ဧရာဝတီ Friday, 12 November 2010 16:30 သတင်း
.စစ်အစိုးရ ကျင်းပသည့် ၂၀၁၀ ရွေးကောက်ပွဲသည် မဲမသမာမှုများ ပြည့်နှက် နေသောကြောင့် တရားမျှတပြီး လွတ်လပ်သည့် ရွေးကောက်ပွဲ မဟုတ်ကြောင်း တသီးပုဂ္ဂလ လွှတ်တော် ကိုယ်စားလှယ် ၅ ဦးနှင့် နိုင်ငံရေး ပါတီ ၃ ခုမှ လွှတ်တော် ကိုယ်စား လှယ်လောင်း ၃ ဦးတို့က သတင်းစာရှင်းလင်းပွဲ ကျင်းပ၍ ပြောဆိုလိုက်သည်။
ရန်ကုန်မြို့ မရမ်းကုန်းမြို့နယ် ခုနစ်မိုင်ခွဲရှိ Cafe47စားသောက်ဆိုင်တွင် နိုဝင်ဘာလ ၁၁ ရက်နေ့က လွှတ်တော် ကိုယ်စားလှယ်လောင်း ၈ ဦးတို့ ပူးပေါင်း၍ သတင်းစာရှင်းလင်းပွဲ ပြုလုပ်ခဲ့ခြင်း ဖြစ်သည်။
၂၀၁၀ ရွေးကောက်ပွဲကို ၀င်ခဲ့ခြင်းမှာ စစ်အစိုးရအနေဖြင့် အပြောင်းအလဲ ပြုလုပ်ရန် ဆန္ဒရှိသည်ဟု ယုံကြည်သောကြောင့်ဖြစ်ကြောင်း၊ သို့သော်လည်း ရွေးကောက်ပွဲသည် အများ မျှော်လင့်ထားသကဲ့သို့ ဖြစ်မလာဘဲ အင်အားကြီးသူက အင်အားသုံး ဖိနှိပ် အနိုင်ယူခြင်းကို ခံလိုက်ရကြောင်း၊ မိမိတို့ လက်ဝယ်တွင် ရွေးကောက်ပွဲ တရားမျှတမှု မရှိကြောင်းကို သက်သေအထောက်အထားများ ပြသနိုင်ကြောင်း အဆိုပါ လွှတ်တော် ကိုယ်စားလှယ်လောင်းများ အားလုံးက ပြောဆိုခဲ့သည်။
သတင်းစာ ရှင်းလင်းပွဲ ပြုလုပ်၍ ရွေးကောက်ပွဲ တရားမျှတမှု မရှိကြောင်း ထုတ်ဖော် ပြောဆိုသူများမှာ တသီး ပုဂ္ဂလ ပြည်သူ့လွှတ်တော် ကိုယ်စားလှယ်လောင်း ဒေါ်ခင်သိန်းဝင်း၊ တသီး ပုဂ္ဂလ တိုင်းဒေသကြီး လွှတ်တော် ကိုယ်စားလှယ်လောင်း ဦးဝင်းကိုကိုဝင်း၊ တသီးပုဂ္ဂလ တိုင်းဒေသကြီး လွှတ်တော် ကိုယ်စားလှယ်လောင်း ဒေါက်တာ စိုးလွင်၊ တသီပုဂ္ဂလ ပြည်သူ့လွှတ်တော် ကိုယ်စားလှယ်လောင်း ဦးဇော်မင်းသိန်း၊ ၈၈မျိုးဆက်ကျောင်းသားလူငယ်များ(ပြည်ထောင်စုမြန်မာနိုင်ငံ)ပါတီမှ ပြည်သူ့လွှတ်တော် ကိုယ်စားလှယ်လောင်း ဒေါ်တင်တင်ရီ၊ မတူကွဲပြားခြင်းနှင့် ငြိမ်းချမ်းရေး ပါတီမှ ပြည်သူ့လွှတ်တော် ကိုယ်စားလှယ်လောင်းဦးညိုမင်းလွင်၊ဒီမိုကရက်တစ်ပါတီ(မြန်မာ)မှပြည်သူ့လွှတ်တော် ကိုယ်စားလှယ်လောင်း ဦးစိုးကြည်တို့ ဖြစ်သည်။
သတင်းစာရှင်းလင်းပွဲသို့ လေးမျက်နှာမြို့နယ်မှ ဦးဇော်မင်းသိန်းနှင့် ဒေါက်တာစိုးလွင်တို့ မတက်ရောက် နိုင်သော်လည်း ကိုယ်စားအဖြစ် ၎င်းတို့၏ ကိုယ်စားလှယ် ဦးဂုဏ်ရည်စိုးက တက်ရောက် ခဲ့သည်ဟု သိရသည်။
ရွေးကောက်ပွဲတွင် ပြည်သူများကို မဲပေးကြရန် လှုံ့ဆော်ခဲ့ပြီး ပြည်သူများက အမှန်တကယ် မဲ ပေးခဲ့ကြသော်လည်း ကြံ့ဖွံ့ပါတီသည် မဲများကို မသမာသော နည်းလမ်းများဖြင့် ရယူခဲ့သည်ကို အထင်အရှားတွေ့မြင်ခဲ့ရကြောင်းဒီမိုကရက်တစ် ပါတီ (မြန်မာ) မှ ဦးစိုးကြည်က ပြောသည်။
“ပြည်သူတွေကိုယ်စား မားမားမတ်မတ် ရပ်တည်ပေးပါမယ်လို့ ကတိ ၀န်ခံချက်တွေနဲ့ ရွေးကောက်ပွဲ ၀င်ခဲ့ပေမယ့် ကျနော်တို့ ကိုယ်ကို ကျနော်တို့ မကာကွယ်လိုက်နိုင်တဲ့ အတွက် မဲပေးခဲ့တဲ့ ပြည်သူတွေကို ၀န်ချ တောင်းပန်ပါတယ်” ဟု ဦးစိုးကြည်က ပြောသည်။
မတူကွဲပြားခြင်းနှင့် ငြိမ်းချမ်းရေးပါတီမှ ဦးညိုမင်းလွင်က ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) သည် မတရားနည်းလမ်း ဖြင့် ရရှိသော ကြိုတင်မဲ ထောင်ပေါင်းများစွာဖြင့် ရွေးကောက်ပွဲကို အနိုင်ယူခဲ့သည်ဟု ဆိုသည်။
“ရွေးကောက်ပွဲမှာ စစ်သားတွေကို ခြင်္သေ့ကို အမှန်ခြစ် ထောက်ခံမဲပေးဖို့ အမိန့်တွေ ထွက်ပေါ်ခဲ့တယ်။ ကျနော်က မင်္ဂလာဒုံမှာ ပြိုင်တော့ စစ်တပ်တွေရဲ့ ကြိုတင်မဲ အားလုံးက ခြင်္သေ့ဘေးမှာ အမှန်ခြစ်ထားတဲ့ မဲတွေ ဖြစ်နေတယ်” ဟု ဦးညိုမင်းလွင်က ရှင်းပြသည်။
တခြား လွှတ်တော် ကိုယ်စားလှယ်လောင်း များကလည်း ကြံ့ဖွံ့ပါတီက ရွေးကောက်ပွဲတွင် မသမာမှုများ ပြုလုပ်ခဲ့သည်ကို သက်သေအထောက်များနှင့်တကွ ရှင်းပြခဲ့ကြသည်။
ရွေးကောက်ပွဲသည် တရားမျှတမှု မရှိသော်လည်း လက်ရှိတွင် ရွေးကောက်ပွဲရလဒ်ကို အသိအမှတ် ပြုရမည်ဖြစ်ပြီး နောက်တက်လာမည့် အစိုးရနှင့် အပြန် အလှန် ယုံကြည်မှုတည် ဆောက်ကာ နိုင်ငံဖွံ့ဖြိုးရေး ဆောင်ရွက်သင့်သည်ဆိုသော အမြင်များကိုလည်း အဆိုပါ သတင်းစာ ရှင်းလင်းပွဲတွင် ထည့်သွင်းဆွေးနွေးခဲ့သည် ဟုလည်း သိရသည်။
နိုဝင်ဘာလ ၇ ရက်နေ့တွင် ကျင်းပခဲ့သော ရွေးကောက်ပွဲ၌ လွှတ်တော် ကိုယ်စားလှယ်လောင်း ၃၀၇၁ ဦး ပါဝင်ယှဉ်ပြိုင်ခဲ့ရာ ကြံ့ဖွံ့ပါတီက လွှတ်တော်အမတ် နေရာ အများစု အနိုင်ရနေကြောင်း စုံစမ်းသိရှိရသည်။
Geen opmerkingen:
Een reactie posten