အန်အယ်ဒီ ရုံးချုပ်တွင် စည်းရုံးရေးသင်တန်း ကျင်းပ

မြင့်မောင်


တနင်္လာနေ့၊ စက်တင်ဘာလ 28 ရက် 2009 ခုနှစ် 21 နာရီ 58 မိနစ်
နယူးဒေလီ (မဇ္ဈိမ)။ ။ အမျိုးသား ဒီမိုကရေစီအဖွဲ့ချုပ် တိုင်းနှင့် ပြည်နယ် စည်းရုံးရေးမှူးများနှင့် စည်းအဖွဲ့ဝင်များ အရည်အချင်း မြှင့်တင်ရေးအတွက် စည်းရုံးရေး သင်တန်းတခုကို ရန်ကုန်ရုံးချုပ်၌ ယနေ့မှ စတင်ကာ ၅ ရက်ကြာ ပြုလုပ်သွားမည်ဟု သိရသည်။
ပါတီလုပ်ငန်းများတွင် အထောက်အကူဖြစ်ရန်၊ ပါတီလုပ်ငန်းများ အကျယ်အပြန့် လုပ်ကိုင်ရန်နှင့် အရည်အသွေး ကောင်းမွန်သည့် လူငယ်များ ပေါ်ပေါက်လာရန်အတွက် ဒုတိယအကြိမ်မြောက် ပြုလုပ်သည့် ယခုသင်တန်းသို့ တိုင်းနှင့် ပြည်နယ် ၁၁ ခုမှ စည်းရုံးရေးမှူးများ၊ စည်းအဖွဲ့ဝင်များ စုစုပေါင်း ဦးရေ ၄ဝ ကျော် တက်ရောက်နေခြင်း ဖြစ်သည်။
“စည်းရုံးရေးလုပ်ငန်းတွေက အမြဲတမ်းလုပ်နေတာပါ။ ဒီအချိန်ဟာ ပါတီအတွက် အရေးကြီးတဲ့ အချိန်ဖြစ်တယ်။ ကျနော်တို့အနေနဲ့ ပါတီဝင်တွေရဲ့ အရည်အချင်းတွေကို မြှင့်တင်တာဖြစ်ပါတယ်။ ပါတီ တည်ရှိနေသရွေ့ ပါတီလုပ်ငန်းတွေကို လုပ်နေရမှာပါ။ ပါတီအနေနဲ့ ၂ဝ၁ဝ ကိစ္စနဲ့ ပတ်သက်ပြီး ဘာအစီအစဉ်မှ မရှိသေးပါဘူး။ တချိန်ချိန်မှာ အပြောင်းအလဲတရပ် ဖြစ်ပေါ်လာရင် အဆင်သင့်ဖြစ်အောင် လုပ်ဆောင်ထားတဲ့ သဘောမျိုးပါ” ဟု ပါတီပြန်ကြားရေးအဖွဲ့ဝင် ဦးဟန်သာမြင့်က မဇ္ဈိမကို ပြောသည်။
ပါတီ၏ သမိုင်းဖြတ်သန်းမှု၊ စည်းရုံးရေး၊ ဥပဒေရေးရာ၊ လူမှုကူညီရေးနှင့် HIV/AIDS ၊ လူ့အခွင့်အရေး၊ တိုင်းရင်းသားလူမျိုးအရေး၊ စီးပွားရေး၊ နိုင်ငံတကာ ဆက်ဆံရေးနှင့် သတင်းစာပညာ အစရှိသည့် ပညာရပ်များကို ပါတီတွင်းရှိ တတ်သိနားလည်သူများက လာမည့်လ ၂ ရက်နေ့အထိ ဦးဆောင်ပို့ချသွားမည်။
ယနေ့နံနက်ပိုင်းတွင် ပါတီ ဖြတ်သန်းခဲ့သည့် နောက်ခံသမိုင်းကြောင်းကို ပြန်ကြားရေးအဖွဲ့ဝင် ဦးအုန်းကြိုင်နှင့် နေ့လယ်ပိုင်းတွင် စည်းရုံးရေးခေါင်းစဉ်ဖြင့် မွန်ပြည်နယ်မှ ဦးအောင်ကြည်ညွန့်က ဆွေးနွေးသင်ကြားရာ၊ တက်ရောက်သူများကလည်း သိလိုသည်များကို မေးမြန်းကာ အပြန်အလှန် ဆွေးနွေးခဲ့ကြသည်။
“အဖွဲ့ချုပ်ရဲ့ ဖြတ်သန်းမှု အခြေအနေ၊ ရွေးကောက်ပွဲကိစ္စ၊ ရွေးကောက်ပွဲပြီးတော့ အဖွဲ့ချုပ်က ကန့်သတ်ချုပ်ချယ် ခံရပုံတွေ ပါတယ်။ ဦးအောင်ကြည်ညွန့်က စည်းရုံးရေးကိစ္စနဲ့ ပတ်သက်ပြီးတော့ အဖွဲ့ဝင်တွေကို ဘယ်လို ပုံသဏ္ဍာန်နဲ့ စည်းရုံးမယ်၊ ဘာကြောင့် စည်းရုံးတယ်၊ ဘယ်အတွက်ကြောင့် စည်းရုံးတယ်၊ စည်းရုံးရေးနဲ့ ပတ်သက်တဲ့ ခိုင်မာတဲ့ စည်းရုံးမှုမျိုး ရှိဖို့ လိုအပ်တယ်။ စသဖြင့်ပေါ့နော်” ဟု ပြန်ကြားရေးအဖွဲ့ဝင် ဒေါက်တာဝင်းနိုင်က ပြောသည်။
ရှေ့နေဦးသိန်းညွှန့်က မြန်မာနိုင်ငံ ဥပဒေနှင့် လက်ရှိပြဿနာ၊ တနင်္သာရီတိုင်းမှ ဦးလှမင်းက လူမှုကူညီရေးနှင့် HIV/ AIDS အကြောင်း၊ ဧရာဝတီတိုင်းမှ ဦးအေးမြင့် လူ့အခွင့်အရေး ပညာပေး၊ ကိုထွန်းထွန်းက တိုင်းရင်းသား လူမျိုးများအရေး၊ ဦးဟန်သာမြင့်က ဒီမိုကရေစီ် ပညာခေတ်နဲ့ မျက်မှောက်ပြဿနာ၊ ဦးအေးမင်းက စီးပွားရေးဆိုင်ရာကိစ္စ၊ ဦးခင်မောင်ဆွေက နိုင်ငံတကာ ဆက်ဆံရေးနှင့် ဦးတင်လှဦးက သတင်းစာပညာနှင့် ပတ်သက်၍ ပို့ချသွားကြမည် ဖြစ်သည်။