ဗန္ဓရ
၁၃ သြဂုတ် ၂၀၀၉
ပြည်ထောင်စုမြန်မာနိုင်ငံ၏ ပထဝီအနေအထားအရ ကမ္ဘာ့အင်အားကြီး အိန္ဒိယ၊ တရုတ် နိုင်ငံကြီးနှစ်နိုင်ငံတို့နှင့် နယ်နိမိတ်ချင်း ထိစပ်နေသည်။ မြန်မာ့စစ်အစိုးရ အာဏာသက်စိုးရှည်နေသည်မှာ ယင်းနိုင်ငံများမှ တစိတ်တဒေသအားဖြင့် အားပေးကူညီ နေခြင်းကြောင့်ဖြစ်သည်။
အိန္ဒိယနိုင်ငံသည် ဒီမိုကရေစီနိုင်ငံ တနိုင်ငံဖြစ်သော်လည်း စီးပွားရေးအရ စစ်အစိုးရနှင့် နီးနီးကပ်ကပ် ဆက်ဆံနေရသကဲ့သို့ ကွန်မြူနစ်ဝါဒ ကျင့်သုံးသော တရုတ်နိုင်ငံသည်လည်း နိုင်ငံရေး၊ စီးပွားရေးတို့တွင် စစ်အစိုးရနှင့် ဆက်စပ်မှုရှိနေသည်။ သို့သော် တရုတ်အစိုးရ၏ နိုင်ငံခြားဆက်ဆံရေးမူဝါဒသည် လက်ရှိအုပ်ချုပ်သော အစိုးရနှင့်သာ ဆက်ဆံရန်ဖြစ်ပြီး မြန်မာနိုင်ငံတွင် မည်သည့်အစိုးရတက်လာသည်ဖြစ်စေ ပူးပေါင်းဆက်ဆံသွားရန်ရှိသည်ဆိုသည်ကို ၁၉၉၀ ပြည့်နှစ် ရွေးကောက်ပွဲအပြီး ပြည်သူ့ကိုယ်စားလှယ်ပေါင်း (၈၂) ရာခိုင်နှုန်းကျော် အနိုင်ရရှိသော အမျိုးသားဒီမိုကရေစီအဖွဲ့ချုပ်သို့ တရုတ်သံအမတ်ကြီး လာရောက်တွေ့ဆုံမိတ်ဆက်ခြင်းက သက်သေနေခံပါသည်။
သို့သော် အထွေထွေရွေးကောက်ပွဲအပြီးတွင် စစ်အစိုးရက အာဏာဆက်လက်ရယူထား သဖြင့် ကမ္ဘာ့နိုင်ငံပေါင်းများစွာတို့က ပြစ်တင်ရှုတ်ချဖိအားပေးရာတွင် တရုတ်အစိုးရက မြန်မာစစ်အစိုးရကို မကြာခဏ အကာအကွယ်ပေးခဲ့သည်။ လုံခြုံရေးကောင်စီတွင် မြန်မာ့အရေး ဆွေးနွေးရန်အဆိုကို တရုတ်နှင့် ရုရှားတို့က အမြဲတစေ ပယ်ချပေးခဲ့သည်။ ရုရှားအစိုးရက ရေတိုအကျိုးအတွက် ၎င်းတို့စွန့်ပစ်မည့် လက်နက်အချို့ရောင်းချနိုင်ရန် မြန်မာစစ်အစိုးရကို ထောက်ခံခြင်းဖြစ်ပြီး တရုတ်အစိုးရမှာမူ ၎င်းတို့၏ တိုးတက်လာသော စီးပွားရေးကို အရှိန်မြှင့်နိုင်ရန်အတွက် မြန်မာစစ်အစိုးရထံမှ ဓာတ်ငွေ့ဝယ်ယူရရှိရေးနှင့် စီးပွားရေးကိုလိုနီနယ်ချဲ့ရန် ရည်ရွယ်ချက်ဖြင့် ထောက်ခံခြင်းဖြစ်ပါသည်။
တရုတ်အစိုးရသည် မြန်မာ့အရေးနှင့်ပက်သက်၍ ပြည်တွင်းရေးသက်သက်ဖြစ်သည်၊ မြန်မာ့ပြည်တွင်းရေးပြဿနာကို စစ်အစိုးရက ဖြေရှင်းနိုင်ပါသည်ဟု မကြာခဏ လူသိရှင်ကြား ပြောဆိုနေပါသည်။ စစ်အစိုးရ အာဏာသက်စိုးရှည်နေသည်နှင့် အမျှ တရုတ်အစိုးရအတွက် နိုင်ငံရေး၊ စီးပွားရေး အမြတ်ထွက်နေသည်ဖြစ်၍ ထိုသို့အကာအကွယ်ပေး ပြောဆိုနေခြင်းဖြစ် သည်။ စစ်အစိုးရကို တရုတ်အစိုးရက ထောက်ခံပေးနေသည့်အတွက် အထက်မြန်မာနိုင်ငံတွင် တရုတ်လူမျိုး ထောင်သောင်းချီပြီး ဝင်ရောက်နေထိုင်သည်ကို စစ်အစိုးရက လျစ်လျူရှုနေရသည်။ စစ်အစိုးရအုပ်ချုပ်မှုအောက်တွင် မြန်မာနိုင်ငံ၌ တရုတ်တို့ စီးပွားရေးနယ်ချဲ့နိုင်ခဲ့သည့်အပြင် နိုင်ငံရေးတွင်လည်း သြဇာသက်ရောက်မှုရှိနေသည်။
မြန်မာစစ်အစိုးရသည် နိုင်ငံရေးအကျပ်အတည်း တွေ့သည့်အခါမျိုးတွင် တရုတ်အစိုးရထံ သွားရောက်ပြီး အကြံဉာဏ်နှင့် အကူအညီ တောင်းခံလေ့ရှိသည်။ မကြာမီက ဒေါ်အောင်ဆန်းစုကြည်အား ထောင်ချရန် ဖမ်းဆီးလိုက်သည့်အခါအတွင်လည်း ကမ္ဘာ့ဖိအားပြင်းထန်လာသည့်အတွက် မည်ကဲ့သို့ ဆောင်ရွက်ဖြေရှင်းသင့်သည်ကို အကြံဉာဏ်ရယူရန် ပထမဦးဆုံး ဗိုလ်ချုပ်ရွှေမန်း တရုတ်ပြည်သို့ သိုသိုသိပ်သိပ် သွားရောက်ခဲ့သည်။ တရုတ်အစိုးရက အဆင့်မြင့် စစ်အစိုးရခေါင်းဆောင်နှင့် ထပ်တွေ့လိုပုံရ၍ ဒုတိယအကြိမ်အဖြစ် ဗိုလ်ချုပ်မောင်အေး တရုတ်ပြည်သို့ ထပ်သွားရလေသည်။
တရုတ်တို့၏ မဟာဗျူဟာရည်မှန်းချက်ဖြစ်သည့် မြန်မာပြည်မှ ဓာတ်ငွေ့ရယူရေးနှင့် မြန်မာပြည်ကိုဖြတ်ပြီး ဘင်္ဂလားပင်လယ်သို့ ထွက်ပေါက်ရရေးကိစ္စရပ်ကို စစ်အစိုးရက ဆောင်ရွက်ပေးမည်ဟု တရုတ်တို့က ယုံကြည်ထားသည်။ ထို့အတွက် တိုင်းရင်းသားလက်နက်ကိုင်များနှင့် စစ်အစိုးရတို့ အပစ်အခတ်ရပ်စဲရေးပျက်လျှင် ပြည်တွင်းစစ်ဖြစ်လာပြီး မြန်မာနိုင်ငံ မငြိမ်မသက်ဖြစ်လာမည်ကို တရုတ်တို့က အလွန်စိုးရိမ်လေသည်။
၂၀၁၀ ရွေးကောက်ပွဲပြီးပါက စစ်အုပ်စုက တရားဝင်အစိုးရ ဖြစ်လာမည်။ အပစ်ရပ်အဖွဲ့များကို တရားမဝင် လက်နက်ကိုင် အဖွဲ့ဟု ကြေညာပြီး လက်နက်ချခိုင်းမည်။ သို့ဖြစ်သောကြောင့် ရွေးကောက်ပွဲမပြီးခင် အပစ်အခတ်ရပ်စဲရေးမပျက်ရန် စစ်အစိုးရ အစွမ်းကုန် ထိန်းသိမ်းထားမည်ဖြစ်သည်။ တိုင်းရင်းသားလက်နက်ကိုင် အဖွဲ့များတို့ကမူ အပစ်အခတ်ရပ်စဲရေး ရယူသည်မှာ နယ်မြေငြိမ်းချမ်းမှုရရှိရေးနှင့် နိုင်ငံရေးကို အေးအေးချမ်းချမ်းဖြစ်အောင် စစ်အစိုးရက ဖြေရှင်းပေးမည်ဟု ယူဆပြီး အပစ်အခတ် ရပ်စဲခဲ့ကြခြင်းဖြစ်သည်။ သို့သော် လက်တွေ့၌မူ အပစ်အခတ်ရပ်စဲရေးအဖွဲ့များသည် အာဏာဆက်လက်ရယူရန်ကြံနေသည့် စစ်အုပ်စု၏ နိုင်ငံရေးခုတုံးလုပ် အမြတ်ထုတ်ခြင်းကို ခံနေရလေသည်။
အပစ်အခတ်ရပ်စဲရေးအဖွဲ့များသည် “အမြင်မှန်ရပြီး လက်နက်စွန့်၍ ဥပဒေဘောင်အတွင်း ဝင်ရောက်သည်” ဟူသော နဖူးစည်းစာတန်းဖြင့် အပစ်အခတ်ရပ်စဲရေး လုပ်ခဲ့ရပါသည်။ စစ်အုပ်စုက တော်လှန်ရေးသမားများကို နယ်စပ်မှ ဆူပူသောင်းကျန်းသူ သူခိုးလူဆိုး ဓားပြများဟု ပြည်သူတွေ အမြင်ရှိလာရန် နှိမ်ချပြောဆို ရေးသားနေသည်များလည်း ရှိသည်။ အမှန်တကယ်၌မူ တော်လှန်ရေးအဖွဲ့အစည်းများတွင် ဘွဲ့ရခေတ်ပညာတတ်လူငယ် များစွာပါဝင်နေပါသည်။ စစ်အစိုးရတပ်မှာကဲ့သို့ ရာထူးရရေး၊ ဇိမ်ခံနိုင်ရေးထက် မိမိတို့ အမျိုးသားလွတ်မြောက်ရေးအတွက် အသက်ကိုပဓာနမထားဘဲ တိုက်ပွဲဝင်နေကြသည်ဖြစ်၍ စစ်အုပ်စုတပ်များနှင့် နှိုင်းစာလျှင် တော်လှန်ရေးသမားတို့က ဂုဏ်တန်ဖိုး ပိုကြီးမားပါသည်။
မွန်ပြည်သစ်နှင့် စစ်အစိုးရ အပစ်အခတ်ရပ်စဲရေး ရယူရာတွင် ရှေ့တန်းမှ ပါဝင်လှုပ်ရှားနေသော နိုင်စိုးမြင့် (သထုံခရိုင် ဥက္ကဋ္ဌ)၊ နိုင်တင်အောင် (ဗဟိုအလုပ်အမှုဆောင်) တို့အား ‘မွန်ပြည်သစ်ပါတီသည် လက်နက်ကိုင် တော်လှန်ရေးလမ်းစဉ်ကို စွန့်လွှတ်၍ ဥပဒေဘောင်အတွင်း ဝင်ရောက်ခြင်းဖြစ်သည်’ ဟူသည့် နဖူးစည်းစာတန်းသည် အပစ်အခတ်ရပ်စဲရေးအဖွဲ့များကို အထင်သေးနှိမ်ချသော အသုံးအနှုန်းဖြစ်၍ တော်လှန်ရေးဂုဏ်သိက္ခာ ထိခိုက်လွန်းသည်၊ နိမိတ်မကောင်းဘူးဟု ကျွန်ုပ်တို့ တင်ပြသောအခါ နိုင်စိုးမြင့်က သက်ဆိုင်ရာ အာဏာပိုင်များထံသို့ ယင်းနဖူးစည်းစာတန်းကို ပြင်ပေးရန် တင်ပြခဲ့ပါသည်။
သို့သော် အရှေ့တောင်တိုင်းစစ်ဌာနချုပ် တိုင်းမှူးက အခြားအပစ်အခတ် ရပ်စဲရေးအဖွဲ့များလည်း ဒီလိုမျိုး နဖူးစည်းစာတန်းပဲ၊ မပြင်ပေးနိုင်ဘူးဟု မွန်ပြည်သစ်သို့ ပြန်လည်ဖြေကြားခဲ့ပါသည်။ မွန်ပြည်သစ်ခေါင်းဆောင်အချို့အနေဖြင့် ကျေနပ်မှု မရှိသော်လည်း ဒီကိစ္စကို ရှေ့တန်းတင်နေလျှင် အပစ်အခတ်ရပ်စဲရေးကိစ္စ ပြဿနာတက်လာမည်စိုး၍ ညီညွတ်မှုကိုရှေးရှုပြီး ငြိမ်သက်နေရသည်။ မွန်လူမျိုးသည် သမိုင်းနောက်ခံကြီးကျယ်သော လူမျိုးဖြစ်၍ အထက်စီးက ဗိုလ်ကျသည့်ကိစ္စကို သည်းမခံလိုခြင်းသည် ဇာတိသွေး၊ ဇာတိမာန်ရှိသော မွန်လူမျိုးတို့၏ စရိုက်လက္ခဏာပင်ဖြစ်သည်။
မွန်ပြည်သစ်ပါတီ အပစ်အခတ်ရပ်စဲရေး ရယူပြီးနောက်တွင် ဗဟိုအလုပ်အမှုဆောင်၊ ဗဟိုကော်မတီ၊ ခရိုင်ဥက္ကဋ္ဌ၊ တပ်မှူးများနှင့် အောက်ခြေတပ်သားများစွာ မွန်ပြည်သစ်မှ နုတ်ထွက်သွားကြသည်။ တပ်အသစ်ဖွဲ့ပြီး တိုက်ပွဲဝင်နေသော အချို့တပ်မှူးများလည်းရှိသည်။ အပစ်ခတ်ရပ်စဲရေးကြောင့် မွန်ပြည်သစ်ပါတီ၏အင်အား အလွန်လျော့ကျသွားသည်။
မွန်လူထုတို့ထံမှ လယ်ယာခြံမြေ အမြောက်အမြားကို စစ်တပ်က သိမ်းယူသည်။ လူ့အခွင့်အရေးချိုးဖောက်မှုလည်း ပိုများလာသည်။ ပေါ်တာအဖြစ် အထမ်းသမား ယူမသုံးသော်လည်း လစဉ် ပေါ်တာကြေး ပေးနေရသည်။ မွန်ရွာတချို့တွင် အိမ်ရာအတင့်သင့်နှင့် လမ်းပန်းဆက်သွယ်ရေး ကောင်းလာခြင်းသည် ဒေသအတွင်း စီးပွားရေးတိုးတက်လာခြင်းကြောင့် မဟုတ်ဘဲ အိမ်နီးနားချင်းနိုင်ငံတွင် ဘ၀ကို