မြန်မာပြည် အချိန်

သတင်းသစ်များမတင်နိုင်တာကိုနားလည်ပေးကြပါ။ C-Box လည်း ပိတ်ထားပါတယ်။

maandag 28 maart 2011

လှိုင်သာယာ စက်မှုဇုန် ကျူးကျော်နေထိုင်သူ များလာ

သင်းအောင် Monday, 28 March 2011 15:53
.ရန်ကုန်တိုင်း လှိုင်သာယာ မြို့နယ်ရှိ စက်ရုံ အလုပ်သမားမိသားစု အများဆုံးနေထိုင်ရာ စက်မှုဇုန် အမှတ် (၃)နှင့် (၄) တွင် ဒေသခံ အာဏာပိုင်များက ငွေကြေးယူ၍ လက်ခံမှုဖြင့် ပျံကျကျူးကျော်နေထိုင်သူ များပြား လာလျက်ရှိကြောင်း သိရသည်။
                                 လှိုင်သာယာစက်မှုဇုန်အတွင်းမှပျံကျကျူးကျော်တဲများ (ဓာတ်ပုံ-ဧရာဝတီ)
စက်ရုံကြီးများ၏ အုတ်နံရံဘေး ကပ်လျက်လည်းကောင်း၊ ကွက်လပ်ကျယ်များ၌လည်းကောင်း ပျံကျကျူးကျော်နေအိမ်များ စုဖွဲ့ နေထိုင်လျက်ရှိရာ စက်မှုဇုန်အမှတ်(၄) ဆိပ်ကမ်းသာ လမ်းတလျှောက်မှ ညောင်တုန်း တံတား အခြေအထိ၊ ကျန်စစ်သား အိမ်ရာ များ အနီး၊ ဗိုလ်အောင်ကျော် လမ်းနံဘေး၊ ၀က်မစွပ် ၀န်ထောက်လမ်း၊ ဦးတရုတ်ကြီး လမ်း၊ မြသဇင်လမ်း နှင့် လှိုင်မြစ်ကမ်းနံဘေး သဲကွင်းများ၌ ထောင်ချီ ရှိနိုင်သည်ဟု စက်မှုဇုန် ၀န်ထမ်းများက ပြောသည်။
“၁၀ ပေ ပတ်လည် အခန်းကျဉ်းလေးတွေပါပဲ။ နောက်တော့ ကွက်လပ်ရှိသလောက် အဖီဆွဲ၊ ချဲ့ဆောက်နဲ့ တဖြည်းဖြည်း ကျယ်ပြန့် လာကြတယ်။ မြေယာနဲ့ ပတ်သက်တဲ့ ဥပဒေကလည်းမရှိတော့ ကျူးကျော်ပျံကျနေအိမ်တွေ တနှစ်ထက် တနှစ် ပိုများလာ ပါ တယ်”ဟု လှိုင်သာယာ ရေဥက္ကံ ကျေးရွာ ဒေသခံ တဦးက ဆိုသည်။
ထိုသို့တည်ဆောက် နေထိုင်ခွင့်ရရန် ရေဥက္ကံ ရပ်ကွက် အေးချမ်း သာာယာရေးနှင့် ဖွံ့ဖြိုးရေးအဖွဲ့(ရယက)ရုံးသို့ လစဉ်အခွန်ငွေ ၄၀၀၀ ကျပ် ပေးသွင်းရကြောင်း၊ သတ်မှတ်ရက် အတွင်း ရယက အဖွဲ့ဝင်များက လာရောက်တောင်းခံကြောင်း၊ အဆိုပါ ပျံကျကျူးကျော်နေအိမ်များအား မြို့နယ် စည်ပင်သာယာရေး ကော်မတီ(စည်ပင်)မှ လာရောက် ဖျက်သိမ်းမည်ဆိုက ဆိုင်ရာ ရယက များက ကြိုတင် အသိပေးကြောင်း ကျူးကျော်ပျံကျ နေအိမ်တအိမ်ကလည်း ပြောပြသည်။
ပြီးခဲ့သည့်နှစ်က ရယက ရာအိမ်မှူးတဦးသည် ၎င်းကောက်ခံနယ်မြေ မဟုတ်ဘဲ လစဉ်ကြေး ၀င်ရောက်ကောက်ခံခြင်းကြောင့် ပြဿနာဖြစ်ကာ တာဝန်မှ ဖယ်ရှားခံခဲ့ရကြောင်း သိရသည်။
