ဖနိဒါ
ကြာသပတေးနေ့၊ ဖေဖေါ်ဝါရီလ ၂၅ ရက် ၂၀၁၀ ခုနှစ် ၁၆ နာရီ ၄၅ မိနစ် .
ချင်းမိုင် (မဇ္ဈိမ)။ ။ နယ်ခြားစောင့်တပ် အသွင်ပြောင်းရေး ကိစ္စဆွေးနွေးရန် စစ်ဖက်ရေးရာ လုံခြုံရေး အရာရှိချုပ် ဒုဗိုလ်ချုပ်ကြီးရဲမြင့်နှင့် ဝ’ ပြည် သွေးစည်းညီညွတ်ရေးပါတီ (UWSP) ဥက္ကဋ္ဌ ပေါက်ယူချန်းတို့ ယနေ့ တွေ့ဆုံမည်ဖြစ်ကြောင်း ဝ’ အရာရှိတဦးထံမှ သိရသည်။
စရဖ အရာရှိချုပ် ဒုဗိုလ်ချုပ်ကြီးရဲမြင့်၊ အရှေ့မြောက်တိုင်းမှူး ဗိုလ်ချုပ်အောင်သန်းထွဋ်တို့၏ တွေ့ဆုံရန် ကမ်းလှမ်းမှုကို ကျန်းမာရေး အကြောင်းပြချက်ဖြင့် ဝ’ တပ်ဖွဲ့ ဥက္ကဋ္ဌက ၃ ကြိမ် ငြင်းဆိုခဲ့ပြီးနောက် ရှမ်းပြည်နယ်မြောက်ပိုင်း တန်ယန်းမြို့တွင် ယခုတွေ့ဆုံမှု ပေါ်ပေါက်လာခြင်း ဖြစ်သည်။
“ဒီနေ့ တွေ့ကြမယ်။ နာရီအတိအကျတော့ မသိသေးဘူး။ တန်ယန်းကို မနေ့က သွားလိုက်ကြပါပြီ။ ဒါပေမဲ့ သူတို့ပြောနေတဲ့ နယ်ခြားစောင့်တပ်က ဘာအကျိုးရှိမယ်လို့ မတွေ့သေးဘူး” ဟု UWSP ၏ လက်နက်ကိုင်တပ်ဖြစ်သည့် ဝ’ ပြည် သွေးစည်းညီညွတ်ရေး တပ်မတော် UWSA မှ ဗိုလ်မှူးတဦးက မဇ္ဈိမကို ပြောသည်။
ဝ’ တပ်ဖွဲ့အနေဖြင့် စစ်အစိုးရ၏ နယ်ခြားစောင့်တပ် အသွင်ပြောင်းရေးပုံစံကိုလက်မခံပဲ တပ်ရင်းကို အခြေခံသည့် ဝမ်ဟုန်နှင့် ပန်ခမ်း စစ်ဒေသခွဲ ၂ ခုဖွဲ့ရန် အပါအဝင် ယခင်က တင်ပြခဲ့သော အချက် ၉ ချက်ကို ဆွေးနွေးကြမည်ဖြစ်ကြောင်း ဝ’ ဗိုလ်မှူးက ပြောသည်။
နအဖ ဘက်က လိုလားသည့် နယ်ခြားစောင့်တပ် ဖွဲ့စည်းပုံတွင် တပ်ရင်းတရင်းအတွက် တပ်သားဦးရေ ၃၂၆ ဦးသာ ထားရှိစေလိုပြီး ထိုအထဲတွင် မြန်မာစစ်တပ်မှ အရာရှိ ၃ဝ ကို ထည့်သွင်းမည်ဖြစ်သည်။
ဒုဗိုလ်ချုပ်ကြီးရဲမြင့်တို့အဖွဲ့သည် ရှမ်းပြည်အရှေ့ပိုင်း အထူးဒေသ ၄ ခေါ် မိုင်းလားအဖွဲ့ (အမျိုးသားဒီမိုကရေစီ မဟာမိတ်တပ်ဖွဲ့ - NDAA) နှင့် ယနေ့ ညနေပိုင်း၌ ရှမ်းပြည်နယ် ကျိုင်းတုံမြို့တွင် ဆက်လက်တွေ့ဆုံကြမည်ဟုလည်း ဆိုသည်။
တရုတ်-မြန်မာနယ်စပ်မှ မြန်မာ့အရေးလေ့လာသူ ဦးအောင်ကျော်ဇော်ကလည်း ဝ’ ကိုယ်စားလှယ်အဖွဲ့တွင် ဥက္ကဋ္ဌ ပေါက်ယူချန်း အပါအဝင် ၇ ဦးခန့်ဖြစ်ပြီး၊ မိုင်းလားအဖွဲ့မှာမူ ဒုဥက္ကဌ ဦးစံပေ့နှင့် ဦးစံလူတို့ ဖြစ်ကြောင်း ပြောသည်။
လက်ရှိ UWSA ဝ ၌ တိုက်ခိုက်ရေးအင်အား ၃ သောင်းခန့်ရှိပြီး မိုင်းလားအဖွဲ့ စစ်အင်အားသည် ၃ ထောင် ဝန်းကျင်ရှိသည်ဟု လေ့လာသူများက ခန့်မှန်းကြသည်။
ပြီးခဲ့သည့်နှစ် ဧပြီလ ၂၈ ရက်နေ့မှ စတင်၍ စစ်အစိုးရက အပစ်ရပ်တိုင်းရင်းသားအဖွဲ့များကို နယ်ခြားစောင့်တပ် အသွင်ပြောင်းရန် ကမ်းလှမ်းခဲ့ပြီး ယခင်နှစ် ဒီဇင်ဘာလကို နောက်ဆုံးထား ဆုံးဖြတ်ရန် ဝ’ တပ်ဖွဲ့ကို သတ်မှတ်ပေးခဲ့သည်။
UWSA သည် ဗမာပြည် ကွန်မြူနစ်ပါတီ - ဗကပ မှ ၁၉၈၉ ခုနှစ်တွင် ခွဲထွက်၍ ထိုနှစ်အတွင်း စစ်အစိုးရနှင့် အပစ်ရပ်စဲခဲ့သည်။
(ကိုဝိုင်း တည်းဖြတ်သည်။)
Geen opmerkingen:
Een reactie posten