မြန်မာပြည် အချိန်

သတင်းသစ်များမတင်နိုင်တာကိုနားလည်ပေးကြပါ။ C-Box လည်း ပိတ်ထားပါတယ်။

maandag 3 augustus 2009

တရုတ်-မြန်မာ နယ်စပ်ကုန်သွယ်ရေးစခန်းသစ် ကန်ပိုက်တီတွင် ဖွင့်လှစ်

NEJ / ၃ သြဂုတ် ၂၀၀၉


သြဂုတ် (၁) ရက်နေ့က ကချင်ပြည်နယ်၊ ဆဒုံးမြို့နယ်၊ ကန်ပိုက်တီးကျေးရွာတွင် တရုတ်-မြန်မာနယ်စပ် ကုန်သွယ်ရေးစခန်းကို တရားဝင်ဖွင့်လှစ်လိုက်ပြီး ဌာနဆိုင်ရာ ဝန်ထမ်းများအခြေချကာ စတင်တာဝန်ထမ်းဆောင်နေသည်။

ကချင်ပြည်နယ် လူဝင်မှုကြီးကြပ်ရေးဦးစီးဌာန၊ သစ်တောဌာန၊ နယ်စပ်ကုန်သွယ်ရေးဦးစီးဌာန၊ ရဲတပ်ဖွဲ့ စသည့် ဦးစီးအရာရှိများနှင့်အတူ တာဝန်ထမ်းဆောင်မည့် ဝန်ထမ်းများသည် သြဂုတ် (၁) ရက်နေ့ မနက်အစောပိုင်းက ကန်ပိုက်တီးသို့ သွားရောက်ဖွင့်လှစ်ခဲ့ခြင်းဖြစ်သည်။

ဌာနဆိုင်ရာဝန်ထမ်းများနှင့်နီးစပ်သူ မြစ်ကြီးနားမြို့ခံတဦးက “ပြီးခဲ့တဲ့ သင်္ကြန်မတိုင်မီကတည်းက အဆောက်အဦတွေက ပြီးနေပြီ။ နယ်စပ်မျဉ်းပေါ်မှာ တောင်ကိုဖောက်ထားတဲ့ ဥမင်ရှိတယ်။ အဲဒါကို အုတ်တွေဘာတွေနဲ့ တရုတ်က အခိုင်အမာကို ဆောက်ထားပေးတာ။ ကားတွေက ဥမင်လိုဏ်ခေါင်းထဲကနေ ဖြတ်သွားရတာ။ အဲဒီဥမင်နဲ့ အနည်းဆုံး ကိုက် (၄ဝဝ)၊ (၅ဝဝ) အကွာလောက်မှာ မြန်မာဘက်က စစ်ဆေးရေးဂိတ်တွေရှိမယ်။ တရုတ်ဘက်ကတော့ အရင် ဟိုချောင်ဂိတ်နေရာမှာပဲ။ နယ်စပ်ကနေ ကီလို (၂ဝ) လောက် ဝေးသေးတယ်” ဟု ပြောသည်။

မိုင် (၆ဝ) နီးပါး ရှည်လျားသည့် ကန်ပိုက်တီး-ဝိုင်းမော်လမ်းကို နယ်စပ်ကုန်သွယ်ရေးလမ်းကြောင်းအဖြစ် အသုံးပြုရန် တရုတ်ဘက်မှ ကုမ္ပဏီတခုက ၂ဝဝ၆ ခုနှစ်တွင် ပြုပြင်ဖောက်လုပ်ခဲ့ရာ လမ်းကောင်းမွန်နေသော်လည်း ကုန်သွယ်ရေးအတွက် အရေးမပါလှသောကြောင့် အသွားအလာနည်းပါးကြောင်း အဆိုပါ မြစ်ကြီးနားမြို့ခံက ပြောသည်။

၎င်းက “ဒီကနေ့အထိ မြစ်ကြီးနားကနေ ကန်ပိုက်တီးအထိ ကားလိုင်းတိုက်ရိုက်မရှိသေးဘူး။ ဆဒုံးကို သွား၊ အဲဒီကမှ ကန်ပိုက်တီး ပြန်သွားရတယ်။ တရုတ်ဘက်ခြမ်းရောက်ရင်လည်း ထိန်ချုံးမြို့ကိုရောက်ဖို့ (၃) နာရီလောက် ကားစီးရသေးတယ်။ ပြီးတော့ အဲဒီက ကုန်တွေက လိုင်ဇာ၊ လွယ်ဂျယ်၊ မူဆယ်တို့ တဖက်မှာရှိတဲ့ တရုတ်မြို့တွေလောက် အမျိုးအမည် မစုံဘူး။ ဈေးနှုန်းအရလည်း မြင့်လို့ အသွားအလာကို မလုပ်ကြဘူး။ ပြီးတော့ ကျောက်စိမ်းဈေးကွက်လည်းသိပ်မရှိဘူး။ မေခ၊ မလိခ မြစ်ကြားက သစ်တွေလောက်ပဲ ပန်ဝါကနေ ထိန်ချုံးကို ဝင်တာပဲရှိတယ်” ဟု ပြောသည်။

ကုန်သွယ်ရေးအရ အချက်အချာမကျသည့် ကန်ပိုက်တီးကျေးရွာတွင် နယ်စပ်ကုန်သွယ်ရေး ဖွင့်လှစ်လိုက်ခြင်းမှာ ကချင်ပြည် လွတ်လပ်ရေးအဖွဲ့ ထိန်းချုပ်ရာ လိုင်ဇာမြို့ကို ဖြတ်သန်းရသည့် လိုင်ဇာနယ်စပ် ကုန်သွယ်ရေးလမ်းကြောင်းအား ပြန်လည်ရုပ်သိမ်းချင်ပုံရသည်ဟု လိုင်ဇာဒေသခံတဦးက ပြောသည်။

“လိုင်ဇာနယ်စပ်ကုန်သွယ်ရေးစခန်းကို ၂ဝဝဝ ခုနှစ် ဝန်းကျင်လောက် စဖွင့်ခဲ့တာ။ တရားဝင်ကုန်သွယ်ရေးထက် တပိုင်တနိုင် ကုန်သွယ်မှုကိုပဲ အဓိကလုပ်နေခဲ့တာ။ အဓိကတော့ ဒေသထွက် သစ်သီးဝလံ၊ ကြိမ်တို့ အဲလောက်ပဲ ပို့တာရှိမယ်။ ကျန်တဲ့သစ်၊ ကျောက်စိမ်း၊ ဒေသထွက် စားသောက်ကုန်တွေ တရားမဝင်ပို့တယ်။ တရုတ်ကုန်တွေကို တရားမဝင် ပြန်သွင်းတယ်။ အဲဒီအပေါ်မှာ ကေအိုင်အိုက အခွန်အကောက်ရတယ်။ အခုက ကေအိုင်အိုကို ဖိအားပေးချင်တာလည်း ပါမယ်။ တရုတ်ကုန် ပစ္စည်းတွေကို အသွင်းမခံတော့ဘူး။ လိုင်ဇာလမ်းကြောင်းကို ခွေထားချင်နေပုံရတယ်” ဟု ၎င်းက ပြောသည်။

တရုတ်-မြန်မာနယ်စပ်တလျှောက်တွင် မူဆယ် (၁ဝ၅) မိုင် ကုန်သွယ်ရေးစခန်းမှာ နယ်စပ်ကုန်သွယ်ရေးအားလုံးတွင် ကုန်သွယ်မှုအများဆုံး လုပ်နေသည့်နေရာလည်းဖြစ်ပြီး လွယ်ဂျယ်ကုန်သွယ်ရေးစခန်းတွင် ကုန်သွယ်မှု အတင့်သင့်ရှိသော်လည်း ကိုးကန့်လက်နက်ကိုင်အဖွဲ့ထိန်းချုပ်ရာ ချင်းရွှေဟော်နှင့် ကချင်ပြည်လွတ်လပ်ရေးအဖွဲ့ထိန်းချုပ်ရာ လိုင်ဇာတို့မှာ တရားဝင်ကုန်သွယ်မှု အနည်းအကျဉ်းသာရှိသည်။

နအဖ ကမ်းလှမ်းခဲ့သည့် နယ်ခြားစောင့်တပ်အသွင်ပြောင်းရေးကို လက်ခံသဘောတူလိုက်ပြီးနောက်ပိုင်း ကချင်ဒီမိုကရေစီသစ် တပ်မတော် ထိန်းချုပ်ရာ ကန်ပိုက်တီးကျေးရွာတွင် နယ်စပ်ကုန်သွယ်ရေးစခန်းကို ယခုအသစ်ဖွင့်လှစ်လိုက်ခြင်းဖြစ်သည်။

Geen opmerkingen: