စိုးမိုး/၂၆ဧပြီ၂ဝ၁ဝ
၈၈မျိုးဆက်ကျောင်းသားလူငယ်များ(ပြည်ထောင်စုမြန်မာနိုင်ငံ)ပါတီကပါတီရန်ပုံငွေအဖြစ် ဗဟိုအဆင့်တဦးကျပ်(၁)သိန်းမှအဖွဲ့ဝင်ကြေးတဦးကျပ်(၅၀၀)အထိအသီးသီး သတ်မှတ်ကောက်ခံနေပြီဖြစ်သည်။
ပြီးခဲ့သည့်အပတ်ကပါတီထူထောင်ခွင့်ရရှိပြီးနောက်ယခုကဲ့သို့ပါတီအဖွဲ့ဝင်များစုဆောင်းခြင်းနှင့်ရန်ပုံငွေ ကောက်ခံခြင်းများလုပ်ဆောင်လာခြင်းဖြစ်သည်။
“ဗဟိုအဆင့်(၂၇)ယောက်ပေါ့ဗျာ။အဲဒါကတယောက်ကို(၁)သိန်းနဲ့(၂၇)သိန်းနဲ့ပါတီမှတ်ပုံတင်လုပ်ငန်းတွေ လုပ်ခဲ့တယ်။အခုပါတီတည်ထောင်ခွင့်ကျတော့ဗဟိုအဆင့်က(၁)သိန်း၊တိုင်းနဲ့ပြည်နယ်အဆင့် ကိုယ်စားလှယ်က(၈)သောင်း၊မြို့နယ်အဆင့်က(၆)သောင်း၊အဖွဲ့ဝင်ကြေးက(၅၀၀)ကျပ်ကောက်ခံပါတယ်။ အဆင့်တခုချင်းစီကို(၂)သောင်းစီလျှော့သွားတာပေါ့”ဟု၈၈မျိုးဆက်ကျောင်းသားလူငယ်များ (ပြည်ထောင်စုမြန်မာနိုင်ငံ)ဥက္ကဋ္ဌဦးရဲထွန်းကပြောကြားသည်။
နိုင်ငံရေးပါတီမှတ်ပုံတင်ကြေးမှာကျပ်(၃)သိန်း၊ကိုယ်စားလှယ်လောင်းတဦးစီအတွက်မှတ်ပုံတင်ကြေးကျပ် (၅)သိန်းအဖြစ်နအဖစစ်အစိုးရရွေးကောက်ပွဲကော်မရှင်ကကောက်ခံနေပြီးရွေးကောက်ပွဲင်ရောက်ယှဉ်ပြိုင် မည့်ကိုယ်စားလှယ်လောင်းတဦးသည်မဲဆွယ်စည်းရုံးစရိတ်ကျပ်သိန်း(၁၀၀)အသုံးပြုနိုင်သည်ဟု သတ်မှတ်ပေးထားသည်။
သို့သော်ပါတီအဖွဲ့ဝင်များနှင့်ပါတီများကိုစေတနာရှိသူများထံမှအလှူငွေ၊အသင်းဝင်ကြေးတို့ကိုမူ သတ်မှတ်ပေးမထားကြောင်းဦးရဲထွန်းကပြောသည်။
“အဲသလိုသတ်မှတ်မထားဘူးဗျ။ပါတီကကိုယ့်ပါတီမူဝါဒပေါ့ဗျာ။ဘယ်လောက်ကောက်ခံမယ်ဆိုတာ ကော်မရှင်ကိုတင်ပြရမှာဖြစ်ပါတယ်”ဟု၎င်းကပြောသည်။
၈၈မျိုးဆက်ကျောင်းသားလူငယ်များ(ပြည်ထောင်စုမြန်မာနိုင်ငံ)ပါတီအနေဖြင့်တနိုင်ငံလုံးအတိုင်းအတာဝင် ရောက်ယှဉ်ပြိုင်မည်ဟုဆိုသည်။
ယခုရွေးကောက်ပွဲဝင်ရောက်ယှဉ်ပြိုင်မည့်နိုင်ငံရေးပါတီများသည်ငွေကြေးအခက်အခဲနှင့် ကြုံတွေ့ရနိုင်သည်ဆိုသည့်လေ့လာသုံးသပ်မှုများလည်း ပြည်တွင်း၌ထွက်ပေါ်နေသည်။
“ရိုးရိုးသားသားဆိုရင်တနိုင်ငံလုံးအတိုင်းအတာယှဉ်ပြိုင်ကြမယ်ဆိုပါတီတွေငွေရေးကြေးရေးအခက်အခဲ ရှိမှာသေချာတယ်။မှတ်ပုံတင်ကြေးကိုက(၅)သိန်း၊ကျနော်တို့တုန်းကအဲလောက်ငွေကြေးကုန်ကျမှုမရှိဘူး။ လူတိုင်းပါဝင်နိုင်ခဲ့တယ်”ဟု၁၉၉၀ရွေးကောက်ပွဲတွင်ဒီမိုကရက်တစ်ပါတီကိုယ်စားလှယ်အဖြစ်ဝင်ရောက်ယှဉ်ပြိုင်ခဲ့သောရှေ့နေကြီးဦးအေးမြင့်ကပြောကြားသည်။
၈၈မျိုးဆက်ကျောင်းသားလူငယ်များအဖွဲ့(ပြည်ထောင်စုမြန်မာနိုင်ငံ)ပါတီကမူယခုကဲ့သို့ ပါတီမှတ်ပုံတင်ကြေးအပါအ၀င်ရွေးကောက်ပွဲစရိတ်များပြားမှုသည်၎င်းတို့အတွက်အခက်အခဲမဖြစ်စေပါဟု ပါတီဥက္ကဋ္ဌဦးရဲထွန်းကပြောကြားသည်။
Geen opmerkingen:
Een reactie posten