မြန်မာ စစ်ရာဇဝတ်မှုများကို စုံစမ်းရန် ပီညဲရိုးနှင့် ယိုကိုတာ တောင်းဆို

ဧရာဝတီ Wednesday, October 06, 2010

.မြန်မာ စစ်အစိုးရ၏ စစ်ရာဇဝတ်မှုများ၊ လူသား မျိုးနွယ်အပေါ် ကျူးလွန်သည့် ရာဇဝတ်မှုများနှင့် ပတ်သက်၍ စုံစမ်း စစ်ဆေးရေး ကော်မရှင် (CoI) ဖွဲ့စည်းရေး ထောက်ခံပေးရန် ဥရောပသမဂ္ဂ (EU) ကို ကုလသမဂ္ဂ လူ့အခွင့်အရေးဆိုင်ရာ ကိုယ်စားလှယ်ဟောင်း ၂ ဦးက တိုက်တွန်းလိုက်သည်။

ကုလသမဂ္ဂလူ့အခွင့်အရေးဆိုင်ရာကိုယ်စားလှယ်ဟောင်းမစ္စတာပေါ်လိုဆာဂျီယိုပီညဲရိုး(ဓာတ်ပုံ-article.wn.com)

မြန်မာ နိုင်ငံဆိုင်ရာ လူ့အခွင့်အရေး ကိုယ်စားလှယ်များအဖြစ် ဆောင်ရွက် ခဲ့ဖူးသည့် ဘရာဇီးလ် နိုင်ငံသား မစ္စတာ ပေါ်လို ဆာဂျီယို ပီညဲရိုး နှင့် ဂျပန်နိုင်ငံသား မစ္စတာ ယိုဇို ယိုကိုတာတို့က EUအဆင့်မြင့် ကိုယ်စားလှယ် မစ္စ ကက်သရင်း အက်ရ်ှတန် ထံသို့ စာရေးပြီး တိုက်တွန်းကြခြင်းဖြစ်သည်။

မစ္စတာ ပီညဲရိုးက ၂၀၀၀ ပြည့်နှစ်မှ ၂၀၀၈ အထိ လည်းကောင်း မစ္စတာ ယိုကိုတာက ၁၉၉၂ မှ ၁၉၉၆ ခုနှစ်ထိ လည်းကောင်း မြန်မာနိုင်ငံဆိုင်ရာ လူ့အခွင့်အရေး ကိုယ်စားလှယ်များ အဖြစ် အသီးသီး ဆောင်ရွက်ခဲ့ကြသည်။

“မြန်မာပြည်မှာ စစ်အစိုးရရဲ့ လူ့အခွင့်အရေး ချိုးဖောက်မှုတွေ တော်တော်များများ ရှိနေတယ်။ ပြည်သူလူထုကို တိုက်ရိုက် ထိခိုက်နေတယ်ဆိုတော့ မြန်မာနိုင်ငံဆိုင်ရာ လူ့အခွင့်အရေး ကိုယ်စားလှယ်ဟောင်းတွေအနေနဲ့ ဒီကိစ္စဟာ နိုင်ငံတကာ လူ့အခွင့်အရေး ဥပဒေတွေ၊ လူသားချင်းစာနာမှုဆိုင်ရာ ဥပဒေတွေကို ချိုးဖောက်နေတယ်ဆိုတာ ပြောဆိုရမှာပဲ” ဟု မစ္စတာ ပီညဲရိုးနှင့် မစ္စတာ ယိုကိုတာ တို့က ပြောသည်။

၎င်းတို့နှစ်ဦး၏ EUသို့ တိုက်တွန်းထားသော စာတွင် “CoIဖွဲ့စည်းရန်အတွက် လက်ရှိ လူ့အခွင့်အရေး ကိုယ်စားလှယ် တင်ပြထားသည့် အတိုင်း မြန်မာနိုင်ငံမှ လူ့အခွင့်အရေး ချိုးဖောက်မှုများသည် တိုင်းပြည်၏ ပေါ်လစီတရပ်ကဲ့သို့ ဖြစ်နေပြီး ချိုးဖောက်မှု သက်သေများ၊ မှတ်တမ်းများသည်လည်း လိုအပ်သည်ထက် ပိုနေသေးသည်” ဟု ပါရှိသည်။

“EU အနေဖြင့် လာမည့် ကုလသမဂ္ဂ အထွေထွေညီလာခံတွင် မြန်မာနိုင်ငံအတွက် CoI ဖွဲ့စည်းရန် အဆိုတင်သွင်းသင့် သည်။ နိုင်ငံတကာ အသိုင်းအဝန်းကလည်း စစ်အစိုးရ၏ လူ့အခွင့်အရေး ချိုးဖောက်မှုများအပေါ် ဆက်လက် သည်းခံလိမ့်မည် မဟုတ် ဆိုသည့် အချက်ပါ စာလွှာကိုလည်း စစ်အစိုးရထံသို့ ပို့သင့်သည်” ဟု တိုက်တွန်းထားသည့် စာတွင် ပါရှိသည်။

လူ့အခွင့်အရေး ကိုယ်စားလှယ်ဟောင်းများ၏ တိုက်တွန်းစာ မိတ္တူများကို EU၏ ဥက္ကဋ္ဌနိုင်ငံအဖြစ် လက်ရှိတာဝန် ယူနေရသည့် ဘယ်လ်ဂျီယံနိုင်ငံအစိုးရ၊ EUအဖွဲ့ဝင်နိုင်ငံများ၏ နိုင်ငံခြားရေး ဝန်ကြီးဌာနများ၊ အမြဲတမ်း ကိုယ်စားလှယ်များနှင့် ကမ္ဘာ့ကုလသမဂ္ဂ အဖွဲ့ကြီးထံသို့ ပေးပို့ခဲ့သည်။

စစ်အစိုးရ၏ လူ့အခွင့်အရေးချိုးဖောက်မှုများဖြစ်သော အတင်းအဓမ္မ လုပ်အားပေးခိုင်းစေခြင်း၊ အမျိုးသမီးများအား လိင်ပိုင်းဆိုင်ရာ စော်ကားခြင်းကို စစ်လက်နက်တခုသဖွယ် အသုံးပြုခြင်း၊ ကလေးစစ်သားများ အသုံးပြုခြင်း၊ ဘာသာရေး ဆိုင်ရာ စော်ကားခြင်း၊ လူမျိုး ပျက်သုဉ်းသည်အထိ သတ်ဖြတ်ခြင်း စသည့် ကိစ္စများနှင့်ပတ်သက်၍ နိုင်ငံတကာ လူ့အခွင့်အရေး အဖွဲ့အစည်းများဖြစ်သော AmnestyInternational(AI)၊HumanRightsWatch(HRW)၊InternationalFederationofHumanRights(FIDH)နှင့်ChristianSolidarityWorldwide(CSW)အပါအဝင်တခြားသောအဖွဲ့အစည်းများတွင် မှတ်တမ်းတင်ထားခြင်း၊ အစီရင်ခံထားခြင်းမျိုးများ ရှိသည်ဟုလည်း သိရသည်။

၁၉၉၆ ခုနှစ်မှစတင်ကာ မြန်မာနိုင်ငံအတွင်းမှ ရွာပေါင်း ၃၅၀၀ ခန့် ဖျက်ဆီးခံခဲ့ရသည်။ အနည်းဆုံး လူပေါင်း ငါးသိန်းခန့်မှာ ပြည်တွင်းရှိတောတောင်များတွင် ပုန်းအောင်း၍ ရွှေ့ပြောင်းနေထိုင်ကြရသူများ ဖြစ်လာကြပြီး သောင်းနှင့်ချီသော လူထုသည်လည်း အိမ်နီးချင်း နိုင်ငံများသို့ ဒုက္ခသည်အဖြစ်နှင့် ရွှေ့ပြောင်းနေထိုင်ခဲ့ရသည်။

မစ္စတာ ပီညဲရိုးနှင့် မစ္စတာ ယိုကိုတာတို့က စစ်အစိုးရ ရေးဆွဲထားသော ဖွဲ့စည်းပုံအခြေခံဥပဒေသည် နိုဝင်ဘာလ ၇ ရက်နေ့တွင် ကျင်းပမည့် ရွေးကောက်ပွဲအပြီးတွင် အသက်ဝင်လာမည်ဖြစ်ပြီး စစ်အစိုးရ၏ ချိုးဖောက်မှုများကို ဖုံးအုပ်ပေးခြင်း၊ စစ်ဗိုလ် တမတ်သားကို လွှတ်တော်အတွင်း နေရာပေးခြင်းတို့ ဖြစ်လာမည်ဟု ပြောဆိုကြသည်။

“ဒေါ်အောင်ဆန်းစုကြည်နဲ့ ရွေးကောက်ပွဲအတွက် မှတ်ပုံမတင်ခဲ့တဲ့ NLDပါတီကိုဖျက်သိမ်းတာတွေ၊ တိုင်းရင်းသားပါတီ တချို့ကို ရွေးကောက်ပွဲဝင်ခွင့်မပြုတာတွေက လာမယ့်ရွေးကောက်ပွဲဟာ ပြောင်းလဲခြင်းကို ယူဆောင်ပေးနိုင်ဖို့ မျှော်လင့်ချက် အရမ်းနည်းနေတယ်။ ကျနော်တို့ရဲ့ အမြင်မှာတော့ ဒီရွေးကောက်ပွဲက စစ်တပ်အုပ်ချုပ်မှုကို သက်တမ်း ရှည်စေမယ်။ လူ့အခွင့်အရေးချိုးဖောက်မှုတွေ ဆက်ဖြစ်စေဦးမယ်” ဟု ၎င်းတို့က ပြောသည်။

USCampaignforBurmaအဖွဲ့မှဦးအောင်ဒင်ကEUသည် ကုလသမဂ္ဂ အထွေထွေ ညီလာခံ၌ မြန်မာ့မူကြမ်း ရေးဆွဲရာတွင် အဓိကကျနေပြီး စက်တင်ဘာလကတည်းက ဘယ်လ်ဂျီယံနိုင်ငံ ဘရပ်ဆဲလ်မြို့တွင် စတင်ခဲ့သည်ဟု ပြောသည်။

လက်ရှိအချိန်အထိ စစ်အစိုးရနှင့် ပတ်သက်၍ CoI ဖွဲ့စည်းရန်ထောက်ခံသည့် နိုင်ငံပေါင်း ၁၃ နိုင်ငံရှိနေပြီ ဖြစ်သော်လည်း ယင်းကိစ္စနှင့် ပတ်သက်၍ EU က တစုံတရာ တုန့်ပြန်ခြင်း မပြုသေးချေ။