ဗိုလ်ချုပ်အောင်ဆန်းမွေးနေ့လူငယ်များသတိတရကျင်းပ

ဧရာဝတီ Monday, 14 February 2011 14:02

.မြန်မာ့ လွတ်လပ်ရေး ခေါင်းဆောင် အာဇာနည် ဗိုလ်ချုပ်အောင်ဆန်း၏ ဖေဖော်ဝါရီလ ၁၃ ရက်နေ့တွင် ကျရောက်သော ၉၆ နှစ်မြောက် မွေးနေ့ အထိမ်းအမှတ်အဖြစ် သတိရအောက်မေ့ခြင်း အခမ်းအနားများကို ပြည်တွင်းရှိ လူငယ်များက ကျင်းပကြသည်။

NLDရုံးချုပ်တွင်ဗိုလ်ချုပ်အောင်ဆန်းမွေးနေ့ကိုဂုဏ်ပြုသောအားဖြင့်သတ်မှတ်ထားသောကလေးများနေ့ ကျင်းပစဉ်(ဓာတ်ပုံ-ဧရာဝတီ)

ဗိုလ်ချုပ်အောင်ဆန်း မွေးနေ့တွင် နိုင်ငံရေး အသိုင်းအ၀န်းကသာမက တခြားသော ကဏ္ဍ အသီးသီးမှ လူငယ်များ စုပေါင်း လှူဒါန်းခြင်း၊ ဗိုလ်ချုပ်အောင်ဆန်းအတွက် ဂုဏ်ပြု စပ်ဆိုထားသော ကဗျာများကို ကလေးငယ်များအား သင်ကြားပေးခြင်း၊ ကလေးများကို အစားအစာ အာဟာရများ ကျွေးမွေးလှူဒါန်းခြင်းတို့ ပြုလုပ်ခဲ့ကြကြောင်း သိရှိရသည်။

အမျိုးသားဒီမိုကရေစီအဖွဲ့ချုပ်(NLD)ကမြန်မာကလေးများနေ့အဖြစ်သတ်မှတ်ထားသော ဗိုလ်ချုပ်အောင်ဆန်း မွေးနေ့တွင် ကလေးကဗျာရွတ်ပွဲ၊ ပန်းချီစွမ်းရည်ပြပွဲ အပါအ၀င် ကလေးငယ်များ အတွက် ပျော်ပွဲရွှင်ပွဲများ ကျင်းပခဲ့သည်။

“မနက်၈နာရီကနေစပြီးNLDရုံးချုပ်မှာဗိုလ်ချုပ်မွေးနေ့ပျော်ပွဲရွှင်ပွဲတွေလုပ်ပါတယ်။ ဒေါ်အောင်ဆန်းစုကြည် ကိုယ်တိုင်တက်တယ်။ကလေးတွေလည်းတော်တော်ပျော်ကြတယ်။ပြိုင်ပွဲတွေလုပ်တယ်။ ဒေါ်အောင်ဆန်းစုကြည်ကိုယ်တိုင်ဆုပေးတယ်။ညနေ၃နာရီကျော်မှပြီးတယ်”ဟု NLDလူငယ်တာဝန်ခံတဦးက ပြောသည်။

ပြည်တွင်းရှိ လူငယ်အဖွဲ့အစည်းများကလည်း ဗိုလ်ချုပ်အောင်ဆန်း၏ မွေးနေ့အဖြစ် မိဘမဲ့ကလေးများအား ခေါ်ယူစောင့်ရှောက် ထားသော ဘုန်းတော်ကြီးကျောင်းများသို့ သွားရောက်၍ ငွေကြေးများ လှူဒါန်းခြင်း၊ ဆွမ်းကပ်လှူဒါန်းခြင်းတို့ ပြုလုပ်ခဲ့ကြောင်း သိရသည်။

