ခိုင်လင်း/ ၉ ဧပြီ ၂ဝ၁ဝ
ရှမ်းပြည်မြောက်ပိုင်းကျောက်မဲနှင့်နောင်ချိုအကြားမီးရထားလမ်းပေါ်ရှိဂုတ်ထိပ်တံတားကြီးအား ပြုပြင်တည်ဆောက်ရန်တရုတ်ပညာရှင်များကယခုလ(၇)ရက်တွင်ကွင်းဆင်းတိုင်းတာမှုများ ပြုလုပ်နေသည်။
တရုတ်ပညာရှင်များဦးဆောင်သည့်လူအင်အား(၄ဝ)ဝန်းကျင်ရှိအဖွဲ့(၁)ဖွဲ့ကမြေတိုင်းတာရေး ကိရိယာများနှင့်အတူတံတားနှင့်မြေအနေအထားများကိုတိုင်းတာနေသည်ဟုတံတားအနီးရှိ နော်ပိန်ကျေးရွာသားတဦးက ပြောသည်။
၎င်းက“ဂုတ်တွင်းထိပ်မှာရှိတဲ့ရှုခင်းသာဆိုတဲ့နေရာမှာသူတို့တွေကိုတွေ့ခဲ့တယ်။ဒေါက်တိုင်တွေပါတဲ့ မြေတိုင်းတဲ့ဟာတွေနဲ့၊မှန်ဘီလူးတွေနဲ့တွေ့ရတယ်။မြေနေရာတိုင်းတာတွေ လုပ်နေတယ်” ဟု ပြောသည်။
ယခုလက်ရှိဂုတ်ထိပ်တံတားသည်အင်္ဂလိပ်များမြန်မာပြည်လာရောက်သိမ်းပိုက် အုပ်ချုပ်ခဲ့စဉ်ကာလကတည်းကဆောက်လုပ်ထားခဲ့ခြင်းဖြစ်သဖြင့်သက်တမ်းအိုနေသည့်တံတားမှာ ကြံ့ခိုင်မှုမရှိတော့သကဲ့သို့မီးရထားများခုတ်မောင်းရာတွင်လည်းအရှိန်နှုန်းနှေးနှေးဖြင့်သာ ခုတ်မောင်းနေရသည့်အတွက်နှစ်နိုင်ငံမီးရထားလမ်းဖောက်မည့်စီမံကိန်းအရယခုကဲ့သို့ တံတားပြုပြင်တည်ဆောက်ခြင်း ဖြစ်နိုင်သည်ဟု နယ်စပ်ကုန်သည်တဦးက ပြောသည်။
၎င်းက“မီးရထားလမ်းဖောက်ပြီးရင်နှစ်နိုင်ငံကုန်သွယ်ဖို့လည်းရှိတော့တံတားကလည်းကောင်းမွန်ဖို့ လိုသေးတယ်။ပြင်သင့်တာတော့ကြာနေပြီ။မြန်မာဘက်ကမတတ်နိုင်လို့သာ။နယ်စပ်ကုန်သွယ်ရေးမှာ ကားနဲ့ပဲအဓိကလုပ်နေရတာ။ကားတွေအတွက်တော့ဂုတ်ထိပ်မှာတံတားသပ်သပ်ရှိတယ်။မီးရထားနဲ့လည်း လုပ်လာကြမယ်ဆိုရင်တော့အဲဒီတံတားကမပြင်ဘဲနေလို့မရတော့ဘူး” ဟုပြောသည်။
မူဆယ်-လားရှိုးရထားလမ်းဖောက်လုပ်ရေးကိုတရုတ်အစိုးရ၏အကူအညီဖြင့်ဆောက်လုပ်ရန်ရှိပြီး ယူနန်ပြည်နယ်၊ကူမင်းမြို့မှတရုတ်-မြန်မာနယ်စပ်ဘက်သို့ဖောက်လုပ်နေသည့်မီးရထားလမ်းဖြင့် ဆက်သွယ်ကာနှစ်နိုင်ငံအကြားကုန်သွယ်ရေးတိုးမြှင့်လုပ်ဆောင်ရန်တရုတ်နှင့်မြန်မာ နှစ်နိုင်ငံအစိုးရအကြားသဘောတူညီမှုရရှိထားသည်။
အဆိုပါမူဆယ်-လားရှိုးမီးရထားလမ်းပိုင်းစီမံကိန်းအတွက်တရုတ်ယွမ်ငွေသန်းပေါင်း(၃,၇ဝဝ) ကုန်ကျမည်ဟု ခန့်မှန်းတွက်ချက်ထားသည်။
Geen opmerkingen:
Een reactie posten