NEJ/ ၂၇ ဇန်န၀ါရီ ၂ဝ၁ဝ
ဗမာပြည်ကွန်မြူနစ်ပါတီသို့ တောခိုသွားခဲ့ကာ ကရင့်တော်လှန်ရေးနယ်မြေတွင် ကျဆုံးသွားသည့် နာမည်ကြီးစာရေးဆရာ နိုင်ဝင်းဆွေ၏ ဝတ္ထု (၂) အုပ်ကို ပြန်လည်ထုတ်ဝေခွင့်ပြုလိုက်ကြောင်း စာပေစိစစ်ရေးရုံးမှ စုံစမ်းသိရသည်။
စာပေစိစစ်ရေးရုံးမှ စာစစ်မှူးတဦးက “နိုင်ဝင်းဆွေရဲ့ မဟူရာမေတ္တာနဲ့ နွေတစ်ည ဝတ္ထု (၂) အုပ်ကို ထုတ်ဝေခွင့် ချပေးလိုက် ပါတယ်။ ကံ့ကော်ဝတ်ရည်စာပေက ထုတ်ဝေခွင့် လာတင်တာကို ခွင့်ပြုပေးလိုက်ပါတယ်။ နိုင်ဝင်းဆွေရဲ့ အခြားစာအုပ်တွေ ကိုတော့ ထုတ်ဝေခွင့်ပြု မပြု မပြောနိုင်ပါဘူး။ ထုတ်ချင်ရင် စာမူ မူပိုင်ခွင့်ရှိသူရဲ့ ထောက်ခံစာနဲ့တကွ စာပေစိစစ်ရေးမှာ လာတင်ပြကြည့်လို့ရပါတယ်” ဟု ပြောသည်။
စာရေးဆရာ နိုင်ဝင်းဆွေ၏ စာအုပ်အဟောင်းများ ထုတ်ဝေခွင့်ကို နှစ်ပေါင်းများစွာ ပိတ်ပင်ထားရာ သူသေလွန်ပြီးချိန် အနှစ် (၂ဝ) နီးပါးကြာ ယခုနှစ်မှ ပြန်လည်ထုတ်ဝေခွင့်ရခြင်းဖြစ်သည်။
ရန်ကုန်မြို့မှ စာအုပ်ထုတ်ဝေသူတဦးက “နိုင်ဝင်းဆွေ စာအုပ်တွေဟာ စာအုပ်အဟောင်း ဈေးကွက်ထဲမှာတောင် အတော်ရှားသွားပြီ။ တချို့စာအုပ်တွေဆို ကျပ် (၁) သောင်း ပေးတာတောင် ရှာလို့မရနိုင်ဘူး။ ခုလို ထုတ်ဝေခွင့်ပြုလိုက်တော့ ကောင်းတာပေါ့။ ဒါမှ နောက်မျိုးဆက်တွေကပါ နိုင်ဝင်းဆွေရဲ့ စာတွေကို ဖတ်ဖူးသွားမယ်” ဟု ပြောသည်။
နာမည်ကျော် စာရေးဆရာနိုင်ဝင်းဆွေသည် ကျွန်းကုန်းမြို့နယ်၊ ချင်းကုန်းရွာတွင် ၁၉၄၁ ခုနှစ်၌ မွေးဖွားပြီး အမည်ရင်း ဦးနိုင်ဝင်းဖြစ်သည်။ ၁၉၅၉ ခုနှစ်မှစပြီး မြန်မာ့မီးရထားဌာနတွင် အလုပ်သင် ဘူတာစာရေးမှ ဘူတာကုန်ရုံစာရေးကြီးအဖြစ် အမှုထမ်းခဲ့သည်။
၎င်းသည် အလွန်ကျော်ကြားလှသည့် မဟူရာမေတ္တာ ဝတ္ထုရှည်ကို ၁၉၆၆ တွင် စတင်ရေးသားပြီး ၁၉၆၈ ခုနှစ် ရှုမဝမဂ္ဂဇင်း၌ စတင်ဖော်ပြခဲ့သည်။
ထို့နောက် နွေတစ်ည (၁၉၇၁)၊ မသိန်းရှင်ဆီ ပို့ပေးပါ (၁၉၇၁)၊ အချစ်ည (၁၉၇၂)၊ နိုးတစ်ဝက်အိပ်မက် (၁၉၇၂) နှင့် ရေဆန်လမ်း (၁၉၇၅)၊ ဘဝစာမျက်နှာများ စသည်တို့ကို ရေးသားထုတ်ဝေပြီး နောက်ပိုင်း ဗမာပြည်ကွန်မြူနစ်ပါတီ အရှေ့မြောက်ပိုင်း စစ်ဒေသ ပန်ဆန်းသို့ တောခိုသွားခဲ့သည်။
၁၉၈၉ ခုနှစ် ဗကပ ဗဟိုတွင် အာဏာသိမ်းပွဲ ဖြစ်ပွားခဲ့ပြီးနောက် ဗမာပြည်ကွန်မြူနစ်ပါတီ ဗဟိုကော်မတီနှင့်အတူ တရုတ်ပြည်သို့ လိုက်ပါသွားခြင်း မရှိသကဲ့သို့ အာဏာသိမ်း ဝတပ်ဖွဲ့နှင့်လည်း ပူးပေါင်းခဲ့ခြင်း မရှိပေ။
အဆိုပါအချိန်က ဗကပ နယ်မြေသို့ ရောက်လာသည့် မဒတ တပ်ပေါင်းစု တပ်ဖွဲ့နှင့်အတူ မြန်မာပြည်တောင်ပိုင်း ကေအန်ယူ နယ်မြေသို့ လိုက်ပါသွားခဲ့ကာ စာပေကလပ်တွင် ဒု-ဥက္ကဋ္ဌအဖြစ် တာဝန်ထမ်းဆောင်စဉ် စစ်အစိုးရက မာနယ်ပလော ဌာနချုပ်ကို ထိုးစစ်ဆင်ရာတွင် အဆိုပါဒေသ၌ ကျဆုံးခဲ့ခြင်းဖြစ်သည်။
Geen opmerkingen:
Een reactie posten