zondag 1 november 2009
တရုတ်-မြန်မာနယ်စပ်မှာ တိုက်ပွဲတွေ ထပ်ဖြစ်လာဦးမလား - အပိုင်း (၁)
ပေါက်ပေါက်
၂ နိုဝင်ဘာ ၂၀၀၉
အောက်တိုဘာလကုန် နောက်ဆုံးထားပြီး နယ်ခြားစောင့်တပ်အသွင်ပြောင်းရေးကမ်းလှမ်းချက် အကြောင်းပြန်ပေးရမယ်ဆိုတဲ့ နအဖရဲ့ ရာဇသံကြောင့် လကုန်ရက် နီးလာလေလေ သတင်းဌာနတွေနဲ့ သတင်းထောက်တွေက လှုပ်လှုပ်ရွရွ ဖြစ်လေလေပေါ့။ နအဖတပ်တွေ တိုးချလာပြီ၊ စစ်ကားတွေ တက်လာပြီ စတဲ့ အတည်ပြုချက်မရနိုင်တဲ့ သတင်းတွေက ဟိုတစ ဒီတစ။ အောက်တိုဘာ (၁) ရက်၊ တရုတ်ပြည်သစ်ထူထောင်တဲ့ နှစ် (၆ဝ) မြောက် နှစ်ပတ်လည်နေ့ပြီးရင်ပဲ တရုတ်-မြန်မာနယ်စပ်မှာ တိုက်ပွဲတွေဖြစ်တော့မယ်ဆိုတဲ့ (အချို့သော စစ်ရေးအကဲခတ်တွေရဲ့) ခန့်မှန်းချက်တွေ အမှန်တကယ် ဖြစ်မလာတဲ့နောက်ပိုင်း အောက်တိုဘာလကုန်ရက်ကို တဖန်ပြန်စောင့်ကြည့်ရင်း နောက်ဆက်တွဲဂယက်တွေ ထလို့နေပါတယ်။
ပြောရရင် အပစ်ခတ်ရပ်အဖွဲ့တွေကို နယ်ခြားစောင့်တပ်လက်မခံလို့ တိုက်ရပါတယ်ဆိုတဲ့ နာမည်ပျက်မယ့် အကြောင်းပြချက်တခုအတွက် နအဖက အချိန်ယူထိုင်စောင့်နေမှာတော့ မဟုတ်ပါဘူး။ တကယ်တမ်း တိုက်ချင်ရင် နိုင်ငံတကာနဲ့ အိမ်နီးချင်းနိုင်ငံကပါ လက်ခံနိုင်တဲ့ အခြားအကြောင်းပြချက် (ဖုန်မိသားစုကို မူးယစ်ဆေးဝါးအမှု၊ တရားမဝင် လက်နက်ထုတ်လုပ်ရောင်းချတဲ့ အမှုနဲ့ ဖမ်းဆီးဖို့ လုပ်တာမျိုး) ရှာပြီးမှ လုပ်သွားမှာပါ။ တိုင်းရင်းသားလက်နက်ကိုင်အဖွဲ့တွေကို သွေးထိုးသပ်လျှို၊ ဖဲ့ထုတ်စည်းရုံး စတဲ့ နည်းနာတွေသုံးပြီး ဖြိုခွဲခဲ့တဲ့ သာဓကတွေ ရှိထားပြီးသားပါ။ နအဖအနေနဲ့ အလွယ်တကူ မဖြိုခွဲနိုင်သေးလို့ ဒါမှမဟုတ် သူ့အတွက် အကျပ်အတည်းတွေရှိနေလို့သာ ငြိမ်းအဖွဲ့တွေအပေါ် တင်းတင်းမာမာ ရှေ့ဆက်တိုးမလာသေးတာလို့ ယူဆရပါတယ်။
ရှမ်းပြည်နယ်၊ အထူးဒေသ (၁) ကိုးကန့်တပ်ဖွဲ့နယ်မြေတခုလုံးကို (၂၇-၈-၂ဝဝ၉) ညနေပိုင်းမှ (၂၉-၈-၂ဝဝ၉) နေ့လယ်ပိုင်းအထိ ခန့်မှန်းခြေ (၄၆) နာရီအတွင်း အင်အားအလုံးအရင်းသုံးကာ တိုက်ခိုက်သိမ်းပိုက်နိုင်တဲ့ နအဖတပ်တွေအနေနဲ့ အခြားအဖွဲ့တွေကိုလည်း အခုလို တိုက်နိုင်မယ်လို့ မှန်းဆထားရင်တော့ လုံးဝမှားသွားပါမယ်။
တကယ်တော့ ကိုးကန့်တပ်ဖွဲ့ဆိုတာ တပ်ရင်း (၄) ရင်း၊ ကိုယ်ရံတပ်ခွဲ၊ ဌာနချုပ်ကင်းတပ်ခွဲဆိုပြီး တိုက်ခိုက်ရေးအင်အား ရာပိုင်းမျှသာရှိတဲ့ လက်နက်ငယ်တွေသာ အဓိကကိုင်နေတဲ့ အဖွဲ့လေးပါ။ ၁၉၈၉ ခုနှစ်၊ မတ်လအတွင်း ဗမာပြည်ကွန်မြူနစ်ပါတီက ခွဲထွက်စဉ်က ရရှိခဲ့တဲ့ အမြောက်လက်နက်ကြီးတွေကို ကိုင်တွယ်ရတဲ့ နာမည်ခံ အမြောက်တပ်ရင်းတခုတော့ ရှိခဲ့ပါရဲ့။ တကယ်တိုက်ပွဲတွေဖြစ်တော့ အဲဒီအမြောက်တပ်ရင်းက ပစ်ခဲ့တဲ့ အမြောက်ကျည်အချို့ (ထိန်းသိမ်းမှုအားနည်းသလို နှစ်ကြာလာလို့ဟု ယူဆရ) မပေါက်ကွဲတော့ပါ။ အဲဒီလို လူအင်အား၊ လက်နက်အင်အား အားနည်းနေတဲ့အပြင် ကိုးကန့်နယ်ထဲမှာ နအဖတပ်တွေ အစောပိုင်းကတည်းက လာရောက်တပ်စွဲ နေရာယူထားခဲ့ပါတယ်။
ဒါကလည်း ကိုးကန့်တပ်ဖွဲ့မှာ ၁၉၉ဝ ကျော်ကာလများက ဖြစ်ခဲ့တဲ့ ဖုန်မိသားစုနဲ့ ရန်မိသားစုအကြား အာဏာလုကြရင်း တဖက်နဲ့တဖက် အပြန်အလှန်တိုက်ကြလို့ ဒေသတည်ငြိမ်ရေးကို အကြောင်းပြပြီး ကိုးကန့်နယ်မြေထဲက လောက်ကိုင်မြို့မှာ ဒေသကွပ်ကဲမှုစစ်ဌာနချုပ် (ဒကစ) တခု ဖွင့်လှစ်ထားပြီး တပ်ရင်းနှစ်ရင်းနဲ့ အမြောက်တပ်ခွဲတခွဲ အခြေချခွင့်ရရှိထားတာပါ။ ချင်းရွှေဟော်၊ ကုန်းကြမ်း စတဲ့ဒေသတွေမှာလည်း လောက်ကိုင်ဒကစလက်အောက်ခံတပ်များ ရှိနေပါသေးတယ်။ လက်ရှိ ကိုးကန့်တပ်ဖွဲ့မှာ ရုပ်သေးဗိုလ် လုပ်ခွင့်ရသွားတဲ့ ပိုင်စုံချိန် (ပယ်စောက်ချိန်) ဆိုတာကလည်း ရန်မိသားစုဘက်ကနေ ဖုန်မိသားစုဘက် ကူးပြောင်းလာသူဖြစ်ပြီး နအဖက သတင်းပေးအနေနဲ့ရော၊ လိုအပ်ရင် အသုံးချဖို့အတွက်ပါ အစောပိုင်းကတည်းက မွေးမြူခံထားရပါတယ်။ ပိုင်စုံချိန်က ကိုးကန့်တပ်ဖွဲ့ရဲ့ ဒု-ဥက္ကဋ္ဌ တာဝန်ယူထားသလို ကိုးကန့်ဒေသတွင်း မူးယစ်ဆေးဝါးတားဆီးနှိမ်နင်းရေး ဥက္ကဋ္ဌ၊ တရားစီရင်ရေး ဥက္ကဋ္ဌ တာဝန်ယူထားရသူဖြစ်လို့ မူးယစ်ဆေးဝါးနဲ့ ပတ်သက်နေတဲ့ ဖုန်မိသားစုနဲ့ သူ့အကြား ဆက်ဆံရေးသိပ်ကောင်းကြတာ မဟုတ်ပါဘူး။ ဒါကို နအဖက အခွင့်ကောင်းယူအသုံးချကာ ပိုင်စုံချိန်ကို အာဏာသိမ်းခိုင်းခဲ့ပြီး အချင်းချင်းတိုက်ခိုက်ကြအောင် ဖန်တီးခဲ့တာပါ။
