donderdag 13 augustus 2009
အဆိုတော်ရုပ်ရှင်သရုပ်ဆောင် ဇော်ဝမ်းကွယ်လွန်
မျိုးချစ်သူ / ၁၃ သြဂုတ် ၂၀၀၉
သင်္ကြန်မိုးရုပ်ရှင်ဇာတ်ကားဖြင့် နာမည်ကြီးသော သင်္ကြန်မင်းသားကြီး ဇော်ဝမ်း အသက် (၆၄) နှစ်သည် ယမန်နေ့ သြဂုတ် (၁၂) ရက် ည (၈) နာရီခွဲခန့်အချိန်က အင်းစိန်မြို့နယ် သီရိစန္ဒာဆေးခန်းတွင် ကွယ်လွန်သွားကြောင်း ၎င်း၏ မိသားစုဝင်တဦးက ပြောသည်။
“အသည်းရောင်တာ ကြာပါပြီ။ သူ့မှာက အသည်းရောဂါရှိတာပါ။ အရင်တုန်းက အရက်တွေ အလွန်အကျွံသောက်ခဲ့တာကိုး။ အဲဒီဒဏ်တွေပေါ့လေ” ဟု ဇော်ဝမ်းနှင့် အနုပညာလုပ်ဖော်ကိုင်ဖက် တဦးက ပြောသည်။
“ဇော်ဝမ်းဟာ စေလိုရာစေ ရုပ်ရှင်ဇာတ်ကားထဲက ကျောက်ခဲသီချင်း ကို သီဆိုခဲ့တယ်။ အဲဒီနောက်ပိုင်း သူအောင်မြင်ခဲ့တယ်။ ပြောရရင် ကျော်ဟိန်းထက် အောင်မြင်ခဲ့တဲ့ မင်းသားအဖြစ်နဲ့ ပရိသတ်က သိခဲ့တာပေါ့” ဟု အသက် (၇၀) ခန့်ရှိ ရန်ကုန်အခြေစိုက် သတင်းဂျာနယ်တခုမှ သတင်းထောက်ဟောင်းကြီးတဦးက ပြောသည်။
ဇော်ဝမ်းသည် စေလိုရာစေ ရုပ်ရှင်ဇာတ်ကားမှ ကျောက်ခဲသီချင်းဖြင့် အောင်မြင်လာခဲ့ရုံမက လူ့မနော၊ နေထွက်သောည၊ ရွှေသမက် ငွေသမက်၊ တို့နှစ်ယောက်နှင့်မိငြိမ်းချမ်း၊ ပလက်ဖောင်းမင်းသား၊ ပုစ္ဆာဆန်သောမိန်းကလေးနှင့် ဘယ်သူပြိုင်လို့ လှပါတော့နိုင် ဇာတ်ကားများဖြင့် ပရိသတ် စွဲလမ်းနှစ်သက်သော သရုပ်ဆောင်ကောင်းတဦး ဖြစ်လာခဲ့သည်။
ယခု သမ္မတရုပ်ရှင်ရုံတွင် ရုံတင်ပြသနေသော မင်းလူ၏၀တ္ထုဖြစ်သည့် အချစ်ဟုအဓိပ္ပာယ်သက်ရောက်ခြင်းမရှိစေရ ရုပ်ရှင် ဇာတ်ကားတွင် အကယ်ဒမီကျော်သူ၊ ကွယ်လွန်သူ အကယ်ဒမီထွန်းထွန်းနိုင်တို့နှင့်အတူ သရုပ်ဆောင်ထားသည်ဟု ရန်ကုန်မြို့ခံတဦးက ပြောသည်။
“သင်္ကြန်မိုးရုပ်ရှင်ဇာတ်ကားမှာ ဇာတ်ဝင်သီချင်းတွေနဲ့ ထိန်းထားခဲ့တဲ့အတွက် အဲဒီဇာတ်ကားဟာ ဇော်ဝမ်းကို ပိုပြီးအရောင် ထွက်စေခဲ့တဲ့ ဇာတ်ကားတကားဖြစ်တယ်လို့ ကျနော်မြင်တယ်” ဟု သရုပ်ဆောင်ညီဂျော်က ပြောသည်။
အကယ်ဒမီဇင်ဝိုင်းကလည်း “သူဟာ စိတ်ကောင်းရှိတယ်။ လူငယ်ဆန်ဆန် ပျော်အောင်နေတတ်တယ်။ ကလေး၊ လူကြီးမရွေး ပေါင်းသင်းတတ်တယ်။ ဘာပဲဖြစ်ဖြစ် သူ့ရဲ့အနုပညာဟာ သူသေပေမယ့် ဘယ်တော့မှ မသေပါဘူး” ဟု ပြောသည်။
သရုပ်ဆောင်အကယ်ဒမီ မျိုးသန္တာထွန်းက “ကျမကတော့ သူ့ရဲ့ ရှာပုံတော်မင်းသားကြီးသီချင်းကို အကြိုက်ဆုံးပဲ။ လူတွေကတော့ အားလုံးသေရမှာပါပဲ။ စောတာနဲ့ နောက်ကျတာပဲ ကွာတာပါ။ သူ့အနုပညာအတွက်တော့ နှမြောမိပါတယ်” ဟု ဇော်ဝမ်းအတွက် ၀မ်းနည်းစကားဆိုသည်။
ဇော်ဝမ်းအား ကြိုက်နှစ်သက်သူ ပရိသတ်များကမူ သင်္ကြန်ရောက်တိုင်း သူ့ကို သတိရကြဦးမည်ဖြစ်သည်ဟု ပြောသည်။
ဇော်ဝမ်းသည် ရှုမ၀ ဦးကျော် ရုပ်ရှင်သင်တန်းမှ အစ်ကိုဖြစ်သူ မောင်တင်ဦးနှင့်အတူ ပေါ်လာသည့် အနုပညာရှင်တဦး ဖြစ်ကြောင်း ရုပ်ရှင်လောကအသိုင်းအ၀ိုင်းတွင် လူသိများသည်။
ဇော်ဝမ်း၏ရုပ်အလောင်းကို သြဂုတ် ( ၁၆) ရက်တွင် ရေဝေးသုသာန်၌ မီးသဂြုင်္ိဟ်မည်ဖြစ်ကြောင်း နာရေးကူညီမှုအသင်း၏ ၀န်ထမ်းတဦးက ပြောသည်။
Labels:
ခေတ်ပြိုင် မှ
Abonneren op:
Reacties posten (Atom)
Geen opmerkingen:
Een reactie posten