စိုးမိုး/ ၂၇ ဇန်န၀ါရီ ၂ဝ၁ဝ
မြန်မာ့ဆန်စပါးအထူးပြု ကုမ္ပဏီ (၂၉) ခုကို အများပြည်သူသို့ ရှယ်ယာရောင်းချခွင့်ရှိသော အများပိုင်ကုမ္ပဏီများအဖြစ် အသွင်ပြောင်းလဲပြီး ဆန်စပါးလောကအတွင်း ရင်းနှီးမြှုပ်နှံမှုများကို စုစည်းသွားရန် အစိုးရက စီစဉ်နေကြောင်း သိရသည်။
လွန်ခဲ့သည့် နှစ်များကတည်းက ဆန်ကုန်သည်ကြီးများအသင်း၊ ဆန်စက်လုပ်ငန်းရှင်များ အသင်းတို့က ဆန်စပါးလောကအတွင်း ရင်းနှီးမြှုပ်နှံမှုများ ကျယ်ကျယ်ပြန့်ပြန့် လုပ်ဆောင်ရန် အများပိုင်ကုမ္ပဏီ ထူထောင်လုပ်ကိုင်ခွင့် တောင်းခံခဲ့ခြင်းကို အစိုးရက ပယ်ချခဲ့ပြီး ယခုအင်အားကြီး ပုဂ္ဂလိက လုပ်ငန်းရှင်များကို လုပ်ကိုင်ခွင့်ပေးရန် စီစဉ်လိုက်ခြင်း ဖြစ်သည်။
“ဆန်စပါးအဖွဲ့ (၃) ခုပေါ့ဗျာ။ ကုန်သည်အသင်း၊ ဆန်စက်အသင်း၊ စိုက်ပျိုးထုတ်လုပ်သူအသင်း။ ဒီအသင်းတွေက အများပိုင် ကုမ္ပဏီ ထောင်မယ်၊ ခွင့်တောင်းတယ်၊ စီစဉ်တယ်၊ ပယ်ချတယ်ခင်ဗျ။ အခု လုပ်ပိုင်ခွင့်ပေးမှာက တစိုက်မတ်မတ် ဆန်လောကမှာ လုပ်ကိုင်လာသူတွေ မဟုတ်ပါဘူး။ စီးပွားရေးသမားတွေပါ” ဟု ကုန်သည် စက်မှုအသင်းအမှုဆောင်က ပြောသည်။
ဆန်စပါးထုတ်လုပ်မှု လောကအတွင်း စီးပွားရေးသမားများ ထပ်တိုးဝင်ရောက်လာခြင်းသည် ကောင်းမွန်သော်လည်း အမှန်တကယ် ဆန်စပါးထုတ်လုပ်မှု၊ ဈေးကွက်ဖော်ဆောင်မှု တိုးတက်လာမည်ဟု ကြိမ်းသေပေါက် မပြောနိုင်ကြောင်း ၎င်းက ပြောသည်။
ဆန်စပါးအထူးပြု ကုမ္ပဏီများကို ကျော်ကြားသော စီးပွားရေးလုပ်ငန်းများဖြစ်သည့် ထူး၊ ဧဒင်၊ ရွှေနဂါးမင်း စသည့် ကုမ္ပဏီကြီးများနှင့် ဒေသခံ ဆန်စက်လုပ်ငန်းရှင်များ စုစည်းကာ ယမန်နှစ်က စတင်ဖွဲ့စည်းခဲ့ပြီး လယ်သမားများအား စိုက်ပျိုးစရိတ် ထုတ်ချေးမှုများ လုပ်ဆောင်ခဲ့သည်။ ယင်းကုမ္ပဏီများသည် အများပိုင် ကုမ္ပဏီများအဖြစ် အသွင်ပြောင်းပြီးပါက အများပြည်သူသို့ ကုမ္ပဏီ၏ ပိုင်ဆိုင်မှု အစုရှယ်ယာများ ရောင်းချခွင့် ရရှိလာမည်ဖြစ်သည်။