ကိုးကန့်အရေးအခင်းမဖြစ်ခင် တနှစ်ကျော်ကာလကတည်းကစလို့ ကိုးကန့်တပ်ဖွဲ့မှာ အာဏာပြဿနာ စဖြစ်နေပြီး ကျန်းမာရေး ယိုယွင်းလာနေပြီဖြစ်တဲ့ ဖုန်ကြားရှင်က သူ့အရိုက်အရာကို သားဖြစ်သူ ဒု-ဥက္ကဋ္ဌ ဖုန်တာရွှင်ကို ဆက်ခံခိုင်းဖို့ စီစဉ်နေတဲ့အပေါ် ပိုင်စံချိန်တို့က မကြိုက်ကြပါဘူး။ တာဝန်ထမ်းဆောင်လုပ်သက်နဲ့ အတွေ့အကြုံနည်းခြင်း၊ မူးယစ်ဆေးဝါးလုပ်ငန်းများတွင် နာမည်ကျော်စောနေခြင်း စတဲ့အချက်များကြောင့် ကိုးကန့်အဖွဲ့ဥက္ကဋ္ဌ တာဝန်ပေးဖို့ မဖြစ်သင့်ကြောင်း၊ တကယ်လို့ ဖုန်မိသားစုနဲ့ ထိတ်တိုက်ရင်ဆိုင်ပြဿနာဖြစ်လာရင် သူ့ဘက်ကသာ ရပ်တည်ပေးဖို့အကြောင်း ပိုင်စုံချိန်က လွန်ခဲ့တဲ့ တနှစ်ကျော်ကာလများကတည်းက ကွမ်းလုံစစ်ဗျူဟာရုံးကို ကိုယ်တိုင်သွားရောက် အစီရင်ခံထားခဲ့တာပါ။ (ကိုးကန့်အရေးအခင်းမတိုင်မီ ရက်ပိုင်းအတွင်းကတော့ လားရှိုး ရမခစစ်ဌာနချုပ်အထိ သွားရာက်ခဲ့ပါတယ်။)
ဒါကြောင့်လည်း ကိုးကန့်တပ်ဖွဲ့အကြား အချင်းချင်း ရန်တိုက်ပေးပြီး ဘယ်အချိန် ကောက်စား ကောက်စား လုပ်လို့ရတယ်လို့ နအဖက တထစ်ချ ယုံကြည်ထားခဲ့ပုံရပါတယ်။ အဲဒီလို ဖြစ်မလာတဲ့ခါကျတော့ နအဖရဲ့ ဒေါသက ကိုးကန့်နယ်မြေထဲမှာ အနီးကပ်ထိုင်ပြီး တာဝန်ယူထားရတဲ့ လောက်ကိုင်ဒကစမှူး ဗိုလ်မှူးချုပ် ဝင်းမောင်ထံ ကျရောက်ပြီး အလုပ်ဖြုတ် အရေးယူရတာတွေ လုပ်ခဲ့ရပါတယ်။
အထက်ကပြောခဲ့သလို အင်အားသေးငယ်ပြီး ခေါင်းဆောင်အကြား သွေးကွဲမှုတွေရှိနေတဲ့ ကိုးကန့်အဖွဲ့ကိုတောင် နအဖဘက်က ချေမှုန်းရာမှာ ထိခိုက်ရှုံးဆုံးမှုတွေ၊ မျက်နှာပျက်ရမှုတွေ ကြုံခဲ့ပါတယ်။ တရုတ်အစိုးရရဲ့ လူသိရှင်ကြား ပြစ်တင်ဝေဖန်ခံရမှု၊ အခြားအပစ်ခတ်ရပ်အဖွဲ့တွေရဲ့ သံသယဖြစ်ခံရမှု၊ ကိုးကန့်အရေးအခင်းကိစ္စ နိုင်ငံတကာ မီဒီယာလောကမှာ ကျယ်ကျယ်ပြန့်ပြန့် ဖော်ပြခဲ့မှု စတာတွေအပြင် နအဖဘက်က အကျအဆုံးကလည်း များပြားခဲ့ရပါတယ်။ နအဖဘက်က တရားဝင် သတင်းထုတ်ပြန်ချက်မှာ တပ်မတော်သား ကျဆုံး (၁၁) ဦး၊ ဒဏ်ရာရ (၃၄) ဦး၊ ရဲတပ်ဖွဲ့မှ ကျဆုံး (၁၅) ဦး၊ ဒဏ်ရာရ (၁၃) ဦးလို့ ဆိုထားပါတယ်။ ရှေ့တန်းစစ်မျက်နှာတွေက တပ်မတော်သားတွေရဲ့ အသေအပျောက်စာရင်းကို အင်အားလျော့ချပြီး သတင်းထုတ်ပြန်တတ်လို့ အသေအပျောက် ဒီထက်ပိုများတာတော့ သေချာပါတယ်။ ကိုးကန့်တပ်ဖွဲ့ဝင် အလောင်း (၈) လောင်း ရရှိခဲ့တယ်လို့ ဆိုနေပါတယ်။