ဗိုလ်ချုပ်အောင်ဆန်းမွေးနေ့ အလှူအဖြစ် ပြည်တွင်း လူငယ်အဖွဲ့အစည်းများ ဖြစ်ကြသည့် FFF၊ Bad boys၊ သတင်းသမား တချို့နှင့်MSTတို့စုပေါင်းကာ သာကေတမြို့နယ်ရှိ ညောင်ဝိုင်း ဘုန်းတော်ကြီး စာသင်ကျောင်းသို့ စာရေးကိရိယာများ လှူဒါန်းခြင်း၊ မိဘမဲ့ကလေး ၁၁၀ ကို နေ့လယ်စာ ကျွေးမွေးခြင်းများ ပြုလုပ်ခဲ့ကြသည်ဟု facebook တွင် သတင်းများ ထုတ်ပြန် ထားသည်။

တသီးပုဂ္ဂလ လွှတ်တော် အမတ်လောင်းအဖြစ် ရွေးကောက်ပွဲတွင် ပါပင်ယှဉ်ပြိုင်ခဲ့သော ဒေါက်တာစောနိုင် ဦးစီးသည့် ရန်ကုန်မြို့ တောင်ဥက္ကလာပ လူငယ်ကွန်ရက်ကလည်း ဗိုလ်ချုပ်အောင်ဆန်း မွေးနေ့ အထိမ်းအမှတ်အဖြစ် နိုင်ငံရေးအကျဉ်းသား ဦးဇော်ဇော်အောင် မိသားစုကို ထောက်ပံ့ငွေများ ပေးအပ်ပြီး ကလေးငယ်များ အပါအ၀င် လူဦးရေ ၅၀၀ ခန့်ကို ကြာဆံချက် ကျွေးမွေးကြောင်း သိရသည်။

သတင်းထောက်တချို့ကလည်း သာကေတမြို့နယ် ငါးကွေ့တွင် ဗိုလ်ချုပ်အောင်ဆန်း မွေးနေ့အထိမ်းအမှတ် အဖြစ် ဆင်းရဲနွမ်းပါးသူများကို ထမင်း ကျွေးမွေးလှူဒါန်းခဲ့ရာ ကြိတ်ကြိတ်တိုး စည်ကားခဲ့သည်။

ရန်ကုန်တိုင်း သန်လျင်မြို့နယ်မှ ကရုဏာလက် လူငယ်ကွန်ရက်ကလည်း တောင်ဒဂုံတွင် ကလေးငယ်များကို ကဗျာရွတ်ပွဲနှင့် ပျော်ပွဲရွှင်ပွဲများကျင်းပပေးခဲ့သည်။

မန္တလေးမြို့တွင်လည်း သွားဘက်ဆိုင်ရာ ဆေးတက္ကသိုလ် ကျောင်းသားတချို့ စုပေါင်းပြီး ဗိုလ်ချုပ်အောင်ဆန်း မွေးနေ့ အဖြစ် ဘုန်းတော်ကြီး ကျောင်းများသို့ ဆွမ်းချိုင့်ပို့ခြင်း၊ ဆွမ်းကပ်ခြင်းများ ပြုလုပ်ခဲ့သည်ဟု သိရသည်။

လူငယ် တဦးချင်းအနေဖြင့်လည်း ဗိုလ်ချုပ်အောင်ဆန်း မွေးနေ့ အမှတ်တရအဖြစ် ဘုရားတွင် ဆုတောင်းမှုများ ရှိခဲ့ပြီး ရွှေတိဂုံစေတီ စနေထောင့်တွင် သွားရောက်ဆုတောင်းကာ ဆီမီး၊ ရေချမ်း ကပ်လှူမှုများ ပြုလုပ်ခဲ့ကြသည်ဟုလူငယ်တချို့က ပြောသည်။

“သွေးဆေးကန်မှာ ငါးလွှတ်မယ်။ ၉၆ ကောင်လွှတ်မယ်။ ဗိုလ်ချုပ် ၉၆ နှစ် ပြည့်တဲ့နေ့ မို့လို့ပါ” ဟု အသက် ၂၂ နှစ်အရွယ် လူငယ်တဦးက ဆိုသည်။

facebook လူမှုကွန်ရက်နှင့် gtalk တွင်လည်း ဗိုလ်ချုပ်အောင်ဆန်း၏ ဓာတ်ပုံများကို Profile ဓာတ်ပုံအဖြစ် ပြောင်းလဲမှု များပြားပြီး ဖေဖော်ဝါရီလ ၁၃ ရက်နေ့ တနေ့လုံး ဗိုလ်ချုပ်အောင်ဆန်းကို အောက်မေ့ သတိရသည့် စာသားများ၊ သီချင်းများ၊ ဗီဒီယိုများကို လွှင့်တင်ကြကြောင်း အဆိုပါ လူမှုကွန်ရက် အသုံးပြုသူများက ပြောသည်။

