မြန်မာပြည် အချိန်

သတင်းသစ်များမတင်နိုင်တာကိုနားလည်ပေးကြပါ။ C-Box လည်း ပိတ်ထားပါတယ်။

woensdag 16 juni 2010

ရေကူးဝတ်စုံကြော်ငြာရိုက်သည့်မြန်မာမော်ဒယ်လ်ကိုဝေဖန်သူများပြား

နရီလင်းလက် Wednesday,June16,2010
လန်ဒန်တွင် ကျောင်းတက်ကာ ဓာတ်ပုံ မော်ဒယ်လ် ဖြစ်ရန် ကြိုးစားနေသည့် ဟန်နီဦး ခေါ် Hazel Moe ကို ရေကူးဝတ်စုံ ကြော်ငြာ ရိုက်ကူးခြင်းနှင့် ပတ်သက်၍ မြန်မာ့ ယဉ်ကျေးမှုနှင့် လျော်ညီခြင်း မရှိကြောင်း ဝေဖန်မှုများ အင်တာနက် စာမျက်နှာများတွင် ပျံ့နှံ့နေသည်။
                  ဟန်နီဦးကိုလူသိများသွားစေသည်ဟုဆိုသောကြော်ငြာ(ဓာတ်ပုံ-purestorm.com)
ဟန်နီဦးသည် ၁၆ နှစ်သမီးအရွယ်က လန်ဒန်သို့ ရောက်ရှိခဲ့ပြီး မြန်မာပြည်တွင် နေထိုင်စဉ်ကတည်းက ကလေး မော်ဒယ်လ် အဖြစ် သရုပ်ဆောင်ခြင်း၊ မဂ္ဂဇင်းမျက်နှာဖုံးများ အတွက် ဓာတ်ပုံ မော်ဒယ်လ် လုပ်ခြင်းများ ရှိခဲ့ပြီး လန်ဒန်တွင် ကျောင်းတက်ရင်း အေဂျင်စီများဖြင့် ချိတ်ဆက်၍ မော်ဒယ်လ် ဖြစ်ခွင့်ရရန် ကြိုးပမ်းလျှက်ရှိကြောင်း သိရသည်။
ရေကူးဝတ်စုံ၎စုံနှင့်ရိုက်ကူးထားသောဟန်နီဦး၏ဓာတ်ပုံများနှင့်၎င်း၏အလှဓာတ်ပုံများကိုမော်ဒယ်လ်ဝက်ဘ်ဆိုက် http://www.purestorm.com/profile.aspx?id=hazelmoe တွင် ကြည့်ရှုနိုင်သည်။
“မြန်မာမျက်စိနဲ့ ကြည့်ရင်တော့ မကောင်းဘူး အပြောခံရမှာ ဖြစ်သလို မကောင်းတဲ့ အမြင်တမျိုး မြင်သွားစေနိုင်ပါတယ်။ ဒီရေကူးဝတ်စုံ ဝတ်တာနဲ့ ပတ်သက်ပြီး ညီမကို မေလ်းတွေကနေ ဝေဖန်တာတွေ အများကြီးရှိပါတယ်။ ကိုယ့်အနေနဲ့ ကတော့ အနုပညာတခုဖန်တီးတယ်၊ အလုပ်တခုလုပ်တယ်လို့ သဘောထားပြီး မြင်စေချင်ပါတယ်” ဟု ဟန်နီဦးက ဧရာဝတီကို ပြောသည်။
ဆက်လက်၍သူက“ပြည်တွင်းမှာဒီမော်ဒယ်လ်တယောက်တည်းကပဲမင်းသမီးလည်းလုပ်တယ်၊ ကြော်ငြာလည်းရိုက်တယ်။ပြည်ပမှာကျတော့လိုင်းတခုတည်းနဲ့ရပ်တည်လို့ရအောင်ငွေကြေးရရှိမှုမှာ ကွာခြားတယ်” ဟု မော်လ်ဒယ်လ် များ၏ မြန်မာပြည်တွင်းနှင့် ပြည်ပ အခြေအနေကို နှိုင်းယှဉ်ပြသည်။
မြန်မာပြည်တွင်မော်ဒယ်အေဂျင်စီနှင့်သင်တန်းဖွင့်လှစ်ထားသူတဦးကလည်းမြန်မာပြည်မှ မော်ဒယ်လ်များအနေနှင့်တခြားအာရှနိုင်ငံများအထိဈေးကွက်မချဲ့ထွင်နိုင်ရခြင်းမှာမြန်မာမော်ဒယ်လ် များ၏ ညံ့ဖျင်းမှုကြောင့်မဟုတ်ဘဲအခွင့်အရေးရရှိနိုင်ရန်ခက်ခဲနေခြင်းကြောင့်ဖြစ်သည်ဟုသုံးသပ်သည်။
“မော်ဒယ်တွေရဲ့ အနုပညာ ဖန်တီးမှုတွေ ပိုပြီးပြသနိုင်တဲ့၊ လွတ်လပ်စွာဖန်တီးနိုင်တဲ့ အခွင့်အလမ်းတွေကို ပြည်တွင်းမှာ အပိတ်ခံထား ရတာကြောင့်လည်း တခြားနိုင်ငံတွေအထိ ဈေးကွက် မချဲ့ထွင်နိုင်တာပါ” ဟု ၎င်းက ပြောသည်။
