မြန်မာပြည် အချိန်

သတင်းသစ်များမတင်နိုင်တာကိုနားလည်ပေးကြပါ။ C-Box လည်း ပိတ်ထားပါတယ်။

woensdag 22 september 2010

ဟူးကောင်းမြေမှုတွင် ဦးဌေးမြင့်နာမည်ကို ဖျက်ခိုင်း

ဖနိဒါ
ကြာသပတေးနေ့၊ စက်တင်ဘာလ ၂၃ ရက် ၂၀၁၀ ခုနှစ် ၀၀ နာရီ ၀၀ မိနစ် .
ချင်းမိုင်(မဇ္စျိမ)။ ။ ဟူးကောင်းတောင်ကြား ခြံမြေများ အဓမ္မသိမ်းမှုတွင် ယုဇန ကုမ္ပဏီ ဥက္ကဋ္ဌကို ထည့်သွင်းစွဲဆိုထားခြင်းကို ဖျက်ပေးရန် တရားပြိုင်ဘက်မှ လျှောက်ထားခဲ့ကြောင်း အကျိုးဆောင်ရှေ့နေ ဦးရွှေလှက ပြောသည်။
မိုးညှင်းခရိုင် ဖားကန့်မြို့နယ် ဝါရာဇွပ်၊ အောင်ရာ၊ ရှရူဇွပ်၊ ဘန်ကောက်၊ နမ်ဆန် စသည့် ကျေးရွာများမှ တောင်သူ ၁၇ ဦးက ဘိုးဘွားပိုင် စိုက်ပျိုးမြေများ အဓမ္မသိမ်းယူမှုနှင့် ယုဇန ကုမ္ပဏီ ဥက္ကဋ္ဌ ဦးဌေးမြင့်ကို ထည့်သွင်းတရားစွဲခြင်းကို ပယ်ဖျက်ပေးရန် တရားပြိုင် ရှေ့နေများက ယခုလ ၂၀ ရက် ရုံးချိန်း၌ လျှောက်လဲခဲ့သည်။
“ကျနော်တို့က ယုဇန ကုမ္ပဏီ မူရင်းဥက္ကဋ္ဌ နာမည်နဲ့ အောက်ကနေပြီးတော့ တာဝန်ခံ ဒါရိုက်တာ ဖားကန့်မြို့နယ် ယုဇနကုမ္ပဏီ ရုံးခွဲဆိုပြီး ထည့်ထားတာ၊ အဲဒီလို လိပ်စာ နှစ်ခုထည့်ထားတာ ပယ်ပေးဖို့ ရုံးကို လျှောက်တယ်”ဟု ရှေ့နေ ဦးရွှေလှက ပြောသည်။
“သူတို့ဘက်က သူတို့ ဥက္ကဋ္ဌကို တရားစွဲမခံစေချင်လို့ နေမှာပေါ့၊ နှစ်ယောက်ထည့်ထားတဲ့အတွက် ကျန်တယောက် အမှုနဲ့ မဆိုင်ဘူးဆိုတဲ့သဘောပေါ့။ ကျနော်တို့ကလည်း မဖျက်ပေးပါဘူး။ ပြန်ပြီးတော့ ကန့်ကွက်မှာပါ၊ ကျနော်တို့က ကုမ္ပဏီကို အဓိကထားစွဲတာလေ” ဟု သူက ဆက်ပြောသည်။
ထို့ပြင် စစ်အစိုးရနှင့် နီးစပ်သူ ဦးဌေးမြင့်ပိုင် ယုဇနကုမ္ပဏီကို အဆိုပါ ကျေးရွာများမှ တောင်သူ ၂၀ ဦးက တရားမ နစ်နာမှုဖြင့် ထပ်မံ တရားစွဲခဲ့ရာ တရားရုံးက လာမည့် ၂၇ ရက်နေ့ တရားလိုများကို စစ်ဆေးကာ လက်ခံအမှုဖွင့်ပေးမည် ဖြစ်ကြောင်း သူက ဆက်ပြောသည်။
အဆိုပါ တောင်သူများ ရုံးချိန်းပြီးအပြန် မြစ်ကြီးနားမြို့မှ ၆ မိုင်အကွာ ရှဒေါင်ကျေးရွာ စစ်ဆေးရေးဂိတ်မှ စ သုံးလုံးအဖွဲ့က တောင်သူ ၃ ဦးကို ဓါတ်ပုံရိုက်ယူကာ အခန်း တခန်းစီထား၍ ၅ နာရီကြာ ခေါ်စစ်ကြောင်း အစစ်ခံခဲ့ရသူ ရွာသားတဦးက ပြောသည်။
“ကျနော်က လယ်လည်းမရှိဘူး။ ဒီခြံလုပ်ငန်းနဲ့ အသက်မွေးနေတာ၊ ကျနော့ခြံမြေ ပြန်ရချင်တယ်။ ကျနော်စိုက်ထားတဲ့ သီးနှံကြေးတွေရချင်တယ်”ဟု သူက ဆက်ပြောသည်။
ပြည်နယ်အေးချမ်းသာယာရေးနှင့် ဖွံ့ဖြိုးရေးကောင်စီ အတွင်းရေးမှူး ဦးအောင်မင်းက ယခုလဆန်းပိုင်းက တောင်သူအချို့ကို ခေါ်၍ ကြိမ်းမောင်းပြောဆိုကြောင်း၊ ယခင်လကုန်ပိုင်းကလည်း မြောက်ပိုင်းတိုင်းစစ်ဌာနချုပ် လက်အောက်ခံ တပ်ရင်း ၂၉၇ က တောင်သူများကို ယုဇန ကုမ္ပဏီသို့ ခေါ်၍ လက်မှတ်ထိုးရန် ခြိမ်းခြောက်ကြောင်းလည်း တောင်သူ တဦးထံမှ သိရသည်။
ယုဇန ကုမ္ပဏီက တောင်သူများပိုင် လယ်ယာမြေများ သိမ်းယူခဲ့ပြီး ၃ နှစ်အကြာ သြဂုတ်လ ၁၆ ရက်က တရားစွဲရန် ပြင်ဆင်ခဲ့သည်ကို ပြည်နယ် တရားသူကြီး ဦးတူးဂျာက သူ့အနေဖြင့် ပယက နှင့် ညှိနှိုင်းဖြေရှင်းပေးမည်၊ တလစောင့်ပါဟု ကမ်းလှမ်းခဲ့သဖြင့် တောင်သူများ စောင့်ဆိုင်းခဲ့ရသေးသည်။
၂ဝဝ၆ က ယုဇနကုမ္ပဏီက မိုးညှင်းခရိုင် ဖားကန့်မြို့နယ်နှင့် မြစ်ကြီးနားခရိုင် တနိုင်းမြို့နယ် ဟူးကောင်းတောင်ကြားတွင် ဘိုးစဉ်ဘောင်ဆက် လုပ်ကိုင်လာသည့် ဥယျာဉ်ခြံနှင့် လယ်ယာမြေ ဧက ၄ သိန်းခန့်ကို ပီလောပီနံနှင့် ကြံစိုက်ရန် သိမ်းခဲ့သည်။
ဦးဌေးမြင့်၏ အစ်ကိုဆိုသူ ဦးပုကြည်က ဦးဆောင်လုပ်ကိုင်ကာ တောင်သူများအား တဧက ၈ သောင်းနှုန်းဖြင့် အတင်း အဓမ္မပေးခဲ့သည်ကို တောင်သူအချို့က လက်မခံဘဲ တရားစွဲဆိုခြင်း ဖြစ်သည်။
မန္တလေး ဗဟိုတရားရုံးချုပ် ရှေ့နေ ဦးလှရွှေနှင့် ဦးမြင့်သွင်တို့က အမှုအကျိုးဆောင်ပေးနေပြီး အမျိုးသား ဒီမိုကရေစီအင်အားစု NDF ပါတီ ကိုယ်စားပြု ဖားကန့်မြို့နယ် ပြည်သူ့လွှတ်တော်မှ ဝင်ရောက်ယှဉ်ပြိုင်မည့် ဒေါ်ဘောက်ဂျာ လိုက်ပါကူညီနေသည်။
လာမည့် အောက်တိုဘာလ ၄ ရက်နေ့တွင် ရုံးချိန်းရှိသည်။



Geen opmerkingen: