ကျော်ခ
တနင်္လာနေ့၊မေလ၁၀ရက်၂၀၁၀ခုနှစ်၁၈နာရီ၁၂မိနစ် .
ချင်းမိုင်(မဇ္ဈိမ)။ ။ပူပြင်းခြောက်သွေ့မှုကြောင့်ရေတွင်းရေကန်များခမ်းခြောက်လာသည့်အတွက် ပဲခူးတိုင်းအတွင်းကျေးရွာပေါင်း၆ဝကျော်တွင်သောက်သုံးရေရှားပါးမှုဆိုးရွားစွာရင်ဆိုင်နေကြရသည်။
ပဲခူးမြို့နယ်၊ဝေါ၊သနပ်ပင်၊ကဝ၊ဒိုက်ဦးစသည့်မြို့နယ်များအောက်ရှိကျေးရွာများတွင်ဧပြီလကုန်ကတည်းက ရေခမ်းခြောက်မှုများကြုံတွေ့လာသဖြင့်သောက်ရေအတွက်ပုဂ္ဂလိကအလှူရှင်များက အနီးပတ်ဝန်းကျင်ဒေသများမှဝယ်ယူလှူတန်းနေရသည်။
စီးပွားရေးလုပ်ငန်းရှင်များကသောက်ရေသန့်စက်ရုံများမှရေဝယ်၍လှူတန်းမှုကိုပဲခူးတိုင်း အမျိုးသားဒီမိုကရေစီအဖွဲ့ချုပ်လူငယ်များကရေပြတ်နေသောကျေးရွာများသို့မေလ၂ရက်နေ့မှစတင်၍ ရေဖြန့်ဖြူးပေးလျှက်ရှိသည်။
ထို့အပြင်ပဲခူးမြို့ပေါ်ရှိသောက်ရေကန်များ၊စက်ရေတွင်းများမှအလှူခံရရှိသောရေများကို ကျေးရွာများအရောက်ပို့ဆောင်ပေးနေရာတရက်လျှင်ကားအစီး၎ဝခန့်ဖြန့်ဝေနေရသည်ဟု ရေဖြန့်ဝေပေးနေသူများကပြောသည်။
“နေကအရမ်းပူတော့ရေတွင်း၊ရေကန်နဲ့ချောင်းတွေကခန်းပြီးပက်ကြားတွေပါအက်တယ်။”ဟု ရေဖြန့်ဖြူးရာတွင်ပါဝင်ဆောင်ရွက်နေသူကိုနေဝင်းကပြောသည်။
“ကျနော်တို့ဒီမြို့မှာရှိတဲ့အလှူရှင်တွေလှူနေတဲ့အင်အားနဲ့မလုံလောက်ပါဘူး။ရေလိုနေတဲ့ကျေးရွာတွေက များတယ်။အဲဒါကြောင့်အစိုးရအာဏာပိုင်တွေအကူအညီပေးဖို့လိုပါတယ်။သူတို့ကိုယ်တိုင်ထဲထဲဝင်ဝင် လုပ်ပေးမှဒီကိစ္စအဆင်ပြေမှာပါ ”ဟုသူကဆက်ပြောသည်။
သို့သော်လည်းလမ်းပမ်းဆက်သွယ်ရေးနှင့်ရေသယ်ကားအခက်အခဲကြောင့်ငွေကြေးစိုက်ထုတ်ပေးမည့် အလှူရှင်ရှိသော်လည်းကျေးရွာ၃၅ကျော်ကိုရေမဖြန့်နိုင်သေးကြောင်းသိရသည်။
ရေသန့်စက်ရုံများက၂ဝလီတာဆန့်ရေသန့်ဗူးတဗူးလျှင်၃ဝဝကျပ်မှ၂ဝဝကျပ်နှုန်းဖြင့်လျော့ပေါ့ ရောင်းချပေးလျှက်ရှိသည်။
”ပဲခူးတိုင်းထဲမှာဒီလောက်ဆိုးတဲ့အခြေအနေဟာဒါပထမဆုံးလို့ပြောလို့ရတယ်။ဒီရွာတွေကအရင်တွင်းရေ မိုးရေကန်တွေကနေအသုံးပြုနေတာ။အဲဒီသောက်သုံးရေကန်ကြီးတွေကနေအပူအရှိန်အရမ်းပျင်းတော့ ရေတွေခမ်းခြောက်ပြီး။သူတို့ဆီမှာကလည်းလက်ယက်တွင်းတို့တွင်းရေတို့ဆိုတာကမရှိဘူး။ ဘာကြောင့်လည်းဆိုတော့သူတို့ဒေသရေမြေသဘာဝကိုကတွင်းတူးလို့ရှိရင်ရေငံတွေထွက်တယ်။ အဲတော့ သောက်သုံးရေအတွက်ပြဿနာတွေတက်ကြတာပေါ့။”ပဲခူးမြို့မှလူမှုအဖွဲ့အစည်းတခုဖြစ်သော လမ်းပြကြယ်အဖွဲ့မှဦးအေးမြင့်ကပြောသည်။
ယခုနှစ်ပျှမ်းမျှအပူချိန်မြင့်တက်နေသောမြန်မာနိုင်ငံ၏နေရာအချို့တွင်ရေတွင်းရေကန်များရေခမ်းခြောက်မှု သဘာဝဘေးအန္တရာယ်ကိုရင်ဆိုင်နေကြရသည်။
ဧရာဝတီမြစ်ဝကျွန်းပေါ်ဒေသနာဂစ်မုန်တိုင်းတိုက်ခိုက်ခဲ့ရာဒေသများတွင်လည်း သောက်သုံးရေရှားပါးမှုများဖြစ်ပွားနေပြီးမော်လမြိုင်ကျွန်းနှင့်ဟိုင်းကြီးကျွန်းတို့တွင်အဆိုးဆုံးဖြစ်သည်။
Geen opmerkingen:
Een reactie posten