Wednesday, 27 January 2010 17:43 ရှောင်ဆန့်
.ဧရာဝတီ မြစ်ဆုံ ရေလှောင်တမံ ဆောက်လုပ် နေခြင်းအား ကန့်ကွက်ကြောင်း ၀ိုင်းဝန်း လက်မှတ်ရေးထိုး ထားသည့် စာကို နိုင်ငံတကာရောက် ကချင် တိုင်းရင်းသား များက တရုတ် အစိုးရသို့ ပေးပို့ရန် ပြင်ဆင်နေကြသည်။
မြစ်ဆုံ ရေလှောင်တမံ စီမံကိန်း မြင်ကွင်းတခု (ဓာတ်ပုံ - ဧရာဝတီ)
ရေလှောင်တမံ ပြိုကျပါက မြစ်အောက် ပိုင်းရှိ ဒေသခံ သန်းနှင့်ချီ ဒုက္ခ ရောက်မည်၊ သဘာဝ အပန်းဖြေ စခန်းနှင့် ကချင်လူမျိုးများ ဆင်းသက် လာသော သမိုင်း ပျောက်ကွယ် သွားမည်၊ ဒေသခံ ၁၅၀၀၀ ကျော် အတင်းအကျပ် ပြောင်းရွှေ့ ခံရမည် စသည့် အချက် သုံးချက်ကို ကန့်ကွက် စာတွင် ဖော်ပြ ထားကြောင်း သိရသည်။ ရေလှောင် တမံသည် စစ်ကိုင်းတိုင်း ငလျင်လမ်း ကြောင်းတွင် တည်ရှိသည်ဟု ကန့်ကွက်စာက ဆိုသည်။
ရေအား လျှပ်စစ် ထုတ်လုပ်ရန် တည်ဆောက် နေသော မြစ်ဆုံ ရေလှောင်တမံ စီမံကိန်း ရပ်တန့်ရေး အတွက် ယုံကြည်ချက် အပြည့်ဖြင့် လက်မှတ် ရေးထိုးခဲ့ကြောင်း ထိုင်းနိုင်ငံ အခြေစိုက် ကချင်တဦးက ပြောသည်။
“ကျမတို့ကလည်း နည်းအမျိုးမျိုး သုံးပြီး ရေကာတာ မဖြစ်မြောက်အောင် တားနေမှာပဲ၊ လုံးဝ ဖြစ်မြောက်လာမှာ မဟုတ်ဘူးလို့လည်း ယုံကြည်ထားတယ်” ဟု သူက ဆိုသည်။
ရေလှောင်တမံ စီမံကိန်း ရပ်တန့်ရေး ဆောင်ရွက်နေသော ထိုင်းနိုင်ငံ အခြေစိုက် ကချင်ဖွံ့ဖြိုးရေး ကွန်ယက် အဖွဲ့မှ ကိုနော်လာက ကန့်ကွက်စာသည် အဆင်သင့် ဖြစ်နေပြီး မနက်ဖြန်တွင် ပေးပို့မည်ဟု ပြောသည်။
မကြာသေးမီကလည်း စီမံကိန်း ရပ်ဆိုင်းပေးရေးအတွက် မြစ်ကြီးနား ကချင်နှစ်ချင်း ခရစ်ယာန် အဖွဲ့ချုပ်က ဦးဆောင်ပြီး အသင်းတော် နေရာပေါင်း ၅၉ နေရာတွင် ၂၄ နာရီ ဆုတောင်းပွဲများ ကျင်းပခြင်း၊ နှိုးဆော်သည့် ပိုစတာများ ကပ်ခြင်း တို့ကို ပြုလုပ်ခဲ့ကြသည်။
အသင်းသူ အသင်းသား တသိန်း နီးပါးရှိသည့် မြစ်ကြီးနားနှင့် အနီးတ၀ိုက်မှ အဆိုပါ အသင်းတော်များ၏ ဇန်န၀ါရီလ ၁၈ ရက်နေ့က ပြုလုပ်ခဲ့သော လှုပ်ရှားမှုများသည် အစိုးရ၏ စီမံကိန်းကို ဆန့်ကျင်သည့် လုပ်ရပ်များ ဖြစ်သော်လည်း အတားအဆီး၊ အနှောင့်အယှက်များ မပေါ်ပေါက်ခဲ့ပေ။
ဧရာဝတီ၏အစ မေခ နှင့် မလိခ မြစ်၂ ခု ဆုံစည်းရာ ဒေသတွင် တည်ဆောက်နေသော ရေလှောင်တမံ တည်ဆောက်ရေး စီမံကိန်းကို ပြီးခဲ့သည့်နှစ်က အမှတ် (၁) လျှပ်စစ်စွမ်းအား ၀န်ကြီးဌာန၊ မြန်မာနိုင်ငံမှ Asia World ကုမ္ပဏီ၊ တရုတ် စွမ်းအင် ရင်းနှီး မြှုပ်နှံမှု ကုမ္ပဏီ (CPI) တို့ ပူးပေါင်း တည်ဆောက်ခဲ့သည်။ ထွက်ပေါ်လာသော လျှပ်စစ်ဓာတ်အားကို တရုတ်နိုင်ငံသို့ ရောင်းချမည် ဖြစ်သည်။
Geen opmerkingen:
Een reactie posten