မြတ်ခိုင်ဦး/ ၃ မေ ၂ဝ၁ဝ
လွတ်လပ်စွာ အလုပ်သမားသမဂ္ဂများဖွဲ့စည်းခွင့်နှင့်ခွဲခြားမှုမရှိဘဲ တန်းတူအခွင့်အရေး တောင်းဆိုခွင့်တို့အား ထိုင်းအစိုးရမှသဘောတူလက်မှတ်ရေးထိုးသွားရန်တိုက်တွန်းပေးသွားမည်ဟု ထိုင်းအလုပ်သမားဝန်ကြီးကထိုင်းနိုင်ငံ၊ဘန်ကောက်မြို့တွင်ပြုလုပ်ခဲ့သည့်အပြည်ပြည်ဆိုင်ရာ အလုပ်သမားနေ့ချီတက်ပွဲအခမ်းအနားအဖွင့်အမှာစကားပြောကြားရာတွင် ထည့်သွင်းပြောကြားသွားသည်။
အဆိုပါအခွင့်အရေးများကို ထိုင်းအစိုးရအား ယခုအလုပ်သမားသမဂ္ဂ အသီးသီးမှ တောင်းဆိုတင်ပြသော အချက်များဖြစ်သည့် အပြည်ပြည်ဆိုင်ရာ အလုပ်သမားအဖွဲ့ချုပ်(ILO)မှ ပြဋ္ဌာန်းထားသော ပြဋ္ဌာန်းချက် အမှတ် (၈၇၊၉၈)တို့နှင့်အညီ ထိုင်းအစိုးရကသဘောတူလက်မှတ် ရေးထိုးသွားရန် တိုက်တွန်းပေးသွားမည်ဟု ထိုင်းအလုပ်သမားဝန်ကြီး မစ္စတာ ပိုင်သုန်က ပြောကြားလိုက်ခြင်းဖြစ်သည်။
မေလ(၁)ရက်နေ့တွင်ကျရောက်သည့်အပြည်ပြည်ဆိုင်ရာအလုပ်သမားနေ့အခမ်းအနားအဖြစ် အလုပ်ရှင်၊ အလုပ်သမားများ ပါဝင်သော အင်အား (၃) ထောင်ကျော်တို့က လမ်းလျှောက်ချီတက်ပွဲပြုလုပ်ရာ မြန်မာရွှေ့ပြောင်း အလုပ်သမားများလည်း ပါဝင်ခဲ့ကြသည်။
အဆိုပါ ချီတက်ပွဲကို ထိုင်းအလုပ်သမားသမဂ္ဂများ၊ ActionNetworkforMigrant(ANM) ရွှေ့ ပြောင်းအလုပ်သမားရေးရာ လှုပ်ရှားမှုကွန်ရက်၊ MigrantWorkingGroup(MWG) ရွှေ့ ပြောင်းအလုပ်သမားအရေး ပူးပေါင်းဆောင်ရွက်မှုအဖွဲ့တို့မှ ဦးစီး၍ လုပ်ငန်းရှင်များ၊ ထိုင်းအလုပ်သမားများနှင့်အတူ မြန်မာအလုပ်သမားတို့က ရာမ (၆)ဘုရင်ရုပ်ထုရှိရာနေရာ စုရပ်မှ မြဘုရားအနီး ဆနွမ်းမနွန်ကွင်းအထိ လမ်းလျှောက်ချီတက်ခဲ့ကြခြင်းဖြစ်သည်။
ယခုကဲ့သို့ အပြည်ပြည်ဆိုင်ရာ အလုပ်သမားနေ့ ချီတက်ပွဲအခမ်းနားကို ပထမဦးဆုံးအကြိမ်အဖြစ် ဘန်ကောက်မြို့တော်၌ ထိုင်းအလုပ်သမားများ၊ လုပ်ငန်းရှင်များကိုယ်တိုင်နှင့် ရွှေ့ ပြောင်းအလုပ်သမားများပါဝင်ကာ ကျင်းပနိုင်ခြင်းဖြစ်ပြီး နောင်နှစ်များတွင်လည်း ဆက်လက်ကျင်းပရန် ကြိုးပမ်းသွားမည်ဟု အဆိုပါအခမ်းအနားသို့ ဦးဆောင်ပါဝင် တက်ရောက်ခဲ့သည့် နိုင်ငံတကာအဖွဲ့အစည်းတခုမှ ခွန်သုန့်က ပြောကြားသည်။
ကိုယ်တိုင်ပါဝင်ချီတက်ခဲ့သည့် မြန်မာရွှေ့ပြောင်းအလုပ်သမားတဦးဖြစ်သည့် ကိုစောဆိုင်းကလည်း “ဒီလို ကိုယ့်အခွင့်အရေးအတွက် ကိုယ်တိုင်ကိုယ်ကျ ပါဝင်တောင်းဆိုခွင့်ရတဲ့အတွက် ၀မ်းသာတယ်။ နောင်ဆို ဒီထက်မက ကျနော်တို့ အလုပ်သမားတွေ ပိုမိုပူးပေါင်းဆောင်ရွက်စေချင်တယ်” ဟု ပြောဆိုသည်။
အဆိုပါ ချီတက်ပွဲတွင် ဖြန့်ဝေသည့် ထိုင်းနှင့်မြန်မာ နှစ်ဘာသာဖြင့် ထုတ်ပြန်သော ကြေညာချက်တစောင်တွင် ရွှေ့ပြောင်းအလုပ်သမားတို့၏ အခက်အခဲ အခြေအနေကို တင်ပြထားပြီး အချက် (၆) ချက်ကိုလည်း တောင်းဆိုတင်ပြထားသည်။
ထိုအချက်များမှာ ရွှေ့ပြောင်းအလုပ်သမားအခွင့်အရေး ကာကွယ်ပေးရေး သဘောတူညီချက်ကို လက်မှတ်ရေးထိုးရန်၊ ရွှေ့ပြောင်းအလုပ်သမား ကျန်းမာရေးဝန်ထမ်းများ တာဝန်ပေးအပ်ရန်၊ ရွှေ့ပြောင်းအလုပ်သမားများ အခွင့်အရေးအတွက် အစိုးရမှ တာဝန်ယူပေးရန်၊ အေအိုင်ဒီအက်စ်ရောဂါရှိ ရွှေ့ပြောင်းအလုပ်သမားများအား ဆေးဝါးပေးအပ်ရန်နှင့် အိမ်အကူ အလုပ်သမားများအတွက် အခြေခံအလုပ်သမား အခွင့်အရေးများ ရရှိရေးတွင် အစိုးရမှ တာဝန်ယူဆောင်ရွက်ပေးရန်တို့ ဖြစ်သည်။
ထိုင်းနိုင်ငံတွင် နိုင်ငံသားအလုပ်သမားဦးရေသန်း(၂၀)ခန့်ရှိပြီး နိုင်ငံသားမဟုတ်သော ရွှေ့ပြောင်းအလုပ်သမားအရေအတွက်(၂)သန်းခန့်ရှိမည်ဟု အလုပ်သမားအရေးဆောင်ရွက်နေသော အဖွဲ့များက ခန့်မှန်းကြသည်။
Geen opmerkingen:
Een reactie posten