သေဆုံးသူ မည်မျှရှိသည်ကို မိမိအနေဖြင့် မသိရှိကြောင်း ၎င်းက ပြောသည်။
မြန်မာနိုင်ငံတွင် A(H1N1) ဗိုင်းရပ်စ်ရောဂါပိုး တွေ့ရှိသူ အသက် (၁၃) နှစ်အရွယ် ကျောင်းသူသည် ရောဂါအခြေအနေ ကောင်းမွန်လာသောကြောင့် ဇူလိုင်လ (၈) ရက် ညနေပိုင်းတွင် ဆေးရုံမှ ဆင်းခွင့်ပြုလိုက်ကြောင်း ယမန်နေ့ထုတ် စစ်အစိုးရ သတင်းစာများတွင် ပါရှိသည်။
ထို့အပြင် A(H1N1) ရောဂါ စောင့်ကြပ်ကြည့်ရှုရန် စာရင်းတွင် ပါဝင်သူ (၂၆၀) ကျော်ကိုလည်း စောင့်ကြည့်ရေးလုပ်ငန်းများ ရုပ်သိမ်းလိုက်ပြီဖြစ်ကြောင်း ဖော်ပြပါရှိသည်။
Abonneren op:
Reacties posten (Atom)
Geen opmerkingen:
Een reactie posten