စည်သူ Monday, 14 February 2011 14:30
.စစ်အစိုးရခေါင်းဆောင်ဗိုလ်ချုပ်မှူးကြီးသန်းရွှေ၏လမ်းညွှန်မှုဖြင့်ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) က နိုင်ငံရေး သင်တန်းကျောင်း ဖွင့်ရန် စီစဉ်နေကြောင်း သိရသည်။
ယင်း သင်တန်း ကျောင်းသည် ကြံ့ဖွံ့ပါတီဝင်များကို သင်တန်းပေးရန် ဖြစ်ပြီး နေပြည်တော် ဒက္ခိဏသီရိ မြို့နယ်ရှိ ကြံ့ဖွံ့ပါတီ ရုံးချုပ် အနီး၌ ယခုနှစ် အတွင်း စတင် ဖွင့်လှစ်သွားမည်ဟု ကြံ့ဖွံ့ပါတီ မြို့နယ် စည်းရုံးရေးမှူး တဦးက ပြောသည်။
နေပြည်တော်တွင်ရုံးထိုင်သောကြံ့ဖွံ့ရုံး အဆောက်အအုံ
“နိုင်ငံရေးသင်တန်းကျောင်းဖွင့်ဖို့ဗိုလ်ချုပ်မှူးကြီးကအမိန့်ပေးထားတယ်လေ။ကြံ့ဖွံ့ပါတီက လူတွေအရည်အသွေးမြင့်ပြီး တိုင်းပြည်ရဲ့ ဦးဆောင်ပါတီ ဖြစ်စေချင်တယ်လို့လည်း ပြောသွားတယ်”ဟု ၎င်းက ဆိုသည်။
သင်တန်းကျောင်းအတွက်ပြင်ဦးလွင်စစ်တက္ကသိုလ်၊ဗထူးစစ်သင်တန်းကျောင်းမှ သင်တန်းဆရာများသာမက ယဉ်ကျေးမှုဝန်ကြီး ဌာန လက်အောက်ရှိ ပညာရှင်များကိုပါ တာဝန် ပေးသွားမည် ဖြစ်ကြောင်း၊ သင်ထောက်ကူဆိုင်ရာ ပစ္စည်းများ၊ စာအုပ် စာ တမ်းများ ကြိုတင် စုဆောင်းမှုများ ပြုလုပ်နေကြောင်းလည်း သိရသည်။
ပြည်တွင်းရှိ နိုင်ငံရေးလေ့လာသူတဦးက“ကြံ့ဖွံ့ပါတီကဒီလိုCapacitybuilding(စွမ်းရည်မြှင့်တင်မှု)လုပ်နေချိန်မှာနိုင်ငံရေးသမားတွေ ကလည်း လုပ်သင့်ပါတယ်။ အပြိုင် ပေါ့ ။ သူတို့ကတော့ အာဏာရှိတယ်။ ငွေရှိတယ်။ လုပ်ပိုင်ခွင့်ရှိတော့ ပိုလုပ်နိုင်တာ ပေါ့”ဟု ပြောသည်။
ကြံ့ဖွံ့ပါတီသည် ၂၀၁၀ ပြည့်နှစ် နိုဝင်ဘာ ၇ ရက်ရွေးကောက်ပွဲတွင် အမတ်နေရာ အများဆုံးရရှိထားသည့် ပါတီဖြစ်ပြီး မကြာသေးခင်က ကျင်းပသော လွှတ်တော် အစည်းအဝေး၌ အစိုးရ အဖွဲ့သစ် ဖွဲ့ရာတွင်လည်း ကြံ့ဖွံ့ပါတီဝင်များသာ ပါဝင်သည်။
ကြံ့ဖွံ့ပါတီမှာ စစ်အစိုးရ ကျောထောက် နောက်ခံမှုဖြင့် ၁၉၉၃ ခုနှစ်တွင် လူမှုရေး အဖွဲ့အစည်း အနေနှင့် စတင် ဖွဲ့စည်းခဲ့သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး အသင်း ကို ၂၀၁၀ ဧပြီလ ၌ နိုင်ငံရေးပါတီ အဖြစ် အသွင်ပြောင်းခဲ့သော ပါတီဖြစ်သည်။ ကြံ့ ဖွံ့ပါတီကို ၀န်ကြီးချုပ် ဦးသိန်းစိန် ခေါင်းဆောင်၍ ရွေးကောက်ပွဲတွင် ၀င်ရောက် ယှဉ်ပြိုင်ခဲ့သည်။
ကြံ့ဖွံ့ပါတီ ၏ အမာခံ အင်အား ၈ သန်းကျော် ရှိကြောင်း ပါတီ အကြီးအကဲ တဦး က ထုတ်ဖော် ပြောဆိုထားသည်။
မြန်မာနိုင်ငံ၌ ၁၉၆၂ ခုနှစ်တွင် တပါတီ အာဏာရှင် ဦးနေ၀င်း အာဏာသိမ်းပြီးနောက် မြန်မာ့ ဆိုရှယ်လစ် လမ်းစဉ်ပါတီ (မဆလ)ကို ဖွဲ့စည်း၍ ပါတီ မူဝါဒ သဘောတရားများကို သင်ကြားပို့ချသည့် နိုင်ငံရေး သင်တန်းကျောင်း ဖွင့်လှစ်မှု ပြုလုပ်ခဲ့ဖူးသည်။
Geen opmerkingen:
Een reactie posten