ယဉ်ကျေးမှုနှင့်အနုပညာကိုကွဲပြားခြားနားစွာကြည့်မြင်လက်ခံပေးနိုင်မှုမရှိသေးသည့် အားနည်းချက်များကြောင့်နိုင်ငံတကာအဆင့်သို့မြန်မာမော်ဒယ်လ်များယခုအချိန်အထိ မရောက်လာနိုင်သေးကြောင်း သူက ဆိုသည်။
“အ၀တ်အစားကြော်ငြာရင်အင်္ကျီဒီဇိုင်းပေါ်ဖို့အတွက်နည်းနည်းဟိုက်သွားတာရှိရင်ရှိမယ်၊တိုသွားတာရှိရင် ရှိမယ်။ဒါတွေကိုသတိထားပြီးမပေါ်အောင်လုပ်နေရင်သဘာဝကျတဲ့ဓာတ်ပုံတပုံ၊ကြော်ငြာတခုထွက်လာမှာ မဟုတ်ဘူး။ဒီလိုတွေရိုက်တယ်ဆိုတာကလည်းအားလုံးကအလုပ်တခုလုပ်နေတယ်လို့သဘောထားတာ။ ခက်တာကလည်း မြန်မာပြည်မှာဆင်ဆာပြဿနာရယ်၊ယဉ်ကျေးမှုဆိုတာကို လွဲမှားစွာခံယူနေတာရယ်ပါပဲ” ဟု နာမည်ကြီး ဓာတ်ပုံဆရာ တဦးက ဆိုသည်။
မြန်မာပြည် ကြော်ငြာဈေးကွက်တွင် မော်ဒယ်လ်များဖြင့် ကုန်ပစ္စည်းကြော်ငြာသည့် ရေစီးကြောင်း ပြောင်းလဲလာပြီးနောက် မော်ဒယ်လ်များ၏ အခန်းကဏ္ဍ ပိုမိုကြီးမားလာခဲ့သည်။
မော်ဒယ်လ်များသည် ကုန်ပစ္စည်းအလိုက်၊ နေရာဒေသအလိုက် သရုပ်ဆောင်ရခြင်းများ ရှိသည်ကို မြန်မာလှုမှုဝန်းကျင်တွင် လက်ခံမှုနည်းပါး နေသေးသည်ဟု မော်ဒယ် ချမ်းချမ်းက ပြောပြသည်။
                          ရေကူးဝတ်စုံကြော်ငြာရိုက်သည့်ဟန်နီဦး(ဓာတ်ပုံ-purestorm.com)
“ရှိုးပွဲတခုလျှောက်တယ်ဆိုဒီဇိုင်နာဆင်ပေးတဲ့စတိုင်ကမြန်မာမျက်စိအမြင်နဲ့မယဉ်ပါးဘူး။ဒီတော့လူတွေက သိပ် လက်မခံချင်ဘူး။မော်ဒယ်လ်နဲ့မင်းသမီးဝတ်တာတူမှမတူတာ။ဝတ်စားဆင်ယင်မှုအရယဉ်ကျေးမှု ဆိုတာကို နည်းနည်းလေး လျှော့ပေး သင့်ပါတယ်” ဟု သူက ဆက်ပြောသည်။
ယဉ်ကျေးမှုဝန်ကြီးဌာနမှအမျိုးသမီးအငြိမ်းစားပါမောက္ခတဦးကနိုင်ငံတိုင်းတွင်ကိုယ်ပိုင်ယဉ်ကျေးမှုကို ထိန်းသိမ်းရန်လိုအပ်သော်လည်းပြောင်းလဲလာသည့်ခေတ်အခြေအနေအလိုက်လက်ခံရမည့်အရာကို လက်ခံရမည်ဖြစ်ကြောင်း၊၀တ်စားဆင်ယင်မှု၊နေထိုင်သွားလာမှုမပြောင်းလဲခြင်းကယဉ်ကျေးမှုကို ထိန်းသိမ်းသော မှန်ကန်သည့် နည်းလမ်း မဟုတ်ကြောင်း သုံးသပ်ပြောဆိုသည်။
“ဖက်ရှင်မော်ဒယ်လ်၊ဓာတ်ပုံမော်ဒယ်လ်တွေကမြန်မာ့အသိုင်းအ၀န်းမှာလက်ခံမှုနည်းနေသေးပေမယ့် မြန်မာအမျိုးသမီးတယောက်အနေနဲ့Playboyမော်ဒယ်လ်သဘောမျိုး၊Nudeမော်ဒယ်လ် သဘောမျိုးမဟုတ်ဘူးဆိုရင်သူဝါသနာပါတဲ့အနုပညာတခုလုပ်တယ်လို့လက်ခံနိုင်ပါတယ်”ဟု ၎င်း၏ အမြင်ကို ပြောပြသည်။

ဟန်နီဦး (ခေါ်) Hazel Moe ၏ ဓာတ်ပုံဝက်ဆိုက်လင့်လိပ်စာများ

Geen opmerkingen: