ကိုဇာဂနာနှင့် ကိုဇော်သက်ထွေး အယူခံ အပယ်ခံရ

ကိုဇာဂနာနှင့် ကိုဇော်သက်ထွေး (ဓာတ်ပုံ - ဧရာဝတီ)

Friday, 21 August 2009 15:38 ကိုထွေး
ထင်ရှားသည့် လူရွှင်တော် ကိုဇာဂနာနှင့် အားကစားဂျာနယ် အယ်ဒီတာ ကိုဇော်သက်ထွေးတို့၏ ဒုတိယကြိမ် တင်သည့် အယူခံကို ဗဟိုတရား ရုံးချုပ်က ယမန်နေ့က ပယ်ချလိုက်ကြောင်း ၎င်းတို့၏ ရှေ့နေနှင့် မိသားစုဝင် များက ပြောသည်။

ကိုဇာဂနာ၏ ရှေ့နေဖြစ်သူ ဒေါ်ခင်ဌေးကြွယ်က “အင်္ဂါနေ့က ဗဟို တရားရုံးက ပလပ်လိုက်တာပါ၊ သူ့မိသားစုနဲ့ ပြန်အဆက်သွယ်လုပ်ပြီး နောက် အယူခံ ထပ်ဝင် မ၀င် မေးရဦးမယ်” ဟု ဧရာဝတီ သို့ ပြောသည်။

ယခု အယူခံသည် ကိုဇာဂနာနှင့် ကိုဇော်သက်ထွေး တို့ အမှုတွဲအတွက် ဒုတိယ အကြိမ် ဖြစ်ပြီး ယင်း အမှုများကို ရှေ့နေ ဒေါ်ခင်ဌေးကြွယ်နှင့် ဦးဇော်လင်းတို့က တာဝန်ယူ ဆောင်ရွက် ပေးလျက် ရှိ်ကြသည်။

ပထမအကြိမ် အယူခံတွင် ကိုဇာဂနာကို ထောင်ဒဏ် ၂၄ နှစ်နှင့် ကိုဇော်သက်ထွေးကိုမူ ထောင်ဒဏ် ၈ နှစ် လျှော့ပေးခဲ့သကဲ့သို့ ၎င်းတို့နှင့် အမှုတွဲဖြစ်သော ကိုသန့်ဇင်အောင်ကို ၈ နှစ်၊ ကိုတင်မောင်အေး ၁၅ နှစ် လျှော့ပေး လိုက်ကြောင်းလည်း သိရသည်။

ကိုဇာဂနာ၏ ခယ်မ မငြိမ်းက“ အထူးအယူခံဆိုတာ နောက်တခုရှိတယ်၊ ၆ လအတွင်း တင်ရမယ်၊ ကျမ အစ်ကိုဆန္ဒကို မေးရမယ်” ဟု ပြောသည်။

မြစ်ကြီးနားအကျဉ်းထောင်တွင် ကျခံနေရသော ကိုဇာဂနာကို ၎င်းတို့သည် ဇွန်လ၂၉ တွင် ထောင်ဝင်စာ သွားရောက် တွေ့ဆုံခဲ့ကြောင်း၊ ထိုစဉ်က သွေးတိုးရောဂါအတွက် ဆေးများ ၀ယ်ပေးခဲ့ကြောင်း၊ လာမည့် စက်တင်ဘာ လဆန်းပိုင်းတွင် ထပ်မံသွားရောက်မည် ဖြစ်ကြောင်းလည်း ၎င်းက ဆက်လက် ပြောသည်။

ကိုဇော်သက်ထွေး၏ ဇနီးဖြစ်သူ မခိုင်ချိုဇော်ဝင်းတင်က “အခုက ဟိုက်ကုတ်ကို အယူခံဝင်တာ အဲဒီအမှုတွဲထဲက ကိုခင်မောင်အေးကိုတော့ ၃နှစ် လျှော့ပေးတယ်၊ ကိုဇော်သက်နဲ့ ဘဘသူရတို့ကိုတော့ အရင်အတိုင်းပဲ၊ နောက် ဆုံး အထူးအယူခံပဲ ကျန်တော့တယ်၊ ကိုယ့်ဘက်ကတော့ ဆက်လုပ်ရမှာပဲ၊ အဆုံးစွန်ထိတော့ လုပ်ရမှာပဲ” ဟု ပြောသည်။

အဆိုပါ ကိုဇာဂနာနှင့် ကိုဇော်သက်ထွေးတို့သည် ဆိုင်ကလုန်း လေဘေး ကူညီကယ်ဆယ်ရေးလုပ်ငန်းများကို အတူ လုပ်ကိုင်ခဲ့ကြသူများဖြစ်ပြီး ၎င်းတို့ကို ပုဒ် ၅၀၅(ခ)၊ ၁၇/၁စသည့် ပုဒ်မများ အပါအ၀င် ပုဒ်မ ၇ ခုဖြင့် အာဏာပိုင်များက စွဲဆို ထားခဲ့သည်။

၂၀၀၈ နိုဝင်ဘာတွင် ကိုဇာဂနာကို ဗီဒီယို အက် အပါအ၀င် ပုဒ်မ ၅၀၅(ခ) ၊ ၁၇/၂ အရ ၊ ၅၀၅(ခ) နှင့် ၂၉၅(က) တို့ဖြင့် ထောင်ဒဏ် စုစုပေါင်း ၅၉ နှစ် ကျခံရန် အင်းစိန်ထောင် အထူးတရားရုံးက ချမှတ်ခဲ့သည်။

ကိုဇာဂနာနှင့် အမှုတွဲ ကိုဇော်သက်ထွေး ကိုလည်း ပုဒ်မ ၅၀၅(ခ)နှင့် ၂၉၅(က) တို့ဖြင့် ထောင်ဒဏ် ၁၉ နှစ် ချမှတ်ခဲ့သည်။ ကိုဇာဂနာ၊ ကိုဇော်သက်ထွေးတို့နှင့် အမှုတွဲဖြစ်သော ကိုတင်မောင်အေးကိုလည်း နိုဝင်ဘာ ၂၁ ရက်နေ့က ထောင်ဒဏ် ၂၉ နှစ် ချမှတ်ထားသည်။