နအဖအနေနဲ့ အချိန်မရွေးကောက်စားနိုင်တယ်လို့ ထင်ထားတဲ့ ကိုးကန့်တပ်ဖွဲ့နဲ့ ထိတွေ့ပြီးနောက်ပိုင်း ရရှိလာတဲ့ အကျိုးအမြတ်ထက် ပေးဆပ်လိုက်ရတဲ့ ဆုံးရှုံးမှုက ပိုများတယ်ဆိုတာ သဘောပေါက်ပြီး ရှေ့ဆက်တိုးဖို့ လက်တွန့်နေပုံရပါတယ်။ တကယ်လို့သာ ကိုးကန့်နယ်မြေအနီးမှာရှိနေတဲ့ ဝ တပ်ဖွဲ့၊ ကေအိုင်အို တပ်မဟာ (၄) နယ်မြေတွေကို တပါတည်း တိုက်ချင်တယ်ဆိုရင် မူးယစ်ဆေးဝါးအမှုနဲ့ ပတ်သက်တဲ့ တရားခံပြေး ဖုန်မိသားစုကို ဖမ်းပြီးလွှဲအပ်ပါ။ တကယ်လို့ မလွှဲပေးရင် အပစ်အခတ်ရပ်စဲရေး သဘောတူညီချက် ပျက်ပြီ၊ ဖုန်မိသားစုအဖွဲ့ကို ဝင်ရောက်ရှာဖွေမယ် စသဖြင့် အကြောင်းပြချက်ကိုင်ပြီး တိုက်ချင်သပဆိုရင် တိုက်လို့ရတဲ့ အကြောင်းပြချက်တွေ ရှိခဲ့ပါတယ်။ မတိုက်နိုင်လို့၊ ဒါမှမဟုတ် တိုက်လိုက်ရင် ရရှိလာမယ့် အကျိုးဆက်တွေကို ကြိုမြင်ထားပုံရလို့ အဲဒီနယ်မြေထဲရောက်နေတဲ့ ရှေ့တန်းတပ်တွေခမျာ ရှေ့လည်းမတိုး၊ နောက်လည်းမဆုတ် ကတုတ်ထဲ နယ်ရုပ်တွေလို နေလာခဲ့တာ အခုဆို နှစ်လတင်းတင်း ပြည့်တော့မှာပါ။
တရုတ်-မြန်မာ နယ်စပ်တိုက်ပွဲတွေကြောင့် တည်ငြိမ်မှုပျက်ပြားတာ၊ စီးပွားရေးလုပ်ငန်း ပြိုပျက်တာတွေကို တရုတ်အစိုးရက မလိုလားပါဘူး။ ဒါကြောင့်လည်း တရုတ်နိုင်ငံ၊ ကွမ်ရှီးပြည်နယ်၊ နန်နင်းမြို့မှ တရုတ်-အာဆီယံ ကုန်စည်ပြပွဲကို တက်ရောက်လာတဲ့ နအဖအတွင်းရေးမှူး ဗိုလ်ချုပ်ကြီး သီဟသူရတင်အောင်မြင့်ဦးနဲ့ တရုတ် ဒု-ဝန်ကြီးချုပ်တို့ အောက်တိုဘာ (၁၉) ရက်က နယ်စပ်ဒေသတည်ငြိမ်ရေးကို တရုတ်-မြန်မာ ပူးတွဲလုပ်ပါမယ်ဆိုတဲ့ သဘောတူညီချက် ကတိကဝတ် ပြုလိုက်ကြပါတယ်။ တကယ်တော့ ဒီသဘောတူညီချက်ကြောင့် နယ်စပ်မှာ နောက်ထပ်တိုက်ပွဲတွေ ထပ်မံပေါ်ပေါက်ဖို့ဆိုတာ ယခုကာလအတွင်း ဖြစ်နိုင်ခြေနည်းပါးသွားသလို နအဖတို့ လှုပ်မလာအောင် အမြီးဆွဲခံထားလိုက်ရတယ်ဆိုရင် မှားမယ် မထင်ပါဘူး။
(ဆက်လက်ဖော်ပြပါမည်)
Labels:
ခေတ်ပြိုင် မှ
Abonneren op:
Reacties posten (Atom)
Geen opmerkingen:
Een reactie posten