မြတ်ခိုင်ဦး / ၁၈ အောက်တိုဘာ ၂၀၁၀
ထိုင်းနိုင်ငံအတွင်း အလုပ်လုပ်ခွင့် ဘတ်လက်မှတ် ကိုင်ဆောင်ထားသော မြန်မာ၊ ကမ္ဘောဒီးယားနှင့် လာအို ရွှေ့ပြောင်းအလုပ်သမားများအား မိမိတို့ကိုင်ဆောင်ထားသော အလုပ်လုပ်ခွင့် ဘတ်လက်မှတ် နောက်ထပ်တနှစ် သက်တမ်းဆက်ရန် ထိုင်းနိုင်ငံ အလုပ်သမားဝန်ကြီးဌာန၊ အလုပ်အကိုင်ခန့်ထားရေးဌာနမှ အသိပေးလိုက်သည်။
လာမည့်ဖေဖေါ်ဝါရီလ (၂၀)နှင့် (၂၈) ရက်နေ့တို့တွင် သက်တမ်းကုန်ဆုံးမည့် နိုင်ငံသားစိစစ်မှု လုပ်ထားဆဲ ရွှေ့ပြောင်းအလုပ်သမားများအား ထိုင်းအစိုးရက သက်တမ်းတိုးပေးမည် ဖြစ်သဖြင့် ပေးအပ်ထားသော ကာလအတွင်း သက်တမ်းတိုးရမည်ဖြစ်ကာ ဘတ်လက်မှတ်သက်တမ်း ပြန်မဆက်သောသူများအား နိုင်ငံအတွင်း နေထိုင်ခွင့် ပြုမည်မဟုတ်ဟု အလုပ်အကိုင်ခန့်ထားရေးဌာန ညွှန်ကြားရေးမှူး ခွန် ဂျီယာဆတ် ဆူခွန်သာက အောက်တိုဘာ (၁၄) ရက်တွင် သတင်းထောက်များအား ပြောကြားခဲ့သည်။
လာမည့် ၂၀၁၁ ခုနှစ်၊ ဖေဖေါ်ဝါရီ (၂၀)ရက်နေ့တွင် သက်တမ်းကုန်ဆုံးမည့် ရွှေ့ပြောင်းအလုပ်သမား (၃၉,၂၇၂) ဦးသည် ၂၀၁၁ခုနှစ် ဖေဖေါ်ဝါရီ (၂၀) ရက်ထက် နောက်မကျဘဲ သက်တမ်းတိုးရမည်ဖြစ်သည်။ ၂၀၁၁ ခုနှစ် ဖေဖော်ဝါရီ (၂၈)ရက်တွင် သက်တမ်းကုန်ဆုံးမည့် အလုပ်သမား (၈၉၂,၉၈၃)ဦးသည် (၂၀၁၁)ခုနှစ်ဖေဖေါ်ဝါရီ(၂၈)ရက်ထက်နောက်မကျဘဲသက်တမ်းတိုးရမည်ဖြစ်သည်။ အုပ်စုနှစ်မျိုးစလုံးသည် နောက်ထပ်တနှစ်စီ နေထိုင်အလုပ်လုပ်ခွင့်ရမည် ဖြစ်သည်။
ထိုင်း-မြန်မာ နှစ်နိုင်ငံ သဘောတူညီချက်အရ မြန်မာရွှေ့ပြောင်း အလုပ်သမားများကို နိုင်ငံသားစိစစ်ရေးပြုမှသာ ထိုင်းနိုင်ငံအတွင်း ဝင်ရောက်နေထိုင် အလုပ်လုပ်ကိုင်ခွင့် ပြုမည့်အစီအစဉ်အရ အလုပ်သမားများသည် ယမန်နှစ်ကတည်းက ယာယီပတ်စပို့စ် လျှောက်ထားခဲ့ကြသည်။
ထိုသို့လျှောက်ထားသူများအနက်မှ မြန်မာရွှေ့ပြောင်း အလုပ်သမား (၁)သိန်း (၆) သောင်းကျော်သာ ယာယီနိုင်ငံကူးလက်မှတ် ပြုလုပ်ရသေးပြီး ကျန်ရှိသော အလုပ်သမားများမှာ လျှောက်ထားဆဲဖြစ်သည်။
ထိုင်းနိုင်ငံ အလုပ်သမားဝန်ကြီးဌာန၊ အလုပ်အကိုင်ခန့်ထားရေးဌာန၊ နိုင်ငံခြားသား အလုပ်သမား အုပ်ချုပ်ရေးရုံးမှ ဇူလိုင်(၂၅)ရက် ထုတ်ပြန်သော စာရင်းဇယားအရ မြန်မာရွှေ့ပြောင်း အလုပ်သမား (၈၃၃,၀၁၃) ဦးရှိသည့်အတွက် အလုပ်သမားပေါင်း (၆၇၀,၀၀၀) ကျော်သည် ယခုကိုင်ဆောင်ထားသော ဘတ်လက်မှတ်ကို သက်တမ်း ဆက်ရမည်ဖြစ်သည်။
Geen opmerkingen:
Een reactie posten