ယင်းစက်မှုဇုန်များအတွင်း အဆောင်နေသူ တဦးက“ဇုန်၃ -၄ အတွင်း လူနေဆောင်တွေမှာ လူတဦးကျောတခင်းစာ ၃၀၀၀ ကျပ်၊ လူ ၄ ယောက်စာ ဖွဲ့ထားတဲ့ အခန်းတခန်း ၁၈၀၀၀ ကျပ်၊ ကျန်စစ်သား အိမ်ရာ၊ န၀ဒေး အိမ်ရာတွေမှာ လူတဦး ၁၀၀၀၀ ကျပ်ခန့် အခန်းခ ပေးရတယ်။ ဒီတော့ တလ ၄၀၀၀ ကျပ်သာပေးသွင်းပြီး မိသားစုနေလို့ရတဲ့ ကျူးကျော်နေအိမ်တွေ တနှစ်ထက် တနှစ် သိပ်သည်းလာခြင်း ဖြစ်ပါတယ်”ဟု ပြောသည်။
ထို့အပြင် နေအိမ်များ၌ အဖီဆွဲခြင်း၊ သီးပင်စားပင် စိုက်ပျိုးခြင်း၊ ကြက် ဘဲ ၀က် မွေးမြူခြင်း၊ ဈေးဆိုင်များ ဖွင့်လှစ်ခြင်းနှင့် တချို့မှာ လိုင်းခန်း ငှားစားခြင်းများ ပြုလုပ်နိုင်သောကြောင့် ယခုကဲ့သို့ များပြားလာခြင်းလည်း ဖြစ်နိုင်သည်ဟု ဒေသခံများအကြား ပြောဆိုမှုများလည်း ရှိနေသည်။
ရာဘာ၊ ပလတ်စတစ် အပါအ၀င် စက်ရုံ၏ စွန့်ပစ် ပစ္စည်းများကို အခြေခံ၍ လည်းကောင်း၊ လှိုင်မြစ်ကမ်းတလျှောက်ရှိ ကျောက်၊ သဲ လုပ်ငန်းများမှ အသက်မွေးဝမ်းကျောင်း အလုပ်အကိုင်ပေါများခြင်း တို့ကြောင့်လည်းကောင်း ဤသို့ ပျံကျနေထိုင်သူများလာခြင်း လည်း ဖြစ်နိုင်သည်ဟု သိရသည်။
“စက်မှုဇုန်ရဲ့အဆောင်တွေ၊ ကျူးကျော် နေထိုင်သူတွေဟာ တပတ်တကြိမ် ဧည့်စာရင်းတိုင်ကြရတယ်၊ ၄ ပတ်ပြည့်ရင် စာရွက် စာ တမ်းဖိုး ၁၀၀ ကျပ် ပေးသွင်းကြရတယ်”ဟု ရေဥက္ကံကျေးရွာ အဆောင်နေသူ တဦးက ဆိုသည်။
ပေ ၂၀ x ပေ ၆၀ အကျယ်ရှိ အဆောင်တခုတွင် အိမ်ထောင်စု၂၀ ခန့် အခန်းဖွဲ့ နေထိုင်ကြသည့်အတွက် ထောင်နှင့်ချီသော နေ အိမ၊် အဆောင်များအတွက် တလ ဧည့်စာရင်းကြေး ကျပ် သိန်း ၃၀ နှင့်အထက် ရှိနိုင်သည်ဟု ဒေသခံများက ခန့်မှန်းကြသည်။
စက်မှုဇုန်များအတွင်း ကျူးကျော်ပျံကျနေအိမ်များ သိပ်သည်း ထူထပ်လာခြင်းမှာ နယ်မြို့ ကျေးလက်ဒေသများရှိ တောင်သူများ အလုပ်အကိုင် အခွင့်အလမ်းသစ်များ ရှားပါးလာခြင်း၊ စိုက်ပျိုးသီးနှံများ ပျက်စီးဆုံးရှုံး၍ ကြွေးသံသရာ လည်ခြင်း၊ လယ်မြေများ အဓမ္မ အသိမ်းခံရခြင်း၊ ထို့အတွက် တရားဥပဒေ၏ အကာအကွယ်ကို မရရှိခြင်း၊ ဒေသ သဘာဝအရ ဖြစ်ထွန်းသော သီးနှံထက် အာဏာပိုင်တို့အလိုကျ ကန့်သတ်သီးနှံကိုသာ စိုက်ပျိုးနေရခြင်း၊ တနှစ်ထက်တနှစ် ကျဆင်းလာသည့် သီးနှံအထွက်နှုန်းများအပေါ် မိသားစု ဆက်လက်ရပ်တည်ရန်ခက်ခဲလာခြင်းများသည် အဓိကကျသည့်အချက်များ၌ ပါဝင်သည်ဟု လေ့လာသူများက ပြောဆိုသည်။

Geen opmerkingen: