ယမထာ / ၀၉ စက်တင်ဘာ ၂၀၁၀
လူအုပ်ထဲမှာ ကျနော်ရှိနေပါတယ်။ ကျနော့်တာဝန်က ဟောပြောပွဲလာ ပရိသတ်တယောက်အဖြစ် လူအုပ်ထဲဝင်နေ၊ သူတို့ဟောသမျှ ပြောသမျှကို အသံဖမ်းယူဖို့နဲ့ လိုအပ်ရင် သတင်းပို့ဖို့။
ခန်းမကျယ်တခုထဲမှာပါ။ ခန်းမက လူငါးရာလောက် ဆန့်နိုင်ပေမယ့် ခန်းမတ၀က်လောက်ပဲလူရှိပါတယ်။ မင်္ဂလာစင်မြင့်ကို ဟောပြောပွဲစင်မြင့်လုပ်ထားပြီး ပါတီအလံတွေ တန်းစီထောင်ထားပါတယ်။ ရဲရဲတောက်နေတဲ့ ဟောပြောပွဲ နဖူးစီးကတော့ ‘ရဲရဲတောက် ဒီမိုကရက်တစ်ပါတီရဲ့ ဒေါင်ဒေါင်မြည် ဟောပြောပွဲကြီး’ တဲ့ ဆောင်းဘောက်က ‘နဂါးနီ သီချင်း’ ကို တကြော့ပြီးတကြော့ဆိုလို့။
တော်တော်ရူးတဲ့လူတွေပဲ။ ကိုယ့်ပတ်ဝန်းကျင်လောကကြီးရဲ့ အခြေအနေမှန်ကို နှမ်းတစေ့လောက်မှ မသိတဲ့လူတွေ၊ လူမိုက်တွေ။ ဆောင်းဘောက်က အော်သံကြားရပါတယ်။
“ပါတီဥက္ကဋ္ဌကြီး မိန့်ခွန်းပြောပါတော့မယ်” အသံတွေတိတ်သွားပါတယ်။ ကျနော့်အသံဖမ်းစက်လေးကို ဖွင့်ထားလိုက်ပါပြီ။
“ကျေးဇူးတင်ပါတယ်…ပရိသတ်ကြီးခင်ဗျား…ဒီကနေ့…ဒီနေရာမှာ....”အရေးမပါတာတွေကို တော်တော်ကြာကြာ လျှောက်ပြောနေပါသေးတယ်။ ဒီလိုပြောရင်း၊ ပြောရင်းနဲ့…ဟော စငြိပြီ။
“လွှတ်တော်ထဲရောက်တာနဲ့ ၂၀၀၈ ဖွဲ့စည်းပုံကို ပြင်ဆင်ဖို့ စလုပ်ရမယ်.....”
ငြိပြီပေါ့။ ပါတီမှတ်ပုံတင် ဥပဒေပုဒ်မ (၆)နဲ့ ငြိသွားပြီ။ ကိုယ်လက်မှတ်ရေးထိုးထားတဲ့ ကတိဝန်ခံချက်ကို ပြောင်ပြောင်တင်းတင်း ချိုးဖောက်လိုက်တာပဲ။ ဖွဲ့စည်းပုံအခြေခံဥပဒေကို ထိန်းသိမ်းစောင့်ရှောက်ပါမယ်ဆို။
“မတရားတဲ့ဥပဒေကို ပြင်ပစ်ရမယ်......”
ဒါလည်း ငြိတာပဲ။ တည်ဆဲဥပဒေကို မလေးစားတာ။
“ပြုပြင်စရာတွေ အများကြီးပဲ......”
ငြိပြန်ပြီ နိုင်ငံတော်ကို အကြည်ညိုပျက်အောင်ပြောတာလေ။
“ကျနော်တို့ပါတီကသာ လူထုအတွက် တကယ်လုပ်ပေးမှာ....”
ငကြွား…စကားပြောကလည်း မဆင်ခြင်ဘူး။ ဒါ…တခြားပါတီတွေကို သိက္ခာချတဲ့စကား၊ ပြဿနာတက်အောင်ရန်စတာ၊ တားမြစ်ချက်တွေကို ဖောက်ဖျက်တာပဲ။
ဥက္ကဋ္ဌကြီးရဲ့ မိန့်ခွန်အဆုံးမှာ ပရိသတ်က လက်ခုပ်တီးတော့ ကျနော်လည်း ပါတာပေါ့။
“အခု ကိုယ်စားလှယ်လောင်းက ဟောပြောပါတော့မယ်”
လက်ခုပ်တီးရပြန်ရော။
“ပထမဆုံးလွှတ်တော်ထဲကိုခြေချမိတာနဲ့နိုင်ငံရေးအကျဉ်းသားတွေကိုလွှတ်ပေးဖိုအထွေထွေလွတ် ငြိမ်းချမ်းသာခွင့် ကြေညာဖို့ အဆိုတင်မယ်...”
ဒါ…လုံခြုံရေးနဲ့ ဥပဒေစိုးမိုးရေးကို ထိပါးတဲ့စကားပဲ။
“တနိုင်ငံလုံး လာဘ်ပေးလာဘ်ယူလုပ်နေကြတာတွေကို တိုက်ဖျက်ပစ်ရမယ်...”
ကြည့်စမ်း၊ အစိုးရရဲ့ ဂုဏ်သိက္ခာကိုတမင်ချတာ။
“လူထုချစ်တဲ့ တပ်မတော်ဖြစ်စေရမယ် ....”
ဟင်း…တပ်မတော်ပြိုကွဲအောင် လှုံ့ဆော်တဲ့စကားအစစ်။
“၀န်ထမ်းတွေရဲ့ ဘ၀သာယာဝပြောအောင် စီစဉ်ပေးရမယ်... ”
အောင်မာ…နိုင်ငံ့ဝန်ထမ်းတွေ အစိုးရကို ဆန့်ကျင်အောင် သွေးထိုးလိုက်တာပေါ့လေ။
“လူထုကို ဆင်ရဲတွင်းကနေ ကယ်ထုတ်နိုင်မယ့် အလုပ်တွေပဲ...”
ဟော…လူထုဆန္ဒပြပွဲတွေဖြစ်အောင် မြှောက်ပေးနေပြီ။
“ဘာသာတိုင်းကို လွတ်လွတ်လပ်လပ်ဆောင်ရွက်ခွင့်ပေးဖို့....”
ကြည့်…ဘာသာရေးကို နိုင်ငံရေးအတွက် အလွဲသုံးစားလုပ်ချလိုက်တာပေါ့။ ခန်းမအပြင်ဘက်ကို ကျနော်လစ်ထွက်လာပြီး လက်ကိုင်ဖုန်းကိုဖွင့်လိုက်ပါတယ်။
“ဟဲလို၊ ကြွက်စုတ်ပါ၊ ဟုတ်ကဲ့၊ အားလုံးငြိတယ် ဆရာရေ၊ အနှစ်သုံးဆယ် လေးဆယ်စာလောက်ကိုငြိတာ၊ ဟုတ်ကဲ့၊ ဟုတ်ကဲ့၊ အဲ့ဒါပဲနော်…”
“ရဲရဲတောက်ပါတီဌာနချုပ်ရုံး” ကို ချိပ်ပိတ်ဖို့ တဖွဲ့သွားနေပါပြီ။ ပါတီဥက္ကဋ္ဌနဲ့ ကိုယ်စားလှယ်လောင်းကို ထိန်းသိမ်းစောင့်ရှောက်ဖို့လည်း တဖွဲ့လာနေပါပြီ။
ခန်းမထဲကို ကျနော်ပြန်ရောက်တော့ ဟောပြောပွဲက အရှိန်ကောင်းတုန်းပါပဲ။ ကိုယ်စားလှယ်လောင်းက ညာလက်ကိုမြှောက်ပြီး…
“ဥပဒေအထက်မှာ ဘယ်သူမှမရှိစေရဘူး..........”
Geen opmerkingen:
Een reactie posten