မြန်မာအတိုက်အခံများစိတ်ပူစရာထိုင်းအစိုးရသစ်

ကိုဝိုင်း ဗုဒ္ဓဟူးနေ့၊ ဇူလိုင်လ ၀၆ ရက် ၂၀၁၁ ခုနှစ် ၁၇ နာရီ ၅၀ မိနစ် .

ချင်းမိုင်(မဇ္ဈိမ)။ ။ဒီမိုကရေစီလိုလားသောမြန်မာအတိုက်အခံများက၎င်းတို့အပေါ်ထားရှိမည့်ထိုင်းနိုင်ငံ အစိုးရသစ်၏မူဝါဒကိုစိတ်မအေးနိုင်ကြသလို၊၎င်းတို့၏မိတ်ဆွေများကလည်းစိုးရိမ်မှုရှိကြောင်းထုတ်ဖော်ပြောဆိုကြသည်။

တနင်္ဂနွေနေ့ရွေးကောက်ပွဲတွင်လက်ရှိဝန်ကြီးချုပ်အဖိဆစ်ဝေ့ခ်ျချာချီဝ၏ဒီမိုကရက်တစ်ပါတီကို၁၀၆နေရာအသာဖြင့်အနိုင်ရခဲ့သည့်ဖု့ရ်ထိုင်းပါတီကအခြားအနိုင်ရပါတီ၎ခုနှင့်ပူးပေါင်းလိုက်ပြီး လွှတ်တော်တွင်းနေရာ၅ဝဝအနက်၂၉၉နေရာကိုထိန်းချုပ်ထားမည့်ညွန့်ပေါင်းအစိုးရဖွဲ့စည်းသွားမှာ ဖြစ်သည်။

“သက်ဆင်ရဲ့အတွေးအမြင်ကိုဖု့ရ်ထိုင်းကအကောင်အထည်ဖော်မယ်”ဆိုသည့်ကြွေးကြော်သံဖြင့်အနိုင်ရခဲ့သော

ပြည်ပရောက်ဖြုတ်ချခံလိုက်ရသည့်ဝန်ကြီးချုပ်ဟောင်းသက်ဆင်ရှင်နာဝပ်ထရာ၏ညီမဖြစ်သူယင်းလတ်ခ် ရှင်နာဝပ်ထရာ၏ပါတီသည်သက်ဆင်အစိုးရဖြစ်စဉ်ကမူဝါဒအတိုင်းတသွေမတိမ်းလိုက်နာပါက ထိုင်းအခြေစိုက်မြန်မာအတိုက်အခံများအပေါ်တင်းကျပ်လာနိုင်သည်ဟုပအိုဝ်းအမျိုးသား လွတ်မြောက်ရေးအဖွဲ့ချုပ် PNLO ဥက္ကဋ္ဌ ဗိုလ်မှူးကြီးခွန်ဥက္ကာက မဇ္ဈိမကို ပြောသည်။

“သက်ဆင်တုန်းကတော့နယ်စပ်ဒေသတွေမှာစီးပွားရေးဇုန်တွေလုပ်မယ်ဆိုတဲ့အခါကျတော့လှုပ်ရှားမှုတွေကို ထိန်းချုပ်တာတို့၊ အသွားအလာတွေကို ထိန်းချုပ်တာတို့၊ ကျနော်တို့ တွေ့ဆုံမှုတွေ၊ စည်းဝေးမှုတွေကို ထိန်းချုပ်တာတွေလုပ်ခဲ့ဖူးတယ်”ဟု သူက ပြောသည်။ ဒီမိုကရက်တစ်ပါတီသည် မြန်မာအတိုက်အခံများနှင့် ပိုမိုရင်းနှီးပြီး လူ့အခွင့်အရေး၊ ဒုက္ခသည် အခွင့်အရေးများ အတွက် အားကိုးရသည်ဟု ဆိုသည်။

မစ္စတာသက်ဆင်လက်ထက်မှစ၍ထိုင်း-မြန်မာနယ်စပ်မဲဆောက်-မြဝတီအထူးစီးပွားရေးဇုန် ဖော်ဆောင်ရေး၊ထားဝယ်ရေနက်ဆိပ်ကမ်းကိစ္စများကို မြန်မာစစ်အစိုးရနှင့်ဆွေးနွေးခဲ့သည်။ ထားဝယ် ဖွံ့ဖြိုးရေး စီမံကိန်းအတွက် အကောင်အထည် ဖော်မည့် အီတာလျံ-ထိုင်း ကုမ္ပဏီက ၂ဝ၁၂ ခုနှစ်တွင် စတင် အကောင်အထည် ဖော်ရန် စီစဉ်ထားပြီး ရင်းနှီးမြှုပ်နှံသူများကို ရှာဖွေလျက် ရှိသည်။

မကြာမီ တက်လာမည့် ထိုင်းအစိုးရသစ်သည် ၂ဝဝဝ-၂ဝဝ၆ ခုနှစ်တွင် ဝန်ကြီးချုပ်ဟောင်း သက်ဆင် ချမှတ်ခဲ့သည့် မူဝါဒများကို ဆက်လက် ကိုင်ဆွဲသွားမည်ဟု သုံးသပ်သူမှာ ထိုင်းနိုင်ငံ၌ အင်္ဂလိပ်ဘာသာဖြင့် ထုတ်ဝေသော သည်နေးရှင်း သတင်းစာ၏ အယ်ဒီတာအဖွဲ့ဝင် ကာဝီ ချွန်ခစ်တဗွန် Kavi Chongkittavorn ဖြစ်သည်။ ထိုင်းနိုင်ငံရှိ မြန်မာအတိုက်ခံများ အနေဖြင့် သတိရှိရန်လိုကြောင်း သူက ပြောသည်။

“ယင်လတ်ခ် ကိုယ်တိုင်က သူဟာ သက်ဆင်ကိုယ်ပွား ဖြစ်တယ်လို့ ပြောထားတာ။ နေပြည်တော် အစိုးရနဲ့ ပိုပြီးနီးကပ်ဆက်ဆံသွားမှာဖြစ်လို့ထိုင်းနိုင်ငံမှာရှိတဲ့မြန်မာအတိုက်အခံတွေအနေနဲ့စိုးရိမ်ရဖို့ရှိပါတယ်။ ဘာလို့လဲဆိုတော့သက်ဆင်လက်ထက်မှာတင်းကျပ်တာတွေလုပ်ခဲ့ဖူးတယ်လေ”ဟုသူကမဇ္ဈိမကို ပြောသည်။ထိုင်းအခြေစိုက်မြန်မာ့အရေးလေ့လာသူဦးအောင်သူငြိမ်းကမူအစိုးရအသစ်အနေဖြင့် ထိုင်းပြည်သူများအကြားပြန်လည်သင့်မြတ်ရေးနှင့်၈၄နှစ်မြောက်ဘုရင့်မွေးနေ့ကိုအကြီးအကျယ် ကျင်းပရေးတို့ ဦးစားပေးရဦးမည်ဖြစ်သဖြင့် မြန်မာအတိုက်အခံများ အရေး ချက်ချင်း လုပ်ဆောင်ဦးမည်ဟု မယူဆပေ။သို့သော်“ရေရှည်မှာတော့မြန်မာအစိုးရနဲ့ ပိုပြီးနီးစပ်လေ၊ ဒီဘက်မှာ တင်းကြပ်တာမျိုးတွေ ဖြစ်နိုင်လေလေပေါ့” ဟု ဆိုသည်။

ထိုင်းအခြေစိုက်လူ့ဘောင်သစ်ဒီမိုကရက်တစ်ပါတီမှဥက္ကဋ္ဌ ဦးအောင်မိုးဇော်ကမူထိုင်းအစိုးရသစ်အနေဖြင့် မြန်မာနိုင်ငံ၏ ဒီမိုကရေစီ ဖွံ့ဖြိုးတိုးတက်ရေး အတွက် ကူညီမည်ဟုတော့ မျှော်လင့်နေသည်။

“ဥပမာဝန်ကြီးချုပ်ဟောင်းသက်ဆင်လက်ထက်ကဆိုရင်BangkokProcess ဆိုပြီး မြန်မာပြည်မှာ အမျိုးသား သင့်မြတ်ရေးဖြစ်ဖို့ ကြိုးစားခဲ့ဖူးပါတယ်” ဟု သူက မဇ္ဈိမကို ပြောသည်။

၂ဝဝ၃-၂ဝဝ၄ ခုနှစ် မစ္စတာသက်ဆင် အာဏာရှိစဉ်က BangkokProcessဟုအမည်ပေးထားသော စင်္ကာပူ၊ သြစတြေးလျ၊ သြစတြီးယား၊အီတလီ၊ဂျာမဏီ၊ပြင်သစ်၊ဂျပန်၊တရုတ်နှင့် အိန္ဒိယတို့ ပါဝင်သည့် မြန်မာ့အရေး

ဆွေးနွေးပွဲကို ထိုင်းနိုင်ငံ ဘန်ကောက်မြို့၌ အိမ်ရှင်အဖြစ် ၂ ကြိမ် ကျင်းပခဲ့သော်လည်း ဒုတိယအကြိမ်တွင် မြန်မာက မတက်ရောက်တော့သဖြင့် အစီအစဉ် ရပ်သွားခဲ့သည်။

လက်ရှိဒီမိုကရက်တစ်ပါတီ လွှတ်တော်အမတ်နှင့် မြန်မာ့အရေး စိတ်ဝင်စားသူ အာဆီယံ အမတ်များအဖွဲ့ AIPMCဥက္ကဋ္ဌကရိုင်ဆတ်ချွန်ဟာဗန်ကမူအသစ်တက်လာမည့်အစိုးရသည်ကော်ပိုရေးရှင်းနှင့်ကုမ္ပဏီများ၏ အကျိုးစီးပွားကိုသာ ဦးစားပေးမည်ဖြစ်၍ မြန်မာလူထုအတွက် အန္တရာယ်ရှိသည်ဟု ဆိုသည်။

“သူတို့မှာကဒေသခံတွေနဲ့ပူးပေါင်းဆောင်ရွက်ဖို့၊ဒေသခံအသံကိုသိရဖို့လည်းမကြိုးစားတတ်ကြဘူး။ ဥပမာသံလွင်မြစ်ပေါ်မှာရေကာတာ တည်ဆောက်တာ၊ ရတနာ သဘာဝဓာတ်ငွေ့ပိုက်လိုင်း၊ ပြီးခဲ့တဲ့ အစိုးရ (သက်ဆင်အစိုးရ)ကထားဝယ်မှာရေနက်ဆိပ်ကမ်းဆောက်ချင်တယ်။အခုတက်မယ့်အစိုးရလည်း အတူတူပဲဖြစ်မှာပါ” ဟု သူက မဇ္ဈိမကို ပြောသည်။

ဖြစ်လာနိုင်ဖွယ်ရှိသောယင်လတ်ခ်ဦးဆောင်မည့်ထိုင်းအစိုးရအသစ်သည်မစ္စတာသက်ဆင်နှင့် မစ္စတာအဖိဆစ်တို့၏အစိုးရများထက်ပိုမိုအင်အားခိုင်မာမည်ဟုသူကယူဆသည်။ထိုင်းနိုင်ငံရှိ မြန်မာအတိုက်အခံများနှင့်ပတ်သက်၍နေပြည်တော်အစိုးရကတောင်းဆိုလျှင် ရံဖန်ရံခါတင်းကျပ်မှုများ ဆောင်ရွက် လာနိုင်သော်လည်း အပြီးသတ် ရှင်းလင်းမည် မဟုတ်ဟု သူက သုံးသပ်သည်။