မြန်မာပြည် အချိန်

သတင်းသစ်များမတင်နိုင်တာကိုနားလည်ပေးကြပါ။ C-Box လည်း ပိတ်ထားပါတယ်။

donderdag 3 maart 2011

ပအိုဝ့်ပြည်သူ့စစ်များကို SSA-S တိုက်ခိုက်

ကြာသပတေးနေ့၊ မတ်လ ၀၃ ရက် ၂၀၁၁ ခုနှစ် ၁၉ နာရီ ၅၆ မိနစ် .
ချင်းမိုင် (မဇ္ဈိမ) ။ ။ ရှမ်းပြည်နယ် တပ်မတော် (တောင်ပိုင်း) SSA-S တပ်များက ရှမ်းပြည်နယ်တောင်ပိုင်း နမ့်ဆန်မြို့နယ် မိုင်စစ်ဒေသရှိ ပအိုဝ့်ပြည်သူ့စစ် စစ်စခန်းများကို ၂ ရက်ကြာ တိုက်ခိုက်ခဲ့သည်ဟု SSA-S သတင်းထုတ်ပြန်ချက်အရ သိရသည်။
ယခုလ၂၈ရက်နေ့ မွန်းလွဲ၁နာရီမှ ၅ နာရီအတွင်း SSA-Sတပ်များက လွိုင်ယီးဒေသရှိ ပအိုဝ့်ပြည်သူ့စစ် စစ်စခန်း ၂ ခုနှင့် ယခုလ ၁ ရက်နေ့မနက်၁၁နာရီမှညနေ ၆ နာရီခန့်အထိ နမ့်ဆန်မြို့နယ် မိုင်စစ်မြို့နယ်ခွဲ ဝမ်ဟန်းဒေသရှိ စစ်စခန်း ၂ ခုကို SSA-Sက တိုက်ခိုက်ခဲ့ကြောင်း SSA-Sဝဘ်ဆိုဒ်တွင် ဖော်ပြထားခြင်း ဖြစ်သည်။
ရှမ်းပြည်နယ်နေ့တွင်ရှမ်းပြည်နယ်တပ်မတော်(တောင်ပိုင်း)SSA-Sတပ်သားများကိုတွေ့မြင်နေရစဉ်(ဓါတ်ပုံ မဇ္ဈိမ)
G3၃လက်၊MA1တလက်၊M16၂လက်၊M79တလက်၊M60 စက်သေနတ် တလက်၊ ဘိန်း ၆ဝဝ ပိဿာခန့်၊ မူးယစ်ဆေးဝါးထုတ်ရာတွင် အသုံးပြုသည့် ဓာတုဗေဒ ပစ္စည်း ၅ ဂါလံနှင့် ဆိုင်ကယ် ၃ စီးကို SSA-S  သိမ်းဆည်းရမိကာ၊ တိုက်ခိုက်မှုများအတွင်း ပအိုဝ့် ပြည်သူ့စစ် ၆ ဦး သေဆုံးခဲ့သည်ဟု ဖော်ပြထားသည်။
အဆိုပါ တိုက်ပွဲများနှင့် ပတ်သက်၍ မဇ္ဈိမအနေဖြင့် သီးခြား အတည်ပြုနိုင်ခြင်း မရှိသေးပါ။
ပအိုဝ့်လက်နက်ကိုင်အုပ်စုသည်၂ဝဝ၉ ခုနှစ်ကတည်းကပြည်သူ့စစ်အသွင်ပြောင်းခဲ့ပြီး၊ စစ်အစိုးရခေါင်းဆောင်ဗိုလ်ချုပ်မှူးကြီးသန်းရွှေနှင့်ဇနီးဒေါ်ကြိုင်ကြိုင်ထံမှအထောက်အပံ့များ ပိုမိုရရှိလာခဲ့သည်ဟုလည်း ဆိုထားသည်။
လတ်တလောတွင် နမ့်ဆန်နှင့် မိုင်းပွန်မှ မြန်မာစစ်တပ်များသည် ပအိုဝ့်ပြည်သူ့စစ်များကို စစ်ကူပေးရန် ပြင်နေသည်။
နမ့်ဆန်မှ ဒေသခံတဦးက ပအိုဝ့်ပြည်သူ့စစ်သည် စစ်စခန်းများ၌ မူးယစ်ဆေးဝါးများ ထုတ်လုပ်နေပြီး၊ ၎င်းတို့ကို မြန်မာစစ်တပ်က အပြည့်အဝ ကာကွယ်ပေးထားသဖြင့် မြန်မာအာဏာပိုင်များသည် ပအိုဝ့်ပြည်သူ့စစ်များထံမှ ဝင်ငွေများစွာ ရရှိခဲ့သည်ဟု SSA-A က ဆိုသည်။
