ရဲရင့် / ၀၁ ဇွန် ၂၀၁၀
တော်လှန်ရေးသက်တမ်းနှစ်(၆၀)ကျော်ရှိကရင်နီအမျိုးသားခေါင်းဆောင်ဗိုလ်ချုပ် မန်းအောင်သန်းလေးသည်လူကြီးရောဂါဖြင့်မယ်ဟောင်ဆောင်ဆေးရုံတွင်ယမန်နေ့က ကွယ်လွန်သွားသည်။
အသက်(၈၁)နှစ်ရှိဗိုလ်ချုပ်မန်းအောင်သန်းလေးသည်၁၉၄၈ခုနှစ်မှစတင်ကာ ကရင်နီပြည်အမျိုးသားပါတီသို့ဝင်ရောက်ခဲ့သည့်ပါတီ၏ဥက္ကဋ္ဌဟောင်းတဦးဖြစ်ပြီး ဖက်ဒရယ်ဖွဲ့စည်းပုံအခြေခံဥပဒေ (မူကြမ်း) ရေးဆွဲရေးကော်မတီ ဥက္ကဋ္ဌလည်း ဖြစ်သည်။
၎င်းကွယ်လွန်ခဲ့သည့်အတွက်ကရင်နီအမျိုးသားတဦးဖြစ်သူဖယ်ခုံမြို့နယ် ပြည်သူ့လွှတ်တော်ကိုယ်စားလှယ် ခွန်မားကိုဘန်းက“သူဟာ၁၉၄၈ခုနှစ်ကစပြီးကရင်နီပြည်သီးခြားလွတ်လပ်ရေးအတွက်ခုခံတော်လှန်ရေးကို ဆင်နွှဲလာတဲ့ခေါင်းဆောင်တဦးဖြစ်တယ်။နောက်တချက်ကပြည်ထောင်စုမြန်မာနိုင်ငံမှာ တိုင်းရင်းသားအားလုံးရဲ့ကိုယ်ပိုင်ပြဋ္ဌာန်းခွင့်နဲ့စစ်မှန်တဲ့ဖက်ဒရယ်ပြည်ထောင်စုတည်ဆောက်ရေးကိုလည်း လက်ခံတဲ့ပုဂ္ဂိုလ်တဦးဖြစ်တယ်”ဟုပြောသည်။
နှစ်(၆၀)ကျော်တော်လှန်ရေးကာလအတွင်းကရင်နီပြည်၏သီးခြားလွတ်လပ်ရေးကို ယုံကြည်ခဲ့သူတဦးဖြစ်သော်လည်းနိုင်ငံရေးဖြစ်စဉ်ပြောင်းလဲမှုများအရတိုင်းရင်းသားတန်းတူရေး၊ ကိုယ်ပိုင်ပြဋ္ဌာန်းခွင့်နှင့်စစ်မှန်သောဖက်ဒရယ်ပြည်ထောင်စုတည်ဆောက်ရေးကိုလည်း လက်ခံကြိုးပမ်းခဲ့သည့် ခေါင်းဆောင်တဦးဖြစ်သည်ဟု ခွန်မားကိုဘန်းက ပြောသည်။
၎င်းက “ပြန်ကြည့်လိုက်မယ်ဆိုရင် သူက တော်လှန်ရေးတလျှောက်လုံးမှာ ကရင်နီပြည်အရေး၊ တိုင်းရင်းသားတန်းတူရေးနဲ့၊ စစ်မှန်သော ဖက်ဒရယ်ပြည်ထောင်စု တည်ဆောက်ရေးကိုလည်း လက်ရှိ နိုင်ငံရေးရဲ့အခြေအနေအပေါ်မှာ လက်ခံကျင့်သုံးတဲ့သူဖြစ်တယ်။ ဒီလိုပုဂ္ဂိုလ်မျိုးက အင်မတန်ရှားပါးတယ်။ သူကွယ်လွန်သွားတဲ့အပေါ်မှာ ကရင်နီပြည်သူအတွက်ရော၊ တိုင်းရင်းသားပြည်သူတွေအတွက်ရော၊ စစ်မှန်တဲ့ ဖက်ဒရယ်ပြည်ထောင်စုစနစ် တည်ဆောက်ရေးမှာရော၊ အများကြီး နစ်နာဆုံးရှုံးတယ်လို့ပဲ ပြောချင်တယ်” ဟု ဆိုသည်။
မန်းအောင်သန်းလေးသည် ၁၉၇၂ ခုနှစ်မှ ၁၉၇၅ ခုနှစ်အထိ ကရင်နီအမျိုးသားတိုးတက်ရေးပါတီ (ကေအန်ပီပီ)၏ ဒု-စစ်ဦးစီးချုပ်အဖြစ် တာဝန်ယူခဲ့ပြီး စစ်ဦးစီးချုပ်ဖြစ်လာခဲ့သည်။ ၁၉၉၂ မှ၂၀၀၅ ခုနှစ်အထိ ကရင်နီပြည်အစိုးရအဖွဲ့တွင် ၀န်ကြီးချုပ်အဖြစ် (၄) နှစ်သက်တမ်း နှစ်ကြိမ် ထမ်းဆောင်ခဲ့သည်။
မန်းအောင်သန်းလေးသည် ဧရာဝတီတိုင်း ယုံတောရွာဇာတိဖြစ်ပြီး ကွယ်လွန်ချိန်တွင် ဇနီးဖြစ်သူ နော်ကိုရီးနှင့် သားသမီး (၈)ဦး ကျန်ရစ်ပြီး ၎င်း၏ဈာပနအခမ်းအနားကို လာမည့် ကြာသပတေးနေ့တွင် ပြုလုပ်မည်ဖြစ်သည်။
Geen opmerkingen:
Een reactie posten