အခက်အခဲမျိုးစုံနှင့် ရင်းနှီးကာ ယင်းနိုင်ငံသားတို့ မလုပ်သည့် အောက်ခြေသိမ်း လုပ်ငန်းများကို လုပ်ကိုင်ပြီး ရလာသောဝင်ငွေများဖြင့် ဆောက်လုပ်ထားခြင်းကြောင့်ဖြစ်သည်။ ထိုသို့သောအခြေအနေကြောင့် မွန်လူငယ်များစွာ ကျောင်းမနေကြရသည့်အတွက် အနာဂတ်တွင် ခေတ်ပညာတတ် မွန်လူငယ်များ နည်းပါးလာပြီး ပြည်နယ်ဒေသဖွံ့ဖြိုးရေး ဆောင်ရွက်ရာ၌ ထိခိုက်မှုရှိလာနိုင်သည်။ ထို့ကြောင့် ဒီမိုကရေစီနိုင်ငံ အမြန်တည်ဆောက်ဖို့ လိုအပ်ပါသည်။
ဒီမိုကရေစီနိုင်ငံ တည်ဆောက်ရာတွင် အာဏာရှင်စစ်အုပ်စုကို တရုတ်တို့ ထောက်ခံနေရာမှ ခြေတလှမ်း နောက်ဆုတ်သွားရန် အတွက် အပစ်ရပ်အဖွဲ့များတွင် နိုင်ငံရေးကစားကွက် ရှိဖို့လိုအပ်ပါသည်။ သို့မှသာလျှင် ကမ္ဘာ့နိုင်ငံများအကြားတွင် စစ်အုပ်စုအနေဖြင့် ရပ်တည်ရန် အလွန်ခက်ခဲသွားမည်ဖြစ်သည်။ ပုဂံခေတ်တွင် အရှင်ဒိသာပါမောက္ခ၏ သံခင်းသမန်ခင်းဖြင့် တရုတ်စစ်တပ်ကြီး ပုဂံမှ နောက်ဆုတ်ခဲ့ရသည်။ အင်းဝခေတ်တွင် တရုတ်သူရဲကောင်း ဂါမဏိကို မွန်သူရဲကောင်း သမိန်ဗရမ်းက စီးချင်းထိုးရာတွင် အနိုင်ရခဲ့သဖြင့် တရုတ်စစ်တပ်ကြီး ဆုတ်ခွာခဲ့ရသည်။ နောက်တကြိမ်တွင်လည်း တရုတ်သူရဲကောင်း စလုံကျော်ခေါင်ကို မွန်သူရဲကောင်း မင်းညီတုန်းက အနိုင်ရခဲ့ပြန်သဖြင့် တရုတ်တို့ ဆုတ်ခွာခဲ့ရပြန်သည်။ ပဒေသရာဇ်ခေတ်တွင် တရုတ်တို့ မြန်မာပြည်မှ နောက်ဆုတ်သွားရန် မွန်တို့ နှစ်ကြိမ်တိုင်တိုင် လုပ်နိုင်ခဲ့သည်။
မြန်မာ့နိုင်ငံရေးဖြစ်စဉ်အရလည်း အဓိကကျသော အပစ်ရပ်တဖွဲ့တဖွဲ့နှင့် အပစ်အခတ်ရပ်စဲရေး ပျက်ပြားပါက မြန်မာ့ပြည်တွင်း စစ်ဖြစ်ရန် မီးစိမ်းပြနေပြီးဖြစ်၍ အပစ်ရပ်အဖွဲ့များ နိုင်ငံရေးကစားတတ်လျှင် စစ်အုပ်စုကို ထောက်ခံနေရာမှ တရုတ်တို့ သေချာပေါက် နောက်ဆုတ်သွားဖို့ရှိကြောင်း သုံးသပ်တင်ပြလိုက်ရပါသည်။
Geen opmerkingen:
Een reactie posten