မိုင်စစ်ဒေသတွင် ဦးအောင်ခမ်းထီ ခေါင်းဆောင်သည့် ပအိုဝ့်အမျိုးသားအဖွဲ့ PNOအပါအဝင် ပြည်သူ့စစ် အုပ်စုများစွာ ရှိနေပြီး၊ မူးယစ်ဆေးဝါးမှ ရရှိသည့် ဝင်ငွေအပေါ်တွင် မီခိုနေသည်ဟု ဖော်ပြထားသည်။ ထိုအုပ်စုများအချင်းချင်း အုပ်စုအကျိုးစီးပွားအတွက် အပြိုင်အဆိုင် ကြိုးပမ်းရာမှ ပဋိပက္ခများလည်း ဖြစ်ပွားခဲ့သည်ဟု သိရသည်။
“အဲဒီပြည်သူ့စစ်အုပ်စုတွေဟာစစ်အစိုးရရဲ့အသုံးချမှုကိုခံနေရတာပါ။ပြီးတော့ တကိုယ်ကောင်းဆန်ကြတဲ့အတွက် သူတို့ရဲ့ မူလရည်မှန်းချက်တွေလည်း ပျောက်ဆုံးကုန်ပါပြီ။ သူတို့ဟာ အရပ်သားတွေကို မြန်မာစစ်တပ်ရဲ့ ဘေးရန်ကနေ ကာကွယ်စောင့်ရှောက်ပေးရမယ့်အစား မာဖီးယားဂိုဏ်းတွေလို လုပ်နေကြပါတယ်” ဟု လေ့လာသူတဦးက ဆိုသည်။
စစ်ရေး လေ့လာသုံးသပ်သူ တဦးကလည်း “ပြည်သူ့စစ် အသွင်ပြောင်းလိုက်တဲ့ လက်နက်ကိုင် အုပ်စုတွေဟာ SSA-S ရဲ့ ပစ်မှတ်တွေ ဖြစ်လာပါတယ်။ ဘာလို့လဲဆိုတော့ အဲဒီအုပ်စုတွေဟာ စစ်အစိုးရရဲ့ အသုံးချခြင်းကို ခံနေရပြီးတော့ စစ်အစိုးရရဲ့ အမိန့်အတိုင်း လိုက်နာဆောင်ရွက်နေကြလို့ပါ။ SSA-S ကတော့ သူ့မှာ သီးခြား ရည်ရွယ်ချက် ရှိပါတယ်။ အဲဒါကတော့ စစ်အစိုးရကို ဆန့်ကျင်တိုက်ခိုက်ဖို့ပါပဲ” ဟု ဆိုသည်။
SSA-S သည် စစ်အစိုးရကို ရှမ်းပြည်နယ်အတွင်းမှနေ၍ ဆန့်ကျင်တိုက်ခိုက်နေသည့် တခုတည်းသော ရှမ်းလက်နက်ကိုင် အင်အားစုဖြစ်ပြီး၊ ရှမ်းပြည်နယ်နှင့် ထိုင်းနိုင်ငံ နယ်နိမိတ်တွင် အခြေစိုက်ထားသည်။ SSA-S ရှမ်းတပ်မတော်၏ ခေါင်းဆောင်မှာ ဒုတိယ ဗိုလ်ချုပ်ကြီး ရွက်ဆစ် ဖြစ်သည်။
အခြားလက်နက်ကိုင်အုပ်စု၃ခုဖြစ်သည့်ဝ’ပြည်သွေးစည်းညီညွတ်ရေးတပ်မတော်(UWSA)၊ တိုင်းရင်းသားလူမျိုးများ ဒီမိုကရက်တစ် မဟာမိတ်တပ်ဖွဲ့ NDAA (မိုင်းလား) နှင့် ရှမ်းပြည်နယ် တပ်မတော် (မြောက်ပိုင်း) (SSA-N) သည်လည်း မြန်မာ-တရုတ်နယ်စပ်တွင် ရှိသည်။ ထိုအုပ်စုများသည် စစ်အစိုးရ၏ နယ်ခြားစောင့်တပ် အသွင်ပြောင်းရန် ဖိအားပေးမှုကို ခံနေရသော်လည်း ငြင်းဆန်နေဆဲ ဖြစ်သည်။







Geen opmerkingen: