ကျော်ခ
ကြာသပတေးနေ့၊ ဧပြီလ ၀၈ ရက် ၂၀၁၀ ခုနှစ် ၁၉ နာရီ ၄၂ မိနစ် .
ချင်းမိုင် (မဇ္ဈိမ)။ ။ စက်သုံးဆီအရောင်းဆိုင်များကို ပုဂ္ဂလိကလုပ်ငန်းရှင်များသို့ယခုလ၃၁ ရက်နေ့ နောက်ဆုံးထား၍လွှဲပြောင်းရန်စစ်အစိုးရကစီစဉ်ထားသော်လည်းယနေ့ထိတိုင်အပြီးသတ် လွှဲပြောင်းနိုင်ခြင်း မရှိသေးကြောင်း မြန်မာ့ရေနံထွက်ပစ္စည်း ရောင်းဝယ်ရေးလုပ်ငန်းက ပြောသည်။
တနိုင်ငံလုံးရှိစက်သုံးဆီဆိုင်ပေါင်း၂၅၆ဆိုင်ထဲမှအစိုးရဌာနဆိုင်ရာများအသုံးပြုသည့်ဆိုင်များမှလွဲ၍၂၄၆ ဆိုင်ကိုပုဂ္ဂလိကလက်သို့လွှဲပြောင်းပေးအပ်ရန်မြန်မာနိုင်ငံပုဂ္ဂလိကပိုင်ပြုလုပ်ရေးကော်မရှင်က စီစဉ်ထားသည်။
“မလွှဲရသေးဘူး။လွှဲပြောင်းရေးကိစ္စတွေဆောင်ရွက်ဆဲပဲဖြစ်နေသေးတာ”ဟုလွှဲပြောင်းရေး လုပ်ငန်းများတွင် ပါဝင်ဆောင်ရွက်နေရသောနေပြည်တော်ရှိအရာရှိတဦးကပြောသည်။
”စက်သုံးဆီဆိုင်တွေကို လိုချင်တဲ့ လူတွေကတော့ အများကြီးပေါ့ဗျာ” ဟု သူက ဆိုသည်။
လွှဲပြောင်းရယူလိုသူသည်စက်သုံးဆီဆိုင်အတွက်သတ်မှတ်ထားသောတန်ဖိုး၏၃ဝရာခိုင်နှုန်းကို ပေးသွင်းထားရန်နှင့်သတ်မှတ်ဈေးနှုန်းအတိုင်းရောင်းချရန်၊ဆီပြတ်မှုမရှိစေရန်၊ကော်မရှင်ကို အကြောင်းကြားရန် သဘောတူညီရသည်ဟု စည်းကမ်းချက်တွင် ပါရှိကြောင်း စုံစမ်းသိရှိရသည်။
ဦးတေဇနှင့်ဦးအောင်သက်မန်းတို့ဦးဆောင်ပြီးစက်သုံးဆီတင်သွင်းရောင်းချ၊ ဖြန့်ဖြူးသူများအသင်းကို ယခုနှစ်ဇန်နဝါရီလ၂၃ရက်နေ့ကတည်းကဖွဲ့စည်းခဲ့ပြီး၊စစ်အစိုးရ၏လက်ရင်းလူယုံလုပ်ငန်းရှင်အနည်းဆုံး၁ဝ ဦးပါဝင်သည်။သို့သော်လည်းအဖွဲ့ ဖွဲ့စည်းမှုကိုတရားဝင်ထုတ်ပြန်ခြင်းမရှိသေးပေ။
ရန်ကုန်သီလဝါဆိပ်ကမ်းနယ်မြေတွင်ပုဂ္ဂလိကပိုင်စက်သုံးဆီဆိပ်ခံတားများတည်ဆောက်ခြင်းနှင့် ဆီသိုလှောင်ကန်များတည်ဆောက်ခြင်းအတွက်ကုမ္ပဏီ၁၅ခုကိုချထားပေးပြီးဖြစ်ကြောင်းမြန်မာ့ဆိပ်ကမ်း အာဏာပိုင်ရုံးကပြောသည်။
အခြားသောကုမ္ပဏီများလျှောက်ထားမှုလည်းရှိနေကြောင်းပြောဆိုသော်လည်းအသေးစိတ်ပြောရန်ကိုမူ ငြင်းဆန်လိုက်သည်။
ပုဂ္ဂလိကပိုင်ပြုလုပ်ပြီးနောက်လုပ်သားအင်အားအပြောင်းအလဲများပြုလုပ်လာနိုင်သည်ဟုစိုးရိမ်မှုများ ရှိသော်လည်းနေပြည်တော်ကညွှန်ကြားချက်ပေးပို့ခြင်းမရှိသေးကြောင်းရန်ကုန်ရှိစက်သုံးဆီ အရောင်းဆိုင်များကတညီတညာတည်းပြောသည်။
“သူတို့ပြောင်းလာမှကျနော်တို့ကိုမလိုချင်ဘူးဆိုရင်ကျနော်တို့ကဆီပိုက်ချပြီးထွက်သွားရုံပဲ”ဟု မင်္ဂလာတောင်ညွှန့်မြို့နယ် ဓာတ်ဆီဆိုင် ဝန်ထမ်းတဦးက ပြောသည်။
ပုဂ္ဂလိကပိုင်ပြုလုပ်ရေးကော်မရှင်က ရောင်းချမည့် စက်သုံးဆီအရောင်းဆိုင်များမှာ ရန်ကုန်တိုင်းတွင် ၅၂ ဆိုင်၊ မန္တလေးတိုင်းတွင် ၃၉ ဆိုင်၊ ပဲခူးတိုင်းအရှေ့နှင့် အနောက်တွင် ၃၇ ဆိုင်၊ ဧရာဝတီတိုင်းတွင် ၂၇ ဆိုင်၊ ရှမ်းပြည်နယ်တွင် ၂၄ ဆိုင်၊ မွန်ပြည်နယ်တွင် ၁၆ ဆိုင်၊ မကွေးတိုင်းတွင် ၁၅ ဆိုင်၊ စစ်ကိုင်းတိုင်းတွင် ၁၄ ဆိုင်၊ တနင်္သာရီတိုင်းတွင် ၆ ဆိုင်၊ ကချင်ပြည်နယ်တွင် ၇ ဆိုင်၊ ရခိုင်ပြည်နယ်တွင် ၆ ဆိုင်၊ ကရင်ပြည်နယ်တွင် ၂ ဆိုင်နှင့် ချင်းပြည်နယ်တွင် ၁ ဆိုင်တို့ ဖြစ်သည်။
Geen opmerkingen:
Een reactie posten