ဇာနည်မာန် WEDNESDAY, 23 FEBRUARY 2011 14:18
ချင်းပြည်နယ် တီးတိန်မြို့တွင် ဒုတိယ ပင်လုံကို ကြိုဆိုသည့် လှုံ့ဆော်စာများ ကပ်သည့် လူငယ် ၄ ဦးကို အာဏာပိုင်များက ဖမ်းဆီးလိုက် သော်လည်း လူငယ် ၃၀၀ ခန့် လာရောက် ဆန္ဒပြတောင်းဆို သဖြင့် ပြန်လွှတ်ပေးလိုက်ကြောင်း သတင်းရရှိသည်။
ချင်းတိုင်းရင်းသား နူန်းရှန်းထန်၊ ကင်ရှန်တွမ်၊ ထန်လွမ်းကျင်နှင့် ရွှာမန်း တို့သည် တီးတိန်မြို့တွင် ယမန်နေ့က ပြုလုပ်ခဲ့သည့် ချင်းအမျိုးသားနေ့ အခမ်းအနားတွင် ဒုတိယပင်လုံကို ကြိုဆိုပါသည်ဟု အဓိပ္ပါယ်ရသည့် အင်္ဂလိပ်စာတန်းပါ စတစ်ကာများကို အခမ်းအနားကျင်းပရာ ကမ်းဟောင်း အားကစားကွင်းဝန်းကျင်နှင့် မြို့တွင်း လူစည်ကားရာအရပ်များရှိ နံရံများ၊ သစ်ပင်များ၊ ဆိုင်ကယ်များတွင် ကပ်ခဲ့ခြင်းကြောင့် တီးတိန်ရဲစခန်းက ဖမ်းဆီးခဲ့ခြင်းဖြစ်သည်။
“ညနေ၃နာရီလောက်ကခေါ်သွားတာ။ သူတို့ ရဲစခန်းမှာ အစစ်ခံနေရတဲ့အချိန် ည ၈ နာရီလောက်ကျတော့ အခမ်းအနားအတွက် ရောက်နေတဲ့ လူငယ် ၃၀၀ လောက်က ရဲစခန်းကို သွားကြပြီး သူတို့ကို အခုချက်ခြင်းလွှတ်ပေး၊ မလွှတ်ပေးရင် မပြန်ဘူးလို့ ၀ိုင်းပြောကြတော့ ရဲတွေနဲ့ ရုတ်ရုတ်သဲသဲဖြစ်တယ်၊။ နောက်တော့ ပြည်နယ် ပယက ဥက္ကဋ္ဌ ဦးဟုန်ငိုင်းရောက်လာပြီး အားလုံးကို လွှတ်ပေးလိုက်တယ်”ဟု တီးတိန်မြို့ခံတဦးက ပြောသည်။
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(ကြံ့ဖွံ့ပါတီ)ဝင်ဗိုလ်မှူးချုပ်ဟောင်းဦးဟုန်ငိုင်းသည် ချင်းပြည်နယ်ဆိုင်ရာ ဝန်ကြီးချုပ်အဖြစ် လျာထားခံရသူဖြစ်သည်။
အလားတူ လှုပ်ရှားမှုမျိုးကို တက်ကြွသူ လူငယ်များက စစ်ကိုင်းတိုင်း အထက်ပိုင်းရှိ ကလေးမြို့၊ ချင်းပြည်နယ် တွန်းဇံမြို့ စသည်တို့တွင် ပြုလုပ်ခဲ့သော်လည်း အဆိုပါမြို့များတွင်မူ ပြဿနာ တစုံတရာ မရှိခဲ့ကြောင်း သိရသည်။
ယမန်နှစ် အောက်တိုဘာလ အတွင်းက ကလေးမြို့တွင် ပြုလုပ်သည့် ဇိုမီးအမျိုးသား ကွန်ဂရက်ပါတီ၏ ၂၂ နှစ်မြောက် အခမ်းအနားတွင် တိုင်းရင်းသား အရေးကိစ္စများအတွက် ဒုတိယ ပင်လုံညီလာခံ ခေါ်ယူရေး “ကလေးမြို့ ကြေညာစာတမ်း” ကို တိုင်းရင်းသား နိုင်ငံရေး ခေါင်းဆောင်များနှင့် အမျိုးသားဒီမိုကရေစီ အဖွဲ့ချုပ်တို့ (NLD) တို့က သဘောတူ ထုတ်ပြန်ခဲ့သည်။
နိုင်ငံတဝန်းတွင် တက်ကြွလှုပ်ရှားသူ လူငယ်များကလည်း ဒုတိယ ပင်လုံကို ကြိုဆိုသည့် ဒုတိယပင်လုံ ဖြစ်ပေါ်ရေး လှုံ့ဆော် စာရွက်စာတမ်းများ ဖြန့်ဝေမှုများကို နိုင်ငံအနှံ့ ပြုလုပ်လျက်ရှိသည်။
Geen opmerkingen:
Een reactie posten