NEJ/ ၁၉ ဧပြီ ၂ဝ၁ဝ
အစိုးရရုံးများစိုက်ရာနေပြည်တော်၌ဆိုင်ကယ်တိမ်းမှောက်မှုနှင့်တိုက်မှုများနေ့စဉ်ဖြစ်ပွားလျက်ရှိပြီး သေဆုံးသူများပြားနေကြောင်း ဖိုးဆောင်းတောင် ယာဉ်ထိန်းတပ်ဖွဲ့ တာဝန်ရှိသူတဦးက ပြောသည်။
၎င်းက“အရပ်သားကယ်ရီတွေကဆိုင်ကယ်ဦးထုပ်ဆောင်းလေ့မရှိဘူး။နောက်ပြီးလမ်းကောင်းပေါ်မှာ တနာရီ (၄၅)ကီလိုထက် ပိုမောင်းတယ်။ ခရီးသည် ရလိုမှုနဲ့ အဲလို လုမောင်းနေကြတော့ အသက်အန္တရာယ် ကြုံရတာပေါ့” ဟု ပြောသည်။
ဆိုင်ကယ်ကယ်ရီများသည်သီးသန့်ဂိတ်မရှိခြင်း၊ဂိတ်စည်းကမ်း၊ယာဉ်မောင်းစည်းကမ်း လိုက်နာမှုအားနည်းခြင်းတို့ကြောင့်ယခုကဲ့သို့ဆိုင်ကယ်တိုက်မှုများဖြစ်ပွားနေရကြောင်း၊အထူးသဖြင့် ပျဉ်းမနား၊လယ်ဝေး၊တပ်ကုန်းမြို့နယ်တို့မှလာရောက်အခြေစိုက်သောအရပ်သားဆိုင်ကယ်ကယ်ရီများ အဖြစ်များကြောင်းဘောဂသိဒ္ဓိရပ်ကွက်နေ၀န်ထမ်းများကပြောသည်။
ပိတောက်အိမ်ရာနေ၀န်ထမ်းတဦးကလည်း“သပြေရိပ်မှာဆိုင်ကယ်ချင်းတိုက်မိတာ(၁၄)နှစ်အရွယ် မိန်းကလေးသေသွားတယ်။ဧပြီ(၁၁)ရက်နေ့ကဖြစ်တာ။စိုးစံဘော်ဒါဆောင်နားမှာတိုက်တော့လည်း သေတာပဲ။လမ်းတွေကကောင်းတော့ဆိုင်ကယ်ကယ်ရီတွေကစည်းမဲ့ကမ်းမဲ့မောင်းကြတယ်။ ကျနော်တို့နားမှာပြီးခဲ့တဲ့အပတ်ကဆက်တိုက်(၅)ယောက်သေတယ်”ဟုပြောသည်။
နေပြည်တော်တွင်ယာဉ်စည်းကမ်း၊လမ်းစည်းကမ်းအသိပညာပေးမှုများပြုလုပ်လေ့ရှိသော်လည်း အရပ်သား ဆိုင်ကယ်ကယ်ရီများမှာလိုက်နာမှုအားနည်းကြသည့်အတွက်တာဝန်ကျယာဉ်ထိန်းများနှင့် ဆိုင်ကယ်ကယ်ရီများမကြာခဏအချင်းများလေ့ရှိကြသည်ဟုသိရသည်။
“ဦးထုပ်မဆောင်းလို့ယာဉ်ထိန်းကတားတယ်၊ကျနော်တို့ကရပ်မပေးဘူး၊ရှောင်ပြေးတယ်။အဲဒါမှမရရင် တိုက်ပစ်လိုက်တယ်”ဟုပျဉ်းမနားဒေသခံဆိုင်ကယ်ကယ်ရီတဦးကပြောသည်။
ယာဉ်ထိန်းရဲတဦးကမူ“၀န်ထမ်းဆိုင်ကယ်တွေကျတမျိုး။သတ်မှတ်တလမ်းမောင်းကိုလမ်းပြောင်းပြန် မောင်းချင်မောင်းတယ်။မြို့မဈေးအဝေးပြေးကားဝင်းကိုဆိုင်ကယ်မ၀င်ရသတ်မှတ်ထားတယ်။ ဧည့်ကြိုနေရာကိုသိလျက်နဲ့ကားဝင်းထဲဆိုင်ကယ်စီးဝင်ချင်ဝင်တယ်။သူတို့ကိုဖမ်းတော့လည်းငါ ဘယ်ဌာနကကွ၊ ဘယ်လူကြီးနဲ့ ပတ်သက်တယ်နဲ့ အခက်အခဲအမြဲကြုံရတယ်” ဟု ပြောသည်။
နေပြည်တော်နှင့်ရန်ကုန်မှအပဆိုင်ကယ်စီးနင်းခွင့်ပြုသည်ဟုယာဉ်မှတ်ပုံတင်သက်သေခံလက်မှတ် (WheelTax)တွင်ဖော်ပြထားသော်လည်းဌာနဆိုင်ရာများကနားလည်မှုဖြင့်စီးနင်းခွင့်ပြုထားသည့်အပြင် နေပြည်တော်တွင်သောင်းချီရှိနေသည့်ဆိုင်ကယ်စီးရေနှင့်ယာဉ်ထိန်းရဲအင်အားမှာမမျှတကြောင်းအဆိုပါ ယာဉ်ထိန်းရဲက ပြောသည်။
နေပြည်တော်ရှိအိမ်ရာ၊ဌာန၊ဈေးတို့တနေရာနှင့်တနေရာအလှမ်းကွာဝေးခြင်း၊ရွှေမြို့တော်တောင်ညို တော်ဝင်မြို့ပတ်ကားများရှိသော်လည်းအချိန်အတော်ကြာစောင့်ဆိုင်းရခြင်း၊နယ်မြေမကျွမ်းခြင်းတို့ကြောင့် ဧည့်သည်များမှာ ဆိုင်ကယ်ကယ်ရီများကိုသာ အားကိုးကြရသည်။
နေပြည်တော်ရှိတာဝန်ကျဝန်ထမ်းအများစုကမူ၎င်းတို့လစာငွေကြေးအရဆိုင်ကယ်ကယ်ရီငှားမစီးနိုင်ကြဟု သိရသည်။
Geen opmerkingen:
Een reactie posten