“ဖေဖော်ဝါရီ လဆန်းပိုင်းလောက် ကတည်းက သတိထားမိတယ်။ Profileဓာတ်ပုံတွေကို ဗိုလ်ချုပ်အောင်ဆန်းပုံ ပြောင်းကြတယ်၊ ပြောင်းဖို့ တိုက်တွန်းတဲ့ နှိုးဆော်စာတွေလည်း တော်တော်ပျံ့တယ်။ လူငယ်တွေရော၊ လူကြီးတွေရော ဗိုလ်ချုပ်အောင်ဆန်း ဓာတ်ပုံတွေကို ပြောင်းပြီး တင်ကြတယ်။ တချို့ဓာတ်ပုံတွေဆိုရင် ကိုယ်တခါမှ မမြင်ဘူး၊ မတွေ့ဘူးတဲ့ ဓာတ်ပုံတွေ”ဟု facebook သုံးစွဲသူ တက္ကသိုလ်ကျောင်းသား တဦးကဆိုသည်။

ဝါရင့် အယ်ဒီတာ တဦးကလည်း ဗိုလ်ချုပ်အောင်ဆန်းကို အောက်မေ့သတိရခြင်းအားဖြင့် လူငယ်ထု၏ စိတ်ထဲတွင် ဗိုလ်ချုပ်အောင်ဆန်း၏ စိတ်ဓာတ်၊ ခံယူချက်နှင့် ၀ိဉာဉ်ပူးကပ်ကာ လူငယ်များ မြန်မာ့နိုင်ငံရေးတွင် တက်ကြွစွာ ဦးဆောင် ပါဝင်လိုသော စိတ်ဓာတ်များ ပေါက်ဖွားလာမည်ဟု ယုံကြည်ကြောင်း ပြောသည်။

“တော်တော်အံ့သြဖို့ ကောင်းပါတယ်။ ကျနော့်မှာ သူငယ်ချင်း ၃၀၀ ကျော်လောက်ရှိတယ်။ အဲဒီအထဲမှာ ၁၅၀ ကျော်လောက်ကဗိုလ်ချုပ်အောင်ဆန်းဓာတ်ပုံကိုProfileဓာတ်ပုံ တင်ထားကြတယ်။ ကြက်သီးမွေးညင်းတောင် ထမိတယ်။ နောက်ပြီး gtalkမှာ သူငယ်ချင်းတွေ အားလုံးကလည်း ဗိုလ်ချုပ်ဓာတ်ပုံတွေချည်းပဲ တင်ထားကြတယ်” ဟု ပြည်တွင်း သတင်းထောက်တဦးကဆိုသည်။

စစ်အစိုးရ အာဏာပိုင်များကမူ အာဇာနည်ခေါင်းဆောင်ကြီး ဗိုလ်ချုပ်အောင်ဆန်း၏ မွေးနေ့ကို ဂရုမူခြင်း မရှိသကဲ့သို့ အထိမ်းအမှတ်ပွဲ ကျင်းပပြုလုပ်ခြင်းလည်း မရှိပေ။

ဗိုလ်ချုပ်အောင်ဆန်းကို ၁၉၁၅ ခုနှစ် ဖေဖော်ဝါရီလ ၁၃ ရက်နေ့တွင် နတ်မောက်မြို့၌ ရှေ့နေကြီးဦးဖာနှင့် မိခင်ဒေါ်စုတို့မှ မွေးဖွားခဲ့ပြီး ၁၉၄၇ ခုနှစ် ဇူလိုင်လ ၁၉ ရက်နေ့တွင် ရန်ကုန်မြို့ အတွင်းဝန်များရုံး၌ ဂဠုန်ဦးစော၏ လုပ်ကြံမှုကြောင့် ကွယ်လွန် ခဲ့ရသည်။