ရန်ကုန်မြို့တွင် အစည်ကားဆုံးဖြစ်သည့် ရုပ်ရှင်ရုံများရှေ့ ဗိုလ်ချုပ်လမ်းမကို အမှိုက်ရွေးကွင်းပြင်အဖြစ် အသုံးပြုနေ၍ ပတ်ဝန်းကျင်နေသူများ အနံ့ဆိုးများဒဏ် မခံနိုင်ဖြစ်နေကြကြောင်း သိရသည်။
စည်ပင်သာယာအမှိုက်သိမ်းကားများသည် ရန်ကုန်မြို့ ပန်းဆိုးတန်းနှင့် ဘားလမ်းအကြား ရုပ်ရှင်ရုံများရှေ့ ဗိုလ်ချုပ်လမ်းမပေါ်တွင် အမှိုက်များကို သွန်ချကာ အမှိုက်ရွေးနေကြသည့်အတွက် အနီးပတ်ဝန်းကျင်နေလူများသည် အနံ့အသက်ဆိုးများကြောင့် အနှောင့်အယှက်ဖြစ်နေကြသည်။
ရန်ကုန်မြို့ (၃၆) လမ်း အထက်ဘလောက်တွင် နေထိုင်သူတဦးက “နေ့ဘက်ဆိုရင်တော့ အမှိုက်ကားက (၃-၄) စီးလောက်ပဲ ရှိတယ်။ ညဘက်ရောက်ပြီဆိုတာနဲ့ (၅) စီးကနေ ၆) စီးအထက်ရှိတဲ့ အမှိုက်ကားတွေဟာ ရုပ်ရှင်ရုံတွေရှေ့ ဗိုလ်ချုပ်လမ်းမပေါ်မှာ အမှိုက်တွေကို လာသွန်ချတယ်။ နောက် အမှိုက်သိမ်းသမားတွေက အမှိုက်ထဲကနေ ပလတ်စတစ်တွေ၊ စက္ကူတွေ၊ ရေသန့်ဘူး၊ ပုလင်းခွံတွေ စတာတွေကို လမ်းပေါ်မှာ ရွေးကြတယ်။ ရွေးလို့ပြီးတော့မှ အမှိုက်တွေကို ကားပေါ်ပြန်တင်ကြတယ်။ အဲဒီအတိုင်း တညလုံးလုပ်နေတော့ အမှိုက်တွေက ထွက်လာတဲ့ အနံ့အသက်တွေကြောင့် ရပ်ကွက်ကလူတွေ မခံနိုင်ဘူး၊ အတော်လေးကို အနံ့ဆိုးတယ်” ဟု ပြောသည်။
ညဘက် တက္ကစီဆွဲစားသည့် တက္ကစီသမားတယောက်ကလည်း ညဘက် တက္ကစီဆွဲသည့်အချိန် ဗိုလ်ချုပ်လမ်းကို အခေါက်ခေါက်အခါခါ ဖြတ်ရကြောင်း၊ ရုပ်ရှင်ရုံများရှေ့ အမှိုက်ရွေးနေသည့် နေရာကို ဖြတ်တိုင်း ဆိုးရွားသည့် အနံ့အသက်များကြောင့် ခရီးသည်များရော ကားသမားပါ စိတ်အနှောင့်အယှက် ဖြစ်ကြရကြောင်း ပြောသည်။
အဆိုပါ အမှိုက်ရွေးရာကွင်းသည် ရန်ကုန်မြို့လယ်က ရွှေဂုံ၊ မြို့မ၊ ဆုထူးပန်၊ သွင်၊ ဘုရင်နှင့် ဝဇီရာ ရုပ်ရှင်ရုံများ၏ ရှေ့တည့်တည့် လမ်းတဖက်ခြမ်းတွင်ဖြစ်သည်။
တညလုံး အမှိုက်ကားများမှ သွန်ချထားသည့် အမှိုက်များအနက် အညစ်အကြေးရည်များ လမ်းပေါ်မှာ စီးကျကျန်ရစ်ကြောင်း၊ ရေဆေးကြောခြင်းမျိုး မရှိသည့်အတွက် အနံ့အသက်များ မခံနိုင်အောင် ဆိုးရွားကြောင်း၊ အမှိုက်ကားများသည် နေ့ခင်းပိုင်းမှစ၍ နောက်တနေ့ နံနက်လင်းအားကြီးအချိန်အထိ အမှိုက်များကို ချ၊ ရွေး၊ ပြန်တင် လုပ်ကြ၍ ကျန်းမာရေးပင် ထိခိုက်လာနေကြောင်း ရွှေဂုံရုံအောက်တွင် မုံ့ဆိုင်ဖွင့်ထားသူတဦးက ပြောသည်။
ရန်ကုန်မြို့တော် စည်ပင်သာယာရေးကော်မတီသည် ရန်ကုန်မြို့တွင်း သိမ်းဆည်းထားသည့် အမှိုက်များကို အမှိုက်ကွင်းရှိရာ လှိုင်သာယာဘက်သို့ တိုက်ရိုက်မသယ်ဘဲ ယခုကဲ့သို့ မြို့တွင်း အမှိုက်ရွေးနေရာတို့တွင် အမှိုက်များ သွန်ချပြီး ပြန်ရွေးနေကြခြင်းဖြစ်သည်။
အမှိုက်များချပြီး ရွေးလေ့ရှိသည့်နေရာတို့မှာ မြို့လယ်ခေါင် လူစည်ကားရာ နေရာများဖြစ်နေသည့်အတွက် မြို့နေ ပြည်သူလူထု၏ ကျန်းမာရေးကိုထိခိုက်စေပြီး မြို့ကိုလည်း ညစ်ညမ်းစေကြောင်း မြို့ခံများက ပြောဆိုနေကြသည်။
ယခင်က အနော်ရထာလမ်းပေါ်ရှိ (၃၈) လမ်းဈေးအနီးတွင် ဈေးဆိုင်များ ဖွင့်လှစ်ရောင်းချနေချိန်တွင်ပင် အမှိုက်များ ချ၊ ရွေး၊ ပြန်တင်ခြင်းတို့ လုပ်၍ ပြည်သူများက ပြည်ပရေဒီယိုတို့မှတဆင့် ကန့်ကွက်ခဲ့ကြဖူးသည်။
အချို့ အမှိုက်ကားမောင်းသူတို့မှာမူ အမှိုက်ရွေးနေရာသို့ မရောက်ခင် ကားမောင်းရာ လမ်းတလျှောက် ကားပေါ်၌ အမှိုက်ရွေးသမားတင်ပြီး ငွေရှာလေ့ရှိသည့်အတွက် အမှိုက်ရွေးသည့် အမှိုက်သိမ်းသမားများ ကားပေါ်က ပြုတ်ကျပြီး သေဆုံးခြင်း၊ ကားပေါ်အမှိုက်ရွေးစဉ် ဓာတ်ကြိုးဖြင့် ငြိပြီးသေဆုံးခြင်း၊ အမှိုက်ကား၏ (Garbage Compactor) ညှပ်ပြီး သေဆုံးခြင်း စသဖြင့် နည်းပေါင်းစုံ သေဆုံးနေကြောင်းလည်း စည်ပင်ဌာန၏ ပြောပြချက်အရ သိရသည်။
ယခုကဲ့သို့ ရန်ကုန်မြို့၏အထင်ကရ လမ်းမကြီးများပေါ်တွင် အမှိုက်များချပြီး ရွေးချယ်နေကြသည့်အလုပ်ကိုမူ အင်္ဂလိပ် အစိုးရခေတ်၊ ဂျပန်ခေတ်၊ ဖဆပလခေတ်၊ မဆလခေတ်တလျှောက်လုံး မည်သူမှ မလုပ်ခဲ့ဖူးကြောင်း ရှေ့မီနောက်မီ ရန်ကုန်မြို့ခံများက ပြောဆိုနေကြသည်။
Geen opmerkingen:
Een reactie posten