Wednesday, 27 January 2010 17:13 ဧရာဝတီ
.ငလျင်ဒဏ် ခံခဲ့ရသည့် ဟေတီနိုင်ငံတွင် အမေရိကန် တပ်များက ကယ်ဆယ်ရေး လုပ်ငန်းများ ၀င်ရောက် ကူညီနေမှုနှင့် ပတ်သက်၍ စစ်အစိုးရ သတင်းစာများတွင် ဖော်ပြခွင့် မရကြောင်း သိရသည်။
ဟေတီနိုင်ငံတွင် လူသားချင်း စာနာမှု အကူအညီ ပေးရေး လုပ်ငန်းများ လုပ်ကိုင် နေသည့် အမေရိကန် နိုင်ငံနှင့် အခြားသော အနောက် နိုင်ငံများမှ တပ်များနှင့် ပတ်သက်သည့် သတင်းများကို အစိုးရ သတင်းစာများနှင့် မီဒီယာများတွင် မဖော်ပြရန် အတွက် စာပေ စိစစ်ရေးက တားမြစ်ထားကြောင်း ရန်ကုန် အခြေစိုက် သတင်းသမား တဦးက ဧရာဝတီသို့ ပြောသည်။
“အမေရိကန် တပ်တွေ ဟေတီမှာ ကယ်ဆယ်ရေး လုပ်နေတာ တွေကို မဖော်ပြဘဲနဲ့ တရုတ်တွေ လုပ်နေတာကိုပဲ ဖော်ပြနေတယ်” ဟု ၎င်းက ဆိုသည်။
ငလျင်လှုပ်ပြီးသည့် နောက်ပိုင်း ဟေတီ ဒုက္ခသည်များကို ကူညီရန် အတွက် အမေရိကန်နှင့် အနောက် နိုင်ငံများမှ တပ်သားပေါင်း ၁၆၀၀၀ ကို စေလွှတ် အကူအညီ ပေးထားကြောင်း သိရသည်။
မကြာသေးမီက ၀န်ထမ်းများအား လစာများ တိုးမြှင့်သည့် သတင်းနှင့် တရုတ်အစိုးရနှင့် Google အင်တာနက်ကုမ္ပဏီတို့အကြား ဖြစ်ပွားနေသည့် ပြဿနာများကို လည်း အဆိုပါ စာပေစိစစ်ရေး အဖွဲ့က ဖော်ပြခွင့် မပေးကြောင်းသိရသည်။
မြန်မာနိုင်ငံသည်လည်း ဟေတီနိုင်ငံကဲ့သို့ပင် ၂၀၀၈ ခုနှစ် မေလက တိုက်ခတ်ခဲ့သည့် နာဂစ်ဆိုင်ကလုန်းမုန်တိုင်းတွင် လူပေါင်း ၁၄၀၀၀၀ကျော် အသက်ဆုံးရှုံးခဲ့ရပြီး လူ၂သန်းခန့် အိုးမဲ့အိမ်မဲ့ဖြစ်ခဲ့ရသည်။
ဟေတီနိုင်ငံသည် လူသားချင်းစာနာမှုအတွက် ပေးအပ်သည့် နိုင်ငံတကာ အကူအညီများကို လက်ခံခဲ့သော်လည်း မြန်မာစစ်အစိုးရ က နိုင်ငံတကာမှ မြန်မာ့အရေးအား ၀င်ရောက်စွက်ဖက်မည်ကို စိုးရိမ်သည့်အတွက် နိုင်ငံတကာအကူအညီပေးရေး ၀န်ထမ်းများ အား မုန်တိုင်းတိုက်ခတ်ပြီး တလခန့်ကြာမှသာ မြစ်ဝကျွန်းပေါ်ဒေသသို့ ၀င်ရောက်ခွင့် ပြုခဲ့သည်။
ပြီးခဲ့သည့် တနလာင်္နေ့က ဟေတီငလျင်နှင့် ပတ်သက်သော နိုင်ငံတကာ အကူအညီပေးရေး ဆွေးနွေးပွဲကို ကနေဒါနိုင်ငံတွင် ကျင်းပခဲ့သည်။
ထိုနိုင်ငံတကာအကူအညီပေးရေး ဆွေးနွေးမှုများကို ငလျင်လှုပ်ခတ်ခဲ့ပြီး သီတင်းနှစ်ပတ်အတွင်း ကျင်းပနိုင်ခဲ့သော်လည်း မြန်မာ နိုင်ငံတွင် တလခန့်ကြာမှသာ ပြုလုပ်နိုင်ခဲ့သည်။
ဟေတီငလျင်တွင် လူပေါင်း ၁၅၀၀၀၀ ခန့် သေဆုံးကြောင်း၊ နိုင်ငံတကာအဖွဲ့အစည်းများတွင် အလုပ်လုပ်ကိုင်နေ ကြသည့် မြန်မာ နိုင်ငံသား ၀န်ထမ်းများလည်း သေဆုံးနိုင်ကြောင်း အမည်မဖော်လိုသည့် ကုလသမဂ္ဂ၀န်ထမ်းတဦးကပြောသည်။
“အရင်က ဟေတီမှာရှိတဲ့ နိုင်ငံတကာအဖွဲ့အစည်းတွေနဲ့ ကုလသမဂ္ဂအဖွဲ့တွေမှာ မြန်မာဝန်ထမ်းတွေရှိတယ်”ဟု၎င်းကဆိုသည်။
ယခင်က ဟေတီနိုင်ငံ၌ မြန်မာဝန်ထမ်းများစွာ အလုပ်လုပ်ကိုင်နေကြောင်း၊ မြန်မာဆရာဝန်တဦးဖြစ်သည့် ဒေါက်တာ မြတ်သူ သည် ယခုငလျင်ကြီးတွင် ပျောက်ဆုံးနေကြောင်း ဟေတီနိုင်ငံမြို့တော် ပို့အော့ပရင့် တွင် အသက်ရှင်ကျန်ရစ်သူ မြန်မာလူ မျိုး တဦးကို ကိုးကား၍ လွတ်လပ်သော သတင်း ဘလော့ဂ်တွင် ဖော်ပြထားသည်။
Geen opmerkingen:
Een reactie posten