ပြည်တွင်းအခြေစိုက် ဆန်စပါးစိုက်ပျိုးထုတ်လုပ်မှု လေ့လာသူတဦးကမူ “ပြည်တွင်း ဆန်ဈေးမတက်ရဆိုတဲ့ မူရှိနေရင်တော့ တောင်သူလောက ဆင်းရဲနေဦးမှာပဲ။ ဆန်ဈေးက ပြည်ပနဲ့တန်းတူ ဖြစ်နေရင်လည်း ၀ယ်မစားနိုင်တဲ့ ပြည်သူက အစိုးရကို အပြစ်တင်လာမယ်။ အဲလိုနဲ့ တောင်သူတွေဘ၀ နိမ့်ကျလာတာ နှစ်ပေါင်းများစွာရှိနေပြီ” ဟု ထောက်ပြပြောဆိုသည်။
စစ်အစိုးရက ဆန်ကို ဗျူဟာသီးနှံအဖြစ် သတ်မှတ်ထားပြီး ပြည်တွင်းစားသုံးမှု ဖူလုံမှ ပြည်ပတင်ပို့ရန် မူဝါဒ ချမှတ်ထားသည့် အပြင် ပြည်တွင်း ဆန်ဈေးနှုန်းကိုလည်း ထိန်းချုပ်ထားသောကြောင့် စပါးစိုက်တောင်သူများ ဆန်စပါး ဈေးကောင်းမရရှိဘဲ တနှစ်ထက်တနှစ် ဆင်းရဲတွင်းနက်လာသည်ဟုလည်း ၎င်းက ပြောဆိုသည်။
တောင်သူများက လယ်ယာသွင်းအားစုများဖြစ်သော ဓာတ်မြေသြဇာ၊ လုပ်အားခ၊ စက်ပစ္စည်း၊ ဒီဇယ်၊ စိုက်ပျိုးရေးလုပ်ငန်းသုံး ဆေးဝါးတို့ကို ပြည်ပပေါက်ဈေးအတိုင်း ၀ယ်ယူအသုံးပြုရပြီး ထုတ်ကုန် ဆန်စပါးကိုမူ စစ်အစိုးရ ထိန်းချုပ်ဈေးနှုန်းဖြင့် ရောင်းဝယ်နေရခြင်းဖြစ်သည်။
ဆန်စပါး အဓိကထုတ်လုပ်သည့်နိုင်ငံဖြစ်သော မြန်မာနိုင်ငံတွင် ဆန်စပါးထုတ်လုပ်မှု လျော့ကျလာခြင်း၊ တောင်သူများ ဆင်းရဲတွင်းနက်နေခြင်း၊ လယ်ယာလုပ်သားများ ပြည်ပထွက် အလုပ်လုပ်ကိုင်မှု များလာပြီး လယ်ယာလုပ်သား ရှားပါးခြင်း၊ မျိုးဆက်သစ် လယ်ယာလုပ်ငန်း လုပ်ကိုင်လိုသူ ရှားပါးလာခြင်း၊ ဒေသတွင်း ဆန်စပါးအဆင့်အတန်း နိမ့်ကျနေခြင်းတို့က မြန်မာ့ ဆန်စပါး ထုတ်လုပ်မှုကို ခြိမ်းခြောက်စိန်ခေါ်နေကြောင်း ဆန်လုပ်ငန်းရှင်များက ပြောဆိုသည်။
စစ်အစိုးရအဆက်ဆက်တွင် တောင်သူများက အစိုးရသတ်မှတ်ဈေးဖြင့် စပါးရောင်းချခဲ့ရပြီး ၂၀၀၃ ခုနှစ်တွင် အဆိုပါစနစ်ကို ဖျက်သိမ်းပေးခဲ့သော်လည်း ယခုအချိန်ထိ လွတ်လပ်စွာ ဆန်စပါးရောင်းဝယ်ခွင့် မပေးသေးပေ။
Geen opmerkingen:
Een reactie posten